Mifala Ol Gel blong Papa long Heven
I Kam long Ilein S. Dalton
Yang Woman Jeneral Presiden we I Jes Rilis
Olsem ol gel blong God, wanwan long yumi i spesel mo defren long situesen mo eksperiens. Be yet, ol pat blong yumi i impoten—from se yumi impoten.
Evri wik, ol yang woman raon long wol oli talem stamba toktok blong ol Yang Woman. Nomata wanem lanwis, evri taem mi harem ol toktok ia: “Mifala ol gel blong Papa long Heven, we Hem i lavem mifala, mo mifala i lavem Hem.”1 Spirit i talem long sol blong mi se oli tru. Hem i no blong konfemem aedentiti blong yumi—be tu, i blong luksave mo talemaot se yumi blong hu. !Yumi ol gel blong wan we i God!
Long evri kantri, long evri graon, mi bin mitim ol yang woman we oli gat tras mo oli toktok klia; we oli fulap long laet, oli kam gud moa tru long hadwok mo tes, we oli gat wan bilif we i klin gud mo i simpol. Oli gat klin fasin. Oli olgeta we oli kipim kavenan, we oli “stanap olsem ol witnes blong God long evri taem mo long evri samting, mo long evri ples.”2 Oli save huia olgeta mo oli gat wan bigfala wok blong mekem blong bildimap kingdom blong God.
Taem mi stap long kolej, mi wan memba blong BYY Kalja Senta blong Danis. Wan sama, grup blong mifala i gat spesel janis blong go tua long ol misin long Yurop. I bin wan had sama long mi from se, sam manis bifo, mifala i sek, papa blong mi i bin ded. Taem mifala i bin stap long Skotlan, mi filim mi stap miwan mo tingting blong mi i kam slak. Mifala i bin danis long japel long naet ia, mo afta long danis blong mifala, mifala i go long misin hom we i stap narasaed. Taem mi stap wokbaot i go, mi luk wan ston i stap long wan garen we i klin gud kolosap long get. Antap long ston, oli ridim “Weaples yu stap, mekem gud pat blong yu.” Long tetaem ia, ol toktok ia, oli go insaed dip long hat blong mi mo mi bin filim ol paoa blong heven oli go aot mo givim wan mesej long mi. Mi save se Papa long Heven we i gat lav, i save mi. Mi filim se mi no stap miwan. Mi stanap long garen ia, wetem wota long ae blong mi. “Weaples yu stap, mekem gud pat blong yu.” Simpol toktok ia i mekem visen blong mi i kam niu, se Papa long Heven i bin save mi mo i gat wan plan long laef blong mi mo Spirit we mi filim, i helpem mi blong andastanem se pat blong mi i impoten.
Afta, mi bin lanem se toktok ia i bin leftemap tingting blong profet Deved O. MaKei taem hem i bin stap olsem wan yang misinari long Skotlan. Hem i bin luk i stap long wan ston long wan bilding, long wan taem we tingting blong hem i no strong long misin blong hem, mo ol toktok ia oli leftemap hem. Sam yia afta, taem oli kilimdaon bilding ia, hem i askem blong hem i tekem ston ia mo i putum i stap long garen long misin hom. 3
Olsem ol gel blong God, wanwan long yumi i spesel mo defren long situesen mo eksperiens. Be yet, ol pat blong yumi i impoten—from se yumi, yumiimpoten. Kontribusen we yumi givim evri dei, blong fidim man, blong tij, blong kea long ol narawan, ating sam i luk se i bigwan tumas, i nating, i had mo i daonem man samtaem, be yet, taem yumi tingbaot fas laen ia blong stamba toktok blong Ol Yang Woman—“Mifala ol gel blong Papa long Heven, we Hem i lavem mifala”—bae i mekem samting defren long rilesensip blong yumi mo fasin blong yumi.
