8 Mei

?Olsem Wanem Nao Mi Save se God I Bin Fogivim Mi?

Eksodas 35–40; Levitikas 1; 16; 19

Kaonsel Tugeta

Wan memba blong kworom o klas presidensi i lidim; 10–20 minit

Long stat blong miting, tugeta, ripitim Stamba Toktok blong Ol Yang Woman o Stamba Toktok blong Ol Kworom blong Aronik Prishud. Afta, lidim wan toktok storian abaot wok ia blong fasin blong sevem man mo mekem olgeta oli kam olsem wan god, mo yusum wan, o moa long wan long ol kwestin andanit ia, o yusum ol kwestin blong yuwan (luk long Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent 10.2, 11.2, ChurchofJesusChrist.org/study?lang=bis). Mekem plan blong gat sam wei blong tekem aksen folem wanem yufala i toktok raon long hem.

• Laef folem gospel. ?Olsem wanem nao taem yumi stap tanem yumi i go long Lod, i helpem yumi blong fesem ol jalenj mo ol tes blong yumi?

• Kea long olgeta we oli stap long nid. ?Olsem wanem yumi save huia i nidim prea mo frensip blong yumi?

• Invaetem evriwan blong akseptem gospel. ?Insaed long wod yut kaonsel miting blong yufala, wanem plan blong serem gospel nao yumi bin toktok raon long hem? ?Olsem wanem klas o kworom i pat insaed?”

• Joenem ol famli blong taem we i no save finis. ?Olsem wanem fasin blong mekem famli histri wok i mekem rilesensip blong yumi wetem Papa long Heven mo Jisas Kraes i kam strong moa?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong klas o blong kworom abaot ol plan mo ol invitesen we oli bin mekem long taem blong miting.

Stap Tijim Doktrin

Wan adalt lida o yut i lidim; 25–35 minit

Rere long Yuwan long Saed blong Spirit

Samtaem ol pipol oli stap askem olgetawan sapos oli “mekem inaf” blong kasem fogivnes from sin blong olgeta. Nomata i tekem hadwok blong sakem sin, long en, yumi no kasem fogivnes from yumi komplitim wan lis blong tikim, mo yumi mekem samfala samting i stap. Yumi kasem fogivnes taem yumi akseptem sore we Jisas Kraes i givim i kam. Long wei olsem nao fasin blong yumi i save jenis.

Long taem bifo, ol seremoni mo ol sakrifaes blong loa blong Moses oli poenem Ol Laen blong Isrel i go long Atonmen blong Sevya. Olsem we Lod i bin eksplenem long Levitikas 16:30: “Long dei ya, hae pris i mas mekem ol samting ya we mi mi talem, nao bambae yufala i kam klin bakegen long fes blong mi.” I tru, wan seremoni hemwan i no save fogivim yumi long wan sin. Fogivnes i kam long Jisas Kraes. Long taem blong yumi tedei, ol odinens oli olsem baptaes mo sakramen, i poenem maen mo hat blong yumi i go long Sevya. Oli helpem yumi andastanem se, oltaem, bambae Hem i fogivim yumi sapos yumi sakem sin.

?Olsem wanem nao Papa long Heven i bin helpem yu blong save se Hem i fogivim yu? Maet bae yu stadi long Mosaea 4:1–3 mo mesej blong Presiden Tad R. Callister: “Atonmen blong Jisas Kraes.” (Liahona, Mei 2019, 85–87). Mesej ia i save helpem olgeta we yu stap tijim blong oli andastanem se Papa long Heven i fogivim yumi taem yumi sakem sin.

Yumi kasem fogivnes taem yumi akseptem sore we Jisas Kraes i givim i kam.

Stap Lan Tugeta

Blong stat, yu save soem ol pikja blong taem we Sevya i stap long Getsemane, mo antap blong kros (luk long Gospel Art Buk, ol namba 56–57). Invaetem ol yut blong luklukgud insaed long Levitikas 1:1–9; 16:15–16, 30. Askem olgeta blong serem ol sentens we i mekem oli tingbaot Atonmen blong Sevya. ?Long wanem wei nao, ol sakrifaes ia we oli tokbaot long ol ves ia, oli bin helpem Ol Laen blong Isrel blong luk fored from Atonmen ia blong Sevya? ?Wanem i helpem yumi tingbaot Atonmen blong Sevya? ?Wanem i helpem yumi blong filim lav mo fogivnes blong Sevya? Ol aktiviti we oli stap daon ia oli save helpem ol yut blong andastanem gud moa wanem we God bambae i fogivim yumi long hem.

