Gudgudfala Wokbaot blong Yu I Gobak Hom

Epril 2013

Gudgudfala Wokbaot blong Yu I Gobak Hom

I Kam long President Dita F. Ukdof

Seken Kaonsela long Fas Presidensi

Taem yu yusum map ia wetem glad, Papa blong yu we i gat lav i givim samting we yu nidim long wokbaot ia, bae yu girap mo kasem bigfala paoa insaed long yu. Bae yu gro i kam wan gel blong God we yu bin hop se bae yu kam olsem.

Yumi gat ona tedei long naet ia blong gat Presiden Tomas S. Monson, profet we yumi lavem tumas i stap wetem yumi. Presiden, mifala i stap prea from yu oltaem.

Ol dia sista blong mi. Tangkyu long miusik mo ol toktok blong yufala. Evri samting i bin leftemap tingting mo i stret gud long Ista, tabu taem ia we yumi stap selebretem long wik ia.

Hem i wan glad blong stap wetem wanwan long yufala, ol impoten yang sista, wetem ol mama blong yufala mo ol gudfala lida blong yufala. Yufala i gat ol spirit we i saen mo ol smael we i kasem mifala. I tru, Lod i stap long heven mo i gat tingting long yufala mo i lukluk long yufala wetem lav.

Mi groap long Sikao, foma Is Jemani. Taem mi gat samples 11 yia, papa blong mi, gavman i stap wajem gud hem from hem i agensem politik blong taem ia, mo papa mo mama i filim se wan sef joes nomo, i blong famle blong mifala i ronwe i go long Wes Jemani. Tufala i talem se sef plan, bae i blong aot long ol defren taem mo mifala i folem ol defren rod i go long Wes, mo livim biaen evri samting blong mifala.

From se papa i stap long bigfala denja, hem i tekem rod we i hariap moa, i go tru long Belin. Bigfala brata blong mi i tekem rod i go Not, mo wanwan i faenem wan rod long Wes. Sista blong mi—we taem ia i gat sem yia olsem plante long yufala tedei—tugeta wetem Helga Fasman, tija blong hem long Yang Woman, mo sam moa, oli tekem tren we i pas sot taem long Wes Jemani. Oli bin pem wan man blong openem wan doa blong olgeta, mo afta we tren i krosem boda blong Wes Jemani, tufala i jiam i go long tren we i stap ron, i go from fridom. Mi stap glad long sista blong mi from strong paoa long tingting blong hem.

Mi mi las pikinini, mo mama blong mi i disaed se hem mo mi, bae i wokbaot krosem wan hil we i stap seperetem tufala kantri. Mi tingbaot se hem i pakemap kakae olsem se mitufala i stap go from wan smol wokbaot o wan piknik long hil.

Mitufala i tekem wan tren i go kasem las rod we i stap, mo afta, wokbaot blong plante longfala aoa, mo stap kam kolosap long boda blong Wes Jemani. Oli stap kontrolem gud ol boda, be mitufala i gat wan map mo save long wan taem mo ples we ating i sef blong krosem. Mi save filim wari blong mama blong mi. Hem i luklukgud long ples olbaot blong luk sapos wan i stap folem mitufala. Evri step we hem i mekem, i olsem leg mo ni blong hem i kam slak moa. Mi helpem hem blong karem wan hevi bag we i fulap long kakae, ol impoten pepa, mo ol famle foto taem mitufala i stap klaem long wan las, longfala hil. Yes, hem i tingting se ating mitufala i krosem boda finis ia. Taem hem i filim se mitufala i sef, mitufala i sidaon, mo stat blong kakae piknik kaekae blong mitufala. Blong fas taem long dei ia, mi sua, se hem i bin pulum gud win blong hem.

Long taem ia nomo, mitufala i luk saen blong boda. !I stap longwe yet long fored blong mitufala! Mitufala i stap kakae kaekae blong mitufala long rong saed blong boda. !Mitufala i stap yet long Is Jemani!

!Ol gad blong boda oli save kamaot long eni taem!

Mama blong mi, i hariap blong fulumap kaekae blong mitufala, mo mitufala i hariap i go antap long saed blong hil. Tetaem ia, mitufala i no tingting blong stop kasem taem mitufala i save stret se mitufala i kasem narasaed blong boda.

