Hem I Wan Merikel
I Kam long Elda Nil L. Andesen
Blong Kworom blong Olgeta Twelef Aposol
Yumi stap witnesem ol merikel blong Lod taem we gospel blong hem i stap go long ful wol.
Laef blong Jisas Kraes i fulap wetem ol merikel; wan yang gel we i neva bin save man, wan niu sta antap long skae, ol enjel oli kamaot long ol man blong lukaot long sipsip, man we i no lukluk i lukluk bakegen, man we i no save wokbaot i wokbaot bakegen, ol enjel long Getsemane mo long tumb, mo bigfala merikel long evri merikel—Laef Bakegen long Ded blong Hem.
Mi stap tingting long pikja blong ol leven Aposol long hil kolosap long Galili, taem we Lod we i girap bakegen long ded i kamaot mo talem: “Yufala i mas go aot long ol man long olgeta ples long wol, baptaesem olgeta long nem blong Papa blong mi, mo long nem blong mi, mo long nem blong Tabu Spirit.”1 “Yufala i mas go aot long olgeta ples long wol, mo stap prijim gospel long evri samting we i laef.”2
“?Long evri nesen?” “?Long ful wol?” “?Long evri man we i stap laef?” ?Hem i posibol? Iven Jisas i mekem i klia long olgeta se oli mas askem olgetawan sapos merikel bae rili hapen long taem we bae oli stap prijim gospel.3
Fet i winim fasin blong gat tu tingting, mo Pita, i leftemap voes blong hem, i talem se:
“Yufala we i stap long Jerusalem, … lesin gud long mi: …
“Jisas blong Nasaret ya,…mo yufala i kilim hem i ded, long ol han blong ol man nogud we oli nilim hem long kros: …
“Be God i tekemaot long paoa blong ded, i mekem hem i laef bakegen, yumi evriwan i witnes long samting ia.”4
Spirit i bin stap long dei ia, mo 3,000 man i bin kasem baptaes. Olsem we Jisas i bin promesem, ol saen mo merikel i kam afta long fet blong olgeta we oli biliv.
Olsem we Jos blong Jisas Kraes i bin kambak long wol 183 yia i pas finis, toktok blong Lod long smol grup blong ol disaepol i gohed blong talem wanem Hem i bin talem long plante yia i pas finis, we i talem se bae voes blong woning bae i go aot long evri man.5 From saon ya blong gospel i mas go long ful wol, mo long ol ples blong wol we oli longlongwe.6
?Evri pipol”? “?Ful wol”? ?Long ol ples we oli longlongwe”? ?Hemia i posibol?
Sevya i talem gud bakegen long ol Lata-dei Sent blong Hem,7 be ?i posibol blong oli luk fastaem se bigfala wok ia bae i kasem wea mo fiuja blong hem i olsem wanem? Oli mas askem olgetawan ia sapos ol merikel bae i rili hapen taem bae oli stap prijim gospel.
Bakegen, fet i winim fasin blong gat tu tingting, mo taosen man i bin kasem baptaes. Long Inglan, Elda Wilfod Wudrof, i faenem wan bigfala komuniti i stap wet from hem. Spirit blong Lod i foldaon long olgeta, mo hem i bin baptaesem 45 prija mo plante handred memba long fasfala manis blong hem long Benbo fam.8
Dei blong yumi i no defren. Team Elda Deved A. Bedna mo mi, i misinari samples 40 yia i pas (mo bae mi talem long yufala se mitufala i no misinari we i moa olfala we i kambak we i sidaon long ol red jea ia), i bin gat 16, 000 misinari. Olsem we Presiden Tomas S. Monson i talem yestedei, naoia yumi gat 65,000—moa bitim bifo. Fastaem i gat 562 stek. Tedei i gat moa long 3,000. Long taem ia blong mifala, ol wod mo ol branj oli stap nomo long 59 kantri. Tedei yumi gat ol kongregesen long 189 blong 224 nesen mo teritri blong wol. Yumi smol long namba, olsem we Nifae i bin talem.9 Be long semtaem, yu mo mi i ol ae witnes blong ol profesi blong Profet Daniel: “i gat wan ston i kamaot hemwan antap long wan bigfala hil … we i kavremap olgeta ples long wol.”10
Taem we yumi stap laef long hem naoia, i wan taem blong merikel. Sikis manis i pas, taem we Presiden Monson i anaonsem jenis long yia blong yang man mo yang woman we i wantem go long wan fultaem misin, strong paoa long saed blong spirit i bin stap wetem olgeta yang pipol blong Jos we oli no save sakemaot. Fet i winim fasin blong gat tu tingting, mo ol yang man mo ol yang woman oli muv i go fored. Tosdei, afta long konfrens, oli givim wok long mi blong rekomendem olgeta koling blong olgeta misinari i go long Fas Presidensi. Mi sapraes blong luk ol aplikesen blong olgeta yang man mo yang woman we oli gat 18 mo 19 yia we oli stretem plan blong olgeta, visitim dokta, kasem intaviu long ol branj presiden mo ol distrik presiden blong olgeta, mo sendem ol aplikesen blong olgeta i kam—evriwan long 5 dei nomo. Naoia, taosen moa i kam joenem olgeta. Hemia i wan merikel.
