25 Septemba

?Wanem Nao Responsabiliti blong Yumi insaed long Wok Ia blong Fasin blong Sevem Man mo Mekem Olgeta I Kam Olsem Wan God?

Aesea 40–49

Kaonsel Tugeta

Wan memba blong kworom o klas presidensi i lidim; 10–20 minit

Long stat blong miting, tugeta, ripitim Stamba Toktok blong Ol Yang Woman o Stamba Toktok blong Ol Kworom blong Aronik Prishud. Afta, lidim wan toktok storian abaot wok ia blong fasin blong sevem man mo mekem olgeta oli kam olsem wan god, mo yusum wan, o moa long wan long ol kwestin andanit ia, o yusum ol kwestin blong yuwan (luk long Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent 10.2, 11.2, ChurchofJesusChrist.org/study?lang=bis). Mekem plan blong gat sam wei blong tekem aksen folem wanem yufala i toktok raon long hem.

• Laef folem gospel. ?Wanem nao yumi bin toktok raon long hem long las taem? Mo ?Wanem invitesen nao o wanem wok nao oli bin givimaot? ?Wanem nao yumi bin mekem blong tekem aksen, blong muv folem ol invitesen ia o ol wok ia we oli bin givimaot olgeta?

• Kea long olgeta we oli stap long nid. ?Wanem nao yumi save talem o mekem blong go luk ol narawan we maet oli stap filim se oli stap olgetawan, o oli filim se oli stap longwe long Papa long Heven?

• Invaetem evriwan blong akseptem gospel. ?Wanem nao sam wei we yumi save helpem ol narawan blong oli filim lav blong Jisas Kraes?

• Joenem ol famli blong taem we i no save finis. ?Wanem aedia nao yumi save serem wetem wanwan long yumi blong helhelpem yumi blong mekem famli blong yumi i kam strong moa?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong klas o blong kworom abaot ol plan mo ol invitesen we oli bin mekem long taem blong miting.

Stap Tijim Doktrin

Wan adalt lida o yut i lidim; 25–35 minit

Rere long Yuwan long Saed blong Spirit

Aot long ol skripja, hem i klia se, blong stap help blong mekem wok ia blong Lod, i no blong ol adalt nomo. Samuel i bin wan boe taem we Lod i bin toktok long hem faswan. Meri i olsem wan yang woman nomo taem we enjel i kam visitim hem, i talemaot long hem se bambae hem i mama blong Sevya. Mo Josef Smit i gat 14 yia nomo taem we Lod i bin singaotem hem blong i putumbak gospel. I no longtaem i pas, Presiden Russell M. Nelson i bin invaetem evri yang pipol blong “joenem bigfala grup blong ami blong yut blong Lod blong helpem wok blong karem Israel i kam tugeta” (“Hope of Israel” [wol yut divosen, 3 Jun 2018], HopeofIsrael.ChurchofJesusChrist.org). I tru we, taem Lod i bin talem: “Yufala ol laen blong Isrel, mi mi jusumaot yufala, mo yufala i man blong wok blong mi” (Aesea 41:8), hemia i tekem evriwan long ol kavenan pipol blong hem, wetem olgeta ia we oli stap insaed long klas o kworom blong yu.

Iven we yumi evriwan i bin mekem kavenan ia blong wok blong God taem yumi kasem baptaes, i no evri yang pipol we oli stap luk olgeta olsem ol wokman blong Lod. Oli no stap luksave ol wei, we i blong olgeta nomo, we oli save help wetem wok ia blong Hem. Lukaotem ol ples long Aesea 41–44 mo long seksen 1.2 blong Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent, we i save helpem ol yut blong oli andastanem wanem nao i minim blong stap olsem ol wokman blong Lod.

Wanwan yangfala i gat wan spesel wok blong mekem blong helpem wok ia blong fasin blong sevem man mo mekem oli kam olsem wan god.

Stap Lan Tugeta

Aesea 41–44 i save helpem ol yut blong oli andastanem wanem hem i minim blong stap olsem wan wokman blong Lod. Blong stat blong toktok insaed long klas o kworom, yu save raetem ol refrens olsem ia long bod: Aesea 41:8–10; 42:6–7; 43:9–12; 44:21. Wanwan i save jusum wan ves mo ridim, mo serem wanem hem i lanem abaot mining blong stap olsem wan wokman blong Lod. ?Long wanem wei nao, yumi, yumi ol wokman blong Lod? ?Wanem blesing i kam taem yumi stap mekem wok blong Lod? Hemia sam narafala wei blong helpem olgeta we yu stap tijim blong oli tekem ol pipol oli kam long Kraes, taem we oli aktiv blong mekem wok ia blong Hem.

