Ol Tabu Ples blong Yufala

I Kam long An. M. Dib

Seken Kaonsela long Yang Woman Jeneral Presidensi

Nomata [ol tabu ples blong yufala oli] stap long wan ples long kantri, o sam sot taem, oli tabu semmak mo oli gat paoa blong mekem man i kam strong moa.

2013 Yut Miutuol stamba toktok i kam long seksen 87 blong Doktrin mo Ol Kavenan. Instraksen ia i stap long tri defren seksen. Yes, toktok ia i impoten. Hem i eksplenem yumi olsem wanem yumi save kasem proteksen, paoa mo pis long ol trabol taem. Instraksen ia, i blong yufala i mas stanap long ol tabu ples, mo no mas muv.¹

Taem mi stap tingting hevi long stamba toktok ia, mi stap tingting se: “?Wanem nao ol ‘tabu ples’ we Papa long Heven i stap tokbaot? Presiden Esra Taf Benson i talem se: “Ol tabu ples oli ol tempol, ol japel, hom blong yumi, mo ol stek blong Saeon, we oli … ‘blong protektem yumi mo blong yumi haed insaed long olgeta.’”² Antap long hemia, mi biliv se wanwan long yumi i save faenem plante moa ples. Faswan, yumi save tingting long toktok ia, ples, olsem wan graon samples, o wan ples long wan kantri.³ Be, wan ples i save stap tu olsem wan “situesen, wan posisen, o wan level long maen.” Hemia i minim se ol tabu ples oli “sam sot taem ia insaed long taem”—sam taem we Tabu Spirit i testifae long yumi, sam taem we yumi filim lav blong Papa long Heven, o sam taem ia we yumi kasem wan ansa long prea blong yumi. Moa long hemia, mi biliv se eni taem we yu gat strong paoa long tingting blong stanap from raet samting, spesel long ol situesen we i no gat wan i wantem mekem, nao yu stap krietem wan tabu ples.

Truaot long sot mo impoten laef blong Josef Smit, i tru, hem i stanap long ol tabu ples mo hem i no bin muv. Taem hem i yangfala, tingting i trabol long raorao blong ol relijin long komuniti blong hem mo i wantem save wijwan long evri jos ia i tru. Dak bus kolosap long haos blong hem i kam wan tabu ples taem hem i bin nildaon long medel blong ol tri mo i bin prea long wan laod voes. Prea blong hem i gat ansa, mo tedei, ol Lata-dei Sent oli singaotem dak bus ia se hem i Tabu Bus.

Ol yang woman raon long wol oli stanap long ol tabu ples, long ol bus long Ol Yang Woman Kamp. Wan Yang Woman lida i bin serem stori blong eksperiens blong wan yang woman. Gel ia, i lesaktiv, mo hem i no biliv tumas we bae hem i gat wan eksperiens long bus. Afta long fas dei, hem i go talem long lida se: “Mi stap gat wan gud taem, be plis, ?i oraet sapos yumi katemaot evri toktok ia long saed blong Spirit? !Mi stap ia blong kamp, glad long bus, stap wetem fren mo gat gud taem! Be, long en blong testemoni miting semfala gel ia, i krae mo talem: “Mi no wantem gobak long haos. ?Olsem wanem nao bae mi save gat wanem mi stap filim naoia, Spirit ia, i stap wetem mi evri taem?” Hem i bin faenem wan tabu ples.

Wan nara tabu ples long laef blong Josef Smit i bin bedrum blong hem. Ating hemia i had blong bilivim, from se, olsem plante long yufala, hem i bin serem bedrum blong hem wetem ol brata mo sista blong hem. Be i kam wan tabu ples taem hem i prea wetem bigfala fet mo tingting i stap daon. Hem i eksplenem se afta we hem i go long bed long naet, hem i stat blong prea mo askem strong long [Hae God] blong fogivim evri sin mo krangke fasin blong hem.⁴ Ol trifala yia we i bin pas afta we Josef Smit i bin gat visen long Tabu Bus, i no bin isi. Josef, we i gat 17 yia, i fesem fasin blong jik, daonem man, mo fos. Be long naet ia, long bedrum blong hem, enjel Moronae i bin kamaot long hem blong ansarem prea blong hem. Josef i bin kasem save, mo kamfot. Long naet ia, bedrum blong hem i kam wan tabu ples.

