Fo Taetol

I Kam long Presiden Dita F. Ukdof

Seken Kaonsela long Fas Presidensi

Mi wantem tokbaot fo taetol … oli save helpem yumi blong luksave wanem wok blong yumi wanwan insaed long plan we i no save finis blong God, mo wanem paoa yumi save kasem olsem ol man we i kasem prishud.

Ol dia brata mo ol fren we mi lavem tumas, ol fren wokman blong mi long prishud blong God. Hat blong mi i fulap long tangkyu mo glad blong stap wetem yufala. Mi presem yufala, ol papa mo bubuman we yufala i tekem ol boe mo apuboe blong yufala i kam. Mi kongratuletem yufala ol yang man we yufala i jusum blong stap long ples ia tedei. Hemia stret ples blong yufala i stap long hem. Mi hop yufala i save filim se yumi ol brata we yumi stap wan, mo mi prea se long ples ia, long medel blong ol brata blong yufala, yufala i filim se yufala i pat blong wan grup, yufala i gat sapot mo fren.

Yumi, ol man, samtaem yumi stap singaotem yumi long ol taetol. Plante long yumi i gat fulap taetol, mo wanwan i talem wan impoten samting abaot aedentiti blong yumi. Eksampol. Sam taetol i tokbaot wok blong yumi long famle, olsem, boe, brata, hasban, mo papa. Ol nara taetol oli tokbaot ol wok blong yumi long wol, olsem dokta, soldia, o handikraf man. Mo sam oli tokbaot ol posisen blong yumi insaed long Jos.

Tedei, mi wantem tokbaot fo taetol, we mi biliv, i blong evri man we i kasem prishud raon long wol—ol taetol ia, oli save helpem yumi blong luksave wanem wok blong yumi wanwan insaed long plan we i no save finis blong God, mo wanem paoa yumi save kasem olsem ol man we i kasem prishud insaed long Jos blong Jisas Kraes blong Ol Lata-dei Sent.

Boe blong Papa long Heven

Wan taetol we i talemaot huia yumi evriwan, long evri wei, hem i boe blong Papa long Heven. I nomata yumi stap olsem wanem mo mekem wanem moa long laef, yumi neva mas foget se yumi ol stret spirit pikinini blong God. Yumi ol pikinini blong Hem bifo yumi kam long wol ia, mo bambae yumi stap ol pikinini blong Hem fogud. Stamba trutok ia i mas jenisim wei we yumi lukluk yumiwan bakegen, wei we yumi lukluk ol brata mo sista blong yumi, mo wei we yumi lukluk laef.

Sore tumas, i no gat wan long yumi i laef i kasem mak we taetol ia i tokbaot, from se “[yumi] evriwan i mekem sin, mo [yumi] stap afsaed olgeta long ol gudfala fasin blong God.”¹

Samtaem, tingting i save slak taem yumi save se i minim wanem blong stap olsem wan boe blong God, mo yet, yumi no naf long toktok ia. Enemi i laekem blong profite long ol filing ia. Setan i wantem tumas se yu luk yuwan tru ol sin blong yu, be i no tru long ol tabu paoa blong yu. Ol brata. No lisin long hem.

Yumi evriwan i bin luk wan smol bebi i stap lan blong wokbaot. Hem i tekem wan smol step mo i seksek. Hem i foldaon. ?Yumi tok strong long hem from hem i stap traem? No, i no olsem. ?Wijwan papa nao bae i panisim wan smol bebi from hem i foldaon? Yumi leftemap tingting, yumi klapklap, mo yumi presem hem, from we, wetem evri smol step ia, pikinini ia i stap kam moa olsem papa mo mama blong hem.

Nao, ol brata. Sapos yumi komperem yumi long fasin blong God we i stret gud evriwan, yumi, ol man long wol ia, yumi moa stronghed bitim ol bebi ia we oli stap foldaon. Be Papa blong yumi long Heven we i lavem yumi, i wantem yumi kam moa olsem Hem, mo, ol dia brata, Hem i wantem yumi gat ol gol we i no save finis. God i andastanem se yumi kasem ples ia i no long wan step nomo, be wetem wan step folem wan narawan.

Mi no bin biliv long wan God we bae i putum ol rul mo ol komanmen nomo blong stap wet blong yumi foldaon, mo afta, bae Hem i panisim yumi. Mi biliv long wan Papa long Heven we i gat lav mo kea, mo i glad long evri hadwok blong yumi blong stanap wetem hed antap mo wokbaot i go long Hem. Mo tu, taem yumi foldaon, Hem i askem yumi blong no slakem tingting—blong no givap, o ronwe long wok blong yumi we i stap—be blong gat paoa long tingting, faenem fet blong yumi, mo gohed blong traem.

