Wei blong Lod

I Kam long Elda Stanli G. Elis

Blong Olgeta Seventi

Wei blong Lod hem i blong yumi harem ol tijing blong ol lida blong yumi, andastanem ol stret prinsipol, mo lukaotem yumiwan.

Seventi

Mi stap olsem wan Seventi. Olgeta Seventi, oli singaotem olgeta blong stap ol mesenja—blong serem toktok blong Lod olsem we mifala i kasem long ol aposol mo ol profet, mo long Spirit, mo blong stap ol spesel witnes blong nem blong Kraes blong prijim gospel long ful wol, blong bildimap Jos, mo blong stretem ol wok blong hem (luk long D&C 107:25, 34).

Boe blong Fam

Mi groap long wan fam kolosap Beli, Aedaho—!wan ril “boe blong fam!” Mo mi bin lanem ol samting ia:

1. Blong wok—sapos yu no planem samting, yu no save pikimap kaekae long graon.

2. Blong wok smat—sapos yu wotarem mo fidim graon, bae yu pikimap moa kaekae.

3. Taem, i impoten—sapos yu no planem kaekae long stret taem, bae kolkol i save spolem kwik ol kaekae blong yu.

4. Mekem wanem we i nid blong mekem nomata sapos i gud, o moa gud, o i stret long tingting—yu pulumaot melek long buluk long stret taem blong mekem hemia, be i no taem yu wantem.

5. Blong tok klia mo stret—wetem ol animol blong fam mo masin we yu gat, yu no gat taem blong “go raonraon long bus,” o blong wari se yu mekem wan i harem nogud. (Long saed ia, taem mi bin givim seves olbaot long ol ples we Jos i stap long hem, plante taem mi askem: “?Yu wantem mi blong toktok stret o wetem suga?” Olsem wan rul, ol Sent i bin jusum “!tok stret!” Tedei bae mi tok stret.)

6. Long en, olsem wan boe blong fam blong Aedaho, mi bin lanem blong folem ol besik prinsipol.

I nogat wan samting we i moa besik long yumi evriwan, mo doktrin blong yumi bitim ol trutok blong fas toktok blong bilif: “Mifala i biliv long God, Papa we I No Save Finis, mo long Pikinini blong Hem, Jisas Kraes, mo long Tabu Spirit.” (Ol Toktok blong Bilif 1:1).

Moa long hemia, Hem i Papa blong yumi long Heven, we i save yumi, i lavem yumi, mo i wantem yumi gobak long Hem. Jisas i Sevya mo Ridima blong yumi, we tru long Atonmen, i mekemsua se bae yumi winim ded mo laef bakegen mo mekem i isi blong yumi blong save kam wan god mo gat laef we i no save finis. Tabu Spirit i Spirit blong givhan, reveleta, tija blong yumi, i testifae, mo i lidim yumi.

Tingbaot samting ia, ol brata mo sista—!yumi no ol spirit pikinini we i no gat papa mo mama! Yumi no stap yumiwan.

?Wanem ol gud saed blong gat ol papa mo mama—blong no kam wan pikinini we i no gat papa mo mama? Yumi save lan long olgeta, benefit long eksperiens blong olgeta, no foldaon long ol hol we oli wonem yumi long hem, mo kam blong andastanem moa gud long wei blong olgeta. Yumi no nid blong yumi go lus, blong oli trikim yumi, o no wok gud. Hemia i tru speseli wetem Papa blong yumi long Heven, we i bin tijim mo soem yumi, i no wan rod nomo, be stret rod ia nao.

God I Gat Wei Ia

I tru se God i gat wei ia blong laef,¹ blong lavem man,² blong help,³ blong prea,⁴ blong toktok,⁵ blong mekem samting wetem narawan,⁶ blong lidim man,⁷ blong mared,⁸ blong lukaotem ol pikinini,⁹ blong lanem samting,¹⁰ blong save trutok,¹¹ blong serem gospel,¹² blong jusum gud wanem blong yumi kakae,¹³ mo sam moa samting.

Wetem ol skripja, i gat ol gudfala ples blong faenem wei blong Lod; oli stap insaed long ol buk ia, Stap Tru long Fet, Blong Ol Yut Oli Kam Strong, mo ol nara tijing blong ol aposol mo profet we oli stap laef.

1. Eksampol, Lod i bin tijim yumi olsem insaed long ol skripja: “Tingting blong mi i no olsem tingting blong yufala, mo fasin blong mi i no olsem fasin blong yufala.Skae i antap we i antap, i antap olgeta long graon, mo long sem fasin, tingting blong mi i hae we i hae, i antap olgeta long tingting blong yufala mo fasin blong mi i antap olgeta long fasin blong yufala.” (Aesea 55:8–9).

