Gospel I Go long Ful Wol

I Kam long Jon B. Dikson

Blong Olgeta Seventi

Jos i bin muv sloslo i go aot long wol, long wan nesen i go long nara nesen, long wan kalja i go long nara kalja, long wan pipol i go long nara pipol folem kalenda blong Lod mo taem blong Hem.

Seves blong Sevya long wol i bin finis evriwan. Taem ia we Hem i safa long hem long Getsemane mo antap long kros, i pas finis. Yumi bin lanem long buk blong Ol Wok, japta 1 se Hem i bin wok blong 40 dei afta we Hem i bin Laef Bakegen long Ded, ol Aposol oli stap “luk hem” mo “tijim ... ol fasin we oli mas mekem we God i King blong olgeta” (Ol Wok 1:3).

Hem i talem long olgeta se: “Be, taem Tabu Spirit i kam kasem yufala, bambae yufala i gat paoa. Nao bambae yufala i mas go talemaot mi long Jerusalem, mo long olgeta ples long Judia mo Sameria, gogo yufala i finisim olgeta ples long wol” (Ol Wok :8).

I no longtaem afta, “God i tekem hem i go antap long heven. Nao wan klaod i kam kavremap hem, mo olgeta oli no moa luk hem bakegen.

“Taem we olgeta oli stap lukluk long skae yet, wantaem nomo tu man we klos blong tufala i waet, tufala i kam stanap wetem olgeta,

“mo tufala i talem se: ‘Ol man Galili! From wanem yufala i stap stanap long ples ya, yufala i stap lukluk i go antap long skae olsem? Jisas ya we God i tekemaot hem long yufala, i tekem hem i go antap long heven, hem bambae i mas kambak bakegen long sem fasin ya we yufala i luk we hem i go antap’ ” (Ol Wok 1:9–11).

I tru, Sevya bae i kambak bakegen long Seken Kaming blong Hem, be blong naoia, gospel blong Jisas Kraes i blong go long “evri ples long wol.”

Long Matiu yumi lanem abaot wan spesel komanmen i go long ol Aposol blong serem gospel long evri nesen:

“… Nao Jisas i talem long olgeta se, ‘God i givim olgeta paoa long mi, long olgeta samting long heven mo long wol.

“… Yufala i go long ol ples long wol, mo baptaesem olgeta long nem blong Papa, mo long nem Pikinini, mo long Tabu Spirit’ ” (Matiu 28:18–19).

Long ol eli taem blong Jos, long medel blong taem, gospel i bin go long haos blong Isrel nomo; afta wan revelesen i bin kam long Pita, senia Aposol, se i taem nao blong tekem gospel i go moa bitim Isrel mo i go long ol Jentael. Long ol japta 10 mo 11 blong buk blong Ol Wok, i helpem yumi andastanem olsem wanem wei ia mo fasin ia we i nidim blong hapen, blong tekem Jos i go long moa pikinini blong God, i kamaot long olgeta we oli prisaed mo evri memba.

Taem Hem i yusum Konelias, we i bin wan Jentael, wan lida blong ami, mo wan gud man, Lod i traem helpem Pita blong andastanem se gospel bae i go long ol Jentael; samting ia hem i niu mo i defren long ol Sent long taem ia. Revelesen ia we i mekem jenis long ol wok blong Jos i bin kam long Pita, senia Aposol. Yumi save se, afta, gospel ia i bin go kwik long ol nesen blong ol Jentael.

Wan eksampol blong Jos i gro long taem ia, i bin taem Pol i konvet, we afta, i bin kam wan gudfala Aposol long ol Jentael. Hem i bin gat wan visen long taem we hem i stap folem rod long Damaskes, taem hem i bin luk wan laet mo harem wan voes, nao i sakem ol sin blong hem, mo God i bin singaotem hem (luk long Ol Wok 22:6–18), mo hem i bin kam wan strong tul blong serem gospel blong Jisas Kraes.

Naoia yumi muv 1,800 yia i go fored i go kasem taem blong Restoresen blong gospel, o taem we evri samting i kam kambak bakegen bifo Seken Kaming. Mi testifae se tru long Profet Josef Smit, Jos i bin kambak mo i gohed blong muv fored anda long daereksen blong Fas Presidensi mo Kworom blong Olgeta Twelef Aposol. Komanmen blong olgeta blong karem gospel i go long wol i semmak olsem long taem blong ol Aposol blong bifo.

Stat long taem we oli oganaesem Jos blong Jisas Kraes blong Ol Lata-dei Sent long 1830, Jos i bin muv sloslo i go aot long wol, long wan nesen i go long nara nesen, long wan kalja i go long nara kalja, long wan pipol i go long nara pipol folem kalenda blong Lod mo taem blong Hem.