I no longtaem i pas, 92 yia mama blong mi i ded. Hem i livim laef long wol ia semmak olsem hem i laef long hem—long wan kwaet wei. Laef blong hem, i no wanem hem i gat plan long hem. Hasban blong hem, papa blong mi, i ded taem hem i gat 45 yia, i livim hem wetem 3 pikinini—mi, mo tufala brata blong mi. Hem i stap 47 yia olsem wan wido. Hem i sapotem famle blong mifala taem hem i tij long skul long dei, mo i tijim ol piano lesen long naet. Hem i lukaotem olfala papa blong hem, bubuman blong hem, we tufala i stap silip long haos narasaed. Hem i meksua se wanwan long mifala i kasem kolej edukesen. Hem i stanap strong long hemia blong mifala i save kam “man blong givhan”. Mo hem i neva komplen. Hem i kipim ol kavenan blong hem, mo from hem i mekem hemia, hem i bin mekem paoa blong heven i kamdaon blong blesem hom blong mifala mo sendem ol merikel. Hem i dipen long paoa blong prea, prishud, mo promes blong kavenan. Hem i bin fetful long seves blong hem long Lod. Strong tingting blong hem i mekem mifala i stap gud, mifala ol pikinini blong hem. Plante taem, hem i ripitim skripja ia: “Mi, Lod, mi mas mekem folem promes blong mi taem yufala i mekem wanem mi talem; be taem yufala i no mekem wanem we mi talem, yufala i no gat promes.”4 Hemia moto blong hem mo hem i bin save se hemia i tru. Hem i andastanem wanem i minim, blong stap wan woman blong kipim kavenan. Neva, wol i luksave hem. Hem i no wantem hemia. Hem i bin andastanem huia hem mo hem i blong hu—wan gel blong God. I tru, man i save talem se hem i bin mekem gud pat blong hem.
Long saed blong ol woman mo mama, Presiden Godon B. Hinkli i talem wan taem:
“Yumi neva mas lusum ae long paoa blong ol woman. …Ol mama nao oli plei bigfala pat long laef blong ol pikinini blong olgeta. … Ol mama nao oli fidim olgeta mo lukaotem olgeta long ol wei blong Lod. Paoa blong olgeta i bigwan olgeta. …
“ … Olgeta nao oli krietem laef. Oli woman blong fidim mo tijim ol pikinini. Oli ol tija blong ol yang woman. Oli ol kompanion blong yumi we yumi nidim tumas. Oli wok wetem yumi blong bildimap kingdom blong God. Pat blong olgeta i bigwan, mo wok blong olgeta i gud tumas. Oli ademap fulap long kwaliti blong laef.”5
?Olsem wanem nao wan mama o papa i putum insaed long yang gel blong olgeta, trutok ia, we i gat paoa mo i no save finis, se hem i wan gel blong God? ?Olsem wanem nao yumi helpem olgeta blong aot long wol mo go long kingdom blong God?
Long wan wol we gud fasin i stap go lus, ol yang woman oli nidim ol woman mo ol man blong “stanap olsem ol witnes blong God long evri taem, mo long evri samting, mo long evri ples.” Neva samting ia i bin moa impoten bitim tedei. Ol yang woman oli nidim ol mama, mo ol tija blong tingting we bae oli stap eksampol blong wan woman blong klin fasin. Ol mama, rilesensip blong yufala wetem gel blong yufala i impoten tumas, mo eksampol blong yufala tu. Olsem wanem yu lavem mo givim ona long papa blong olgeta, prishud blong hem, mo tabu wok blong hem, bae i kamaot mo ating bae i kamaot bigwan moa long fasin mo aksen blong gel blong yu.