2. Wan long ol rabis fasin blong ol las dei ia, i taem we evri man i wokbaot long wei blong hemwan (luk long D&C 1:16). Long Proveb, oli wonem yumi blong “no ting se [yumi] gat save inaf blong givhan long [yumiwan]” mo “no dipen long save blong yumiwan” (luk long Ol Proveb 3:5–7).

3. Yumi bin kasem tijing se sapos yumi mekem ol samting long wei blong Lod, bae Hem i blesem yumi mo yumi gat raet long ol promes blong Hem; mo sapos i no long wei blong Hem, yumi no gat promes (luk long D&C 82:10).

4. Lod i komperem wei blong Hem wetem wei blong yumi taem Hem i bin trenem profet Samuel, we Hem i sendem blong go faenem wan niu king: “Be Hae God i talem long hem se, yu no tingbaot we man i longfala man mo i naes. Mi mi no wantem man ya, from we fasin blong mi blong lukluk man i no olsem fasin blong man. Man i stap lukluk long bodi blong man nomo be mi mi stap lukluk long tingting blong hem” (Fas Samuel 16:7).

5. Iven wetem hat ia we evriwan i gat blong save helpem ol puaman mo olgeta long nid, Lod i agri long ol gol blong yumi, be i wonem se, “Be i nid blong i hapen long wei blong miwan” (luk long D&C 104:16). Be sapos yumi traehad yumiwan blong help, bae yumi save mekem ol pua mo olgeta long nid i harem nogud. Lod i tijim yumi nid ia blong promotem fasin blong no stap dipen. Iven sapos yumi save help, yumi no mas givim o karem wanem we oli save, mo oli mas mekem olgetawan. Evri ples we oli traem, wol i lanem finis praktis ia blong givim wanem we olgetawan i save mekem blong kasem olsem mane mo kakae. I tru God nomo i save moa gud.

Yumi traem tingbaot sam narafala eksampol. Lod i gat wei blong mekem misinari wok. Oli eksplenem long skripja mo long Prijim Gospel blong Mi mo blong folem olsem we Spirit i talem.

Lod i gat wei blong Hem, o wei ia blong lavem man. Olgeta blong wol i talem se wanem we i moa impoten hem i taem we tufala pipol i lavlavem tufala. Papa blong yumi long Heven i tijim se hem i impoten, be Hem i tijim yumi moa: se i gat wan wei we Hem i givim raet from, mo taem blong soemaot lav ia.

Stap Lukaotem mo Lidim Yumiwan

Josef Smit i bin kasem tijing olsem wan yut, long ol wei blong Lod. Taem oli askem hem olsem wanem hem i bin lidim Jos, hem i eksplenem se hem i bin tijim ol stret prinsipol mo ol memba oli yusum blong lukaotem mo lidim olgetawan.¹⁴ Ol brata mo sista. Ol aposol mo profet blong yumi tedei oli stap tijim yet ol stret prinsipol. Kwestin hem i: “?Yumi stap yusum olgeta prinsipol ia o no blong lukaotem mo lidim yumiwan?”

Wan samting we oli stap tijim oltaem long yumi, i blong yumi kam antap fulwan long eni ples we yumi stap long hem. Be samtaem, temtesen i kam long yumi blong muv i go long sam niu eria, wetem tingting se ol pikinini bae oli gat moa fren, mo long wei ia, bae oli gat ol program blong yut we oli moa gud .

Ol brata mo sista. ?I tru ia se yumi ting se impoten samting blong sevem ol pikinini blong yumi, hem i ples we oli stap long hem? Ol aposol mo profet, oltaem oli tijim se wanem i hapen insaed long wan hom i moa impoten bitim wanem ol pikinini blong yumi oli fesem aotsaed. ?Olsem wanem yumi lukaotem ol pikinini i moa impoten bitim ples we yumi stap long hem blong yumi lukaotem olgeta.

I tru se i gat sam narafala samting tu we i mekem yumi wantem muv blong stap long hem, mo tangkyu tumas, Lod bae i givhan long yumi sapos yumi luklukgud long Hem blong kasem konfemesen blong Hem.