Papa blong yumi long Heven i stap tijim ol pikinini blong Hem, mo plante taem, i sendem ol help we i kam long heven we yumi no luk blong helpem olgeta, we wetem fet, oli wantem blong folem Sevya.

Disaepol blong Jisas Kraes

Mo hemia i lidim yumi long nekis taetol we yumi evriwan i gat: Evriwan we i wantem tumas blong folem Kraes, oli singaotem olgeta ol disaepol blong Hem. Nomata yumi luksave se i no gat wan long yumi i stret gud evriwan, yumi no yusum hemia olsem wan eskius blong daonem ol tingting blong yumi, blong laef andanit long paoa blong yumi, blong pusumbak dei blong sakem sin, o blong no wantem blong gro i kam gud moa, moa stret gud evriwan, moa gud evriwan blong folem Masta mo King blong yumi.

Tingbaot se Jos blong Jisas Kraes blong Ol Lata-dei Sent oli no bildim blong ol man mo ol woman we oli stret gud evriwan—we oli no stap kasem ol temtesen blong wol ia—be, hem i blong ol pipol ia we oli olsem yu mo mi. Mo oli bildim i stap antap long ston blong Ridima blong yumi, Lod Jisas Kraes,² we tru long Atonmen blong Hem, yumi save kam klin mo kam “ol man we yumi blong haos blong God.”³

Sapos i no gat Atonmen blong Jisas Kraes, laef bae i wan rod we i fas samples, i no gat hop o fiuja blong hem. Wetem Atonmen, laef i leftemap spirit, i wan gudfala rod blong groap mo develop we i lidim yumi long laef we i no save finis long ples we Papa blong yumi long Heven i stap long hem.

Be nating we Atonmen i stap blong helpem yumi evriwan blong kam moa olsem Kraes, hem i no stap blong mekem yumi evriwan i semsemmak. Samtaem, yumi stap miksim ol defren fasin blong man wetem sin. Samtaem, yumi stap mekem mistek ia tu blong gat tingting ia se from wan i defren long yumi, nao i minim se God i no glad long olgeta. Kaenkaen tingting olsem i lidim sam blong biliv se Jos i wantem krietem evri memba aot long wan singgel tin—se wanwan i mas lukluk, i filim, i tingting mo mekem sem samting olsem ol narawan. Hemia bae i agensem waes tingting blong God, we i bin krietem evri man i defdefren long brata blong hem, mo evri boe i defren long papa blong hem. Iven ol stret twin oli no semsemmak evriwan, long fasin mo spirit aedentiti blong tufala.

Hem i go agensem tu tingting mo stamba tingting blong Jos blong Jisas Kraes, we i luksave mo protektem fasin blong mekem joes—wetem evri samting we i kam wetem—joes ia blong wanwan mo evriwan long ol pikinini blong God. Olsem ol disaepol blong Jisas Kraes, yumi kam wan long testemoni blong yumi long saed blong gospel we i kambak mo komitmen blong yumi blong kipim ol komanmen blong God. Be, yumi defdefren long ol samting we yumi laekem long kalja, sosaeti mo politik.

Jos i traehad taem yumi tekem janis aot long ol defdefren samting ia mo i leftemap tingting blong wanwan long yumi blong developem mo yusum ol talen blong yumi blong leftemap mo mekem ol disaepol blong yumi oli kam strong moa.

Ol brata. Fasin blong stap disaepol i wan rod blong wan laeftaem blong stap folem Sevya. Long rod ia blong yumi we i stat long Betlehem i go kasem Golgota, bae yumi gat plante janis blong stop long rod blong yumi. Samtaem, bae i olsem se rod ia i askem moa bitim wanem we yumi wantem. Be olsem ol man blong prishud, yumi mas gat strong paoa long tingting blong folem Ridima blong yumi, iven taem kros blong yumi i hevi blong tekem i go.

Wetem evri step we yumi tekem blong folem Pikinini blong God, bae yumi tingbaot se yumi no stret gud evriwan yet. Bae yumi mas stanap strong mo gohed olsem ol disaepol. Yumi no mas givap. Yumi mas tru long ol kavenan blong yumi. Yumi no mas tekemaot ae blong yumi long Loya mo Ridima blong yumi taem yumi stap wokbaot i go from Hem, wan step we i no stret evriwan folem wan nara step.

