14 Ogis

?Olsem Wanem bae Mi Faenem Glad Taem Mi Stap Folem Sevya?

Ol Sam 1–2; 8; 19–33; 40; 46

Kaonsel Tugeta

Wan memba blong kworom o klas presidensi i lidim; 10–20 minit

Long stat blong miting, tugeta, ripitim Stamba Toktok blong Ol Yang Woman o Stamba Toktok blong Ol Kworom blong Aronik Prishud. Afta, lidim wan toktok storian abaot wok ia blong fasin blong sevem man mo mekem olgeta oli kam olsem wan god, mo yusum wan, o moa long wan long ol kwestin andanit ia, o yusum ol kwestin blong yuwan (luk long Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent 10.2, 11.2, ChurchofJesusChrist.org/study?lang=bis). Mekem plan blong gat sam wei blong tekem aksen folem wanem yufala i toktok raon long hem.

• Laef folem gospel. ?Olsem wanem nao yumi stap gat glad taem yumi biaen long Jisas Kraes?

• Kea long olgeta we oli stap long nid. ?Huia long wod o blong komuniti blong yumi i nidim help blong yumi? ?Olsem wanem nao yumi save helpem olgeta?

• Invaetem evriwan blong akseptem gospel. ?Olsem wanem yumi helpem wanwan long yumi blong rere from misinari seves?

• Joenem ol famli blong taem we i no save finis. ?Olsem wanem nao yumi save tekpat long ol hadwok blong wod blong mekem wok blong famli histri mo tempol?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong klas o blong kworom abaot ol plan mo ol invitesen we oli bin mekem long taem blong miting.

Stap Tijim Doktrin

Wan adalt lida o yut i lidim; 25–35 minit

Rere long Yuwan long Saed blong Spirit

?Wanem nao yu tekem glad long hat blong yu? Ol pipol oli save talem se oli gat glad taem oli spendem taem wetem ol fren mo ol famli, wan samting we oli laekem tumas, o iven, blong jes gat wan dei we i no gat tes. Presiden Russell M. Nelson i tijim: “Glad we yumi filim i no from situesen blong laef blong yumi, be hem i from samting we yumi lukluk faswan long laef blong yumi. Taem we, long laef blong yumi, yumi stap lukluk nomo long plan blong God blong fasin blong sevem man, mo Jisas Kraes mo gospel blong Hem, yumi save filim glad nomata wanem i stap hapen—o i no stap hapen—long laef blong yumi. Hem i stamba blong Glad i kam long Hem mo from” (“Glad mo Traehad blong Laef long Saed blong Spirit,” Jeneral Konfrens, Okt 2016, ChurchofJesusChrist.org/study/general-conference?lang=bis). Plante long Ol Sam, oli talemaot semfala mesej: “Yu bambae yu soem rod ya long mi we i blong go kasem laef. Nao taem mi mi stap wetem yu, bambae mi harem we mi glad tumas, tingting blong mi bambae i glad oltaem nomo” (Ol Sam 16:11).

Tingting long sam jalenj we ol memba blong klas o blong kworom blong yu oli stap fesem. ?Olsem wanem bae yu helpem olgeta blong andastanem se tru glad i kam taem wan i praktisim fet blong hem long Sevya—iven long ol taem we oli had? Tingting hevi long ol kwestin ia taem yu stap rere blong tij. Lukaotem sam ples long mesej we oli semmak we yu save serem wetem klas o kworom blong yu; tekem ol toktok we oli kamaot long Buk blong Ol Sam, o insaed long mesej ia blong Presiden Nelson: “Glad mo Traehad blong Laef long Saed blong Spirit.”

Tru glad i kam taem wan i praktisim fet blong hem long Sevya, iven long ol taem we oli had.

Stap Lan Tugeta

Tingting blong invaetem ol memba blong klas o blong kworom blong luklukbak long samfala skripja ia: Ol Sam 1; 8; 19; 23; 27. ?Wanem nao yumi lanem aot long Ol Sam ia abaot wanem i tekem glad i kam long yumi? Afta, yu save yusum wan o moa long olgeta aktiviti ia blong helpem olgeta we yu stap tijim blong oli andastanem moa se tru glad, hem i kam taem yumi folem Jisas Kraes.