Wan nara kwestin hem i “?Weaples nao oli nidim yumi?” Blong 16 yia mi bin stap long presidensi blong Yuston Teksas Not Stek. Plante oli bin stap muv i kam long eria blong mifala long tetaem ia. Plante taem, bae mifala i stap kasem wan fon kol se wan man i stap muv i kam long eria mo askem se wijwan hem i bes wod. Be wan taem nomo long 16 yia, we mi bin kasem wan fon kol we i askem se: “?Wanem wod i nidim wan gud famle? ?Wea nao mifala i save help?”

Long ol eli yia blong Jos, Presiden Brigham Yang mo ol narawan, bae oli singaotem ol memba blong go long wan ples blong bildimap Jos longwe. Fani samting se iven naoia yumi gat ol fetful Jos memba evri ples we bae oli save go eni ples profet i askem olgeta blong go long hem. ?I rili nidim blong Presiden Monson i askem wanwan long yumi we yumi ova 14 milian se oli nidim famle blong yumi wea? Wei blong Lod hem i blong yumi harem ol tijing blong ol lida blong yumi, andastanem ol stret prinsipol, mo lukaotem yumiwan.

I Impoten Tumas

Wetem evri samting we i stap hapen long Jos tedei, mo taem we Lod i stap muvum kwik wok blong Hem long evri situesen, !hem i moa impoten se yumi mekem evri samting we yumi mekem long wei blong Hem!

Speseli long wok blong sevem man, yumi lanem se “tru long presen blong Pikinini blong hem, God i bin mekem rere wan rod we i moa gud tumas” (Ita 12:11). Doktrin blong Kraes, “hemia i rod; mo i nogat wan narafala rod o nem we oli givim andanit long heven we tru long hem ol man i save sev long kingdom blong God” (2 Nifae 31:21).

Las Toktok

Taem we yumi luk plante pipol long wol tedei i laef folem fasin blong gat tu tingting, o moa nogud, folem ol rod we i no stret, mo safa from ol risal we oli kasem taem oli jusum rong, i mekem mi wantem singaot olsem Alma i bin mekem:

“O mi wantem kam wan enjel, mo save gat hop blong hat blong mi, blong mi save go aot mo toktok wetem bigfala pupu blong God, wetem wan voes blong mekem wol i seksek, mo talem fasin blong sakem sin long evri pipol!

“Yes, bae mi talemaot long evri sol, … fasin blong pemaot man, se oli mas sakem sin mo kam long God blong yumi, blong mekem se i nomo save gat plante sore long evri fes blong wol” (Alma 29:1–2).

!Bakegen mi witnes se Lod i gat wei! Papa blong yumi long Heven i save yumi, i lavem yumi, mo i wantem blong help. Hem i save gud moa hao blong help. !Yumi no ol spirit pikinini we i nogat papa mo mama!

Sevya blong yumi, Jisas Kraes, i “rod ya, i stamba blong trutok, mo i stamba blong laef” (Jon 14:6; luk tu long Alma 38:9). Wei blong hem i abaot trutok we i no save finis mo i lidim yumi i go long pis long wol ia, mo laef we i no save finis long wol we i stap kam yet (luk long D&C 59:23). Mi testifae olsem long nem blong Jisas Kraes, amen.

Ol Not

1. Luk long 2 Nifae 5:27; Mosaea 4:27; Alma 7:23–25.

2. Luk long Eksodas 20:14; Dutronome 6:5; Jon 13:34–35; Rom 1:24–32; Fas Tesalonaeka 4:3; Alma 39:3–5.

3. Luk long Mosaea 4:21–27; Doctrine and Covenants 104:15–18.

4. Luk long Matiu 6:5–13; 2 Nifae 32:8–9; 3 Nifae 18:21; Doctrine and Covenants 10:5.

5. Luk long Ol Proveb 15:1; Kolosi 4:6; Jemes 5:12; 3 Nifae 11:29–30.

6. Luk long Doctrine and Covenants 64:10–11; 121:41–46.

7. Luk long Matiu 25:14–30; Jon 10:1–14; Doctrine and Covenants 50:26; 107:99–100; 121:34–40.

8. Luk long Jenesis 2:24; Jekob 2:27; Doctrine and Covenants 42:22; 132:19.

9. Luk long Mosaea 4:14–15; Doctrine and Covenants 68:25–28.

10. Luk long Doctrine and Covenants 43:8–9; 88:77–79, 118.

11. Luk long Moronae 7:15–19; 10:3–5; Doctrine and Covenants 9:7–9.

12. Luk long Doctrine and Covenants 33:8–10; 100:3–8.

13. Luk long Doctrine and Covenants 89.

14. Luk long Teachings of Presidents of the Church: Joseph Smith (2007), 284.