yut we i stap sidaon long brij

26 Jun

?From Wanem Jastiti I Impoten long Plan blong God?

2 Samuel 5–7; 11–12; 1 King 3; 8; 11

kaonsel tugeta pikja bokis

Kaonsel Tugeta

Wan memba blong kworom o klas presidensi i lidim; 10–20 minit

Long stat blong miting, tugeta, ripitim Stamba Toktok blong Ol Yang Woman o Stamba Toktok blong Ol Kworom blong Aronik Prishud. Afta, lidim wan toktok storian abaot wok ia blong fasin blong sevem man mo mekem olgeta oli kam olsem wan god, mo yusum wan, o moa long wan long ol kwestin andanit ia, o yusum ol kwestin blong yuwan (luk long Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent 10.2, 11.2, ChurchofJesusChrist.org/study?lang=bis). Mekem plan blong gat sam wei blong tekem aksen folem wanem yufala i toktok raon long hem.

• Laef folem gospel. ?Hamas moa nao yumi muv i go kolosap moa long Sevya? ?Olsem wanem nao yumi stap traem blong kam moa olsem Hem?

• Kea long olgeta we oli stap long nid. ?Huia nao i bin stap long maen blong yumi long ol las dei we oli jes pas? ?Olsem wanem nao yumi save helpem wanwan long olgeta ia?

• Invaetem evriwan blong akseptem gospel. ?Olsem wanem nao bae yumi ansarem ol kwestin blong ol fren blong yumi abaot Jos long wan wei we i bildimap fet blong olgeta long Sevya?

• Joenem ol famli blong taem we i no save finis. ?Wanem nao samfala wei we yumi toktok o go kolosap moa wetem ol narafala memba blong famli, olsem ol bubu mo ol kasen brata mo sista?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong klas o blong kworom abaot ol plan mo ol invitesen we oli bin mekem long taem blong miting.

Stap Tijim Doktrin

Wan adalt lida o yut i lidim; 25–35 minit

Rere long Yuwan long Saed blong Spirit

Papa blong yumi long Heven, Hem i wantem yumi blong stap hapi, nao, Hem i givim loa blong jastiti long yumi. Mo Setan, we i wantem yumi blong prapa harem nogud, i stap tijim se loa ia i no impoten. Setan i stap mekem evri samting we hem i save mekem blong temtem yumi blong mekem sin ia long saed blong seks. Ol yang pipol tedei, bae i gat ol pikja, mo ol mesej we oli save pulum tingting blong olgeta; olgeta samting ia oli agensem wanem we God i stap tijim abaot fasin long saed blong seks. Wanwan long yumi i nidim blong lukaotgud long ol kaen temtesen ia, mo traehad blong kipim ol tingting, ol toktok, mo ol aksen blong yumi oli klin gud truaot long laef blong yumi. Yumi lanem lesen ia aot long eksperiens blong King Deved. Hem i bin eksampol blong bigfala fasin blong stap fetful. Helpem ol pikinini blong rere blong gat hapines long mared mo holem loa blong jastiti (luk long 2 Samuel 11:1–5).

Taem yu stap rere blong tij, tingting blong luklukbak long 2 Samuel 11, mo mesej blong Elda David A. Bednar: “Mifala I Biliv blong Stap Klin” (Jeneral Konfrens, Epril 2013, ChurchofJesusChrist.org/study/general-conference?lang=bis), mo ol nara risos abaot jastiti. ?Wanem nao i save givim insperesen long ol memba blong klas mo kworom blong yu blong luk jastiti long wei ia we God i stap lukluk long hem? ?Wanem i save helpem olgeta blong sakemaot wei we Setan i stap luk long hem?

yang man klas

Blong gohed blong stap fetful long loa blong God long saed blong jastiti, yumi mas traehad, evri dei, blong kipim ol tingting, ol toktok, mo ol aksen blong yumi oli klin gud.

Stap Lan Tugeta

Hemia i wan wei blong presentem topik blong jastiti, mo semtaem, helpem olgeta we yu stap tijim blong luklukbak long wanem we oli bin ridim insaed long ol skripja. Raetem ol toktok ia, Deved mo Josef long bod. Afta, tugeta yufala i luklukbak long 2 Samuel 11:1–5 mo Jenesis 39:7–12. ?Olsem wanem nao Deved mo Josef tufala i fesem temtesen blong mekem sin long saed blong seks”? ?Wanem nao yumi save lanem aot long eksampol blong tufala? Yusum olgeta aktiviti ia, o sam we yu rere blong givim insperesen blong gat moa toktok storian abaot from wanem jastiti i impoten long plan ia blong God.