Man we I Mekem Sol I Kam Gud Bakegen

Ol brata. Sapos yumi tru blong stap folem Lod Jisas Kraes, yumi mas akseptem wan nambatri taetol: Man blong mekem sol i kam gud bakegen. Yumi, we oli bin odenem yumi long prishud blong God, Hem i singaotem yumi blong praktisim fasin blong hilim man.⁴

Hem i wok blong yumi blong bildimap, riperem, mekem i kam strong, mo leftemap mo mekem man i kam gud evriwan. Wok blong yumi i blong folem eksampol blong Sevya mo go aot long olgeta we oli stap safa. Yumi “i glad blong krae wetem olgeta we oli krae, … mo leftemap tingting blong olgeta we oli nidim fasin blong leftemap tingting.”⁵ Yumi mekem gud ol soa blong olgeta we oli harem nogud. Yumi givhan long olgeta we oli no strong, leftemap ol han we oli hang i kamdaon, mo mekem ol ni ia we oli no strong oli kam strong moa.⁶

Olsem ol hom tija, yumi stap hilim man. Olsem ol prishud lida, yumi hilim man. Olsem ol papa, ol boe, ol brata, mo ol hasban, yumi mas komitim yumi mo givim taem blong yumi blong hilim man. Yumi tekem long wan han, smol botel blong tabu oel blong blesem ol sikman; long nara han yumi tekem wan ful bred blong fidim olgeta we oli hanggri; mo insaed long hat blong yumi, yumi tekem toktok blong God we i givim pis, “we i mekem ol sol we i gat soa i kam oraet bakegen.”⁷

Hemia nao fas mo bigfala responsabiliti blong yumi olsem man we i kasem prishud—mo hem i blong olgeta we oli kasem Aronik Prishud mo olgeta we oli kasem Melkesedek Prishud. Gospel blong Jisas Kraes we i kambak i blesem ol laef, i no taem nomo yumi biliv long hem—be moa nao taem yumi laef folem. Taem ol pipol oli yusum ol gospel prinsipol long wanwan laef blong olgeta, nao hemia i leftemap olgeta mo ol famle oli kam strong moa. Hem i spesel janis blong yumi mo responsabiliti blong yumi, i no blong toktok nomo, be blong wokbaot folem toktok blong yumi.

Sevya i stap mekem ol merikel. Hem i bigfala man blong hilim man. Hem i eksampol blong yumi, laet blong yumi long ol taem blong tudak, mo Hem i soemaot stret rod long yumi.

Bae yumi folem Hem. Bae yumi stanap mo mekem wok blong yumi mo kam man blong hilim man taem yumi givim seves long God mo long ol narafala man.

Yumi Gat Raet long Laef we I No Save Finis

Nambafo taetol we yumi evriwan i serem i mekem yumi gobak long fas taetol blong yumi long lis—olsem ol boe blong Papa blong yumi long Heven, yumi evriwan i gat raet long evri samting we Hem i gat.

“Spirit ya blong i kam joen long tingting blong yumi, blong talemaot we yumi pikinini blong God.

“Nao from yumi pikinini blong hem, bae yumi save joen long Kraes blong kasem haf long ol gudgudfala samting we God i putum olgeta oli tabu, se oli blong Kraes. Mo from yumi joen long Kraes long harem nogud olsem we hem i harem nogud, bae yumi joen wetem hem blong kasem gudfala laef blong hem long heven.”⁸

Tingbaot hemia, ol brata blong mi we mi lavem yufala. !Yumi joen wetem Kraes long evri samting we God i gat!

So, ?yufala i ting se i wan stret tingting blong plante long yumi i spendem taem blong yumi we i impoten tumas, ol tingting, ol samting, mo ol paoa blong yumi blong stap wok blong kasem ol hae nem, ol ting blong wol, o blong stap westem taem wetem ol niu mo gud lektronik tul?

Lod i putum yumi long fored blong tabu promes blong hem se huia i fetful blong kasem tufala prishud ia, blong wok strong long ol koling blong olgeta, bae oli akseptem Hem, Lod i talem; mo hem we i akseptem Lod, i akseptem Papa blong Hem; from hemia bambae Lod i givim long hem evri samting we Papa blong Hem i gat.⁹

Hem i bitim paoa blong tingting blong mi blong mi traem tingting long wanem nao promes ia i minim. Be mi save se hem i bigwan tumas, i tabu, i no save finis, mo i inaf blong hadwok from, long laef.

