Mifala I Biliv blong Stap Klin
I Kam long Elda Deved A. Bedna
Blong Kworom blong Olgeta Twelef Aposol
Fasin blong obei long loa blong jastiti bae i mekem hapines blong yumi i kam antap moa long wol ia, mo i mekem i posibol blong yumi progres long taem we i no save finis.
Mesej blong mi i tokbaot wan stamba kwestin we risal blong hem i bigwan long saed blong spirit: ?From wanem loa blong jastiti i impoten tumas? Mi prea se Tabu Spirit bae i konfemem trutok blong ol prinsipol ia we mi poenemaot.
Plan blong Stap Glad we I Kam long Papa
Bae man i save andastanem nomo se jastiti i impoten, long taem we i no save finis, taem hem i luk insaed long wanem Papa i gat insaed long Plan blong stap glad blong ol pikinini blong Hem. “Evri famle blong man—man mo woman—oli mekem olgeta folem imej blong God. Wanwan long olgeta hem i wan spirit pikinini boe o spirit pikinini gel blong papa wetem mama long heven … [mo] i gat gudfala fasin mo … bigfala janis blong save kam olsem God.” (“Famle: Wan Ofisol Toktok I Go long Wol,” Ensign o 35538 852,). Evri man mo woman i bin stap wetem God olsem spirit pikinini blong Hem bifo i kam long wol wetem bodi blong mit mo bun. Plan blong Papa i mekem i posibol blong ol spirit boe mo gel blong Hem oli kasem wan bodi, blong kasem eksperiens long wol, mo blong muv i go from fasin blong kam olsem wan god.
Olsem Wanem I Impoten blong Gat Wan Bodi blong Mit mo Bun
Bodi blong mit mo bun i mekem i posibol blong yumi gat plante kaen bigfala eksperiens we yumi no save gat long laef bifo laef long wol. From hemia, rilesensip blong yumi wetem ol nara man, paoa blong yumi blong luksave mo tekem aksen folem trutok, mo paoa blong yumi blong obei long ol prinsipol mo ol odinens blong gospel blong Jisas Kraes, oli kam bigwan moa tru long bodi blong mit mo bun. Long skul blong wol ia, yumi gotru long gud fasin, lav, kaen fasin, glad, harem nogud, tingting i slak, sobodi, mo tu, ol jalenj blong fesem limit blong bodi long samfala wei we i mekem yumi rere from taem we i no save finis. Blong talem simpol, hemia oli ol lesen we yumi mas lanem, mo oli ol eksperiens we yumi mas gat, olsem we skripja i talemaot, “long saed blong bodi blong mit mo bun” (1 Nifae 19:6; Alma 7:12–13).
Paoa blong Krietem Laef
Afta we oli krietem wol, oli putum Adam i stap long Garen blong Iden. Be wanem i impoten, God i talem se i nogud blong man ia bae i stap hemwan (Moses 3:18; luk tu long Jenesis 2:18), mo Iv i kam waef mo woman blong helpem Adam. Fasin ia blong joenem tugeta ol paoa long saed blong spirit, bodi, tingting mo filing long man mo woman, i bin wan nid blong mekem plan blong stap glad i kamtru. “Long Kristin laef, woman i no save mekem samting hemwan, mo man tu, i no save mekem samting hemwan” (Fas Korin 11:11). Tingting i stap se man mo woman i lanem samting long tufala, i mekem tufala i kam strong, i blesem, mo mekem tufala i kam komplit.
Rod we i stap blong krietem laef long wol, God nao i putum i stap. “Fasfala komanmen … we God i bin givim long Adam mo Iv i long saed blong paoa blong tufala, olsem hasban mo waef, blong kam papa mo mama” (Ensign o Liahona, Nov. 2010, 129). Komanmen ia blong gat plante pikinini mo fulumap wol i stap laef yet tedei. From hemia, mared bitwin wan man mo wan woman, i rod ia nomo we God i givim raet from, we tru long hem, ol spirit blong laef bifo laef long wol ia, oli kam long laef long wol ia. Blong no gat seks nating bifo long mared, mo blong stap fetful fulwan afta long mared i protektem rod ia blong i stap tabu oltaem.
