Mi Save Olgeta Samting Ia
I Kam long Presiden Boed K. Peka
Presiden blong Kworom blong Olgeta Twelef Aposol
Long evri samting we mi bin ridim mo tijim mo lanem, wan trutok we i impoten mo i tabu we mi gat blong talem i spesel witnes blong mi abaot Sevya Jisas Kraes.
Long 1992, afta we mi stap olsem wan Asisten blong Olgeta Twelef blong naen yia, mo 22 yia olsem wan memba blong Olgeta Twelef, mi nao kasem 68 yia. Mi filim blong statem wanem mi singaotem wan “Singsing we I No Finis.” Fas pat blong wok ia i go olsem:
Mi gat wan tingting long las naet;
Wan tingting we i impoten mo i dip.
I kam taem mi bin taed tumas;
Mi taed tumas blong go silip.
Mi bin gat wan bisi bisi dei
Mo tingting hevi long fiuja blong mi.
Tingting ia i go olsem:
!Taem mi yang, mi no gat 68 yia!
Mi save wokbaot gud we mi no lei;
Solda i no soa nating.
Mi save ridim wan laen tu taem,
Mo afta talem baehat.
Mi save wok longfala aoa
Mo no stop smol blong pulum win.
Mo ol samting we naoia, mi no save mekem,
Mi bin save mekem gud bifo we i isi nomo.
Sapos nomo mi save gobak biaen,
Mo sapos i stap long mi blong mi jusum,
Bae mi no wantem stap yangfala nomo,
Mi gat tumas samting blong lusum.
Mi glad nomo blong muv fored,
Mo lusum yangfala laef, nating i gud tumas.
Samting we bae mi lusum sapos mi yangfala bakegen
I wanem mi andastanem.
Ten yia afta, mi disaed blong ademap sam moa laen long poem ia:
Ten yia i flae, mi no save i go wea
Mo plante harem nogud i go wetem olgeta.
Wan hip we oli wokem long aean i mekem mi wokbaot gud;
Mi wokbaot stret bakegen nao.
Wan nara aean i holem bun blong nek i fas wanples—
!Wan Naes kriesen!
I help blong stopem polio;
Mi joenem jeneresen blong ol strong nek.
Ol saen blong olfala oli kamaot klia.
Ol samting ia bae oli no kam gud moa.
Wan samting nomo i stap gro strong,
I fasin blong mi fogetem samting.
Yu askem: “?Yu tingbaot mi?”
Yes, yu semmak nomo.
Be, yu no harem nogud;
Mi no save tingbaot nem blong yu.
Mi agri se mi bin lanem sam samting
We mi no wantem save,
Be olfala yia i tekem ol bigfala trutok ia oli kam
We i mekem spirit i gro.
Aot long evri blesing we i bin kam,
Bes samting long laef blong mi
Hem i kampani mo kamfot
We mi kasem long gudfala waef blong mi.
Evri pikinini blong mitufala i mared gud;
Oli gat famle blong olgeta,
Wetem ol pikinini, mo ol apupikinini
We oli gro bigwan finis.
Mi no jenisim tingting blong mi nating
Blong mi kam yangfala bakegen.
Yumi stap ia blong kam olfala, from se wetem hemia
Wan save blong trutok i kam wetem.
Yu askem: “?Wanem nao fiuja i tekem i kam?”
?Bae fiuja blong mi i wanem stret?
Bae mi gohed mo no komplen.
Askem taem bae mi kasem 88 yia!
Mo long las yia, mi ademap ol laen ia:
Mo naoia, yu luk, mi gat 88 yia.
Ol yia oli pas kwiktaem.
Mi bin wokbaot, mi wokbaot slo, mi holem wan wokingstik.
Mo naoia, mi spid long wiljea.
Mi silip wanwan taem,
Be paoa blong prishud i stap.
Long ples blong evri paoa blong bodi we mi nomo gat,
I gat ol bigfala samting long saed blong spirit we mi kasem.
Mi bin travel milian kilometa,
Mo wan nara milian tu.
Mo wetem help blong ol satelaet,
Ol wokbaot blong mi oli no finis yet.
Naoia, mi save talem wetem stret save,
Se mi save Lod mo lavem Lod.
Mi save testifae wetem olgeta blong bifo
Taem mi stap prijim tabu tok blong Hem.