?Wanem nao pat ia, we yumi mas “mekem gud”? Famle ofisol toktok i klia:
“Folem plan blong God, ol papa oli mas lidim ol famle blong olgeta wetem lav mo fasin blong stap stret oltaem. Oli gat wok ia tu, blong luk se ol famle blong olgeta i gat proteksen mo evri samting we oli nidim long laef. Ol fas wok blong wan mama hem i blong fidim ol pikinini blong tufala long saed blong spirit mo long saed blong bodi. Long ol tabu wok ia, papa mo mama, tufala i mas helpem wanwan long tufala, olsem we tufala i semmak. …
Mifala i givim woningse, olgeta we oli stap brekem ol kavenan blong jastiti (klin laef), olgeta we oli stap mekem nogud long ol man, woman o pikinini blong olgeta, o oli no mekem evri famle wok we oli mas mekem, bambae olgeta ia oli mas lukaot from God bambae i jajem olgeta from ol samting ia.”6
Long sosaeti we i stap foldaon long taem blong Mormon, hem i krae from oli stilim long ol woman wanem we i moa gud mo impoten bitim evri samting—klin fasin mo jastiti blong olgeta.7
Bakegen, mi talem bakegen singaot ia blong kambak long klin fasin. Klin fasin i paoa blong ol gel blong God. ?Bae wol i olsem wanem sapos klin fasin—wan wei blong tingting mo aksen we i folem ol hae standet blong klin tingting wetem jastiti8—i kambak long sosaeti blong yumi olsem wan praes we yumi wantem kasem tumas? ?Sapos rabis tingting long saed blong seks, ponografi, mo abius i godaon, bae i nomo gat tumas mared i brokbrok, ol laef i brokbrok, mo hat we i brok? ?Bae media i save mekem man i gat gud tingting mo i save mekem samting, be i no blong stap daonem mo rabisim ol gudfala gel blong God? Sapos evri man mo woman long wol i andastanem olsem wanem toktok ia i impoten: “Mifala i ol gel blong Papa long Heven,” bae ?olsem wanem nao bae oli lukluk mo tritim ol woman?
Sam yia i pas, taem oli stap bildim konfrens senta ia, mo kolosap i finis, mi bin go insaed long tabu bilding ia, long ples antap, mi werem wan bigfala hat mo sefti glas, mi rere blong swipim kapet we hasban blong mi i help blong putum. Long ples we pulpit i stap long hem naoia, i gat wan smol loda i stap karemaot ol doti, mo das long bilding ia i tik. Taem i kamdaon long floa, bae i foldaon long niu kapet. Pat blong mi i blong mi tekemaot das ia wetem wan masin. Mekem se mi pulumaot das we mi pulumaot das. Afta long 3 dei, !smol masin blong mi blong pulum das, i bon!
Long aftenun, bifo long fas jeneral konfrens long naes, niu bilding ia, hasban blong mi i singaotem mi. Hem i stap rere blong putum las pis kapet—andanit long pulpit ia nao.
Hem i askem: “?Wanem skripja nao bae mi raetem long kapet ia?
Mo mi talem: “Mosaea 18:9 ‘Stanap olsem wan witnes blong God long evri taem, mo long evri samting mo long evri ples.’”
Long wan wol blong jalenj, hemia nao ol yang woman mo evri woman blong Jos ia oli stap mekem. Oli wan paoa blong mekem gud. Oli gat klin fasin mo gat eksampol, oli waes mo wok strong. Oli mekem samting i defren from se oli defren. Oli stap mekem gud pat blong olgeta.
Sam yia i pas, taem mi stap swipim kapet ia—we mi traem blong mekem gud pat blong mi—mi no bin luksave se, wan dei, bae leg blong mi i stanap long kapet ia andanit long pulpit.
Tedei, olsem wan gel blong God, mi stanap olsem witnes se God i stap laef. Jisas I Kraes. Hem i Ridima blong yumi. Hem i tru long sakrifaes blong Hem we i pemaot praes, we, wan dei, bae mi gobak stap wetem Hem—mi pruvum mi, mi klin gud, mo mi sil long wan famle we i no save finis. Bae mi presem hem from spesel janis ia blong stap wan woman, wan waef, mo wan mama. Mi testifae se wan profet blong God, Presiden Tomas S. Monson i lidim yumi, mo mi talem tangkyu from ol man we oli stret mo gud, we prishud paoa blong olgeta i blesem laef blong mi. Mo oltaem, bae mi talem tangkyu from paoa we mi kasem tru long paoa blong Atonmen blong Sevya taem mi gohed blong traehad blong “mekem gud pat blong mi.” Long nem blong Jisas Kraes, amen.