Paoa blong krietem laef i impoten long saed blong spirit. Taem oli yusum nogud paoa ia, hem i spolem ol stamba tingting blong plan blong Papa, mo tu, i spolem laef blong yumi long wol. Papa blong yumi long Heven mo Pikinini blong Hem we Hem i Lavem Tumas, oli ol krieta, mo oli givim long wanwan long yumi wan smol pat blong paoa ia blong Tufala blong krietem samting. Ol stret rod blong folem blong yusum gud paoa ia blong krietem laef, oli impoten insaed long plan blong Papa. Olsem wanem yumi filim mo yusum paoa ia we i bitim paoa blong man, bae i talemaot bigwan hamas bae yumi hapi long wol ia mo long ples blong yumi long taem we i no save finis.
Elda Dalin H, Oks i eksplenem:
“Paoa blong krietem laef long wol i paoa blong God we i moa hae we Hem i givim long ol pikinini blong Hem. Olsem wanem blong yusum i stap long fas komanmen, be wan narafala impoten komanmen i kamaot tu blong blokem nogud fasin blong yusum paoa ia. From wanem yumi tokbaot fulap loa blong jastiti, i kamaot long olsem wanem yumi andastanem stamba tingting blong ol paoa blong krietem laef insaed long plan blong God. …
“Aotsaed long rod blong mared, evri fasin blong yusum paoa ia blong krietem laef, nomata i smol o bigwan, oli sin, i daonem mo i rabisim fasin blong man mo woman we i moa tabu” (“The Great Plan of Happiness,” Ensign, Nov. 1993, 74).
Standet blong Fasin blong Gud Tingting mo Fasin long saed blong Seks
Jos blong Jisas Kraes blong Ol Lata-dei Sent i gat wan standet nomo, we i no save jenis, long saed blong gud fasin long saed blong seks: fasin blong gat seks i stret nomo bitwin wan man mo wan woman we tufala i mared olsem we plan blong God i talem. Fasin ia bitwin man mo woman, i no blong traem nomo, blong stretem tingting blong bodi, o i no wan wei blong gat gud taem, o entetenmen we bae yu selfis long hem. I no blong resis blong winim o wan samting nomo blong mekem. Be, long wol ia, hem i wan rod blong soemaot tabu fasin mo paoa blong yumi, mo i wan rod blong mekem wanem i joenem hasban mo waef i kam strong moa long filing mo spirit. Yumi ol man mo woman we yumi gat blesing blong gat fridom blong joes mo ples we yumi kamaot long hem i talem huia yumi olsem ol pikinini blong God—be i no ol fasin long saed blong seks, o ol fasin blong tedei mo ol tingting blong tedei.
Man we I Folem Fasin blong Wol
Long sam wei, man ia we i folem fasin blong wol, we King Benjamin i tokbaot i laef yet insaed long wanwan long yumi (luk long Mosaea 3:19). Man o woman we i folem fasin blong wol i no save sakem sin, i gat rabis tingting, mo i folem tingting blong bodi (luk long Mosaea 16:5; Alma 42:10; Moses 5:13), i no gat kontrol mo mekem samting i ova, i gat hae tingting mo i selfis. Olsem we Presiden W. Kimbol i tijim: “ ‘Man we i folem fasin blong wol’ i ‘wan man blong wol ia’ we i letem ol strong fasin mo filing olsem hemia blong animol i kavremap ol fasin blong hem long saed blong spirit” (“Ocean Currents and Family Influences,” Ensign, Nov. 1974, 112).
Be long narasaed, “man [o woman] we i folem Kraes” (Hileman 3:29) i gat spirit, mo i kontrolem ol strong filing blong hem (luk long Alma 38:12), i gat kontrol mo i holemtaet hem, mo i gat open hat mo i no selfis. Ol man mo woman we oli folem Kraes oli holemtaet toktok blong God, mo oli fogetem olgetawan mo oli tekem kros blong Jisas (luk long Matiu 16:24; Mak 8:34; Luk 9:23; D&C 56:2), mo oli gohed blong folem stret mo smol rod blong stap fetful, stap obei, mo wok wetem strong tingting blong Sevya mo gospel blong Hem.
Olsem ol boe mo ol gel blong God, yumi bin kasem ol tabu paoa long Hem. Be yumi stap laef long wan wol we i stap foldaon. Ol stret samting we oli stap krietem ol bodi blong yumi, folem fasin blong yumi, oli stap foldaon, mo oli stap fesem paoa blong sin we i pulum yumi, korapsen mo ded. From hemia, Foldaon blong Adam mo risal blong hem long saed blong spirit mo wol ia, i kasem yumi stret tru long bodi blong mit mo bun blong yumi. Be yet, yumi, yumi tufala kaen man, from se spirit blong yumi, we i pat blong yumi we i no save finis, i wan tabenakol we i stap insaed long wan bodi blong mit mo bun, we i mas fesem fasin blong Foldaon. Olsem Jisas i talem bigwan long Aposol Pita: “I tru, tingting blong yufala i strong, be bodi blong yufala i slak” (Matiu 26:41).
