Hop we I Kam long Laet blong God
I Kam long Presiden Dita F. Ukdof
Seken Kaonsela long Fas Presidensi
Taem yumi stap lukaotem blong mekem lav blong yumi long God i kam antap mo taem yumi traehad blong lavem neiba blong yumi, laet blong gospel bae i raonem mo leftemap yumi.
Doa we I Open I Go long Moa Laet
Mi gat wan peinting we mi laekem long ofis blong mi we oli singaotem Doa we I Open I Go long Moa Laet. Wan fren blong mi i bin pentem; hem i man Denmak, Joan Bentin, we i bin fas stek presiden long Kopenagen, Denmak.
Peinting ia, i soem wan rum we i tudak wetem wan doa we i open we laet i stap saen i kamtru long hem. Long mi, mi intres blong luk se laet we i stap kam tru long doa i no saenem ful rum—spes ia nomo long fored blong doa.
Long mi, tudak mo laet long peinting ia, i olsem wan pikja blong laef. Hem i pat blong olsem wanem yumi olsem ol man we i save ded, i filim samtaem, se tudak i stap raonem yumi. Ating yumi lusum wan we yumi lavem; wan pikinini i aot long gospel; ating yumi kasem wan nogud nius long dokta; ating yumi gat problem long wok, o yumi hevi long ol tu tingting o fraet; o ating yumi filim yumi stap yumiwan o i no gat man i lavem yumi.
Be nomata yumi filim se bae yumi lus long medel blong situesen blong yumi naoia, God i promesem hop we i kam long laet blong Hem—Hem i promesem blong saenem rod long fored blong yumi, mo soemaot long yumi rod we i go aot long tudak.
Wan Rum we I Fulap long Tudak
Mi wantem talem long yufala abaot wan woman we i bin groap long wan rum we i fulap long tudak—bae mi singaotem hem Jen.
Stat long taem we Jen i kasem tri yia, oltaem nomo oli stap kilim nogud hem, oli daonem hem mo oli abiusum hem. Oli tok nogud long hem, mo oli jikim hem. Evri moning, hem i wekap, mo i no save se bae hem i laef kasem nekis dei o nogat. Ol pipol we oli sapos blong protektem hem, olgeta nao oli stap mekem nogud long hem, mo letem abius ia i gohed.
Blong protektem hem, Jen i bin lanem blong stop blong gat filing. Hem i no gat hop blong kam fri, mekem se hem i mekem hat blong hem i strong long rabis wok insaed long laef blong hem. I no bin gat laet long wol blong hem, mekem se hem i stap nomo long tudak. Wetem fasin ia blong nomo filim samting we i kam nomo from hem i stap oltaem wetem devel fasin, hem i akseptem se eni taem, i save las taem blong hem.
Afta, taem hem i kasem 18 yia, Jen i faenem Jos blong Jisas Kraes blong Ol Lata-dei Sent. Glad mo hop blong gospel we i kambak i kasem hat blong hem, mo hem i akseptem invitesen blong kasem baptaes. Blong fas taem, laet i kam insaed long laef blong hem, mo hem i luk wan rod we i saen long fored blong hem. Hem i aot long tudak blong wol blong hem, mo disaed blong go long skul we i longwe long olgeta we oli stap mekem nogud long hem. Nao, hem i filim se hem i fri long ples ia blong tudak mo devel—hem i fri blong stap glad long swit pis mo merikel hiling blong Sevya.
Be, sam yia afta, afta we man we i abiusum hem i ded, Jen i fesem trabol bakegen wetem ol nogud samting we i bin hapen taem hem i yangfala. Bigbigfala harem nogud mo bigfala kros i prapa spolem laet we hem i bin faenem long gospel. Hem i luksave se sapos hem i letem tudak ia i kaekae hem, man we i stap spolem tingting blong hem bae i win.
