10 Julae

?From Wanem Hem I Impoten blong Folem Ol Profet blong God we Oli Stap Laef?

2 King 2–7

Kaonsel Tugeta

Wan memba blong kworom o klas presidensi i lidim; 10–20 minit

Long stat blong miting, tugeta, ripitim Stamba Toktok blong Ol Yang Woman o Stamba Toktok blong Ol Kworom blong Aronik Prishud. Afta, lidim wan toktok storian abaot wok ia blong fasin blong sevem man mo mekem olgeta oli kam olsem wan god, mo yusum wan, o moa long wan long ol kwestin andanit ia, o yusum ol kwestin blong yuwan (luk long Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent 10.2, 11.2, ChurchofJesusChrist.org/study?lang=bis). Mekem plan blong gat sam wei blong tekem aksen folem wanem yufala i toktok raon long hem.

• Laef folem gospel. ?Wanem nao bisoprik i bin toktok raon long hem long wod yut kaonsel miting blong yumi? ?Wanem aksen mi save tekem blong mekem hemia?

• Kea long olgeta we oli stap long nid. ?Olsem wanem nao yumi save openem han long ol pipol long ol wei we i olsem hemia blong Kraes taem se yumi luk se i gat wan nid, mo yumi no save wanem blong talem?

• Invaetem evriwan blong akseptem gospel. ?Wanem nao yumi faenem insaed long gospel blong Jisas Kraes we i tekem glad i kam? ?Olsem wanem nao yumi save serem glad ia wetem ol narafala man?

• Joenem ol famli blong taem we i no save finis. ?Wanem nao samfala wei we yumi toktok o go kolosap moa wetem ol narafala memba blong famli, olsem ol bubu mo ol kasen brata mo sista?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong klas o blong kworom abaot ol plan mo ol invitesen we oli bin mekem long taem blong miting.

Stap Tijim Doktrin

Wan adalt lida o yut i lidim; 25–35 minit

Rere long Yuwan long Saed blong Spirit

Ating i gat fasin blong Neman we i stap insaed long yumi evriwan (luk long 2 King 5:1–15). Olsem Neman, we i kros taem profet Elisa i talem long hem blong hem i go swim nomo long wan reva blong hem i kam oraet, yumi tu, samtaem yumi no andastanem ol risen biaen long ol advaes blong ol profet blong yumi. Bae yumi ting se sam long ol advaes blong olgeta i no stret long yumi, mo from hemia, i no blong yumi. Be God i promesem ol bigfala blesing sapos yumi gat tingting i stap daon inaf blong folem profet (luk long Doktrin mo Ol Kavenan 21:4–7). ?Olsem wanem nao, taem yu bin folem profet, i bin helpem yu blong kam kolosap moa long Lod? ?Wanem nara eksampol nao, aot long 2 King 4–6 i soem hamas yumi gat blesing taem yumi stap folem ol profet we oli stap laef?

Taem yufala i stap rere blong tij abaot ol blesing we oli kam taem wan i stap folem profet we i stap laef, tingting long ol jalenj we ol yut oli stap fesem. ?Olsem wanem nao taem oli stap folem profet bae i helpem olgeta wetem ol jalenj ia? Mo tu, yufala i save ridim mesej blong Elda Neil L. Andersen: “Profet blong God” (Liahona, Mei 2018, 24–27) o mesej blong Elda L. Whitney Clayton: “Whatsoever He Saith unto You, Do It” (Liahona, May 2017, 97–99).

Blong stap folem profet, i save helpem ol yang pipol wetem ol jalenj we oli stap fesem.

Stap Lan Tugeta

Blong statem storian insaed long klas, yu save askem wanwan memba blong klas o blong kworom (o ol smol grup) blong oli luklukbak long wan long olgeta stori ia: 2 King 4:1–7; 5:6–14; 6:8, 13–17. Askem olgeta blong lukaotem wan samting we i givim insperesen long olgeta blong oli ridim mo folem ol tijing blong ol profet mo ol aposol tedei. Mo, afta we wanwan grup i serem wan samting we oli faenem, yu save askem sam long ol yut blong finisim sentens ia: “Taem mi folem ol profet mo ol aposol we oli stap laef, mi …” Blong gohed blong toktok raon long fasin blong folem ol profet, jusum wan, o moa long wan long ol aedia ia.

