28 Ogis

?Olsem Wanem Sevya I Save Helpem Mi long Taem blong Tes blong Mi?

Ol Sam 102–103; 110; 116–119; 127–128; 135–139; 146–150

Kaonsel Tugeta

Wan memba blong kworom o klas presidensi i lidim; 10–20 minit

Long stat blong miting, tugeta, ripitim Stamba Toktok blong Ol Yang Woman o Stamba Toktok blong Ol Kworom blong Aronik Prishud. Afta, lidim wan toktok storian abaot wok ia blong fasin blong sevem man mo mekem olgeta oli kam olsem wan god, mo yusum wan, o moa long wan long ol kwestin andanit ia, o yusum ol kwestin blong yuwan (luk long Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent 10.2, 11.2, ChurchofJesusChrist.org/study?lang=bis). Mekem plan blong gat sam wei blong tekem aksen folem wanem yufala i toktok raon long hem.

• Laef folem gospel. ?Wanem sam eksperiens we i jes pas we oli tekem yumi i go kolosap moa long Papa long Heven mo Jisas Kraes.

• Kea long olgeta we oli stap long nid. ?I gat wan we i jes muv i kam insaed long wod blong yumi, o i jes joenem Jos? ?Olsem wanem nao yumi helpem olgeta blong filim we oli welkam?

• Invaetem evriwan blong akseptem gospel. ?Wanem aktiviti i stap kam we yumi save invaetem ol fren blong yumi blong kam long hem?

• Joenem ol famli blong taem we i no save finis. ?Wanem wok moa yumi save mekem blong raetem ol histri blong yumiwan?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong klas o blong kworom abaot ol plan mo ol invitesen we oli bin mekem long taem blong miting.

Stap Tijim Doktrin

Wan adalt lida o yut i lidim; 25–35 minit

Rere long Yuwan long Saed blong Spirit

Ol jalenj we yumi stap fesem oli save mekem se yumi filim se yumi nomo gat paoa, yumi kros smol, yumi filim se yumi lus mo stap yumiwan. Olgeta we oli raetem Ol Sam oli bin andastanem olgeta filing ia mo oli talemaot olgeta wetem paoa: “Mi mi kam olsem gras we san i bonem i drae. Mo mi no moa save harem nating se mi hanggri” (Ol Sam 102:4, 7). Be wetem semfala strong paoa, oli bin testifae se, blong tanem i go long Sevya, bambae i tekem spel i kam: “Mi mi mas presem hem, mo mi no save fogetem we hem i kaen tumas long mi. Hem i stap fogivim mi, i stap tekemaot ol sin blong mi. Hem i stap tekemaot ol sik blong mi, i mekem mi mi gud bakegen, mo i stap lukaot gud long mi blong mi mi no ded. Hem i lavem mi tumas, mo i sore tumas long mi, nao oltaem hem i stap mekem i gud tumas long mi” (Ol Sam 103:2–4).

Tingting abaot ol blesing we bambae oli kam long ol memba blong klas o blong kworom blong yu taem we bae oli andastanem moa fulwan olsem wanem Sevya i save helpem olgeta tru long ol tes blong olgeta. ?Olsem wanem nao Sevya i bin helpem yu? Taem yu stap rere, yu save luklukbak long mesej blong Presiden Henry B. Eyring:“Oli Testem, Yumi Pruvum, Oli Smutum” (Liahona, Nov 2020, 96–99) mo “Agens, Wanem I Kam” insaed long Gaed long Ol Skripja (olskripja.ChurchofJesusChrist.org).

Sevya i save helpem mo i givim kamfot long yumi taem yumi stap gotru long ol tes blong yumi.

Stap Lan Tugeta

Blong stat, yu save askem ol memba blong klas blong luklukbak long Ol Sam 102, 103, mo 116, mo lukaotem olsem wanem Sevya i bin helpem yumi long ol hadwok blong yumi blong winim ol tes. Oli save wok wanwan, o long wan grup blong raetem samfala sentens abaot wanem oli bin faenem, mo afta, serem wanem we oli bin raetem. Jusum wan, o moa long olgeta aktiviti ia blong helpem olgeta blong oli andastanem topik ia moa dip.