Afta long 1978, folem sem fasin blong kasem revelesen tru wan senia Aposol, be long taem ia Presiden Spensa W. Kimbol, i bin kasem revelesen abaot prishud blong letem evri man we i klin inaf raon long wol blong kasem prishud mo helpem famle blong olgeta mo ol nara man blong kasem evri blesing blong gospel we i kambak. Long taem ia, i no se plante nomo, be evri pikinini blong Papa long Heven raon long wol i save tekpat long evri blesing blong gospel. Hemia i stret gud long kingdom blong God long wol long taem naoia we i stap kam kolosap long Seken Kaming blong Kraes.

Olsem wanem hemia i bin aplae long miwan, mi bin kasem koling blong mi olsem wan misin presiden, mo Sista Dikson mo mi, i stap rere blong tekem famle blong mitufala i go long Meksiko taem Elda Rijad G. Skot, long taem ia i wan memba blong Olgeta Seventi, i bin talem long mi abaot spesel revelesen ia we i jes kamaot. Mi tingbaot wota i kamaot long ae blong mi taem hem i stap talem long mi wanem i bin hapen. Glad blong mi i bigwan tumas we mi no save talem taem mi bin save se i stret mo we i taem nao blong evri man long wol blong gat raet long evri odinens, kavenan, mo ol blesing blong gospel.

Hemia i kolosap 35 yia i pas finis, mo long taem ia mi no bin luksave se bae mi spendem sam yia blong wok olsem wan Seventi long Wes Afrika Eria blong Jos long medel blong wan pipol we oli biliv, mo fetful we laef blong olgeta i save kam gud tru revelesen blong 1978 abaot prishud. Sista Dikson mo mi i bin stap longwe blong fo yia, mo i bin wan gudfala eksperiens mo i jenisim laef blong mitufala.

Ol pipol blong Wes Afrika oli biliv long God, mo oli no gat sem nating blong talemaot mo serem bilif blong olgeta wetem ol narafala man, mo oli gat gudfala save long hao blong kam wan lida. Oli stap kam plante long Jos, mo evri wik olsem, oli krietem sam wod mo branj samples long Wes Afrika, mo kolosap long evriwan, evri prishud mo okseleri lida, oli ol man Afrika nomo.

Mi hop nomo se yufala i save joenem ol Sent long ol tempol long Aba, Naejeria, o Akra, Gana, we yu save filim komitmen blong ol Sent mo kam blong save ol presidensi blong tempol we evriwan oli ol man Afrika, O mi wantem tumas blong presentem yufala long ol Eria Seventi we oli man Afrika, we oli stap wetem yumi long ples ia long Konfrens Senta tedei mo oli ol loya, ol profesa, mo ol bisnis maneja, o mi wantem mekem yufala i mit wetem ol stek mo wod lida blong Afrika wetem ol famle blong olgeta we evriwan i man Afrika.

Long evri ples long Afrika, blong joenem wan Sandei Skul, okseleri, o prishud klas i wan tabu eksperiens we Jos Kurikulum i stap folem mo i gat wan bigfala andastaning, tijing, mo fasin blong lan wetem Spirit.

Gospel long Afrika i stap go long wan hapi pipol, mo oli no wari long wanem we wol i stap givim we i spolem laef blong plante. Oli no wari abaot ol samting we man i save gohed blong gat long wol ia.

I gat wan toktok blong ol man Afrika se “oli gat smol nomo long wanem we i no impoten tumas mo oli gat plante long ol samting we oli moa impoten.” Oli no intres tumas long ol bigfala haos mo ol naes trak, be bigfala intres blong olgeta i blong save Papa blong olgeta long Heven mo Pikinini blong Hem, Jisas Kraes, mo blong gat ol famle we oli no save finis. Olsem ansa blong fet blong olgeta, Lod i leftemap olgeta long plante impoten wei.

Olsem we mitufala i save gud olgeta, hem i no wan sapraes se bae oli kam wan impoten pat blong muvum Jos blong Jisas Kraes long ol las dei ia. Long Doktrin mo Ol Kavenan i tokbaot taem Daniel, profet blong OlTesteman i bin luk long visen, kingdom blong God long ol las dei ia we i rol i kam daon go kasem ol en blong wol, olsem wan ston we i no gat han i katemaot long hil mo i rol i go mo kavremap ful wol (luk longD&C 65:2); Hem i stret wantaem se ol gudfala brata mo sista blong yumi blong Afrika bae oli kam wan impoten pat blong mekem profesi ia i hapen, mo we ol revelesen oli kam folem wanem we Lod i putum finis i stap.

Mi testifae se Papa blong yumi long Heven i lavem evri pikinini blong Hem, se Jisas i Kraes, mo we gospel i blong evriwan, tugeta olgeta we i laef mo olgeta we oli ded, long nem blong Jisas Kraes, amen.