Mared: Lukluk mo Lanem
I Kam long Elda L. Witni Kleiton
Blong Presidensi blong Olgeta Seventi
Ol promes blong Lod i go long evriwan we oli stap folem paten blong laef we i stap bildimap wan hapi, tabu mared rilesensip.
Wan naet, plante yia i pas finis, waef blong mi mo mi i stap visitim hom blong wan boe blong mitufala mo waef blong hem wetem ol pikinini long wan dina. Hem i wan nomol taem blong wan famle wetem ol smol pikinini: i gat fulap noes mo plante pleplei. Afta long dina, apugel blong mitufala we i gat fo yia, Ana, mo mi, i stap sidaon long tebol yet. Hem i luk se mitufala nomo, hem i stanap stret long wan stul, i lukluk stret long mi. Taem hem i save gud se mi stap lukluk hem, hem i givim oda long mi blong mi “lukluk mo lanem.” Afta, hem i danis mo singsing long wan singsing long mi.
Instraksen blong Ana blong “lukluk mo lanem” i waes tingting we i kamaot long maot blong wan bebi. Yumi save lanem plante samting taem yumi stap lukluk samting, afta, tingting long wanem yumi bin lukluk mo filim. Wetem sem tingting ia, bae mi serem wetem yufala sam prinsipol mi bin lukluk mo lanem long ol gudfala mo fetful mared. Ol prinsipol ia, oli bildim strong, mo gudfala mared we oli fit wetem ol prinsipol blong heven. Mi invaetem yufala blong lukluk mo lanem wetem mi.
Faswan, mi bin luk se long ol mared we oli hapi, tugeta, hasban mo waef oli tekem rilesensip blong tufala i olsem perel ia we praes blong hem i sas tumas, wan rij samting we i impoten tumas. Tugeta, tufala i aot long papa mo mama blong tufala, mo tugeta putum taem blong bildimap wan mared we bae i gro blong taem we i no save finis. Tufala i andastanem se tufala i wokbaot long wan rod we Lod i odenem i tabu. Tufala i save se i no gat eni kaen rilesensip we i save tekem glad i kam, i givimaot gud, o mekem man i kam gud moa. Lukluk mo lanem: ol nambawan mared patna oli lukluk se mared blong tufala, i no gat praes long hem.
Nekiswan, fet. Ol mared we oli gat sakses oli bildimap olgeta long fandesen blong bilif long Lod Jisas Kraes, mo fasin blong laef folem ol tijing blong Hem.1 Mi bin luk se ol kapol we oli mekem mared blong olgeta i simpol, oli praktisim tabu fasin blong fet: oli go long sakramen mo ol nara miting evri wik, oli gat famle haos naet, oli prea mo stadi long skripja tugeta mo wanwan, mo oli pem wan ones taeting. Wanem tufala i lukaotem i blong stap obei mo stap gud pipol. Tufala i no tekem ol komanmen olsem wan tebol blong lafet we oli save jusum kakae we oli wantem we i naes tumas.
Fet i fandesen blong evri klin fasin we i mekem mared i kam strong moa. Taem yu mekem fet i kam strong moa, hemia i mekem mared i kam strong moa. Fet i gro taem yumi stap obei long ol komanmen, mo gud laef tu insaed long mared. From hemia, blong stap obei long ol komanmen i stamba blong stanemap ol strong mared. Lukluk mo lanem: fet long Lod Jisas Kraes, i fandesen blong ol hapi mared we i no save finis.
Nambatri, fasin blong sakem sin. Mi bin lanem se hapi mared oli dipen long presen blong fasin blong sakem sin. Hem i wan stamba pat blong evri gud mared rilesensip. Ol hasban o waef we oli save lukluk long olgetawan bakegen, mo afta, oli tekem ol step blong sakem sin mo kam antap, bae oli gat eksperiens blong hiling insaed long mared blong tufala. Fasin blong sakem sin i help blong putumbak mo holemtaet gud laef mo pis.
Fasin blong putum tingting i stap daon i stamba blong fasin blong sakem sin. Fasin blong putum tingting i stap daon i blong gat open hat, i no selfis. I no nidim blong man i tingting hae long hemwan. Be, tingting we i stap daon i ansa long kwaet toktok,2 mo i lisin gud blong andastanem man, i no blong faenem pruf. Fasin blong putum tingting i stap daon i luksave se i no gat man i jenisim narafala man, be, wetem fet, hadwok mo help blong God, yumi save gotru long bigfala jenis long hat blong yumi.3 Blong gotru long bigfala jenis long hat, i mekem yumi tritim gud ol nara man, speseli hasban o waef blong yumi, wetem fasin we i no flas.4 Fasin blong putum tingting we i stap daon i minim se tugeta, hasban mo waef, i lukaot blong blesem, helpem, mo leftemap wanwan long tufala, mo putum narawan i faswan long desisen blong hem. Lukluk mo lanem: Fasin blong sakem sin mo fasin blong putum tingting i stap daon i bildimap ol hapi mared.
Nambafo, respek. Mi bin luk se long ol gud mo hapi mared, hasban mo waef i tritim wanwan long tufala olsem ol ikwol patna. Ol praktis, long eni ples, o long eni taem, we hasban i rul ova long waef, o i tritim waef olsem patna we i gat seken ples long mared, oli no stap kipim tabu loa mo oli mas riplesem praktis ia wetem ol stret prinsipol mo rod blong folem ol gud fasin.