• From se oli faenem nomo ol profet we oli stap laef insaed long Jos ia blong Lod we Hem i putumbak, ol memba blong klas o blong kworom blong yu oli gat janis ia blong ansarem kwestin blong ol narafalawan abaot ol profet we oli stap laef. Maet bae yu wantem raetem long bod olgeta kwestin ia we ol pipol oli save gat abaot ol profet we oli stap laef: ?From wanem yu yu gat wan profet? “Olsem wanem oli jusum wan profet” ?Olsem wanem yu save se profet ia i rili stap toktok long bihaf blong God? Ol yut oli save lukaotem ol ansa long ol kwestin ia insaed long ol risos we oli stap long “Ol Sapot Risos.” Oli save praktis blong stap ansarem ol kwestin ia mo ol nara kwestin we oli gat, mo oli yusum ol trutok we oli faenem wetem ol tingting mo ol eksperiens blong olgeta bakegen.

• ?Olsem wanem nao ol toktok blong profet blong yumi we i stap laef, i save helpem yumi taem yumi fesem ol jalenj we i blong yumiwan? Blong helpem ol yut blong ansarem kwestin ia, yu save invaetem olgeta blong raetem wan lis, long bod, blong samfala advaes mo invitesen we profet i bin givim long las jeneral konfrens. ?Wanem nao yumi bin mekem blong tekem aksen, blong muv folem ol invitesen ia blong hem? ?Wanem jenis nao yumi bin luk insaed long laef blong yumi from ol hadwok ia? Maet yu wantem invaetem wan blong i kam serem wan eksperiens blong hemwan, mo long eksperiens ia, advaes blong profet i bin helpem hem wetem wan jalenj blong hemwan.

• ?Olsem wanem yu save helpem olgeta we yu stap tijim blong oli andastanem se, blong stap folem profet bambae i helpem olgeta blong oli kam kolosap moa long Sevya? Wan wei, i blong givim olgeta wan smol kad, mo invaetem olgeta blong ridim sam pat blong mesej blong Elda Neil L. Andersen: “Profet blong God.” Long wan saed blong kad ia, oli save raetem ol samting we oli lanem abaot wei we profet i save helpem olgeta blong kam kolosap moa long Kraes. Long narasaed blong kad, oli save raetem sam samting we oli kasem insperesen blong mekem blong folem profet. Invaetem olgeta blong serem wanem we oli bin raetem.

Mekem Samting Wetem Fet

Leftemap tingting blong ol memba blong klas o blong kworom blong tingting hevi mo raetemdaon wanem bae oli mekem blong tekem aksen folem ol strong tingting mo filing we oli bin kasem tedei. Sapos oli wantem, oli save serem ol aedia blong olgeta. Invaetem olgeta blong oli tingting abaot, hao we, taem oli tekem aksen folem ol tingting we oli bin kasem, bae i mekem se rilesensip blong olgeta wetem Papa long Heven mo Jisas Kraes i kam strong moa.

Ol Sapot Risos

• Amos 3:7; Doktrin mo Ol Kavenan 1:4, 37–38; Moses 6:26–27, 32–36; Gaed long Ol Skripja, “Profet,” olskripja.ChurchofJesusChrist.org; “Why Do We Have Prophets?” (vidio), ChurchofJesusChrist.org (From wanem yumi gat ol profet)

• Gary E. Stevenson, “Hat blong Wan Profet,” Liahona, Mei 2018, 17–20 (Olsem wanem oli jusum profet)

Tij Folem Wei blong Sevya

“Tru fasin blong jenisim laef, i moa jes blong stap filim Spirit we i stap konfemem trutok long sol blong yumi; yumi mas tekem aksen folem ol trutok ia tu. Antap long fasin blong stap helpem olgeta we oli stap lan blong oli filim mo luksave Spirit, helpem olgeta blong tekem aksen folem ol kwaet toktok we oli kasem long Spirit” (Teaching in the Savior’s Way, 10).