Jos Odit Dipatmen Ripot, 2012
I go long Fas Presidensi blong Jos blong Jisas Kraes blong Ol Lata-dei Sent
Ol Dia Brata: Olsem we i stap long revelesen long Seksen 120 long Doktrin mo Ol Kavenan, Kaonsel we i lukaotem mane blong Taeting i givim raet blong spendem ol mane blong Jos. Kaonsel ia, insaed i gat Fas Presidensi, Kworom blong Olgeta Twelef Aposol, mo Prisaeding Bisoprik.
Kaonsel ia, i apruvum ol bajet blong ol Jos dipatmen mo ol wok blong Jos mo ol aktiviti we i go wetem ol eklesiastik yunit. Afta we oli kasem raet long Kaonsel ia, ol dipatmen blong Jos oli spendem mane ia folem bajet we oli apruvum mo i go stret wetem ol bajet we oli apruvum mo wetem ol polisi mo ol fasin blong wok blong Jos.
Jos Odit Dipatmen i bin gat raet blong gotru long evri rekod mo sistem blong oli save jekem mo kontrolem ol risit blong mane we oli spendem, fasin blong spendem mane mo lukaotem gud ol propeti we Jos i gat. Jos Odit Dipatmen i wan independen bodi aot long ol narafala dipatmen mo operesen blong Jos mo ol staf we oli wok insaed i gat ol akaonten, intenal odita, infomesen sistem odita we oli kwalifae mo ol narafala kwalifae man.
Folem wok we odita i bin mekem, Jos Odit Dipatmen i wantem givimaot se, long saed blong evri samting we Jos i gat, ol kontribusen we oli bin kasem, ol mane we oli bin spendem, mo ol propeti we Jos i gat blong yia 2012, oli bin rekodem mo yusum folem stret fasin blong lukaot mane, wetem ol bajet, mo ol Jos polisi mo fasin blong wok we oli apruvum.
Mi givim wetem respek,
Jos Odit Dipatmen
Robet W. Konwel
Manejing Daerekta