Mi save wanem Hem i bin filim long Getsemane,
I tumas blong andastanem.
Mi save Hem i mekem hemia blong yumi evriwan;
Yumi no gat wan Fren we i moa gud.
Mi save se bae Hem i kambak bakegen
Wetem paoa mo long glori.
Mi save bae mi luk Hem wan moa taem bakegen
Long en blong stori blong laef blong mi.
Bae mi nildaon long fored blong leg blong Hem we i gat soa;
Bae mi filim Spirit blong Hem.
Kwaet voes blong mi we i seksek bae i talem:
“Lod blong mi, God blong mi, mi save Yu.”1
!Mo yes, mi save!
Ol bak windo blong hom blong mifala, i luk i go long wan smol garen blong flaoa mo ol bus tri long saed blong wan smol wota. Wan wol blong haos i saed long garen mo ol bigfala tik lif oli gro long hem. Plante yia, ol lif ia oli haos blong ol smol pijin. Ol bed blong olgeta long ol rod oli sef aot long ol wael dog mo bigfala rat, mo puskat we oli wokbaot olbaot.
Wan dei, i gat bigbigfala noes long ol lif ia. Ol bigfala singaot i mekem 8 o 10 pijin we oli stap raon oli joen long singaot ia blong woning. I no longtaem afta, mi luk wanem i mekem se i gat noes. Wan snek i glis hafwei long ol lif ia mo i hang long fored blong windo, i longwan inaf blong mi pulumaot hem. Medel pat blong bodi blong snek i solap long tu ples—we i soem klia we i tru we hem i kakae tu smol pijin long bed blong pijin. Mitufala i neva luk wan samting olsem ia long ol 50 yia blong laef blong mitufala. Hem i bin wan eksperiens blong wan taem—o mitufala i ting olsem.
Sam dei afta, i gat wan bigfala noes bakegen, be tetaem ia, long pat blong ol lif we i kavremap ples blong ron blong dog. Mifala i harem sem singaot ia blong woning, we i luk ol pijin long ol raonabaot oli kam wanples. Mifala i save se i gat wan samting i stap. Apuboe blong mitufala i klaem i go antap mo pulumaot wan narafala snek we i stap holemtaet yet mama pijin we hem i kasem long bed blong pijin mo kilimded.
Mi askem miwan: “?Wanem nao i stap gohed? ?Wan i tekova long Garen blong Iden bakegen?
I kam long maen blong mi, ol woning we ol profet oli talem. I no oltaem we bae yumi sef long paoa blong enemi, iven insaed long hom blong yumi. Yumi nidim blong protektem hom blong yumi.
Yumi laef blong wan wol we i gat tumas denja mo i putum long denja ol samting we oli moa long saed blong spirit. Famle, stamba oganaesesen blong taem naoia, mo taem we i no save finis, i stap anda long atak blong ol fos we i stap long klia ples mo olgeta we i no stap long klia ples. Enemi i stap raon. Gol blong hem i blong mekem man i kasem kil. Sapos hem i save mekem famle i nomo strong mo prapa spolem hemia, bae hem i win.
Ol Lata-dei Sent oli luksave hamas famle i impoten tumas mo oli traehad blong laef long wan wei we enemi i no save stil insaed long ol hom blong yumi. Yumi faenem sefti mo sekiuriti blong yumiwan mo ol pikinini blong yumi taem yumi ona long ol kavenan we yumi bin mekem mo stap laef blong mekem ol aksen evri dei blong stap obei olsem ol man we oli folem Kraes oli mas mekem.
Aesea i bin talem: “Mo frut blong ol stret fasin ya, ol man bambae oli stap olwe long pis, we oli stap kwaet, oli stap gud, mo oli stap trastem Hae God.”2
Pis ia, promes blong hem i stap tu long ol revelesen we Lod i talem: “Sapos yufala i rere gud, nao yufala i no save fraet.”3
Bigfala paoa blong prishud, God i bin givim blong protektem hom mo olgeta we oli laef insaed. Papa i gat atoriti mo responsabiliti blong tijim ol pikinini blong hem mo blesem mo givim long olgeta, ol odinens blong gospel mo evri nara prishud proteksen we i nid. Hem i mas soemaot lav mo stap tru mo givim ona long mama, blong mekem se ol pikinini oli luk lav ia.