• Olgeta ia we yu stap tijim, ?oli andastanem wanem ia “wok ia blong fasin blong sevem man mo fasin blong mekem man i kam olsem wan god”? Blong helpem olgeta, yu save givim wok ia long olgeta blong oli stadi (wanwan o long ol smol grup) wan long ol smol seksen blong seksen 1.2 blong Jeneral Hanbuk. Wanwan smol seksen ia i tokbaot wan defren pat insaed long wok ia. Askem ol yut blong oli askem olgetawan, ol kwestin olsem: ?Wanem nao ol stret samting we wan we i gat yia blong mi i save mekem blong tekpat long pat ia blong wok blong fasin blong sevem man? ?Wanem nao klas o kworom i save mekem? Wanwan yang woman o man i save serem wanem we oli lanem, mo semtaem oli save givim ansa long ol kwestin ia.

• Olgeta we yu stap tijim olgeta bae oli save kam antap sapos oli lanem moa abaot ol fofala pat blong wok ia blong fasin blong sevem man mo mekem oli kam olsem wan god—we oli blong stap laef folem gospel blong Jisas Kraes, stap kea long olgeta we oli stap long nid, stap invaetem evriwan blong akseptem gospel, mo blong stap yunaetem ol famli blong taem we i no save finis. Oli save jusum wan pat ia we oli gat intres long hem, mo luklukgud long sam long ol samting we i go wetem, we i stap insaed long “Ol Sapot Risos.” Letem ol yut oli serem wanem we oli faenem we i givim insperesen long olgeta blong kam blong jenisim laef moa long Lod, mo helpem ol narawan blong oli mekem semmak. Afta, oli save mekem ol plan blong mekem wan samting we i help blong mekem wok ia i hapen. Presiden blong klas o blong kworom i save lidim toktok storian ia.

• Blong helpem ol yut blong oli tingting hevi long wei we oli save yusum talen blong olgeta blong tekem ol sol oli kam long Kraes, yu save askem wanwan long olgeta blong stadi long wan seksen blong mesej ia blong Elda John C. Pingree Junia: “I Have a Work for Thee” (Liahona, Nov. 2017, 32–35). Oli save serem, olsem wanem, wanem we oli bin lanem, i save helpem wan we i no save stret olsem wanem blong help wetem wok ia blong Lod. Tugeta, yufala i save luklukbak long seksen ia: “Discover and Develop Spiritual Gifts” insaed long mesej blong Elda Pingree. ?Olsem wanem Lod i stap helpem yumi blong faenemaot mo developem ol talen blong yumi?

Mekem Samting Wetem Fet

Leftemap tingting blong ol memba blong klas o blong kworom blong tingting hevi mo raetemdaon wanem bae oli mekem blong tekem aksen folem ol strong tingting mo filing we oli bin kasem tedei. Sapos oli wantem, oli save serem ol aedia blong olgeta. Invaetem olgeta blong oli tingting abaot, hao we, taem oli tekem aksen folem ol tingting we oli bin kasem, bae i mekem se rilesensip blong olgeta wetem Papa long Heven mo Jisas Kraes i kam strong moa.

Ol Sapot Risos

• Laef folem gospel blong Jisas Kraes: 2 Nifae 31:17–21; 3 Nifae 27:13–21; “Following God” (vidio), ChurchofJesusChrist.org

• Kea long olgeta we oli stap long nid: Matiu 25:34–40; Mosaea 18:8–9; “You Are the Gift” (vidio), ChurchofJesusChrist.org

• Invaetem evriwan blong akseptem gospel: Matiu 5:14–16; 1 Pita 3:15; “Sharing Your Beliefs” (vidio), ChurchofJesusChrist.org

• Joenem ol famli blong taem we i no save finis: Doktrin mo Ol Kavenan 2; 128:18; “Because of James” (vidio), ChurchofJesusChrist.org

Tij Folem Wei blong Sevya

“Sapos ol yut oli filim se yu trastem olgeta, bae tras blong olgeta long tabu paoa ia we oli save kasem bae i gro, mo bambae oli mekem sapraes long yu wetem wanem oli save mekem” (Teaching in the Savior’s Way, 28).