• Samfala pipol insaed long ol skripja ia oli tokbaot ol filing we oli bin gat taem we Papa long Heven i bin fogivim olgeta. Ol memba blong klas o blong kworom blong yu oli save ridim samfala eksampol ia (luk long “Ol Sapot Risos”). Invaetem olgeta blong mekem wan lis blong ol sentens aot long ol ves ia we oli tokbaot se wan i filim olsem wanem taem God i fogivim hem. Maet yu save askem olgeta blong talemaot, long toktok blong olgeta, hao oli filim fogivnes. ?Wanem nao yumi lanem abaot God aot long ol filing ia? Maet yu save serem ol filing blong yuwan abaot fogivnes.

• Samtaem, ol pipol oli no save stret se God i fogivim olgeta o no, from se oli no save stret se oli sakem sin wetem tru tingting o nogat. Mesej blong Elda Dale G. Renlund: “Repentance: A Joyful Choice” i eksplenem wei blong sakem sin wetem tru tingting, mo hao blong kasem fogivnes long God (Liahona, Nov. 2016, 121–24). Yu save raetem ol heding ia antap long bod: Tru Fasin blong Sakem Sin mo Ol Samting we Oli Blokem Fasin blong Sakem Sin. Askem olgeta we yu stap tijim blong faenem ol tijing, insaed long mesej ia, we i blong go andanit long ol heding ia. ?Wanem nao yumi lanem abaot Sevya mo fogivnes blong Hem aot long ol las tri paragraf blong mesej ia?

• Sam pipol, maet oli bin sakem sin, be oli no filim se oli kasem fogivnes. Maet i olsem from se oli no save fogivim olgetawan nomo. Kaonsel we i stap long mesej blong Presiden Tad R. Callister: “Atonmen blong Jisas Kraes” i save helpem olgeta. Klas o kworom blong yu i save ridim seksen ia we i stat wetem “2. Sin.” Askem olgeta blong oli faenem wan kaonsel we oli save givim long wan fren o wan memba blong famli we i stil filim se hem i rong afta we hem i bin sakem sin. Givim taem long ol yut blong oli serem filing blong olgeta abaot Sevya, we i bin mekem i posibol blong yumi sakem sin mo kasem fogivnes.

Mekem Samting Wetem Fet

Leftemap tingting blong ol memba blong klas o blong kworom blong tingting hevi mo raetemdaon wanem bae oli mekem blong tekem aksen folem ol strong tingting mo filing we oli bin kasem tedei. Sapos oli wantem, oli save serem ol aedia blong olgeta. Invaetem olgeta blong oli tingting abaot, hao we, taem oli tekem aksen folem ol tingting we oli bin kasem, bae i mekem se rilesensip blong olgeta wetem Papa long Heven mo Jisas Kraes i kam strong moa.

Ol Sapot Risos

• Inos 1:1–8; Mosaea 4:1–3; Alma 24:7–10; 36:17–21 (Hao ol pipol oli bin filim taem God i fogivim olgeta)

• Aesea 1:18; Mosaea 26:30; Moronae 6:8; Doktrin mo Ol Kavenan 58:42–43; 64:10 (Lod i promesem se bambae Hem i fogivim yumi)

• Russell M. Nelson, “Yumi Save Mekem Gud Moa mo Stap Gud Moa,” Liahona, Mei 2019, 67.

• Craig A. Cardon, “The Savior Wants to Forgive,” Liahona, May 2013, 15–18

Tij Folem Wei blong Sevya

Sevya i tijim yumi blong yusum olgeta skripja blong faenem ol ansa blong ol kwestin blong yumiwan bakegen. ?Olsem wanem nao yu save helpem tingting blong olgeta we yu stap tijim blong oli tanem olgeta i go long ol skripja mo ol toktok blong ol profet blong oli faenem ol ansa long ol kwestin?