9 Oktoba

?From Wanem Jisas Kraes I Mas Stap long Medel Insaed long Laef blong mi?

Aesea 58–66

Kaonsel Tugeta

Wan memba blong kworom o klas presidensi i lidim; 10–20 minit

Long stat blong miting, tugeta, ripitim Stamba Toktok blong Ol Yang Woman o Stamba Toktok blong Ol Kworom blong Aronik Prishud. Afta, antap long we yufala i kaonsel tugeta abaot ol stret nid blong klas o blong bisnis blong kworom, ating yu wantem blong toktok raon long ol filing mo ol stamba toktok we oli kam long jeneral konfrens. Ol kwestin ia bae i save help:

• ?Wanem stamba tingting o mesej we i kamaot klia long yumi? ?Wanem i mekem bilif blong yumi long Jisas Kraes i kam strong moa?

• ?Wanem nao yumi save mekem blong mekem ol testemoni blong yumi abaot profet we oli stap laef oli kam strong moa? ?Wanem nao yu filim se Spirit i talem long yu blong go mekem from olgeta samting ia we yu bin lanem, o bin filim?

• ?Wanem nao yumi nidim blong mekem, olsem wan klas o kworom blong tingbaot mo tekem aksen folem kaonsel we yumi bin harem long jeneral konfrens?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong klas o blong kworom abaot ol plan mo ol invitesen we oli bin mekem long taem blong miting.

Stap Tijim Doktrin

Wan adalt lida o yut i lidim; 25–35 minit

Rere long Yuwan long Saed blong Spirit

“!Ol man Jerusalem! Hae God i God blong yumi, mo naoia yumi glad tumas from ol samting ya we hem i mekem,” Aesea i talem, “Yumi olsem yang boe wetem yang gel we bambae tufala i mared, we tufala i putum klos blong mared finis. Spesel klos blong yumi, hemia we Hae God i sevem yumi, i mekem we yumi kam stret man long fes blong hem.” (Aesea 61:10). ?From wanem “yumi glad tumas” long Lod? Olsem Aesea, taem yumi luksave wanem we Lod i bin mekem from yumi, yumi stap glad tumas, mo yumi tokbaot plante we Lod “i stap lavem yumi tumas,” mo yumi “presem [Hem]” (Aesea 63:7).

?Olsem wanem nao olgeta we yu stap tijim oli filim abaot Sevya? ?Wanem nao i save helpem olgeta blong oli filim moa lav mo respek long Hem? ?Wanem nao bae i save helpem olgeta blong oli filim lav blong Hem? Taem yu stap tingting hevi long ol kwestin ia mo ridim Aesea 58–66, bae yu save luklukbak long mesej blong Elda Matthew S. Holland: “Naesfala Presen ia we Pikinini blong God i Givim” (Liahona, Nov 2020, 45–47) mo mesej blong Sista Cristina B. Franco: “Hiling Paoa blong Jisas Kraes” (Liahona, Nov 2020, 60–62).

Taem yumi stap lan abaot Sevya, yumi kasem insperesen ia blong mekem Hem i kam senta blong laef blong yumi.

Stap Lan Tugeta

Taem we ol memba blong klas o blong kworom oli stap lan abaot misin ia we God i sendem Jisas Kraes from, bambae oli kasem moa insperesen blong mekem Sevya i stap long medel blong laef blong olgeta. Maet oli save luklukgud insaed long Aesea 61:1–3 mo mekem wan lis, long bod, blong wanem wok nao God i bin anoentem Sevya blong mekem (luk tu long Luk 4:16–20). ?Olsem wanem nao Sevya i stap mekem olgeta pat ia blong misin blong Hem? ?Olsem wanem nao Hem i mekem olgeta samting ia oli hapen insaed long laef blong yumi naoia? Ol aedia andanit ia oli save helpem klas o kworom blong yu blong gohed blong toktok raon long from wanem nao Jisas Kraes i mas stap long medel blong laef blong yumi.

• Oltaem nomo, jeneral konfrens i gat ol mesej we oli testifae abaot Jisas Kraes. Bae yu save invaetem sam memba blong klas o blong kworom blong oli serem wan samting we oli bin lanem abaot Sevya long taem blong jeneral konfrens. Leftemap tingting blong olgeta blong oli serem olsem wanem oli filim abaot Sevya, mo hemia from ol samting we oli bin lanem.

