24 Julae

?Wanem Blesing Nao I Kam Taem Yumi Kasem Ol Odinens blong Tempol?

Esra 1; 3–7; Nehemaea 2; 4–6; 8

Kaonsel Tugeta

Wan memba blong kworom o klas presidensi i lidim; 10–20 minit

Long stat blong miting, tugeta, ripitim Stamba Toktok blong Ol Yang Woman o Stamba Toktok blong Ol Kworom blong Aronik Prishud. Afta, lidim wan toktok storian abaot wok ia blong fasin blong sevem man mo mekem olgeta oli kam olsem wan god, mo yusum wan, o moa long wan long ol kwestin andanit ia, o yusum ol kwestin blong yuwan (luk long Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent 10.2, 11.2, ChurchofJesusChrist.org/study?lang=bis). Mekem plan blong gat sam wei blong tekem aksen folem wanem yufala i toktok raon long hem.

• Laef folem gospel. ?Long wanem wei nao yumi bin luk han blong God insaed long laef blong yumi?

• Kea long olgeta we oli stap long nid. ?Olsem wanem yumi save sapsapotem wanwan long yumi long ol samting we yumi stap gotru long hem?

• Invaetem evriwan blong akseptem gospel. ?Olsem wanem yumi save yusum teknoloji long wan wei we i gud moa, mo olsem wan tul blong stap serem gospel?

• Joenem ol famli blong taem we i no save finis. ?Wanem nao yumi stap mekem blong helpem ol famli blong yumi blong kam long Kraes?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong klas o blong kworom abaot ol plan mo ol invitesen we oli bin mekem long taem blong miting.

Stap Tijim Doktrin

Wan adalt lida o yut i lidim; 25–35 minit

Rere long Yuwan long Saed blong Spirit

Taem we Ol Jiu oli gobak long Babilon afta we oli bin aot long hem, oli faenem Jerusalem mo tempol blong hem i prapa nogud i stap (luk long 2 King 25:1–10; 2 Kronikel 36:17–19). Oli pipol oli bin wantem tumas blong bildimbak tempol. So, afta wan sot taem, oli statem wok blong bildimbak tempol mo oli bin glad taem tempol i komplit (luk long Esra 3:8–13; 6:16–22). Tedei, olsem ol kavenan pipol blong God, yumi tu, yumi stap bildim ol tempol mo yumi stap glad taem oli bildim finisim wan tempol. ?From wanem? From ol tempol odinens oli lidim yumi i go long ol blesing blong Papa long Heven we oli moa hae evriwan. Oli tekem paoa long saed blong spirit. Oli soem rod long yumi. Mo oli helpem yumi blong kam olsem God mo kasem evri samting we Hem i gat. (Luk long Doktrin mo Ol Kavenan 84:19–22; 109:22–26.)

?Olsem wanem nao bae yu helpem ol yut ia blong oli wantem tempol o go long tempol semmak olsem Ol Laen blong Isrel? ?Olsem wanem nao bae yu helpem olgeta blong wantem, wetem ful hat blong olgeta, blong oli mekem ol kavenan wetem God long tabu haos blong Hem? Taem yu stap rere blong tij, tingting blong luklukbak long mesej blong Presiden Thomas S. Monson: “Blessings of the Temple” (Liahona, May 2015, 91–93) mo atikol ia “Why Ordinances and Covenants Matter” we i stap long temples.ChurchofJesusChrist.org.

Ol odinens blong tempol oli helpem yumi blong kam olsem God mo kasem evri samting we Hem i gat.

Stap Lan Tugeta

Blong helpem ol memba blong klas o blong kworom blong luk fored from ol blesing we oli save kasem from ol odinens blong tempol ia, yu save invaetem olgeta blong luklukbak long Esra 3:10–13; 6:16, 21–22. Askem olgeta blong oli serem ol toktok o ol sentens we oli soemaot olsem wanem Ol Jiu bifo oli bin filim abaot wok blong bildimbak tempol blong olgeta. ?From wanem wok blong stap bildim wan tempol, i wan gud wok blong stap selebretem? ?Olsem wanem nao, ol tempol tedei, mo wok we yumi stap mekem insaed, i helpem yumi blong kam kolosap moa long Sevya? Hemia sam aedia blong helpem ol yut blong oli andastanem ol blesing we oli save kasem insaed long tempol.