• Ol yut we yu stap tijim, maet bae oli glad mo lanem samting sapos yufala i tokbaot stret mining blong standet blong Lod long saed blong fasin blong stap klin long saed blong seks. Invaetem olgeta blong luklukbak long “Stap Klin long Saed blong Seks” insaed long Blong Ol Yut Oli Kam Strong ([buklet, 2011], 35–37) o nambafo paragraf blong “Famli: Wan Ofisol Toktok I Go long Wol” (ChurchofJesusChrist.org/study?lang=bis). ?Olsem wanem nao ol tijing blong Lod abaot fasin long saed blong seks i defren long wanem Setan i wantem yumi blong biliv long hem? Ol yut oli save luklukbak long “Famli: Wan Ofisol Toktok I Go long Wol,” mo lukaotem ol toktok we i eksplenem from wanem, blong stap klin long saed blong seks, i wan impoten pat insaed long plan ia blong Papa long Heven blong yumi stap hapi. ?Wanem nao yu lanem aot long ol toktok ia we i helpem yumi blong stap laef long wan stret mo gud laef insaed long wol ia blong tedei?

• Samtaem, ol narawan oli no andastanem ol standet blong yumi long saed blong klin fasin, speseli from se, ol standet ia, oli defren long wanem plante pipol oli stap biliv long hem. ?Olsem wanem nao bae yumi ansa long ol kwestin blong olgeta? ?Wanem nao yumi lanem aot long Elda mo Sista Renlund insaed long vidio ia: “Why Is It Important to Live the Law of Chastity?” from “Face to Face with Elder and Sister Renlund” (ChurchofJesusChrist.org). Ol yut oli save luklukgud insaed long ol skripja insaed long “Ol Sapot Risos” blong faenem ol toktok we oli tokbaot ol blesing blong stap folem loa blong jastiti. Maet yu save askem olgeta blong serem ol tingting blong olgeta abaot from wanem oli jusum blong stap obei long standet blong Lod long saed blong fasin blong stap klin long saed blong seks.

• Ol popula kalja oli stap tijim plante se i no gat nid blong stap klin long saed blong seks. Be yet, kalja ia i no wantem save long ol trutok abaot ol blesing blong jastiti mo ol denja blong rabis fasin long saed blong seks. Blong lanem moa abaot ol trutok ia, ol yut oli save stadi long mesej blong Elda David A. Bednar: “Mifala I Biliv blong Stap Klin.” Sam oli save stadi long seksen ia: “Tingting blong Enemi,” mo sam narawan oli save stadi long “Ol Blesing blong Stap Klin long Saed blong Seks.” Afta, oli save serem wanem we oli bin lanem wetem wanwan long olgeta. Leftemap tingting blong olgeta blong raetemdaon wan sentens aot long mesej ia we oli wantem blong tingbaot nekis taem we oli fesem ol giaman mesej abaot fasin long saed blong seks. Mo tu, yu save lidim olgeta i go long seksen ia, we taetol blong hem i: “Prinsipol blong Fasin blong Sakem Sin.” Toktok raon long wei we Sevya i save hilim evriwan we i wantem blong sakem sin ia long saed blong seks. Mekem olgeta we yu stap tijim oli tingbaot se oli save toktok wetem papa mo mama blong olgeta, o wetem bisop sapos oli gat ol kwestin, o sapos oli nidim blong sakem sin.

Mekem Samting Wetem Fet

Leftemap tingting blong ol memba blong klas o blong kworom blong tingting hevi mo raetemdaon wanem bae oli mekem blong tekem aksen folem ol strong tingting mo filing we oli bin kasem tedei. Sapos oli wantem, oli save serem ol aedia blong olgeta. Invaetem olgeta blong oli tingting abaot, hao we, taem oli tekem aksen folem ol tingting we oli bin kasem, bae i mekem se rilesensip blong olgeta wetem Papa long Heven mo Jisas Kraes i kam strong moa.

Ol Sapot Risos

• 1 Korin 6:19–20 (Bodi blong yumi i wan tempol)

• Alma 38:12 (Sapos yumi kontrolem ol filing blong bodi, bae yumi gat fulap lav)

• Doktrin mo Ol Kavenan 25:2; 121:45–46 (Ol blesing blong gat klin fasin)

• “Chastity: What Are the Limits?” “True Confidence,” “I Choose to Be Pure” (ol vidio), ChurchofJesusChrist.org

Tij Folem Wei blong Sevya

Long evri ples ia, Sevya Hem i bin eksampol mo tija blong tingting. Hem i tijim ol disaepol blong Hem blong prea taem Hem i stap prea wetem olgeta. Hem i tijim olgeta blong lavem man mo givim seves long man tru long wei we Hem i bin lavem mo givim seves long olgeta. Hem i tijim olgeta olsem wanem blong tijim gospel tru long wei we Hem i bin tijim gospel.