famli skripja stadi

23 Oktoba

?Weswe? ?Mi Raetem Gospel Insaed long Hat blong Mi?

Jeremaea 30–33; 36; Ol Krae 1; 3

kaonsel tugeta pikja bokis

Kaonsel Tugeta

Wan memba blong kworom o klas presidensi i lidim; 10–20 minit

Long stat blong miting, tugeta, ripitim Stamba Toktok blong Ol Yang Woman o Stamba Toktok blong Ol Kworom blong Aronik Prishud. Afta, lidim wan toktok storian abaot wok ia blong fasin blong sevem man mo mekem olgeta oli kam olsem wan god, mo yusum wan, o moa long wan long ol kwestin andanit ia, o yusum ol kwestin blong yuwan (luk long Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent 10.2, 11.2, ChurchofJesusChrist.org/study?lang=bis). Mekem plan blong gat sam wei blong tekem aksen folem wanem yufala i toktok raon long hem.

• Laef folem gospel. ?Wanem nao yumi bin toktok raon long hem long las taem? Mo ?Wanem invitesen nao o wanem wok nao oli bin givimaot? ?Wanem nao yumi bin mekem blong tekem aksen, blong muv folem ol invitesen ia o ol wok ia we oli bin givimaot olgeta?

• Kea long olgeta we oli stap long nid. ?Wanem nao yumi save talem o mekem blong go luk ol narawan we maet oli stap filim se oli stap olgetawan, o oli filim se oli stap longwe long Papa long Heven?

• Invaetem evriwan blong akseptem gospel. ?Wanem nao sam wei we yumi save helpem ol narawan blong oli filim lav blong Jisas Kraes?

• Joenem ol famli blong taem we i no save finis. ?Wanem aedia nao yumi save serem wetem wanwan long yumi blong helhelpem yumi blong mekem famli blong yumi i kam strong moa?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong klas o blong kworom abaot ol plan mo ol invitesen we oli bin mekem long taem blong miting.

Stap Tijim Doktrin

Wan adalt lida o yut i lidim; 25–35 minit

Rere long Yuwan long Saed blong Spirit

Lod i bin talem long profet Jeremaea se, long ol dei we oli stap kam, bambae Hem i mekem Isrel i kam tugeta, mo bambae Hem i mekem wan “niu kavenan” wetem ol pipol blong Hem. Hem i talem: “ Mi bambae mi putum loa blong mi long tingting blong yufala, mo bambae mi raetemdaon long hat blong yufala. Mo mi bambae mi God blong yufala, mo yufala bambae i man blong mi” (luk long Jeremaea 31:31–34). Ol taem ia, oli ol taem blong yumi tedei, mo yumi nao ol man blong God. Ol tijing ia, maet bae oli pusum yu—mo olgeta we yu stap tijim—blong askem: ?Wanem nao God i minim blong Hem raetemdaon gospel long hat blong mi? ?Weswe? ?Hem i raetemdaon gospel ia long hat blong mi? Sapos Hem i no raetem, ?wanem nao bae yu mekem long hemia?

Tingting long wei we bae yu helpem ol memba blong klas o blong kworom blong yu blong oli tingting hevi long ol kwestin ia, olgetawan. Blong yu rere blong tij, yu save faenem ol mesej blong serem, we oli kam long Jeremaea 30–33; 36; we i kam long mesej blong Presiden Russell M. Nelson: “Letem God I Win” (Liahona, Nov 2020, 92–95); mo insaed long mesej blong Elda D. Todd Christofferson: “When Thou Art Converted” (Liahona, May 2004, 11–13).

wan yang woman i stap stadi long skripja

Taem yumi stap lavem Lod, mo yumi stap lukaotem blong lanem samting aot long Hem, gospel ia bambae Hem i raetemdaon insaed long hat blong yumi.

Stap Lan Tugeta

Leftemap tingting blong ol yut blong oli toktok raon long Jeremaea 31:31–34. Blong mekem hemia, yu save givim sam pepa hat, we antap long olgeta, yu raetemdaon samfala kwestin abaot mining blong gat gospel insaed long hat blong yumi, olsem ol kwestin ia we oli stap insaed long seksen ia: “Rere long Yuwan long Saed blong Spirit.” Oli save wok olgetawan, o tutu, o long smol grup; ol yut oli save ridim ol ves ia aot long Jeremaea, mo tingting hevi long wei we bae oli ansarem ol kwestin ia. Letem olgeta oli serem ol kwestin blong olgeta wetem ol ansa we oli bin tingting long hem. Andanit ia, i gat moa aedia we oli save helpem yu blong tijim ol yut abaot wei we Lod i save raetemdaon gospel insaed long hat blong olgeta.