Nomata wanwan memba blong famle blong mifala i tekem ol defdefren rod mo gotru long ol defdefren hadtaem folem rod ia, long en, evriwan long mifala i kam tugeta sef. Mifala i kam wan bakegen olsem wan famle. !Hemi bin wan gudfala dei!

Ol Stori blong Ol Wokbaot

Wanem mi jes talem long yufala i wan eksperiens, we long mi, i wan impoten wokbaot. Naoia, mi save lukbak long laef blong mi mo luksave plante kaen “wokbaot” we mi bin tekem ova long plante taem. I no evriwan we i nidim blong krosem ol hil o ol baondri blong politik; sam, i moa blong winim ol tes, o blong groap long saed blong spirit. Be long wan wei, evriwan, oli ol wokbaot. Mi biliv se evri laef i ol smol hip blong “wokbaot stori” blong wanwan man o woman.

Mi save se yufala i save se evri kastom kalja i rij wetem ol storian blong ol wokbaot. Eksampol, ating yufala i save gud long wokbaot blong Doroti mo dog blong hem, Toto, insaed long The Wizard of Oz (Kleva blong Osi). Doroti mo Toto, oli stap long wan wael win mo i sakem tufala long Graon blong Osi. Longwe, Doroti i faenem wan spesel yelo brikis rod we i makem rod blong wan wokbaot we i lidim hem i gobak hom.

Afta, i gat stori blong Jals Diken, abaot Ibinisa Skrug, we wokbaot blong hem i tekem hem i no long wan ples i go nara ples, be wan taem i go kasem nara taem. Hem i wan wokbaot we i go insaed long hat blong hemwan blong helpem hem andastanem from wanem hem i kam olsem we hem i stap, mo luk wanem bae i hapen long hem sapos hem i bin gohed long rod blong hem blong fasin blong selfis mo no gat hat.¹

Wan long ol Bigfala Klasik Stori blong Jaena, i Wokbaot i go long Wes. Oli raetem long nambasikstin senturi, mo i tokbaot naes wokbaot stori mo tabu wokbaot blong wan Budis man, we, wetem help blong fo fren, i wokbaot from niu laet mo save long saed blong spirit.

Mo yes, i gat Bilbo Bagins, smol hobit wetem tingting i stap daon, we i wantem tumas blong stap long hom mo kakae sup blong hem. Be afta wan i noknok long doa blong hem, hem i folem singaot ia i go long ples we hem i no save mo i go aot long wol wetem wan kleva mo wan grup blong dwaf blong mekem wan impoten misin.²

Wan Stori we I blong Ful Wol

?I no tru se yumi laekem ol wokbaot storian ia from se yumi save luksave yumiwan long ol man blong wokbaot ia? Ol sakses mo ol samting we oli no winim, oli helpem yumi blong faenem rod blong yumi long laef. Vidio we yumi bin jes luk, i tokbaot tu wan naes wokbaot stori. Ating, ol stori ia oli mekem yumi tingbaot long wan wokbaot storian we yumi evriwan i sud save gud long hem—wan wokbaot stori we yumi evriwan i gat wan impoten pat long hem.

Stori ia i stat longtaem finis i pas, longtaem bifo wol i stat blong tantanem hem, bifo olgeta san we i no muv i stat blong sakem ol han blong hem we i gat faea i go kasem kolkol blong spes, bifo olgeta ol klaod mo ren mo ol samting we oli laef, bigwan mo smolwan, oli kam fulap long wol. Long stat blong stori ia, yufala i bin stap long wan ples longlongwe we i naes.

Yumi no save plante samting abaot laef long laef ia bifo laef long wol, be yumi save sam samting. Papa long Heven i talemaot long yumi huia Hem, huia yumi, mo huia yumi save kam.

Long fas laef, yufala i bin save wetem stret save se God i bin stap from se yu bin luk mo harem Hem. Yufala i bin save Jisas Kraes, we bae i kam Smol Sipsip blong God. Yufala i bin gat fet long Hem. Mo yufala i bin save se fiuja blong yufala i no blong stap long sef ples ia blong hom long laef bifo laef long wol. Nomata yufala i bin lanem tumas wol ia we i no save finis, yufala i bin save we yufala i wantem mo i nid blong statem wan wokbaot . Bae yufala i aot long han blong Papa blong yufala, i pas tru long wan vel we yufala i fogetem evri samting, i kasem wan bodi blong mit mo bun, mo lanem mo gat eksperiens long ol samting we, wetem hop, bae i helpem yufala blong gro blong kam moa olsem Papa blong yumi long Heven mo gobak long ples we Hem i stap long hem.