Nao, stret fasin blong tes long wol ia, yumi save talemsot long kwestin ia: ?Bambae mi folem ol tingting blong man we i folem fasin blong wol, o, bae mi folem ol kwaet toktok blong Tabu Spirit, mo sakemaot man we i folem fasin blong wol mo kam wan sent tru long Atonmen blong Kraes we i Lod? (luk long Mosaea 3:19) Hemia nao tes. Evri strong filing blong bodi, tingting, tingting blong mekem, mo muv blong man we i folem fasin blong wol, yumi save winim, from mo tru long Atonmen blong Jisas Kraes. Yumi stap ia long wol blong developem ol kwaliti olsem hemia blong God mo blong kontrolem ol strong filing blong bodi blong mit mo bun.
Tingting blong Enemi
Plan blong Papa oli mekem long wan wei blong givim daereksen long ol pikinini blong Hem; blong helpem olgeta blong kam hapi, mo tekem olgeta i gobak hom sef, long Hem, wetem ol bodi we oli laef bakegen long ded mo oli olsem hemia blong God. Papa long Heven i wantem yumi blong stap tugeta long laet mo gat fulap hop. Be long narasaed, Lusifa i wok blong mekem ol boe mo ol gel blong God oli konfius mo oli no hapi, mo blong stopem progres blong olgeta long taem we i no save finis. Bigbigfala tingting blong papa blong ol giaman i blong yumi evriwan bae i “harem nogud olsem hem” (2 Nifae 2:27). Lusifa i wantem stret blong yumi stap yumiwan long tudak mo no gat hop.
Setan i no stop nating blong wok blong tantanem ol stamba samting blong plan blong Papa. Hem i no gat wan bodi, mo progres blong hem long taem we i no save finis i stop. Semmak olsem oli stap stopem wota we i ron long reva wetem wan haedro, semmak, progres we i no save finis blong enemi i stop from se hem i no gat wan bodi blong mit mo bun. From se hem i agens, Lusifa i no letem evri blesing mo eksperiens blong wol ia blong kam posibol tru long wan bodi blong mit mo bun. Hem i no save lanem ol lesen we wan spirit we i gat bodi i save lanem. Hem i no laekem tingting ia se i gat wan laef bakegen long ded blong evri man. Wan long ol strong mining blong toktok blong skripja panis i kamaot long wei ia se hem i no save gohed blong gro mo kam olsem Papa blong yumi long Heven.
From se, blong gat wan bodi blong mit mo bun i stap long medel blong plan blong Papa blong stap glad, mo plan blong yumi kam antap long spirit, nao Lusifa i lukaot blong blokem progres blong yumi taem hem i temtem yumi blong yusum nogud bodi blong yumi. Wan long ol defren samting blong taem we i no save finis, i we, enemi, we i harem nogud, stret from se hem i no gat wan bodi blong mit mo bun, i stap pulum yumi blong serem harem nogud blong hem tru long fasin blong yusum nogud bodi blong yumi. Stret tul we hem i no gat, i kam fas poen blong ol hadwok blong hem blong trikim yumi blong lus long saed blong spirit.
Blong brekem loa blong jastiti, i wan bigbigfala sin mo i rabis wei blong yusum ol tabenakol blong bodi blong yumi. Long olgeta we oli save mo andastanem plan blong fasin blong sevem man, blong spolem bodi i olsem we yumi stap agens (luk long Mosaea 2:36–37; D&C 64:34–35), mo yumi tanem baksaed long tru aedentiti blong yumi olsem ol boe mo gel blong God. Taem yumi luk i go bitim laef long wol ia i go kasem taem we i no save finis, hem i isi blong luksave se kopi blong kompanion we enemi i givim i wan giamanwan, i blong smol taem mo i emti.
Ol Blesing blong Stap Klin long Saed blong Seks
Alma i givim advaes long boe blong hem Siblon blong “kontrolem evri strong filing blong hem, blong hem i save fulap wetem lav” (Alma 38:12). Wanem i impoten semmak, i we, blong stap disiplinim man we i folem fasin blong wol insaed long wanwan long yumi, i mekem i posibol blong yumi kasem wan lav we i rij moa, i moa dip, mo i stanap strong moa, we i kam long God, mo long ol pikinini blong Hem. Lav i kam antap tru long ol stret fasin blong holemtaet yumi, mo i stap go daon tru long ol fasin we i folem ol strong filing.
