Welkam long Konfrens

I Kam long Presiden Tomas S. Monson

Mi askem strong long yufala blong lisin gud mo tekem gud ol mesej we bae yumi harem. Blong yumi mekem olsem, i prea blong mi, long nem blong Jisas Kraes, amen.

Ol brata mo sista we mi lavem tumas. Mi glad blong welkamem yufala long namba 183 Yia Jeneral Konfrens blong Jos.

Long las taem mi luk yufala long sikis manis i pas finis, i bin janis blong mi blong travel i go mo mit wetem sam long yufala long ples blong yufala. Afta long jeneral konfrens long Oktoba, mi bin travel i go long Jemani, mo mi bin gat spesel janis blong mitim ol memba blong yumi long ol defren ples long kantri ia, mo tu, sam pat blong Ostria.

Long en blong manis Oktoba, mi bin dediketem Kalgari Albeta Tempol long Kanada, wetem help blong Elda mo Sista M. Rasel Balad, Elda mo Sista Kreg. K. Kristensen, mo Elda mo Sista Wiliam R. Woka. Long manis Novemba, mi dediketem bakegen Boas Aedaho Tempol. Mo tu, olgeta we oli tekpat long dedikesen, i gat Elda mo Sista Deved A. Bedna, Elda mo Sista Kreg K. Kristensen, mo Elda mo Sista Wiliam R. Woka.

Ol kalja selebresen we oli bin holem we i go wetem ol dedikesen ia oli gud tumas. Mi no bin go long kalja selebresen long Kalgari, from se i bin namba 85 betdei blong Sista Monson, mo mi filim se mi mas stap wetem hem. Be, hem mo mi i bin gat gud janis blong lukluk selebresen ia long living rum blong mitufala long wan praevet televisen brodkas, mo afta, mi bin flae i go long Kalgari long nekis moning from dedikesen. I bin gat plante yang pipol tumas mekem se i no gat rum blong ol memba blong famle oli kam insaed long ples ia we oli bin danis long hem.

Long las manis nomo, Presiden Dita F. Ukdof, wetem Sista Ukdof, Elda mo Sista Jefri R. Holan, mo Elda mo Sista Gregori A. Switsa, oli bin go long Tegukipalga, long Honduras, blong dediketem niufala tempol longwe. Wan gudfala yut selebresen i bin tekem ples long naet bifo long dedikesen.

I gat ol nara tempol we oli bin anaonsem, we oli stap long ol defren level, sam oli jes stat blong mekem o sam oli stap bildim finis.

Hem i spesel janis blong mi, long moning ia, blong anaonsem tu moa tempol, we long ol manis mo yia we oli stap kam, bae oli bildim long ol ples ia: Sida Siti long Yuta, mo Rio de Janeiro long Brasil. Ol brata mo sista, wok blong bildim ol tempol, i gohed, i strong nomo.

Olsem we yufala i save, long Oktoba jeneral konfrens, mi bin anaonsem ol jenis long yia we ol yang man mo yang woman oli save go long fultaem misin, wetem ol yang man we, naoia, oli save go long misin long 18 yia, mo ol yang woman long 19 yia.

Ansa we i bin kam long ol yang pipol blong yumi i bin gud tumas mo i givim insperesen. Long 4 Epril—2 dei i pas—yumi gat 65, 634 fultaem misinari we i wok, wetem ova long 20,000 moa we oli kasem koling blong olgeta be oli no kam yet long misinari trening senta, mo long 6 taosen moa we oli stap intaviu wetem ol bisop mo stek presiden blong olgeta. I bin nid, long mifala, blong krietem 58 niu misin blong putum bigfala namba blong ol misinari ia long olgeta.

Blong help blong holemtaet misinari ami ia, mo from plante long ol misinari blong yumi oli kam long laef we i simpol, mifala i invaetem yufala, olsem we yufala i save mekem, blong kontribiut wetem open hat long Jeneral Misinari Mane blong Jos.

Naoia, ol brata mo sista, bae yumi lisin long ol mesej blong insperesen, tedei mo tumoro. Olgeta we bae oli toktok long yumi, oli bin prea strong blong save wanem Lod i wantem yumi blong harem long taem naoia.

Mi askem strong long yufala blong lisingud mo tekem gud ol mesej we bae yumi harem. Blong yumi mekem olsem, i prea blong mi, long nem blong Jisas Kraes, amen.