• Yumi evriwan i wantem faenem glad, be yumi nidim blong andastanem wanem i tekem tru glad i kam, mo wanem i lidim yumi blong go harem nogud. Askem ol yut blong oli serem sam long ol samting we i tekem glad i kam long olgeta, mo from wanem ol samting ia oli tekem glad i kam. Raetem long bod: “Ol man oli stap, blong oli save gat glad.” (2 Nifae 2:25). Afta, invaetem ol yut, wanwan long olgeta o long ol smol grup, blong oli luklukbak long wan, o moa long wan long ol skripja insaed long “Ol Sapot Risos” mo mekem wan lis blong wanem we oli faenem, we i lidim man blong kasem glad. Maet bae yu wantem soem vidio ia: “We Can Find Happiness” (ChurchofJesusChrist.org). ?Wanem nao samfala wei we ol pipol oli stap traem blong faenem glad ia, we long tru laef, i stap lidim olgeta i go harem nogud? ?Olsem wanem nao Sevya i tekem glad i kam long yumi?

• Yumi evriwan i save ol pipol we oli fesem ol jalenj iven we oli stap traem bes blong olgeta blong laef folem gospel. ?Olsem wanem yu save helpem olgeta we yu stap tijim blong oli andastanem we yumi save faenem glad iven taem i gat jalenj long laef blong yumi? Yu save askem olgeta blong luklukbak long mesej blong Presiden Russell M. Nelson: “Glad mo Traehad blong Laef long Saed blong Spirit” o mesej blong Presiden Steven J. Lund: “Stap Faenem Glad long Kraes” (Liahona, Nov 2020, 35–37). ?Wanem eksampol nao yumi bin faenem, blong ol pipol we, nomata long situesen blong olgeta we i had tumas, be yet oli faenem glad? ?Wanem nao yumi lanem aot long ol eksperiens ia? ?Wanem eksperiens nao yumi save serem?

• Yumi evriwan i save gat ol filing blong tingting i wari tumas, o tingting i fasfas tumas taem yumi stap fesem ol jalenj blong laef. Long sam, ol filing ia, oli wan faet blong laeftaem. Maet bae i gud blong klas o kworom blong yu i toktok raon long ol jalenj ia mo abaot wei we Sevya i save helpem olgeta we oli gat hadtaem wetem tingting i wari mo tingting i fasfas tumas. Blong stat blong toktok raon long hemia, yu save askem ol yut blong oli luklukbak long mesej blong Elda Jeffrey R. Holland: “Olsem Wan Man we Oli Sakem Finis,” speseli, ol las fofala paragraf (Jeneral Konfrens, Okt 2013, ChurchofJesusChrist.org/study/general-conference?lang=bis), o mesej blong Sista Reyna I. Aburto: “!Tru long Klaod mo San I Saen, Lod, Stap Wetem Mi!” (Liahona, Nov 2019, 57–59). Invaetem ol memba blong klas o blong kworom blong lukaotem ol trutok we oli gat mining long olgeta, mo blong oli serem wanem we oli bin faenem. Leftemap tingting blong ol yut blong oli toktok wetem wan papa mo mama, o lida we oli trastem, o visitim mentalhealth.ChurchofJesusChrist.org sapos oli filim se oli nidim help.

Mekem Samting Wetem Fet

Leftemap tingting blong ol memba blong klas o blong kworom blong tingting hevi mo raetemdaon wanem bae oli mekem blong tekem aksen folem ol strong tingting mo filing we oli bin kasem tedei. Sapos oli wantem, oli save serem ol aedia blong olgeta. Invaetem olgeta blong oli tingting abaot, hao we, taem oli tekem aksen folem ol tingting we oli bin kasem, bae i mekem se rilesensip blong olgeta wetem Papa long Heven mo Jisas Kraes i kam strong moa.

Ol Sapot Risos

• Matiu 5:1–12; 1 Pita 4:12–13; 2 Nifae 2:25–27; Mosaea 2:41; 3:3–7; 4:2–3; Alma 36:16–22; 4 Nifae 1:15–16 (Olsem wanem blong faenem glad)

• D. Todd Christofferson, “Glad Ia blong Ol Sent,” Liahona, Nov 2019, 15–18

• “Suicide Prevention and Ministering,” ChurchofJesusChrist.org

Tij Folem Wei blong Sevya

Sevya Hem i save olgeta we Hem i bin tijim, Hem i save gud huia olgeta wanwan— mo Hem i save se wanem kaen man o woman bae oli save kam. Taem oli stap traehad blong kamaot long hadtaem, Hem i bin gohed blong lavem olgeta. ?Olsem wanem yu save soem se yu lavem mo sapotem olgeta we yu stap tijim?