12 Jun

?Olsem Wanem Nao Mi Harem Voes blong Lod?

Rut; 1 Samuel 1–3

Kaonsel Tugeta

Wan memba blong kworom o klas presidensi i lidim; 10–20 minit

Long stat blong miting, tugeta, ripitim Stamba Toktok blong Ol Yang Woman o Stamba Toktok blong Ol Kworom blong Aronik Prishud. Afta, lidim wan toktok storian abaot wok ia blong fasin blong sevem man mo mekem olgeta oli kam olsem wan god, mo yusum wan, o moa long wan long ol kwestin andanit ia, o yusum ol kwestin blong yuwan (luk long Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent 10.2, 11.2, ChurchofJesusChrist.org/study?lang=bis). Mekem plan blong gat sam wei blong tekem aksen folem wanem yufala i toktok raon long hem.

• Laef folem gospel. ?Wanem eksperiens we yumi bin gat i no longtaem i pas we i bin mekem ol testemoni blong yumi oli kam strong moa?

• Kea long olgeta we oli stap long nid. ?Huia i nidim help mo ol prea blong yumi? ?Wanem nao yumi save filim blong mekem blong helpem olgeta?

• Invaetem evriwan blong akseptem gospel. ?Olsem wanem yumi save stap olsem wan laet long ol nara memba blong famli o fren we oli no gat ol semfala bilif olsem yumi?

• Joenem ol famli blong taem we i no save finis. ?Olsem wanem yumi save soem moa lav mo sapot long ol famli blong yumi, mo mekem wan samting we i defren be i gud insaed long ol hom blong yumi?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong klas o blong kworom abaot ol plan mo ol invitesen we oli bin mekem long taem blong miting.

Stap Tijim Doktrin

Wan adalt lida o yut i lidim; 25–35 minit

Rere long Yuwan long Saed blong Spirit

Plante memba blong klas o blong kworom blong yu, maet bae oli save andastanem boe ia Samuel. Taem we Lod i toktok long hem, Samuel i no bin gat inaf eksperiens yet wetem fasin blong kasem revelesen blong save haremsave voes ia blong Lod. Man we i stap tijim Samuel, Ilae, i bin save helpem Samuel blong lanem blong haremsave voes ia. Olsem Ilae, yu gat janis ia blong testifae long olgeta we yu stap tijim se Lod i wantem toktok long olgeta. Yu save helpem olgeta blong haremsave voes blong Lod, iven we yu stap lanem yet blong lisingud long Hem. Tugeta, yufala i save stadi long wanem ol profet blong Hem oli bin tijim long saed blong fasin blong kasem revelesen blong yuwan. Mo yufala i save lanem blong talem long Lod, semmak olsem Samuel i bin mekem: “Yu toktok. Mi mi man blong wok blong yu, mi stap harem yu ya.” (1 Samuel 3:10).

Antap long riding blong 1 Samuel 3 long wik ia, yu save rere blong tij taem yu ridim mesej blong Presiden Russell M. Nelson: “Lisin Gud long Hem” (Liahona, Mei 2020, 88–92).

Presiden Russel M. Nelson i bin askem yumi blong “kam antap long paoa blong [yumi] long saed blong spirit blong kasem revelesen.”

Stap Lan Tugeta

Blong rere long olgeta we yu stap tijim blong oli toktok long klas tedei, tingting blong askem olgeta blong luklukbak long 1 Samuel 3:1–14. Invaetem olgeta blong serem wanem we oli lanem aot long stori ia abaot fasin blong haremsave voes blong Lod. ?Wanem nao sam moa wei we Lod i stap yusum blong toktok wetem yumi? Olgeta aktiviti ia oli save helpem ol yut blong oli gat moa andastaning abaot revelesen we i blong olgetawan nomo.