Ol hasban mo waef long ol gudgudfala mared oli mekem desisen tugeta, we wanwan long olgeta i tekpat fulwan mo i gat raet long wan ikwol voes mo desisen.5 Oli lukluk faswan long hom, mo blong helpem wanwan long tufala wetem responsabiliti we tufala i serem.6 Mared blong tufala i stanap long fasin blong wok wan, i no wok folem praes. Taem blong kakae blong olgeta mo famle taem we i kam afta, i kam pat we i moa impoten long dei blong olgeta mo i gol blong ol hadwok blong tufala. Oli ofem ol lektronik tul, mo oli lego pleiplei blong olgeta blong help mekem ol wok blong haos. Olsem we i posibol, tufala i rid evri naet wetem ol pikinini mo tugeta, tufala i tekpat blong helpem ol smolwan blong go long bed. Tufala i silip tugeta. Olsem wok mo situesen i letem, hasban mo waef i wok saedsaed blong mekem ol wok we oli moa impoten—we hem i wok we yumi mekem insaed long hom blong yumiwan.
Long weaples we i gat respek, evri samting i klia, i no haed, we i wan ki pat blong ol hapi mared. I no gat sikret abaot ol impoten samting insaed long mared we i stanap long respek long wanwan mo wok we i klia gud. Hasban mo waef, tufala i mekem desisen tugeta abaot fasin blong yusum mane, mo tugeta, i save evri samting.
Fasin blong stap tru i wan wei blong gat respek. Ol profet i tijim se patna we oli gat sakes, “oli tru fulwan” long wanwan long tufala.7 Tufala i yusum sosol media long ful fasin we i klin inaf long evri wei. Tufala i no gat sikret long ol eksperiens blong Intanet. Tufala i serem nomo ol paswod long sosol netwok blong tufala. Tufala i no lukluk long ol intanet pej blong eniwan we i save spolem tabu tras we wan i gat long patna blong hem. Oli neva mekem, o talem wan samting, we i kam kolosap long rabis fasin, long intanet o long saed blong bodi. Lukluk mo lanem: Ol gudgudfala mared evriwan oli gat fasin blong respek fulwan, klia fulwan mo tru fulwan.
Nambafaef, lav. Ol mared we oli moa hapi we mi bin luk, oli soem fasin blong obei long wan long ol komanmen we i gud moa—se “tufala i laef tugeta wetem lav.”8 Taem Hem i toktok long ol hasban, Lod i givim komanmen ia : “Bambae yu mas lavem waef blong yu wetem ful hat blong yu, mo yu mas stap strong fulwan long hem mo i no wan narawan.”9 Wan Jos hanbuk i tijim: “Toktok ia stap strong fulwan i minim blong givim ful tingting mo stap fetful long wan. Ol mared kapol oli stap strong fulwan long God mo long wanwan long tufala taem tufala i givim seves mo lavlavem tufala mo taem tufala i kipim ol kavenan wetem tru fasin long wanwan long tufala mo long God.” Tugeta, hasban mo waef i livim biaen singgel laef blong tufala mo stanemap mared blong tufala olsem fas wok blong tufala.… Tufala i no letem wan narawan o intres i kam tekem fas ples … mo fogetem blong kipim ol kavenan we tufala i bin mekem wetem God mo wanwan long tufala.”10 Lukluk mo lanem: ol kapol we oli gat sakses oli lavem olgeta wetem ful tingting mo bodi.
I gat olgeta we mared blong olgeta i no hapi olsem we oli wantem, o oli neva mared, oli divos, oli singgel papa o mama, o blong sam risen oli no stap long wan situesen blong save mared. Ol situesen ia, oli save gat fulap jalenj o hat i soa, be oli no nid blong stap kasem taem we i no save finis. Long yufala we i stap long ol situesen olsem, we yufala “i mekem wetem glad hat, evri samting we i stap long paoa blong [yufala]” 11 blong gohed long laef, bae heven i blesem yufala fulap. Lukaotem tingting ia blong gat wan mared we i no save finis, we i tekem tu blong traehad, o rere blong stap wan waef o hasban we i klin inaf. Kipim ol komanmen, mo trastem Lod mo lav blong Hem we i stret evriwan blong yu. Wan dei evri promes blesing blong mared ia bae i blong yu.12
Wan long swit ves long Buk blong Momon i talem klia: “Mo oli bin kasem mared, mo oli letem olgeta blong kasem mared, mo oli bin kasem blesing folem plante promes we Lod i bin mekem long olgeta.”13 Ol promes blong Lod i go long evriwan we oli stap folem paten blong laef we i stap bildimap wan hapi, tabu mared rilesensip. Ol kaen blesing ia, oli kam olsem ol gudfala risal blong stap fetful blong laef folem gospel blong Jisas Kraes.
Mi mi talem tangkyu long gudfala waef blong mi, Keti, we i lav blong laef blong mi.
Mared i wan presen we i kam long God; kwaliti blong mared blong yumi i wan presen we i kam long yumi i go long Hem. Mi talem testemoni blong mi long saed blong gudfala plan blong Papa long Heven we i gat lav, we i mekem se i gat janis blong gat wan gud mared we i no save finis. Long nem blong Jisas Kraes, amen.