Hem i askem advaes mo help long dokta, mo hem i stat blong luksave se, long hem, bes rod blong kamgud i blong hem i andastanem mo akseptem se tudak i stap—be i no blong go stap long hem. From se, olsem we hem i save, laet tu i stap—mo ples ia nao hem i bin jusum blong stap long hem.
From laef blong hem bifo we i stap long tudak, Jen i save kam wan we i wantem givimbak, i fulap long kros, o i nogud. Be, hem i no olsem. Hem i stanap agensem temtesen blong spredem tudak, i no wantem blong stap kros tumas, stap harem nogud o stap gat rabis tingting. Be, hem i bin holemtaet hop ia, se wetem help blong God bae hem i save kam gud bakegen. Hem i bin jusum blong sendemaot laet mo givim laef blong hem blong helpem ol narawan. Desisen ia i bin helpem hem blong lego pas laef blong hem i stap biaen, mo i mekem step i go long wan gudfala fiuja we i gat laet.
Hem i kam wan skul tija, mo tedei, plante yia afta, lav blong hem i bin tajem laef blong plante pikinini, mo i helpem olgeta blong save se oli gat praes, oli impoten. Hem i no stap stop blong difendem olgeta we oli no strong, oli viktim, mo olgeta we tingting i kam slak. Hem i bildimap, mekem i kam strong mo givim insperesen long evriwan raon long hem.
Jen i lanem se hiling i kam taem yumi muvaot long tudak mo wokbaot i go from hop blong wan laet we i saen moa. Hem i taem we hem i bin praktisim fet, hop mo jareti, we hem i bin jenisim laef blong hemwan, be tu, hem i bin blesem laef blong plante, plante moa pipol.
Laet I Folem Laet
Ating i gat sam long yufala we i filim se tudak i stap hang nomo long yufala. Ating yu filim se yu hevi wetem wari, fraet mo tu tingting. Long yufala mo long yumi evriwan, mi ripitim gudfala mo tru trutok ia: Laet blong God i ril. !Hem i stap blong yumi evriwan! !Hemi givim laef long evri samting!1 Hem i gat paoa blong mekem bigfala harem nogud blong bigfala soa i go daon. Hem i save kam pomad blong mekem fasin blong stap yuwan mo sik blong sol i kamgud. Long medel blong nogud taem, hem i planem sid blong wan hop we i gud moa. Hem i givim laet long ol bigfala taem blong harem nogud. Hem i saenem rod long fored blong yumi mo i lidim yumi tru long naet we i tudak i go kasem promes blong wan niu moning.
Hemia, Spirit blong Jisas Kraes, we i givim laet long evri man we i kam long wol ia.2
Be, laet blong spirit ia i no stap kam tumas long olgeta we oli stap sidaon long tudak mo wet se wan bae i onem laet. Hem i tekem wan aksen blong fet blong openem ae blong yufala i go long Laet blong Kraes. Laet blong spirit, ol ae blong wol ia oli no save luk. Jisas Kraes, Hemwan i tijim se Hem i laet we i saen long tudak, mo tudak ia i no andastanem hemia.3 From se “man we Tabu Spirit ya i no stap long hem, i no save kasem paoa blong Tabu Spirit, [from hem i luk se oli ol krangke samting] from se Tabu Spirit nomo i save mekem man i save ol paoa ia …”4
So. ?Olsem wanem nao yumi openem ae blong yumi long hop ia we laet blong God i givim?
Faswan, stat long ples we yu stap long hem.
?Yufala i no ting se i gud tumas from se i no nid blong yumi kam stret evriwan blong kasem ol blesing mo ol presen we i kam long Papa long Heven? Yumi no nid blong wet blong krosem laen long en blong kasem ol blesing blong God. I tru, ol heven oli stat blong open mo ol blesing blong heven oli folfoldaon sloslo long yumi wetem evri fas step we yumi stap mekem i go from laet ia.