• Ol hym oli save invaetem Spirit mo i save tijim doktrin long wan wei we i gat paoa. Tingting blong luklukbak long wan hym abaot wei we Sevya i stap helpem yumi long ol tes blong yumi, olsem: “Tijing blong Jisas Oli Stamba blong Yumi” (STSP, pej 6). ?Wanem nao hym ia i tijim abaot help we Sevya i save givim? Afta, ol yut oli save luklukbak long ol skripja we oli stap long “Ol Sapot Risos.” Maet bae oli lanem moa sapos oli raetemdaon wan sentens aot long hym ia, o wan long ol skripja we i mekem olgeta oli tingbaot blong lukaotem Sevya long taem we samting i kam agensem olgeta.

• Mesej ia blong Presiden Henry B. Eyring: “Oli Testem, Yumi Pruvum, Oli Smutum” i save helpem olgeta we yu stap tijim blong oli andastanem moa ol kwestin olsem: ?Wanem nao sam long ol stamba tingting blong laef? ?Olsem wanem nao Sevya i stap helpem yumi wetem ol jalenj blong yumi? ?Wanem nao yumi save mekem blong askem mo yusum help mo paoa blong Sevya? Tingting blong raetem ol kwestin ia long bod. Ol memba blong klas o blong kworom oli save lukaotem ansa blong olgeta insaed long mesej blong Presiden Eyring. Eksampol: ?Wanem nao yumi lanem aot long ol stori abaot mama blong Presiden Eyring? stori ia i stap long stat mo long en long mesej? Maet bae yu askem wanwan blong tingting hevi long wei we oli save yusum wanem we oli bin lanem insaed long ol tes blong olgetawan bakegen. Sam yut, bae oli wantem blong serem ol tingting blong olgeta.

• Sista Lisa L. Harkness i yusum stori blong Sevya we i mekem strong win i stop blong tijim se Hem i save mekem ol strong win insaed long laef blong yumi oli go kwaet (luk long Mak 4:35–41; “Yu Gat Pis, Yu Stap Kwaet,” Liahona, Nov 2020, 80–82). Maet yu save invaetem wan memba blong klas o blong kworom blong i kam we hem i rere blong serem wanem we hem i bin lanem abaot Sevya aot long skripja stori ia. Memba blong klas o kworom ia i save soem wan pikja tu (luk long Gospel Art Buk, namba 40). Afta, yut ia i save luklukbak long wanem Sista Harkness i bin tijim abaot wei we Sevya “i stap long bot blong yumi” taem yumi fesem ol jalenj ia. Maet bae yu save invaetem wanwan man o woman blong serem olsem wanem Sevya i bin helpem olgeta long ol tes blong olgeta, mo hemia i tekem tu olsem wanem Hem i bin helpem olgeta tru long ol nara pipol. Leftemap tingting blong ol yut blong oli serem eksperiens blong olgeta wetem wan we oli save we i nidim pis blong Sevya.

Mekem Samting Wetem Fet

Leftemap tingting blong ol memba blong klas o blong kworom blong tingting hevi mo raetemdaon wanem bae oli mekem blong tekem aksen folem ol strong tingting mo filing we oli bin kasem tedei. Sapos oli wantem, oli save serem ol aedia blong olgeta. Invaetem olgeta blong oli tingting abaot, hao we, taem oli tekem aksen folem ol tingting we oli bin kasem, bae i mekem se rilesensip blong olgeta wetem Papa long Heven mo Jisas Kraes i kam strong moa.

Ol Sapot Risos

• Aesea 53:3–5; Hibrus 2:17–18; Alma 7:11–13; 36:3; Ita 12:27 (Sevya bae i helpem yumi long ol tes blong yumi)

• Dieter F. Uchtdorf, “God Bae I Mekem Wan Samting We Yumi No Save Bilivim,” Liahona, Nov 2020, 51–54

• Cristina B. Franco, “Hiling Paoa blong Jisas Kraes,” Liahona, Nov 2020, 60–62

• “Ol Hil blong Klaem” (vidio), ChurchofJesusChrist.org

Tij Folem Wei blong Sevya

“Blong askem ol kwestin we i leftemap tingting blong olgeta we oli stap lan blong oli serem testemoni abaot ol prinsipol we oli stap tijim, i save kam wan wei, we i gat paoa, blong invaetem Spirit. Testemoni blong olgeta—mo testemoni blong ol narawan insaed long klas— i gro taem we Spirit i talem witnes abaot trutok” (Teaching in the Savior’s Way, 32).