Long tabu ples ia, wetem olgeta we yufala i bin save mo lavem, bigfala kwestin long maot blong yufala mo hat blong yufala long tetaem ia i: “Bae mi save kambak sef long hom blong mi long heven?”

I bin gat plante samting we bae i nomo gat kontrol long hem. Laef long wol ia bae i had, i fulap long ol kona long rod: sik, hat i soa, aksiden, raorao.

Bae yufala i nomo tingbaot fasfala laef—yufala i nomo tingbaot se i bin gat wan taem we yufala i bin wokbaot wetem Papa blong yufala long Heven—?Olsem wanem? ?Bae yufala i stil haremsave voes blong Hem long medel blong evri noes mo defren kaen samting blong laef long wol ia?

Wokbaot we i stap, i olsem se i longwan mo i no sua—i fulap long denja.

Bae i no isi be yufala i save se i gud blong pem praes ia blong evri hadwok.

Mekem se, yufala hemia, yufala i stanap long stat blong taem we i no save finis, i stap luk fored we yufala i glad gud mo gat fulap hop—be tu, mi ting, yufala i wari mo fraet bigwan.

Long en, yufala i bin save se God bae i mekem samting i stret—se gud fasin blong Hem bae i win. Yu bin tekpat long ol bigfala kaonsel blong heven, mo yufala i bin save se Sevya mo Ridima blong yufala, Jisas Kraes, bae i givim wan rod blong yufala i kam klin aot long sin, mo i sevem yufala long ded blong bodi. Yufala i bin gat fet se, long en, bae yufala i glad mo joenem voes blong yufala wetem wan kores blong heven we i singsing ol pres long tabu nem blong Hem.

Mekem se yufala i pulum gud win blong yufala …

Mo mekem wan bigfala step …

!Nao yufala i stap ia!

!Wanwan long yufala, i bin statem gudfala wokbaot blong yufalawan i gobak long hom blong yufala long heven!

Map blong Yufala

Naoia we yufala i stap long ples ia long wol, ating i waes blong askem yufalawan olsem wanem nao long wokbaot blong yufala. ?Yufala i stap long stret rod? ?Yufala i stap kam man o woman we oli putum i stap long fas ples mo yufala i wantem kam? ?Yufala i stap mekem ol joes we bae i helpem yufala blong gobak long Papa blong yufala we i stap long Heven?

Hem i no bin sendem yufala long wokbaot ia blong yufala i stap wokbaot olbaot nating nomo yufalawan. Hem i wantem yufala blong gobak hom stap wetem Hem. hem i bin givim long yufala, ol papa mo mama we oli gat lav mo ol fetful Jos lida, wetem wan map we i soemaot ples mo i poenemaot ol denja; map ia i soem weaples pis mo hapines i stap long hem mo i helpem yufala blong raetem rod blong yufala i gobak hom.

?Nao, weaples nao bae yufala i faenem map ia?

Insaed long ol tabu skripja.
Insaed long ol toktok blong ol profet mo ol aposol.
Mo tru long revelesen blong yuwan we i kam tru long Tabu Spirit.

Map ia, i gospel blong Jisas Kraes, gudfala nius ia, mo glad fasin blong wan disaepol blong Kraes. Hem i ol komanmen mo eksampol we i kam long yumi tru long Loya mo Tija blong yumi, we i save rod, from se Hem nao i rod.³

I tru. Blong gat wan map nomo, i no help tumas sapos yufala i no stap stadi long hem—sapos yu no yusum hem blong gotru long laef. Mi invaetem yufala blong mekem i kam faswan long laef blong yufala blong stadi mo yusum ol toktok blong God. Openem hat blong yufala long Tabu Spirit, blong mekem se Hem i save lidim yufala long taem blong wokbaot blong yufala long laef.