• Taem we Josef Smit i dediketem Ketlan Tempol, hem i talem dedikesen prea we i stap long Doktrin mo Ol Kavenan 109. Prea ia i tokbaot plante long ol blesing we yumi save kasem tru long ol odinens blong tempol. Ol memba blong klas o blong kworom oli save luklukgud insaed long ol pat blong prea ia, speseli long ol ves 12–26, mo lukluk long ol blesing we Josef Smit i bin prea from. Oli save raetem ol blesing ia long bod. Maet yu save askem ol yut blong toktok raon long wei, we, wanwan long ol blesing ia i save mekem olgeta i kam strong moa naoia, mo long fiuja. Serem testemoni blong yu abaot ol blesing we yu bin kasem tru long ol odinens blong tempol.

• Blong helpem ol memba blong klas mo blong kworom blong oli serem ol filing blong olgeta abaot tempol, askem olgeta blong finisim sentens ia: “Taem mi tingbaot tempol, mi filim …” Yu save invaetem olgeta blong ridim ol faef fas paragraf blong mesej blong Elda Kent F. Richards: “The Power of Godliness” (Liahona, May 2016, 118–20). ?From wanem yumi nidim tempol i moa bitim eni nara samting moa? ?Wanem nao yumi bin lanem abaot paoa we God i givim long yumi tru long ol odinens blong tempol? Ol yut oli save luklukgud long nara haf blong mesej blong Elda Richards, blong faenem ol blesing we oli kam long yumi taem yumi tekpat long ol odinens blong tempol. O, oli save lukaotem ol blesing ia insaed long mesej blong Presiden Thomas S. Monson: “Ol Blesing blong Tempol.”

• Blong helpem ol memba blong klas o blong kworom blong oli tingting hevi long ol sakrifaes we sam oli bin glad blong mekem blong kasem ol blesing blong tempol, yu save soem wan vidio: “Temples Are a Beacon” (ChurchofJesusChrist.org). ?From wanem Mou Tham famli i bin glad blong mekem ol bigfala sakrifaes olsem blong go long tempol? (Luk tu long Thomas S. Monson, “The Holy Temple—a Beacon to the World,” Liahona, May 2011, 90–94.) ?Wanem sakrifaes nao yumi stap mekem blong kasem ol blesing blong tempol tedei? Mebi wan we i jes go long tempol i save joenem miting mo serem eksperiens blong hem. Yu save invaetem ol yut blong luklukgud insaed long mesej blong Elda Ronald A. Rasband: “We Oli Givim Nem I Go long Lod” (Liahona, Nov 2020, 22–25) mo serem ol blesing blong gat wan tempol rekomen. Mo tu, tugeta yufala i save luklukbak long ol kwestin blong tempol rekomen (luk long Russell M. Nelson, “Las Toktok,” Liahona, Nov 2019, 120–22).

Mekem Samting Wetem Fet

Leftemap tingting blong ol memba blong klas o blong kworom blong tingting hevi mo raetemdaon wanem bae oli mekem blong tekem aksen folem ol strong tingting mo filing we oli bin kasem tedei. Sapos oli wantem, oli save serem ol aedia blong olgeta. Invaetem olgeta blong oli tingting abaot, hao we, taem oli tekem aksen folem ol tingting we oli bin kasem, bae i mekem se rilesensip blong olgeta wetem Papa long Heven mo Jisas Kraes i kam strong moa.

Ol Sapot Risos

• Quentin L. Cook, “Luk Yuwan Insaed long Tempol,” Jeneral Konfrens, Epril 2016, ChurchofJesusChrist.org/study/general-conference?lang=bis

Tij Folem Wei blong Sevya

“Yu no stap givimaot infomesen nomo, be helpem ol yut blong oli faenemaot ol trutok blong gospel olgetawan insaed long ol skripja, mo tu, insaed long ol toktok blong ol profet” (Teaching in the Savior’s Way, 28).