Taem yumi save hemia, ?olsem wanem nao i posibol blong yumi no wantem mo stap glad blong wok blong Lod mo ol narafala man mo stap laef long mak blong ol responsabiliti blong yumi insaed long prishud blong God?

Hemia i wan wok we bae i givim jalenj long evri filing mo paoa blong bodi blong yumi. ?Bae yumi wantem blong luk ol heven oli open mo witnesem toktok blong Tabu Spirit we i soemaot long yumi rod ia? Nao, !yumi mas tekem huknaef blong yumi, mo gobak long bigfala wok ia—wan wok we i moa bigwan bitim tingting blong yumi bakegen!

Blong wok blong God mo ol narafala man, bae i givim jalenj long yumi mo jenisim yumi i kam wan man we i moa bigwan bitim wanem yumi save tingting long hem.

Ating, yu tingting se oli no nidim yu, se man i no luk yu, o oli no wantem yu, se yu yu nating nomo.

Mi sore tumas sapos eniwan we i kasem prishud i filim olsem. Yes, Papa long Heven i luk yu mo i wantem yu. Hem i lavem yu. Mo mi talemaot long yu, se i tru, Jos i nidim yu tumas.

?Yu yu save se “God i jusumaot ol samting we ol man blong wol oli stap talem se oli krangke, blong mekem ol man we oli gat waes oli sem. Mo hem i jusumaot ol samting we ol man blong wol oli stap talem se oli no gat paoa blong mekem ol man we oli gat paoa oli sem”? ¹⁰

Ating i tru se yumi no strong. Ating yumi no waes o gat paoa. Be taem God i wok tru long yumi, i no gat wan man, i no gat wan samting we i save stanap agensem yumi.¹¹

From hemia nao, oli nidim yu. Yu gat wan spesel pat blong yu givim, mo God i save mekem pat blong yu ia i kam bigwan long wan wei we i gat paoa. Paoa blong yu blong save givim samting i no dipen long koling blong yu long Jos. Ol janis blong givim seves oli no gat en. Sapos yu stap wet long saed rod, mi leftemap tingting blong yu blong yu kam joen.

Yu no wet blong kasem wan koling blong stat blong wok fulwan blong bildimap kingdom blong God. Olsem wan we i kasem prishud, oli singaotem yu blong mekem wok. Stadi long toktok blong God evri dei, prea long Papa long Heven evri dei, fulumap insaed long yu ol prinsipol blong gospel we i kambak, talem tangkyu long God, mo askem help blong Hem. Afta, laef folem wanem we yu bin lanem, faswan, insaed long famle blong yu, be tu, insaed long evri situesen blong laef blong yu.

Long bigfala miusik blong Lod, yu gat wan spesel pat blong plei—ol stret toktok blong singsing long hem. Sapos yu no mekem, yes, miusik ia bae i gohed. Be sapos yu stanap mo joenem kores mo letem paoa blong God i wok tru long yu, bae yu luk “ol windo blong heven” oli open, mo bae Hem i kapsaetem wan blesing, we bambae i no gat inaf rum blong tekem.¹² Kam antap long tru paoa blong yu olsem wan boe blong God, mo yu save stap olsem wan fos blong mekem gud long famle, hom, komuniti, kantri blong yu, mo yes, long wol.

Taem yu mekem hemia, taem yu lusum laef blong yu long seves i go long ol narafala man,¹³ bae yu stap gro mo develop kasem taem yu kam bigman, we yu olsem Kraes we i bigman tru.”¹⁴ Afta, bae yu rere blong kasem, wetem Kraes, evri samting we Papa blong yu i gat.

Yu Impoten long God.

Ol dia brata blong mi. Ol dia fren blong mi. Yufala i impoten. Oli lavem yufala. Oli nidim yufala. Wok ia i tru. Prishud we yufala i gat spesel janis blong gat, i tru, i kam long God.

Mi prea se taem yufala i tingting hevi long ol taetol we wan prishud we i klin inaf i gat, bae yu faenem we i gat wan tabu win long baksaed blong yu, we i stap leftemap yu i go antap, i go blong kasem ol samting we Papa blong yumi long Heven i putum i stap blong yu. Mi livim blesing ia mo testemoni blong mi i stap wetem yufala, long nem blong Jisas Kraes, amen.