Map blong yufala i fulap long ol mesej blong leftemap tingting mo blong givim daereksen we i kam long Papa blong yufala long Heven mo Pikinini blong Hem Jisas Kraes. Tedei, mi wantem serem wetem yufala, tri long ol mesej ia we bae i helpem yufala blong gat sakses long wokbaot blong yufala i go bak long hom blong yufala long heven.

Fas mesej: “Yufala i no fraet, from se mi, Lod, mi stap wetem yufala.”⁴

Yufala i no stap yufalawan long wokbaot ia. Papa blong yufala long Heven i save yufala. Taem we i no gat man i harem yufala, Hem, Hem i harem yufala. Taem yufala i stap glad long stret mo gud fasin, Hem i stap glad wetem yufala. Taem yufala i kasem tes, Hem i stap harem nogud wetem yufala.

Tingting we Papa long Heven i gat long yufala i no dipen long hamas yufala i rij, o luk naes, o stap helti, o stap smat. Hem i no stap luk yufala long wei we wol i stap luk yufala; Hem i luk yufala stret olsem we yufala i stap naoia. Hem i lukluk long hat blong yufala.⁵ Mo Hem i lavem yufala⁶ from se yufala i pikinini blong Hem.

Ol dia sista. Lukaotem Hem wetem strong tingting, mo bambae yufala i faenem Hem.⁷

Mi promesem yufala, se yufala i no stap yufalawan.

Naoia, tekem smol taem naoia nomo, mo lukluk ol pipol raon long yufala. Sam, oli ol lida blong yufala, ol fren, mo ol memba blong famle. Sam narawan, yufala i neva mitim bifo. Be, evriwan we yufala i luk raon long yufala—long miting ia, o long eni narafala ples, tedei o long wan nara taem—i bin strong long laef bifo laef long wol. Nomol man o woman wetem tingting i stap daon we i stap sidaon long saed blong yu, ating i wan we yu bin lavem hem tumas mo yu bin stap glad long hem long wol blong ol spirit. !Ating yufalawan i bin wan gudfala eksampol!

Wan samting we yu save sua long hem: evri man mo woman we yufala i luk—nomata kala blong skin blong hem, relijin, politik bilif, bodi blong hem mo hao hem i luk—i wan famle. Yang woman we yufala i stap luk, i gat semfala Papa long Heven we yufala i gat, mo hem tu, i aot long ples blong Hem we i gat lav, semmak olsem yufala, mo hem tu, i wantem tumas blong kam long wol ia mo laef blong mekem se, wan dei, hem i save gobak long Hem.

Be, ating bae hem i filim se hem i stap hemwan, semmak olsem yufala samtaem. Samtaem, hem i stap fogetem stamba tingting biaen long wokbaot blong hem. Plis, mekem hem i tingbaot, tru long ol toktok mo aksen blong yufala, se hem i no stap hemwan. Yumi stap ia blong helhelpem yumi.

Laef i save had, mo i save mekem hat i kam strong i go kasem poen we sam pipol, yumi nomo save toktok long olgeta. Sam, oli fulap long kros. Sam narawan oli save jik mo daonem olgeta we oli biliv long wan God we i gat lav. Be tingting long hemia: nomata oli nomo tingbaot, olgeta tu, long wan taem, oli bin wantem tumas blong gobak long Papa blong olgeta we i stap long Heven.

Hem i responsabiliti blong yufala blong jenisim laef blong eniwan. Hemia i wok blong Tabu Spirit. Wok blong yu, i blong serem ol bilif blong yu, mo no stap fraet. Stap wan fren long evriwan, be neva salemaot ol standet blong yu. Stanap tru long ol bilif mo fet blong yu. !Stanap wetem hed antap, from se yu wan gel blong God, mo Hem i stanap wetem yu!

Seken mesej: “Lavlavem yufala olsem we mi mi lavem yufala.”⁸

?Yu bin askem yuwan finis se yumi bin toktok long wanem lanwis taem yumi bin stap wetem God? Mi mi biliv strong se yumi bin toktok lanwis blong Jemani, mo mi ting tu i no gat wan i save stret. Be mi save se long laef bifo laef long wol, yumi bin lanem stret long Papa blong spirit blong yumi, wan lanwis we i blong evriwan—wan we i gat paoa blong winim ol fanis blong filing, bodi mo spirit.

Lanwis ia, hem i stret klin lav blong Jisas Kraes.

Hem i lanwis we i gat moa paoa long wol ia.

