22 Mei

?Olsem Wanem Mi Save Soem Tangkyu blong Mi long God?

Dutronome 6–8; 15; 18; 29–30; 34

Kaonsel Tugeta

Wan memba blong kworom o klas presidensi i lidim; 10–20 minit

Long stat blong miting, tugeta, ripitim Stamba Toktok blong Ol Yang Woman o Stamba Toktok blong Ol Kworom blong Aronik Prishud. Afta, lidim wan toktok storian abaot wok ia blong fasin blong sevem man mo mekem olgeta oli kam olsem wan god, mo yusum wan, o moa long wan long ol kwestin andanit ia, o yusum ol kwestin blong yuwan (luk long Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent 10.2, 11.2, ChurchofJesusChrist.org/study?lang=bis). Mekem plan blong gat sam wei blong tekem aksen folem wanem yufala i toktok raon long hem.

• Laef folem gospel. ?Wanem nao yumi bin toktok raon long hem long las taem? Mo ?Wanem invitesen nao o wanem wok nao oli bin givimaot? ?Wanem nao yumi bin mekem blong tekem aksen, blong muv folem ol invitesen ia o ol wok ia we oli bin givimaot olgeta?

• Kea long olgeta we oli stap long nid. ?Wanem nao yumi save talem o mekem blong go luk ol narawan we maet oli stap filim se oli stap olgetawan, o oli filim se oli stap longwe long Papa long Heven?

• Invaetem evriwan blong akseptem gospel. ?Wanem nao sam wei we yumi save helpem ol narawan blong oli filim lav blong Jisas Kraes?

• Joenem ol famli blong taem we i no save finis. ?Wanem aedia nao yumi save serem wetem wanwan long yumi blong helhelpem yumi blong mekem famli blong yumi i kam strong moa?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong klas o blong kworom abaot ol plan mo ol invitesen we oli bin mekem long taem blong miting.

Stap Tijim Doktrin

Wan adalt lida o yut i lidim; 25–35 minit

Rere long Yuwan long Saed blong Spirit

God i stap luklukaotem yumi mo blesem yumi oltaem, we Hem i no stop. Be wetem evri samting we i save pulum tingting blong yumi, hem i isi blong fogetem Hem. Hemia i bin hapen long Ol Laen blong Isrel plante taem, mo tu long ol taem we i had taem oli bin stap wokbaot long waelples. Be Lod i gat sore mo i lidim olgeta i go long promes graon—wan gudfala ples we i gud moa, mo i gat plante temtesen, wan ples we bae oli fesem temtesen ia blong fogetem Hem bakegen. Ol instraksen blong Lod long Dutronome 6 oli stap blong helpem Ol Laen blong Isrel blong oltaem tingbaot hem mo ol toktok blong Hem (luk long ol ves 6–9).

?Olsem wanem nao yu yu stap kipim Lod mo ol toktok blong Hem oli stap insaed long hat blong yu—“mo … lukaot gud blong [yu] no fogetem hem”? (Dutronome 6:12). ?Olsem wanem nao taem yumi tingbaot Lod, i helpem yumi blong filim blong talem tangkyu long evri situesen blong laef blong yumi? Taem yu stap rere blong tij, tingting blong luklukbak long Dutronome 12:6–9, 12 mo Luk 17:11–19. Mo tu, yu save luklukbak long mesej blong Presiden Dieter F. Uchtdorf: “Grateful in Any Circumstances” (Liahona, May 2014, 70–77).

Taem yumi stap tingbaot Lod i save helpem yumi blong filim blong talem tangkyu long evri situesen blong laef.

Stap Lan Tugeta

Blong stat blong toktok raon long fasin blong stap tingbaot Lod, yu save invaetem ol yut blong serem sam eksperiens blong sam taem we oli bin fogetem wan impoten samting. ?Wanem nao risal blong hem? ?Wanem i hapen taem yumi stap fogetem ol bigfala samting we Lod i bin mekem blong yumi? Invaetem klas o kworom blong yu blong luklukbak long Dutronome 6:4–9, 20–25. ?Wanem nao ol ves ia oli stap tijim yumi abaot fasin blong stap tingbaot gud fasin blong God long laef blong yumi? Jusum wan, o moa long wan long ol aktiviti andanit ia blong helpem olgeta we yu stap tijim lanem olsem wanem blong talem tangkyu moa from gud fasin blong God, mo blong talem tangkyu blong olgeta long Hem.