Yumi glad tumas from strong fet blong olgeta sista blong yumi, long bigfala namba blong ol misinari raon long wol, mo bigfala namba blong olgeta senia kapol we oli stap rere blong go givim seves. Fifti-eit niu misin we oli jes anaonsem, mo bigfala misinari trening senta blong yumi long Provo naoia i faenem wan niufala kompanion long Meksiko Siti.
Presiden Tomas S. Monson i talem: “Mifala i no pleplei long toktok blong Sevya se ... ‘Yufala i mas go aot long evri ples, mo tijim evri nesen, baptaesem olgeta long nem blong Papa, mo long nem blong Pikinini, mo long nem blong Tabu Spirit.’”11 “Bae wok ia i gohed blong go fored, bae i jenisim mo blesem ol laef … I no gat wan paoa long ful wol ia we i save stopem wok ia blong God.”12
Yumi stap witnesem ol merikel blong Lod taem we gospel blong hem i stap go long ful wol.
Ol brata mo sista. Olsem we Lod i stap singaotem plante moa misinari blong go givim seves, Hem i stap wekemap ol tingting mo openem olgeta hat blong ol gud mo ones pipol blong akseptem ol misinari blong Hem. Yu save olgeta finis o bae yu save olgeta yet. Oli pat blong famle blong yu mo stap laef long komuniti blong yu. Oli wokbaot bitim yu long rod, oli sidaon wetem yu long skul, mo oli stap konek wetem yu long intanet. Yu tu, yu wan impoten pat blong mekem merikel ia i hapen.
Sapos yu yu no wan fultaem misinari wetem wan misinari baj we oli pinim long kot blong yu, naoia i taem blong yu pentem wan long hat blong yu—pentem olsem Pol i talem: “Kraes i no yusum ing blong raetem, i yusum Spirit blong God ya we i laef we i no save ded.”13 Mo ol riten misinari, faenem olfala misinari baj blong yu. Yu no putum, be yu putum long wan ples we bae yu save luk. Lod i nidim yu naoia moa i bitim oltaem blong yu stap wan tul long han blong hem. Evriwan long yumi i gat wan pat blong mekem long merikel ia.
Evri stret mo gud memba blong Jos i tingting long olsem wanem blong serem gospel. Sam oli serem gospel i isi nomo, mo yumi save lanem samting long olgeta.14 Sam long yumi oli stap traehad mo tingting se olsem wanem nao blong mekem gud moa; oli wantem tumas se ol filing blong sem we yumi filim samtaem bae oli faenem wan nara ples blong go long hem.
Fasin blong wantem serem gospel i mekem evriwan long yumi i nildaon, mo i mas olsem, from yumi nidim help blong Lod.
Presiden Monson i askem yumi blong prea from “ol eria we yumi gat limit nomo mo we oli no letem yumi no fri tumas blong serem gospel.”15 Taem yumi tingting strong, mo wetem wan tingting, yumi askem Papa blong yumi we i stap long Heven, bae Lod i gohed blong openem ol impoten doa long yumi.
Yumi prea tu blong yumiwan i gat ol janis blong serem gospel. Aposol Pita i givim kaonsel: “Sipos ol man oli askem long yufala from wanem yufala i putum tingting blong yufala i stap long Kraes, oltaem yufala i mas rere blong givim ansa long olgeta.”16
Wetem fasin blong stap konfius,17 mo wetem fasin blong stap mekem samting olbaot18 long wol blong tedei, i no wan sapraes nating se smol namba nomo blong ol pipol oli stap go long Jos. Nomata plante oli wantem kam kolosap long God mo blong kam blong save andastanem moa long bigfala stamba tingting blong laef, oli gat ol kwestin we oli no kasem ansa long olgeta. Plante i gat hat we i open long trutok, be olsem profet Amos i talem: “Bambae yufala i stap go olbaot blong harem tok blong mi. … be neva bambae oli save harem.”19 Yu save help blong ansarem ol kwestin blong olgeta. Long evri dei storian blong yu, yu save ademap samting long bilif blong olgeta long Kraes.20
Sevya i talem: “Leftemap laet blong yufala blong mekem i save saen long wol. Luk mi mi laet we yufala i mas leftemap.”21
Mi promesem yu, taem yu prea blong save hu blong toktok wetem, ol nem mo ol fes bae oli kam long tingting blong yu. Ol toktok blong talem bae oli kam long stret taem we yu nidim olgeta.22 Ol janis bae oli kam long yu. Fet i winim tu tingting, mo Lod bae i blesem yu wetem merikel we i blong yu stret.