Stret ples blong stat i stret ples we yu stap long hem naoia. Hem i nomata se yu no naf, olsem we yu tingting long hem, o hamas yu filim se yu biaen long ol narawan. Long stret taem ia we yu stat blong lukaotem Papa blong yu long Heven, long taem ia nao, hop blong laet blong Hem bae i stat blong wekemap, leftemap mo givim paoa long sol blong yu.5 Tudak bae i no ronwe long wan go, be yes, olsem we i tru se oltaem naet i letem niufala dei i stat, bae laet i kam.
Seken, tanem hat blong yu i go long Lod.
Leftemap sol blong yu long prea mo talemaot stret long Papa long Heven wanem yu stap filim. Luksave ol samting yu mekem i rong. Kapsaetem hat blong yu mo talemaot tangkyu blong yu. Letem Hem i save long ol tes we yu stap fesem. Plis long Hem, long nem blong Kraes, blong yu kasem paoa mo sapot. Askem se bae sora blong yu bae i open, blong yu save harem voes blong Hem. Askem blong ae blong yu i open, blong yu save luk laet blong Hem.
Nambatri, wokbaot long laet.
Papa blong yu long Heven i save se bae yu mekem ol mistek. Hem i save se bae yu folfoldaon—ating plante taem. Hemia i mekem Hem i harem nogud, be, Hem i lavem yu. Hem i no wantem blong daonem spirit blong yu. Be, Hem i wantem se yu kam antap, mo kam man o woman ia we Hem i putum se bae yu kam olsem.
From hemia, Hem i bin sendem Pikinini blong Hem blong i saenem rod mo i soemaot long yumi olsem wanem blong stap sef blong krosem ol samting we i blokem rod blong yumi. Hem i givim gospel long yumi, we i tijim wei blong stap wan disaepol. Hem i tijim yumi ol samting we yumi mas save, mekem, mo stap blong save wokbaot long laet blong Hem, we yumi stap folem ol step blong Pikinini blong Hem we Hem i Lavem tumas, Sevya blong yumi.
Laet I Winim Tudak
Yes, bae yumi mekem ol mistek.
Yes, bae yumi foldaon.
Be taem yumi stap lukaotem blong mekem lav blong yumi long God i kam antap mo taem yumi traehad blong lavem neiba blong yumi, laet blong gospel bae i raonem mo leftemap yumi. Tudak bae i gowe, from se hem i no save stap long ples we laet i stap long hem. Taem yumi stap kam kolosap long God, bae Hem i kam kolosap long yumi.6 Mo dei afta dei, hop blong laet blong God bae i gro insaed long yumi, i saen gud mo i saen moa gud bakegen kasem stret dei i kam.7
Long evriwan we i filim se oli wokbaot long tudak, mi invaetem yufala blong dipen long promes ia we Sevya blong man i talem: “Mi nao mi olsem laet blong ol man long wol. Man we i biaen long mi, bambae hem i no save wokbaot long tudak, …bae i gat laet blong laef.”8
Wan Laet long Afrika
Sam yia i pas, waef blong mi, Hariet mo mi, i bin gat wan gud eksperiens we mitufala i luk wan promes i kamtru. Mitufala i stap long Wes Afrika, wan naes pat blong wol we Jos i stap gro mo ol Lata-dei Sent oli gud tumas. Be, long Wes Afrika tu, i gat plante jalenj. Speseli, mi bin harem nogud long ol puaman we mi bin luk. Long ol siti, plante man tumas i no gat wok, mo ol famle oli traehad blong lukluk long evri dei nid blong olgeta, mo sefti blong olgeta. I brekem hat blong mi blong save se plante long ol gudfala memba blong Jos oli laef long pua laef ia. Be tu, mi bin lanem se ol gudfala memba ia, oli helpem wanwan long olgeta blong mekem se i no gat wan i go hanggri.