Presiden Marion J. Romni i talem:
“Mi no save tingbaot samfala blesing moa bitim olgeta blesing ia we God i promesem long olgeta we oli klin evriwan mo oli gat klin fasin. Jisas i tokbaot ol stret praes blong wanwan defren klin fasin, be hem i holemtaet hemia we i hae moa, olsem we mi luk, blong olgeta we hat blong olgeta i klin gud evriwan, from se, hem i talem, ‘bambae oli luk God’ (Matiu 5:8). Mo bambae oli no luk Lod nomo, be bambae oli filim se oli stap long hom wetem Hem.
Hemia nao promes blong Sevya we i talem se yumi mas letem klin fasin i flasem ol tingting blong yumi oltaem; afta nao, tras blong yumi bae i gro i kam strong long fored blong God (luk long D&C 121:45) (“Trust in the Lord,” Ensign, Mei 1979, 42).
Yumi kasem promes tu se, taem yumi stap folem rod blong klin fasin, Tabu Spirit bae i fren blong yumi oltaem (luk long D&C 121:46). Olsem ia nao, taem yumi stap laef folem loa blong jastiti, hem i invaetem sam long ol blesing we i moa bigwan we ol man mo ol woman oli save kasem long wol ia; wan stret save long saed blong spirit, wetem famle, ol fren, ol fren blong Jos, mo long en, wetem Sevya. Taem ia we yumi stap wet from i hapen long stret mo gud fasin taem yumi stap wokbaot long laet mo wetem hop.
Prinsipol blong Fasin blong Sakem Sin
Sam long yufala we i kasem mesej ia i nid blong sakem sin from ol sin long saed blong seks o ol narafala sin. Sevya, plante taem, yumi tokbaot Hem olsem Hae Dokta, mo taetol blong Hem i wan saen mo i gat mining. Yumi evriwan i gat eksperiens long harem nogud we i kam wetem wan kil long bodi o wan soa. Taem yumi harem bodi i soa, yumi go lukaotem samting blong givhan, mo yumi glad from ol meresin mo ol tritmen we i help blong givhan long harem nogud blong yumi. Tekem se sin i wan soa long saed blong spirit we i mekem yu filim rong, o olsem we Alma i tokbaot, i mekem yu “harem nogud tumas [long tingting] blong yu” (Alma 42:18). Blong filim rong i, long spirit blong yumi, wanem i soa long bodi blong yumi—wan woning blong denja mo wan proteksen blong no kasem moa kil. Aot long Atonmen blong Sevya, i gat krim ia we i smut i kamaot, we i hilim ol soa long saed blong spirit mo i karemaot ol filing blong gat rong. Be krim ia, oli save putum nomo sapos yu yusum ol prinsipol blong fet long Lod Jisas Kraes, fasin blong sakem sin mo fasin blong stap obei oltaem. Risal blong tru fasin blong sakem sin oli pis long maen, kamfot, mo hiling long saed blong spirit mo kam niu bakegen.
Bisop o branj presiden blong yu, oli ol man blong givhan blong dokta long saed blong spirit, we i gat raet blong helpem yu blong sakem sin mo kam gud bakegen. Plis, tingbaot; se hamas taem mo hamas yu sakem sin i mas fit wetem fasin mo saes blong sin blong yu—speseli long ol Lata-dei Sent we oli stap anda long tabu kavenan. Ol series kil long saed blong spirit i nidim bigfala tritmen mo taem, blong kam gud evriwan mo fulwan.
Wan Promes mo Wan Testemoni
Doktrin we mi bin tokbaot, bae yufala i luk se hem i olfala mo i no blong taem blong tedei, long plante pipol long wan wol we i jikim tabu wei blong krietem laef mo i daonem praes blong laef blong man. Be trutok blong Lod i no jenis folem ol fasin blong dei, o folem wanem i popula, o folem ol tingting blong pablik. Mi promes se fasin blong obei long loa blong jastiti bae i mekem hapines blong yumi i kam antap moa long wol ia, mo i mekem i posibol blong yumi progres long taem we i no save finis. Jastiti mo klin fasin oli naoia, oli bin oltaem, mo bambae oli oltaem stap “ol samting ia we oli bin lavem moa mo we i gudgudfala bitim evri samting” (Moronae 9:9). Mi testifae olsem long tabu nem blong Lod Jisas Kraes, amen.