Lav blong Kraes i no wan lav blong priten. Hem i no wan lav we oli raetem long kad. Hem i no kaen lav ia we oli stap presem long popula miusik mo muvi.

Lav ia, i mekem se man mo woman i jenisim fasin blong hem. Hem i stikim kros mo i mekem jalus i lus. Hem i hilim fasin blong agens mo i kilimdaon ol faea blong konkon fasin. Hem i mekem ol merikel.

Yumi bin kasem ol fas lesen⁹ blong lanwis ia blong lav olsem ol spirit long ples blong God; mo long ples ia, long wol, yumi gat janis blong yusum mo save toktok gud long hem. Yu save save se yu stap lanem lanwis ia taem yu skelem yuwan wanem nao i pusum ol tingting mo ol aksen blong yu.

Taem ol fas tingting blong yu oli stap long wei we bae yu profite long ol samting, nao ol tingting blong yu oli selfis mo oli emti. Hemia, i no lanwis we yu wantem lanem.

Be taem ol fas tingting mo aksen blong yu oli lukluk long seves long God mo ol narawan—taem i tru, yu wantem blong blesem mo leftemap olgeta we oli stap raonabaot long yu—nao paoa blong stret lav blong Kraes i save wok insaed long hat mo laef blong yu. Hemia nao lanwis we yu wantem lanem.

Taem yu kam blong toktok gud long lanwis ia mo yusum lanwis ia long ol wokbaot blong yu wetem ol narawan, bambae oli luksave wan samting insaed long yufala we bae i wekemap insaed long olgeta, wan filing we i bin haed, blong lukaotem stret wei long wokbaot blong olgeta i gobak long hom blong olgeta long heven. Long en, lanwis blong lav, hem i wantok lanwis blong olgeta tu.

Paoa i we i dip mo i stap, hem i lanwis we i go stret i go kasem sol. Hem i lanwis blong haremsave samting, lanwis blong givim seves, lanwis blong leftemap tingting, stap glad, mo givim kamfot.

Lanem blong yusum wantok lanwis blong lav blong Kraes.

Mo nambatri mesej: “Stap glad.”¹⁰

Samtaem, yumi no glad se yumi no muv kwik long wokbaot blong yumi, ?i tru o no? Sapos yu gat 12 yia, ating yu wantem se yu gat 14. Taem yu gat 14 yia, yu wantem gat 18 yia. Mo taem yu gat 18, wanwan taem yu wantem se yu gat 12 yia bakegen blong statem evri samting bakegen.

Oltaem, bae i gat wan samting blong komplen from—ol samting we yu luk se i no stret. Yu save spendem plante dei blong harem nogud, stap yuwan, we oli no andastanem yu, o oli no wantem yu. Be hemia i no wokbaot we yu bin hop from; hem i no wokbaot we Papa long Heven i bin sendem yu blong folem. !Tingbaot, yu, i tru, yu wan gel blong God!

Wetem hemia long tingting, mi invaetem yufala blong wokbaot wetem tras mo glad. Yes. Rod ia i gat ol smol hil mo ol longfala rod blong hem, mo sam samting i blokem. Be yu no lukluk long olgeta. Lukaotem hapines we Papa blong yu we i stap long Heven i mekem rere blong yu long evri step blong wokbaot blong yu. Hapines i ples blong kasem, be hem i rod ia tu. “Pis long wol ia, mo laef we i no save finis long wol we i stap kam” i wanem Hem i promesem yumi.¹¹ Hemia nao from wanem Hem i komandem yumi blong “stap glad”.

Ol dia sista, dia yang woman blong Jos, ol dia yang fren. Olsem wan Aposol blong Lod, mi livim wan blesing long yufala se bae yufala i faenem rod blong yufala long wokbaot ia i gobak hom, mo bae yu stap olsem wan insperesen long ol fren we oli wokbaot wetem yufala. Hem i promes mo prea blong mi tu, se, taem yu stap ona mo laef long tru fasin long ol kavenan, ol prinsipol, mo ol valiu blong gospel blong Jisas Kraes, long en blong wokbaot blong yufala, bae Papa long Heven i stap ia. Bae Hem i akseptem yufala, mo bae yufala i save gud evriwan se yufala i bin kasem hom sef. Long nem blong Jisas Kraes, amen.