11 Septemba

?Olsem Wanem Mi Save Stap Klin mo Hapi Bakegen Afta we Mi Sin?

Aesea 1–12

Kaonsel Tugeta

Wan memba blong kworom o klas presidensi i lidim; 10–20 minit

Long stat blong miting, tugeta, ripitim Stamba Toktok blong Ol Yang Woman o Stamba Toktok blong Ol Kworom blong Aronik Prishud. Afta, lidim wan toktok storian abaot wok ia blong fasin blong sevem man mo mekem olgeta oli kam olsem wan god, mo yusum wan, o moa long wan long ol kwestin andanit ia, o yusum ol kwestin blong yuwan (luk long Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent 10.2, 11.2, ChurchofJesusChrist.org/study?lang=bis). Mekem plan blong gat sam wei blong tekem aksen folem wanem yufala i toktok raon long hem.

• Laef folem gospel. ?Olsem wanem nao taem yumi stap tanem yumi i go long Lod, i helpem yumi blong fesem ol jalenj mo ol tes blong yumi?

• Kea long olgeta we oli stap long nid. ?Olsem wanem yumi save huia i nidim prea mo frensip blong yumi?

• Invaetem evriwan blong akseptem gospel. ?Insaed long wod yut kaonsel miting blong yufala, wanem plan blong serem gospel nao yumi bin toktok raon long hem? ?Olsem wanem klas o kworom i pat insaed?”

• Joenem ol famli blong taem we i no save finis. ?Olsem wanem fasin blong mekem famli histri wok i mekem rilesensip blong yumi wetem Papa long Heven mo Jisas Kraes i kam strong moa?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong klas o blong kworom abaot ol plan mo ol invitesen we oli bin mekem long taem blong miting.

Stap Tijim Doktrin

Wan adalt lida o yut i lidim; 25–35 minit

Rere long Yuwan long Saed blong Spirit

Taem yumi filim se yumi rong afta we yumi mekem wan sin, yumi gat wan joes. Olgeta filing ia, nating oli mekem yumi harem nogud tumas, i save kam wan blesing sapos oli pusum yumi i go blong sakem sin. Be Setan i stap talem long yumi se, ol filing ia, oli minim se God i no lavem yumi mo i stap traem blong mekem yumi slakem tingting mo nomo gat hop. Maet bae i gat ol pipol we yu stap tijim, we ol kaen filing olsem oli hevi long tingting blong olgeta. Maet oli save stap askem olgetawan sapos oli save kam klin mo hapi bakegen. ?Olsem wanem nao yu save helpem olgeta blong faenem hop long Atonmen blong Sevya?

Profet Aesea i stretem ol pipol long wan klia fasin, from ol sin blong olgeta. Be tu, hem i bin testifae se, from Sevya, “nating we ol sin blong yufala i mekem yufala i doti gud, be bambae mi mekem we yufala i klin we i klin” (Aesea 1:18). Tingting hevi long hemia taem yu stap ridim Aesea 1–12 long wik ia. ?Wanem nao i givim insperesen long olgeta we yu stap tijim blong oli tanem olgeta long Jisas Kraes wetem fet ia se, hevi trabol blong sin blong olgeta, Lod i save tekemaot long olgeta? Mo tu, maet bae wantem stadi long testemoni blong Sista Sharon Eubank insaed long mesej ia blong hem:“Kraes: Laet Ia we I Stap Saen long Tudak” (Liahona, Mei 2019, 73–76).

From Jisas Kraes, hevi trabol blong sin ia, Hem i save tekemaot.

Stap Lan Tugeta

Blong rere long wan storian insaed long klas we bae i bildimap wanem we oli bin lanem long Aesea 1–12, yu save askem wanwan yut blong karem wan samting we i red, mo wan samting we i waet i kam long miting. Yu save soem ol samting ia taem we, tugeta, yufala i ridim Aesea 1:16–18. Leftemap tingting blong ol yut blong oli serem, wetem toktok blong olgeta nomo, wanem we oli lanem aot long ol ves ia. (Luk long wanem Sista Sharon Eubank i stap talem abaot ves 18 insaed long “Kraes: Laet Ia we I Stap Saen long Tudak.”) Hemia sam narafala aktiviti we i save givim insperesen blong gat fet long paoa blong Sevya blong mekem yumi kam klin long saed blong spirit.