• Sapos yufala i ridim Luk 17:11–19 tugeta, i save helpem ol yut blong tingting long from wanem nao i impoten blong yumi soem tangkyu blong yumi long God. Tingting blong askem sam kwestin we bae i helpem olgeta blong oli luk olgeta insaed long stori ia. Eksampol: ?Wanem sam risen we naen long ol man we oli bin kasem leprosi oli no bin kam talem tangkyu long Sevya? ?From wanem, samtaem, yumi no stap talem tangkyu i gobak long God? Askem olgeta we yu stap tijim olgeta blong tingtingbak long ol taem we oli bin filim se oli gat bigfala tangkyu, iven taem i bin had. ?Wanem nao fasin blong talem tangkyu bae i mekem long yumi? ?From wanem i impoten blong talemaot tangkyu blong yumi long God? (Luk long ol skripja refrens we oli stap long “Ol Sapot Risos” blong kasem sam ansa.) ?Wanem yumi save mekem blong soem long God se yumi fulap long tangkyu?

• I gat plante hym blong presem God, mo talem tangkyu long God, olsem “How Great Thou Art” mo “Yu Gat Blesing, Kaontem Evriwan” (Hymns, namba 86, mo STSP, pej 8). Yu save askem ol yut blong lukaotem ol toktok, insaed long ol hym ia, we i tokbaot ol samting we oli wantem talem tangkyu from. Invaetem olgeta blong serem ol samting we oli faenem, mo eksplenem from wanem oli talem tangkyu from ol samting ia. Yufala i save singsing sam long ol singsing tugeta.

• Mesej blong Presiden Dieter F. Uchtdorf, “Grateful in Any Circumstances” i helpem yumi andastanem olsem wanem blong talem tangkyu moa. Wan wei blong helpem ol yut blong oli lanem samting aot long mesej ia, i blong serem olgeta long ol smol grup, mo givim wan seksen blong mesej ia long wanwan grup. Askem olgeta blong serem wan sentens we oli filim se i talemaot gud wanem we Presiden Uchtdorf i talem. Invaetem olgeta blong serem wan samting we oli bin lanem abaot fasin blong talem tangkyu. Mo tu, oli save wajem vidio ia: “President Russell M. Nelson on the Healing Power of Gratitude” (ChurchofJesusChrist.org). ?Wanem nao yumi save mekem blong kam blong “talem tangkyu long eni situesen,” nomata wanem nao ol situesen ia? ?Wanem eksampol nao yumi bin luk, blong ol pipol we, nomata long situesen blong olgeta we i had tumas, be yet oli talem tangkyu?

Mekem Samting Wetem Fet

Leftemap tingting blong ol memba blong klas o blong kworom blong tingting hevi mo raetemdaon wanem bae oli mekem blong tekem aksen folem ol strong tingting mo filing we oli bin kasem tedei. Sapos oli wantem, oli save serem ol aedia blong olgeta. Invaetem olgeta blong oli tingting abaot, hao we, taem oli tekem aksen folem ol tingting we oli bin kasem, bae i mekem se rilesensip blong olgeta wetem Papa long Heven mo Jisas Kraes i kam strong moa.

Ol Sapot Risos

• Mosaea 2:19–24 (Yumi mas presem mo talem tangkyu long God.)

• Alma 34:38; 37:37; Doktrin mo Ol Kavenan 46:32; 59:7, 15–21 (Yumi mas talem tangkyu from evri samting)

• Ol Sam 107:8–9; Filipae 4:6–7; Doktrin mo Ol Kavenan 78:19 (Ol blesing blong fasin blong talem tangkyu)

• Dale G. Renlund, “Tingting long Gudfala Fasin mo Bigfala Paoa blong God,” Liahona, Mei 2020, 41–44

• “Fasin blong Talem Tangkyu,” insaed long Blong Ol Yut Oli Kam Strong (buklet 2011), 18

Tij Folem Wei blong Sevya

Sevya, Hem i save olgeta we oli stap biaen long Hem, mo wanem kaen man o woman oli save kam. Save ia i bin lidim wei we Hem i bin tijim olgeta. ?Olsem wanem yu save lanem wanem olgeta we yu stap tijim oli intres long hem, ol nid blong olgeta, mo ol jalenj we oli stap fesem, blong mekem se yu save tijim olgeta long wan wei we i wok gud moa?