• Hemia i wan wei blong helpem olgeta we yu stap tijim blong oli andastanem gud moa hao blong kasem revelesen. Yu save raetem long bod, ol skripja refrens we oli putum i stap long “Ol Sapot Risos” (o sam narawan moa we yu save). Invaetem olgeta yut blong ridim wanwan skripja. Afta, yu save raet long bod long saed blong wanwan refrens, wanem nao skripja ia i stap tijim abaot fasin blong kasem revelesen we i blong yuwan nomo. Invaetem olgeta blong oli serem sam eksperiens we oli bin gat taem we oli bin stap lukaotem mo kasem revelesen. Olsem we i stret, serem ol eksperiens blong yuwan.

• Yumi kasem ol bigfala blesing taem yumi lanem blong harem voes ia blong Lod. Yu save statem wan toktok storian abaot hemia taem yu askem long ol yut blong oli serem ol risen from wanem oli nidim revelesen. Afta, askem olgeta blong luklukgud long mesej blong Presiden Russell M. Nelson: “Lisin Gud long Hem.” Invaetem olgeta blong lukaotem advaes ia we bae i helpem olgeta blong andastanem olsem wanem blong harem voes blong Lod. Yu save soem wan, o moa long wan long ol vidio ia we i stap long koleksen; vidio ia hem i: “Hear Him” long (ChurchofJesusChrist.org/media). ?From wanem i impoten long yumi blong lan blong haremsave voes blong Lod? Leftemap tingting blong ol yut blong raetemdaon wanem oli lanem insaed long jenol blong olgeta, o long ol pepa, blong oli soem long hom blong olgeta.

• Ol yut we yu stap tijim, maet oli stap askem olgetawan olsem wanem bae oli save taem we Tabu Spirit i stap toktok long olgeta. Tingting blong soem ol vidio ia: “How Can I Tell the Difference between the Holy Ghost and My Emotions?” mo “How Can I Feel the Holy Ghost More Often?” we i kamaot long “Face to Face with President Eyring and Elder Holland” (ChurchofJesusChrist.org). ?Wanem yumi lanem aot long ol vidio ia abaot fasin blong luksave bitwin ol kwaet toktok blong Spirit mo ol tingting blong yuwan? Ol memba blong klas o blong kworom oli save serem olsem wanem bae oli ansa long wan fren we i gat ol semmak kwestin olsem olgeta ia we oli tokbaot long ol vidio ia.

Mekem Samting Wetem Fet

Leftemap tingting blong ol memba blong klas o blong kworom blong tingting hevi mo raetemdaon wanem bae oli mekem blong tekem aksen folem ol strong tingting mo filing we oli bin kasem tedei. Sapos oli wantem, oli save serem ol aedia blong olgeta. Invaetem olgeta blong oli tingting abaot, hao we, taem oli tekem aksen folem ol tingting we oli bin kasem, bae i mekem se rilesensip blong olgeta wetem Papa long Heven mo Jisas Kraes i kam strong moa.

Ol Sapot Risos

• 1 King 19:9–12; Hileman 5:29–31; Doktrin mo Ol Kavenan 6:14–16, 21–23; 8:2–3; 11:12–14 (Ol wei we Lod i stap toktok i kam long yumi)

• Doktrin mo Ol Kavenan 9:7–9 (Revelesen, i nidim tingting blong yumi, mo stadi blong yumi)

• Ronald A. Rasband, “Let the Holy Spirit Guide,” Liahona, May 2017, 93–96

• Presiden Nelson i bin tijim: “Be, long ol dei we oli stap kam, bambae i no posibol blong laef long saed blong spirit, sapos yumi no gat Tabu Spirit i lidim, daerektem mo kamfotem yumi wetem paoa blong Hem.” Ol brata mo sista blong mi we mi lavem. Mi plis long yufala blong kam antap long paoa blong yufala long spirit blong kasem revelesen.” (“Revelesen blong Jos, Revelesen blong Laef blong Yumi,” Liahona, Mei 2018, 96).