Mifala i kasem wan long ol mitinghaos kolosap long wan bigfala siti. Be, mifala i no faenem ol pipol we oli hevi mo stap nomo long tudak; !mifala i faenem wan pipol we i glad we laet i saenaot long olgeta! Hapines we oli bin filim from gospel i kasem evriwan mo i leftemap spirit blong mitufala. Lav we oli soemaot long mitufala i putum tingting i stap daon. Smael blong olgeta i tru mo i mekem mifala tu i smael.
Mi tingbaot se mi stap askem miwan we i gat wan pipol we i moa hapi long fes blong planet ia. Nomata ol dia Sent ia oli bin stap long medel blong ol hadtaem mo tes, !oli bin fulap wetem laet!
Miting i stat, mo mi stat blong toktok. Be i no longtaem afta, paoa i of long bilding, mo mifala i stap long ful tudak.
Blong smol taem, mi no save luk eniwan long kongregesen, be mi save luk mo filim ol naes bigfala smael blong ol Sent blong yumi. !O, mi laekem tumas blong stap wetem ol naes pipol ia!
Tudak long japel i gohed, mo mi sidaon long saed blong waef blong mi mo wet blong paoa i kambak. Taem mifala i stap wet, wan defren samting i hapen.
Sam voes oli stat blong singsing long ol hym blong Restoresen. Mo afta ol narawan oli joen. Mo afta, moa i joen. I no longtaem afta, wan bigbigfala kwaea blong ol voes i fulumap japel.
Ol memba blong Jos ia oli no nidim ol hymbuk; oli save evri toktok blong evri hym we oli singsing long hem. Mo oli singsing wan hym afta wan narawan wetem wan paoa mo spirit we i tajem sol blong mi.
Long en, ol laet oli wok bakegen mo i fulumap rum wetem laet. Hariet mo mi i lukluk mitufala bakegen, fes blong mitufala i wetwet long wota blong ae.
Long medel blong bigfala tudak, ol naes, gudfala Sent ia oli bin fulumap Jos bilding ia mo sol blong mifala wetem laet.
Hem i bin wan taem we i tajem mitufala bigwan—wan we Hariet mo mi bae i no save fogetem.
Kam long Laet
Yes, wanwan taem, i olsem se laef blong yumi, tudak i kasem, o i kavremap. Samtaem, naet raon long yumi bae i hevi, i daonem hat, i mekem yumi fraet.
Hat blong mi i harem nogud long plante harem nogud we samfala long yufala i stap fesem, from yufala i stap yufalawan, mo stap wari mo fraet.
Be, mi testifae se hop blong yumi we i laef, i stap long Jisas Kraes, Hem i tru, i klin gud, mo i doa ia we i open i go kasem moa laet we i kam long heven.
Mi testifae se, wetem Kraes, tudak i no save win. Tudak bae i no win ova long laet blong Kraes.
!Mi testifae se tudak i no save stanap long fored blong bigfala laet we i kam long Pikinini blong God we i stap laef!
Mi invaetem wanwan long yufala blong openem hat blong yu long Hem. Lukaotem Hem tru long stadi mo prea. Kam long Jos blong Hem iven Jos blong Jisas Kraes blong Ol Lata-dei Sent, lanem abaot Hem mo gospel blong Hem, mo stap aktiv mo tekpat, helpem wanwan long yufala, mo givim seves wetem glad long God blong yumi.
Ol brata mo sista. Iven afta long naet we i bin tudak evriwan, Sevya blong wol bae i lidim yu long wan moning we i girap sloslo, i swit mo i saen gud, we bae i kam insaed long yufala.
Taem yu stap wokbaot i go from hop blong laet blong God, bae yu faenem lav mo sore, mo bigfala lav mo gud fasin blong wan Papa long Heven we i gat lav, “we i no gat tudak nating long hem.”9 Long hemia, mi testifae, long tabu nem blong Jisas Kraes, amen.