• Sapos yufala i luklukbak long samfala eksampol blong fasin blong sakem sin, bae i save helpem olgeta we yu stap tijim blong oli bildimap fet blong olgeta se Jisas Kraes i save mekem olgeta oli kam klin long saed blong spirit. Maet bae yu wantem raetem long bod, ol nem olsem Sol (we afta i kam Pol), Yangfala Alma, Sisrom, mo Ol Antae Nifae Lihae. Yu save raetem tufala grup blong ol skripja refrens: Ol Wok 8:3; Mosaea 27:8–10; Alma 11:21–23; Alma 17:12–15 (ol pipol ia long taem we oli bin stap long sin) mo Ol Wok 9:13–20; Alma 36:17–24; Alma 15:5–12; Alma 23:6–12 (afta, ol pipol ia oli bin tanem olgeta i go long Sevya mo oli bin sakem sin). Ol yut bae oli save majem wanwan nem wetem ol skripja we oli tokbaot nem ia. ?Wanem nao ol pipol ia oli bin mekem blong sakem sin? ?Wanem nao ol stori ia oli stap tijim yumi abaot gud tingting mo hat we Sevya i gat blong fogivim man? ?Yumi luk sam paten long ples ia we yumi save folem?

• Blong helpem olgeta we yu stap tijim blong oli andastanem moa fasin blong fogivim sin, yu save givim wan analoji o parabol blong wanwan i stadi long hem. Olgeta ia, i gat parabol blong yangfala man we i lus mo i kambak (luk long Luk 15:11–24); Sevya olsem Man blong yumi blong Lukaot long Ol Sipsip (ol paragraf 5–8 blong mesej blong Elda Dale G. Renlund: “Gudfala Man blong Yumi blong Lukaot long Sipsip” [Jeneral Konfrens, Mei 2017, ChurchofJesusChrist.org/study/general-conference?lang=bis]); mo wan piano we i brokbrok (stat blong mesej blong Sista Cristina B. Franco: “Hiling Paoa blong Jisas Kraes” [Liahona, Nov 2020, 60–62]). Ol yut oli save talem sot wanwan analoji o parabol ia, mo afta toktok raon long wanem analoji o parabol ia i stap tijim abaot lav mo paoa we i pemaot man, blong Sevya.

• Blong harem sore from se yumi bin mekem sin i save help, mo i save lidim yumi i go from fasin blong sakem sin. Blong filim se tingting i slak, o blong filim se yumi no impoten from ol sin blong yumi, i no save help mo i mekem se i save stopem yumi blong sakem sin. Klas o kworom blong yu, i save ridim tugeta seksen ia we taetol blong hem i: “Godly Sorrow” insaed long mesej blong Presiden Dieter F. Uchtdorf, “You Can Do It Now!” (Liahona, Nov. 2013, 55–57). ?Wanem i defren bitwin harem nogud from sin we i lidim man blong sakem sin, mo harem nogud ia we i lidim man blong lusum hop? (Luk tu long 2 Korin 7:9–10; Momon 2:12–14). Sapos wan i harem se, filing ia blong rong mo lusum hop from sin i winim hem, ?wanem nao bae yumi save talem long hem blong hem i tanem hem i go long Sevya? Invaetem ol yut blong oli serem ol testemoni blong olgeta abaot Sevya mo sore blong Hem.

Mekem Samting Wetem Fet

Leftemap tingting blong ol memba blong klas o blong kworom blong tingting hevi mo raetemdaon wanem bae oli mekem blong tekem aksen folem ol strong tingting mo filing we oli bin kasem tedei. Sapos oli wantem, oli save serem ol aedia blong olgeta. Invaetem olgeta blong oli tingting abaot, hao we, taem oli tekem aksen folem ol tingting we oli bin kasem, bae i mekem se rilesensip blong olgeta wetem Papa long Heven mo Jisas Kraes i kam strong moa.

Ol Sapot Risos

• Dallin H. Oaks, “Fasin blong Sakem Sin I Klinim Mi,” Liahona, Mei 2019, 91–94

• Fasin blong Sakem Sin tru long Atonmen blong Jisas Kraesinsaed long japta 3 blong Prijim Gospel blong Mi (2019), 62–63.

• “Repentance: A Joyful Choice” (vidio), ChurchofJesusChrist.org

Tij Folem Wei blong Sevya

“Testemoni blong Sevya Hemwan i bin givim atoriti ia long ol toktok blong Hem. … Taem yu stap talem testemoni blong yu long saed blong tru doktrin, bae Spirit i konfemem se doktrin ia i tru insaed long hat blong olgeta ia we yu stap tijim” (Teaching in the Savior’s Way, 21).