• Taem we Moses i bin givim sam long ol las tijing blong hem long Ol Laen blong Isrel, hem i bin askem strong long olgeta blong akseptem ol toktok blong God insaed long hat blong olgeta. Mo tu, Hem i bin tijim olgeta long samfala wei we oli save mekem hemia, olsem we oli bin faenem insaed long Dutronome 6:3–9. Olsem wan klas o wan kworom, ridim ol ves ia tugeta mo toktok raon long sam wei we yumi save mekem wanem we Moses i bin givim advaes long yumi blong mekem. Blong gat samfala aedia, klas o kworom blong yu i save wajem vidio ia: “Come, Follow Me: These Words” (ChurchofJesusChrist.org). Mo tu, oli save stadi long Alma 5:14, 26–35 blong oli faenem wanem we Alma i bin tijim abaot wei we yumi save kipim gospel ia i raet i stap insaed long hat blong yumi.

• Long mesej blong hem: “When Thou Art Converted,” Elda D. Todd Christofferson i tokbaot wanem yumi save mekem blong oli raetem gospel insaed long hat blong yumi. ?Wanem nao yumi lanem aot long ol fo fasfala paragraf abaot mining blong gat gospel we oli raetemdaon insaed long hat blong yumi? Yu save invaetem wanwan yut blong i ridim wan, o moa long wan long ol paragraf we oli stap, mo lukaotem wanem yumi nidim blong mekem blong hemia i hapen. ?Wanem rol nao, Sevya i gat long ples ia? ?Wanem rol nao yumi gat? Leftemap tingting blong ol yut blong oli serem ol ansa blong olgeta, wetem sam nara niu tingting we oli faenem. ?Wanem eksperiens nao oli bin helpem yumi blong oli raetem gospel ia insaed long hat blong yumi? ?Wanem rol nao, fasin blong stap kipim ol kavenan i gat, long rod ia?

• Presiden Russell M. Nelson i bin eksplenem se, toktok ia, Isrel “i tokbaot wan we i wantem letem God i stap win insaed long laef blong hem” (“Letem God I Win,” 92). Yu save invaetem ol yut blong luklukgud insaed long ol sikis fasfala paragraf blong mesej blong Presiden Nelson, mo luklukgud long las pat blong mesej ia we i stat wetem “Kwestin i kam long wanwan long yumi.” Askem olgeta blong faenem wan samting we i helpem olgeta blong andastanem wanem i minim blong “letem God i win” insaed long laef blong olgeta. ?Olsem wanem nao yumi filim mo tekem aksen taem God i stap win insaed long laef blong yumi. ?Wanem nao Presiden Nelson i stap tijim abaot, olsem wanem, taem yumi gat gospel we oli raetemdaon i stap insaed long hat blong yumi i tajem ol hadwok we yumi mekem blong pulum Isrel i kam tugeta?

Mekem Samting Wetem Fet

Leftemap tingting blong ol memba blong klas o blong kworom blong tingting hevi mo raetemdaon wanem bae oli mekem blong tekem aksen folem ol strong tingting mo filing we oli bin kasem tedei. Sapos oli wantem, oli save serem ol aedia blong olgeta. Invaetem olgeta blong oli tingting abaot, hao we, taem oli tekem aksen folem ol tingting we oli bin kasem, bae i mekem se rilesensip blong olgeta wetem Papa long Heven mo Jisas Kraes i kam strong moa.

Ol Sapot Risos

• Henry B. Eyring, “Write upon My Heart” (Liahona, Nov. 2000, 85–87)

• Linda K. Burton, “Is Faith in the Atonement of Jesus Christ Written in Our Hearts?” (Liahona, Nov. 2012, 111–15)

Tij Folem Wei blong Sevya

“Doktrin we oli faenem insaed long ol skripja mo insaed long ol toktok blong ol profet blong lata-dei, oli gat paoa blong jenisim hat blong man mo mekem man i gat moa fet. Taem yu, mo olgeta we yu stap tijim, yufala i ‘traem paoa blong toktok blong God,’ bae yu faenem we ‘hem i gat fasin ia blong lidim ol pipol blong mekem samting we i stret’ (Alma 31:5)” (Teaching in the Savior’s Way, 5).