Taem mi stap luk wan Momon Mesej blong Yut, mi bin witnesem wan nara bedrum i kam wan tabu ples. Vidio ia i soem Ingrid Delgado, wan yang woman long El Salvado, i serem ol filing abaot tempol. Hem i talem se: “Hem i gud blong save se yumi gat wan ples we yumi save kamaot long ol samting blong wol, mo kasem ol tabu odinens mo helpem olgeta we oli no bin save kasem olgeta long laef ia.” Taem hem i stap toktok, vidio i soem Ingrid i stap ridim skripja blong hem, we ol Momon posta oli stap raon long hem, ol toktok blong profet, wan buk blong Progres blong Miwan, pikja blong famle mo tempol oli raonem hem, yes, wetem ol nunus animol we hem i laekem tumas.⁵ Ating, hem i no luksave, be hem i krietem wan tabu ples blong hem, longwe long ol samting blong wol. Mi askem miwan hamas taem Ingrid i bin ridim skripja blong hem, i filim Spirit, mo kasem ol ansa blong ol prea blong hem long tabu ples blong hem.

Wan nara tabu ples we man i no ting long hem long laef blong Josef Smit, i bin Libeti Kalabus. Elda Jefri R. Holan i bin talem: “I no gat wan nara taem blong bigfala trabol long laef blong Josef Smit, be taem ia nomo we oli sarem hem long kalabus, we i no gat risen from.” Be Elda Holan i gohed blong eksplenem se Libeti Kalabus, we stat long taem ia oli stap singaotem “kalabus-tempol” from tabu eksperiens we Profet Josef Smit i bin kasem, … we Profet Josef i kasem taem hem i bin stap ia.⁶

Sam long yufala, ol yang woman, i stap long Libeti Kalabus blong yufalawan; wan ples we oli daonem yu, we yu no filim lav mo kaen fasin, wan ples we oli jikim yu, fosem yu, o oli kilim yu. Long yufala ol yang woman, mi talem bakegen toktok blong Elda Holan : “Yu save gat, wetem Lod, eksperiens we i tabu, i givim revelesen, i tijim yu fulap long ol taem blong laef blong yu we oli moa nogud … mo semtaem, yu stap stanap strong long ol samting we oli no stret, mo fesem ol bigfala samting we i kam agens, we yu neva fesem bifo.⁷ Long nara toktok, olsem Profet Josef Smit, yu save krietem mo stanap long ol tabu ples, iven long hadtaem we yu neva fesem bifo.

Wan yang adalt, Kerstin i bin serem had eksperiens blong hem. Hae skul i bin Libeti kalabus. Laki, miusik rum i givhan. Hem i talem se: “Taem mi go insaed long rum ia, i olsem se mi go insaed long wan sef ples. I no gat toktok blong daonem man, i no gat rabis toktok. Be, mifala i harem ol toktok blong leftemap tingting mo lav. Mifala i stap kaen long mifala. Hem i bin wan hapi ples. Miusik rum ia i fulap long Spirit taem mifala i stap praktis mo plei miusik. Rum i bin olsem, from paoa blong tija blong miusik. Hem i bin wan gudfala Kristin man. Taem mi tingbak, hae skul i wan ples blong kam gud. Hem i bin had, be mi bin lanem fasin blong no flas tumas. Oltaem bae mi talem tangkyu from ples blong haed ia, tabu ples blong mi, we i miusik rum blong mi.”⁸

?Yu bin stap askem yuwan tunaet long wanem nao ol tabu ples blong yu? Mi bin askem plante yang woman blong serem ol tabu ples blong olgeta wetem mi. Nomata oli stap long wan ples long kantri, o sam sot taem, oli tabu semmak mo oli gat paoa blong mekem man i kam strong moa. Hemia naen long ol naes ansa blong olgeta:

Wan: “Mi bin stap long hospital, mi stap holem niu bebi brata blong mi.”
Tu: “Evri taem mi ridim petriakel blesing blong mi, mi filim se man i save mi mo Papa long Heven i lavem mi.”
Tri: “Dei we mi kasem twelef yia, ol yang woman long wod oli dekoretem doa blong mi wetem ol pepa hat.⁹ !Mi bin filim se oli lavem, akseptem mi mo mi hapi!”
Fo: “Taem mi stap ridim skripja blong mi wan dei, wan sentens “i kamaot.” Mi bin faenem ansa blong prea blong mi.
Faef: “Mi wokbaot go long wan pati we ol pipol stap dring. Spirit i talem long mi blong tanem raon mo gobak hom. Mi mekem, mo yes, sam samting bae i kamaot biaen. Be, sot taem ia, i givim tras we mi nidim blong save se mi save laef folem gospel.”
Sikis: “Long taem blong sakramen, mi stap tingting long Atonmen. Mi luksave se mi nidim blong fogivim wan man we mi kros long hem. Taem mi bin jusum blong fogivim hem, i wan gud aksen we bae i tekem Atonmen long laef blong mi evri dei.”
Seven: “Afta we mi go long Niu Bigining wetem mama blong mi, hem i kisim mi, mo i talem long mi se hem i lavem mi. Hemia i fas taem we mi save tingbaot se hem i mekem hemia.”
Eit. “Wetem stret toktok we i kam long bisop blong mi, mi bin save se promes blong skripja i tru: ‘se nomata ol sin blong yumi oli red evriwan, bambae oli waet olsem sno.’¹⁰ Mi bin filim hop mo mi bin save se mi save statem longfala rod blong mi sakem sin.”
Laswan: “Wan naet, mi pulum ful paoa long tingting blong mi blong serem filing blong mi abaot gospel mo Buk blong Momon wetem bes fren blong mi. Afta, mi bin gat spesel janis blong go long baptaes blong hem. Naoia, mitufala i stap go long Jos tugeta.”

?Bae mi save serem wetem yufala wan long tabu ples blong mi? Wan taem, mi filim we samting i hevi tumas, mi fraet mo mi filim mi stap miwan. Kwaet nomo, mi prea: “Papa long Heven, mi no save olsem wanem blong mekem hemia. !Plis, plis, yu helpem mi!” I no longtaem, wan i kam, i putum han long solda blong mi, i talem wan tru toktok long hat blong hem we i leftemap tingting blong mi. Long tetaem ia, mi bin filim pis. Mi filim se oli akseptem mi. Evri samting i jenis. Ol toktok blong Presiden Spensa W. Kimbol oli kam long tingting blong mi: “God i stap luk yumi mo i lukaot long yumi. Be, plante taem, i tru long narafala man we hem i lukluk long nid blong yumi.”¹¹ Long mi, taem ia, ples ia, i bin kam tabu.

Ol dia yang woman. I gat plante we plante nara tabu ples we mi wantem serem wetem wanwan long yumi. Taem yufala i gobak hom tedei, mi leftemap tingting blong yufala blong raetemdaon long jenol blong yufala, ol ples ia we yufala i luksave mo tingbaot olsem ol tabu ples. Hem i klia long mi se ol taosen blong yufala oli stanap long ol tabu ples. Ol ples ia, oli bin givim yu proteksen, paoa, mo pis long taem blong trabol. Ol testemoni blong yufala i stap gro mo i kam strong moa, from se yufala i stap stanap from trutok mo fasin we i stret mo gud, long ol impoten wei.

Yufala, i tabu yut blong Jos, yufala i ol hiro blong mi. Mi filim bigbigfala lav we Papa long Heven i gat long yufala mo mi talem testemoni blong mi long yufala se gospel blong Jisas Kraes i tru. Hem i stap wet, i rere blong leftemap yufala taem yufala i stap stanap long ol tabu ples mo no stap muv. Mi lavem mo sastenem Presiden Tomas S. Monson, tru profet we i stap leftemap tingting. Mi talem ol samting ia long nem blong Jisas Kraes, amen.