• Ol skripja oli save helpem moa ol yut blong andastanem from wanem Sevya i mas stap long medel blong laef blong olgeta. Maet bae yu save raetem long bod: ?From wanem Jisas Kraes i mas stap long medel blong laef blong mi? Askem ol yut blong oli serem ol tingting blong olgeta. Afta long hemia, yu save askem olgeta (wanwan o long grup), blong oli luklukgud insaed long ol skripja anda long “Ol Sapot Risos” blong oli faenem sam moa ansa. Invaetem ol yut blong oli serem wanem we oli bin lanem, mo from wanem nao i gat mining long olgeta.

• Tingting blong askem olgeta we yu stap tijim blong tokbaot dei ia we i moa impoten long laef blong olgeta. ?Wanem dei nao, i luk se i moa impoten dei long histri? Invaetem olgeta blong oli faenemaot wanem we Elda Dieter F. Uchtdorf i bin talem se i moa impoten taem oli luklukbak long mesej blong hem: “!Yufala i luk! !Hemia Nao Man Ya!” (Liahona, Mei 2018, 107–10). Leftemap tingting blong ol yut blong oli lukaotem ol blesing ia we Elda Uchtdorf i promesem long olgeta we oli “luk” Jisas Kraes. Mo tu, oli save serem wanem we oli stap mekem blong putum Sevya i stap long medel blong evri dei laef blong olgeta. Yu save leftemap tingting blong olgeta blong tingting long wanem oli save mekem blong kam kolosap moa long Jisas Kraes mo putum wan gol blong mekem i hapen.

• Sapos wan bae i kam askem long yumi from wanem yumi stap biliv long Jisas Kraes, ?bae yumi talem wanem? Leftemap tingting blong ol yut blong serem ol tingting blong olgeta, mo raetem olgeta antap long bod. Yu save invaetem olgeta blong luklukbak long “Kraes we I Laef: Testemoni blong Olgeta Aposol” (ChurchofJesusChrist.org/study?lang=bis) o “The Divine Mission of Jesus Christ” insaed long japta 3 blong Preach My Gospel ([2019], 60–61). Leftemap tingting blong olgeta blong faenemaot ol simpol trutok we bae oli wantem serem blong eksplenem from wanem Sevya i impoten long olgeta. Oli save ademap ol trutok we oli faenem i go long lis we i stap long bod, mo toktok raon long wei we oli save serem ol trutok ia wetem ol pipol we oli save olgeta.

Mekem Samting Wetem Fet

Leftemap tingting blong ol memba blong klas o blong kworom blong tingting hevi mo raetemdaon wanem bae oli mekem blong tekem aksen folem ol strong tingting mo filing we oli bin kasem tedei. Sapos oli wantem, oli save serem ol aedia blong olgeta. Invaetem olgeta blong oli tingting abaot, hao we, taem oli tekem aksen folem ol tingting we oli bin kasem, bae i mekem se rilesensip blong olgeta wetem Papa long Heven mo Jisas Kraes i kam strong moa.

Ol Sapot Risos

• Jon 8:12; 14:6; Rom 8:35–39; 2 Nifae 2:3–9; 9:5–10; Alma 36:3, 27; 3 Nifae 27:14–16, 27; Ita 12:27 (From wanem Jisas i mas stap long medel blong laef blong yumi)

• Becky Craven, “Holemtaet Jenis Ia” (Liahona, Nov 2020, 58–60)

• “I Believe in Christ,” “Mi Sapraes Tumas” (Hymns, namba 134, STSP, pej 22)

• “Why We Need a Savior—A Christmas Message about Our Savior Jesus Christ,” “Because of Him” (ol vidio), ChurchofJesusChrist.org

Tij Folem Wei blong Sevya

“Wanwan man o woman insaed long klas blong yu, i wan rij ples blong testemoni, niu tingting, mo eksperiens blong fasin blong laef folem gospel. Invaetem olgeta blong serem mo blong leftemap wanwan long olgeta bakegen” (Teaching in the Savior’s Way, 5).