Mi kam blong save se fet i wan tru paoa, be i no wan samting we i soemaot bilif. I gat sam samting we i gat moa paoa bitim ol fetful prea blong wan stret mo gud mama.
Tijim yuwan mo tijim ol famle blong yu long saed blong presen we i Tabu Spirit, mo Atonmen blong Jisas Kraes. Bae yu mekem wok we i no save finis we i moa hae insaed long ol wol blong hom blong yu.
Yumi save se yumi ol spirit pikinini blong ol paren blong heven, long ples ia, long wol, blong kasem ol bodi we i save ded mo blong kasem tes. Yumi, we bodi blong yumi i save ded, i gat paoa ova long olgeta we oli no gat bodi. 4 Yumi fri blong jusum wanem yumi wantem, mo tekem mo jusum ol aksen blong yumi, be yumi no fri blong jusum wanem i kam afta. Oli kam olsem we bae oli kam.
Fridom blong joes, insaed long skripja oli eksplenem se hem i “fasin blong stap fri blong mekem joes” we i minim se yumi save jusum bitwin gud mo nogud. Enemi i luklukgud blong temtem yumi blong yumi no yusum gud fasin ia blong stap fri blong mekem joes blong yumi.
Ol skripja oli tijim yumi “se evri man i mekem samting long saed blong doktrin mo prinsipol blong fiuja blong hem, folem gud fasin blong fridom blong jusum we mi bin givim long hem, blong mekem se evri man i ansa from sin blong hemwan long dei blong jajmen.”5
Alma i tijim se: “from we Lod i no save lukluk long sin wetem wan smol pat we hem i save akseptem.”6 Blong save andastanem hemia, yumi mas seperetem sin long man we i mekem sin.
Eksampol. Taem oli tekem, long fored blong Sevya, wan woman we i mekem adaltri, mo i rong, nao Hem i sakemaot ol samting ia wetem ol toktok ia: “Be i gud yu gohom, mo yu nomoa mekem sin bakegen.”7 Hemia nao spirit blong seves blong Hem.
Blong akseptem defren fasin, i wan gud fasin, be olsem evri gud fasin, taem i go tumas, nao i kam samting we i nogud. Yumi nid blong lukaot gud long “trap blong akseptem defren fasin” blong mekem se yumi no draon insaed long hem. Fasin blong pablik blong akseptem sam fasin we i kamaot taem oli mekem ol loa blong kantri i nomo strong blong letem ol nogud aksen oli hapen folem loa, i no karemaot wanem i kam afta long saed blong spirit we bae i risal blong fasin blong brekem loa blong God long saed blong jastiti.
Evriwan i bon wetem Laet blong Kraes, wan paoa we i lidim man we i mekem se wanwan i save luksave raet aot long rong. Wanem yumi mekem wetem laet ia, mo olsem wanem yumi ansa long ol toktok ia blong laef long stret mo gud fasin, i pat blong tes blong laef long wol ia.
“From luk, Spirit blong Kraes, God i givim long evri man, blong hem i save gat save long samting we i gud aot long samting we i nogud; from samting ia, mi soemaot long yufala fasin blong jaj; from evri samting we i askem blong mekem samting we i gud mo blong winim tingting blong biliv long Kraes, i kamaot tru long paoa mo presen blong Kraes; from samting ia yufala i save gat save wetem wan save we i stret gud se samting ia i blong God.”8
Wanwan long yumi i mas rere i stap blong ansa long insperesen mo toktok blong Tabu Spirit. Lod i gat wan wei blong kapsaetem klin waes tingting long maen blong yumi blong pusum yumi, blong lidim yumi, blong tijim yumi, blong wonem yumi. Wanwan boe o gel blong God i save ol samting we oli nidim blong save kwiktaem. Lanem blong kasem mo mekem folem insperesen mo revelesen.
Long evri samting we mi bin ridim mo tijim mo lanem, wan trutok we i impoten mo i tabu we mi gat blong talem i spesel witnes blong mi abaot Jisas Kraes. Hem i stap laef. Mi save se Hem i stap laef. Mi mi witnes blong Hem. Mo abaot Hem, mi save testifae. Hem i Sevya blong yumi, Ridima blong yumi. Long hemia mi save stret. Long hemia, mi talemaot witnes blong mi, long nem blong Jisas Kraes, amen.