Sevya i tijim yumi olsem wanem blong serem gospel. Mi laekem stori blong Andru, we i askem: “?Rabae, yu yu stap long weples?”23 Jisas i save ansa long wanem ples stret Hem i stap. Be Hem i talem long Andru, “Yutufala i kam luk.”24 Mi laekem blong tingting se Sevya i stap talem: “Yutufala i kam luk i no long weples mi stap long hem, be olsem wanem mi stap laef long ples ia. Yutufala i kam luk huia mi. Kam mo filim Spirit.” Yumi no save evri samting abaot dei ia, be yumi save se taem Andru i faenem brata blong Hem Saemon, hem i talem: “Mifala i faenem Mesaea finis.”25
Long olgeta we i soem intres long toktok blong yumi, yumi save folem eksampol blong Sevya blong invaetem olgeta blong “kam mo luk.” Sam bae i akseptem invitesen blong yumi, ol narafala bae i no akseptem. Yumi evriwan i save long wan we oli invaetem hem plante taem kasem we i akseptem blong kam mo luk. Bae yumi tingbaot olgeta we oli bin stap wetem yumi be naoia yumi no lukim olgeta oltaem, invaetem olgeta blong kambak mo luk wan moa taem.
Yumi respektem joes blong wanwan man mo taem blong olgeta. Lod i talem se yumi mas letem evri man i jus blong hemwan.26 Wan man i no gat intres, i no nid blong lusum yumi olsem wan fren mo i no nid blong lusum lav blong yumi. Nomata oli akseptem invitesen blong yu o no taem yu stap invaetem ol narafala blong “kam luk,” bae yu filim se Lod i apruvum, mo wetem hemia, bae yu kasem moa fet blong save serem bilif blong yu bakegen mo bakegen.
Long olgeta we oli stap yusum Intanet mo mobael fon, i gat ol niu wei blong invaetem ol man blong “kam mo luk.” Bae yumi serem fet blong yumi tru long intanet moa olsem wan pat blong laef blong yumi. Lds.org, Mormon.org, Facebook, Twitter— evriwan i givim wan janis.
Blong serem gospel, ol yang memba long Boston i statem sam blog.27 Olgeta we oli joenem Jos oli stat blong lan tru long intanet, folem wetem ol lesen we ol misinari i givim. Ol eksperiens ia oli helpem olgeta yut blong gat strong fet blong toktok abaot gospel long fes. Wan yut i talem: “Hemia i no misinari wok. Hem i misinari gudtaem.”28
Yumi evriwan i stap long wok ia tugeta. Wetem ol branj memba mo ol misinari blong yumi, yumi plan mo prea mo helpem wanwan long yumi. Plis, kipim ol fultaem misinari i stap long tingting mo prea blong yufala. Trastem olgeta blong putum ol famle mo fren blong yufala long han blong olgeta. Lod i trastem olgeta mo i singaotem olgeta blong tijim mo blesem olgeta we oli lukaotem Hem.
Presiden Paolo Kretli blong Mosambik Maputo Misin i serem eksperiens ia: “Hem i wan fasin long Kantri blong Mosambik blong ol kapol i laef tugeta [we tufala i no mared] from se kastom blong Afrika i mekem se oli mas givim wan presen we i sas tumas blong save mared, wan presen we plante kapol i no save pem.”29
Ol memba mo ol misinari oli bin tingting mo prea long olsem blong save help.
Ansa blong prea blong olgeta i blong oli mas tokbaot plante loa blong jastiti mo olsem wanem mared mo famle we i no save finis i impoten. Mo taem oli stap helpem ol kapol blong sakem sin mo afta mared folem loa blong gavman, bae oli tijim olgeta tru glad we i kam taem wan i folem Jisas Kraes.
Hemia i wan pikja blong ol kapol blong tu defren siti long Mosambik. Oli mared long Fraedei, oli kasem baptaes wetem ol pikinini blong olgeta long Satedei.30 Ol fren mo famle oli kasem invitesen blong “kam luk” mo plante handred oli bin “kam luk.”
Afta long baptaes, wan sista i talem: “Mifala i nidim blong jusum blong folem kastom blong ol papa blong mifala, o blong folem Jisas Kraes. Mifala i jusum blong folem Kraes.”31
Ating yu no laef long Mosambik, be long wei blong yu, insaed long kastom blong yu, yu save serem gospel we i kambak blong Jisas Kraes.
Prea long Papa long Heven. Hemia i tabu wok blong Hem. Bae Hem i lidim yu long wanem blong mekem. Hem, bae i openem ol doa, karemaot ol samting we oli stap blokem rod, mo helpem yu winim ol hadtaem. Lod i talem se voes blong woning bae i kasem evriwan long ol pipol, tru long maot blong ol disaepol blong Hem, mo i no gat wan we bae i save stopem olgeta.32
Mi testifae se voes blong Lod bae i mas go long evri kantri long wol, blong evriwan we i harem bae i lisin.33 Hem i wan merikel. Hem i wan merikel. Long nem blong Jisas Kraes, amen.