13 Novemba

?Olsem Wanem Bae Mi Kasem Spirit blong Lod I Plante we I Plante?

Hosea 1–6; 10–14; Joel

Kaonsel Tugeta

Wan memba blong kworom o klas presidensi i lidim; 10–20 minit

Long stat blong miting, tugeta, ripitim Stamba Toktok blong Ol Kworom blong Aronik Prishud o Stamba Toktok blong Ol Yang Woman Afta, lidim wan toktok storian abaot wok ia blong fasin blong sevem man mo mekem olgeta oli kam olsem wan god, mo yusum wan, o moa long wan long ol kwestin andanit ia, o yusum ol kwestin blong yuwan (luk long Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent 10.2, 11.2, ChurchofJesusChrist.org/study?lang=bis). Mekem plan blong gat sam wei blong tekem aksen folem wanem yufala i toktok raon long hem.

• Laef folem gospel. ?Wanem eksperiens we yumi bin gat i no longtaem i pas we i bin mekem ol testemoni blong yumi oli kam strong moa?

• Kea long olgeta we oli stap long nid. ?Huia i nidim help mo ol prea blong yumi? ?Wanem nao yumi save filim blong mekem blong helpem olgeta?

• Invaetem evriwan blong akseptem gospel. ?Olsem wanem yumi save stap olsem wan laet long ol nara memba blong famli o fren we oli no gat ol semfala bilif olsem yumi?

• Joenem ol famli blong taem we i no save finis. ?Olsem wanem yumi save soem moa lav mo sapot long ol famli blong yumi, mo mekem wan samting we i defren be i gud insaed long ol hom blong yumi?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong klas o blong kworom abaot ol plan mo ol invitesen we oli bin mekem long taem blong miting.

Stap Tijim Doktrin

Wan adalt lida o yut i lidim; 25–35 minit

Rere long Yuwan long Saed blong Spirit

I no gat kwestin se yumi stap laef long wan taem we yumi no save gud ol samting, mo yumi stap fraet. Profet blong OlTesteman, Joel, i bin tokbaot taem blong yumi olsem—dei blong Hae God— i olsem wan taem we i “gat bigfala klaod, we i blak we i blak, mo olgeta ples bambae i tudak olgeta” (Joel 2:1–2, 11). Be hemia i no minim se i no gat hop long taem blong yumi tedei. Tingting long promes ia we i kam long Elda Dieter F. Uchtdorf: “Long taem we yumi filim se oli berem yumi long ol hadtaem blong laef, o tudak i raonem yumi, lav blong God mo ol blesing blong gospel blong Jisas Kraes we i kambak bae i karem ol samting i kam we yumi no save bilivim se bae i gro.” (“God Bae I Mekem Wan Samting We Yumi No Save Bilivim,” Liahona, Nov 2020, 52).

So taem we yu luk se ples i tudak mo i no gud long taem blong yumi, tingbaot se Lod i bin promesem ol blesing we oli bigwan—we yumi no save bilivim olgeta: “mi bambae mi givim Spirit blong mi long olgeta man, we bambae olgeta evriwan oli kasem fulpaoa blong hem. Ol pikinini blong yufala, ol boe mo ol gel, bambae oli save talemaot ol tok we mi bambae mi givim long olgeta” (Joel 2:28; luk tu long Josef Smit—Histri 1:41). Luk gud long spesifik promes ia, se Spirit blong God bae i kam long evri yang man mo yang woman. ?From wanem yu yu filim se i impoten blong olgeta we yu stap tijim blong oli andastanem hemia? Tingting hevi long kwestin ia taem yu stap ridim Joel 2 mo mesej blong Elda Uchtdorf, taem yu stap rere blong tij.

Lod i bin promesem se, long ol las dei, bambae Hem i givim Spirit blong Hem i fulap, mo “Ol pikinini blong yufala, ol boe mo ol gel, bambae oli save talemaot ol tok we mi bambae mi givim long olgeta” (Joel 2:28).

Stap Lan Tugeta

Blong helpem olgeta we yu stap tijim blong oli andastanem moa wanem i stap long Joel 2:28–29, yu save putum wan samting insaed long wan bolglas, mo letem wan i kavremap wetem wota. ?Olsem wanem nao hemia i helpem yumi blong andastanem wanem hem i minim blong Lod i “givim Spirit blong [Hem] long olgeta man”? ?Long wanem wei nao ol profesi we oli stap insaed long Joel 2:28–29 oli stap kamtru? Hemia sam moa aedia we oli save helpem ol yut blong oli andastanem moa olsem wanem Lod i stap givim Spirit blong Hem tedei.

• Ol skripja oli rekodem plante taem we Lod i givim Spirit blong Hem long ol pipol blong Hem. Taem yu stap luklukbak long olgeta taem ia, bae i save helpem ol yut blong oli andastanem moa olsem wanem bae oli kasem Spirit blong God i fulap insaed long laef blong olgeta. Tingting blong droem wan bigfala jag blong wota long bod, mo askem wanwan, o ol smol grup blong oli ridim wan, o moa long wan long ol skripja we oli stap long “Ol Sapot Risos.” Oli save raet long bod, raon long jag wota, wanem nao ol pipol insaed long skripja we oli ridim, i bin mekem blong mekem se Lod i save kapsaetem Spirit blong Hem, mo tu, ol blesing we oli bin kam afta. ?Wetaem nao yumi bin filim Spirit i stap givim kamfot, i stap lidim, o i stap klinim yumi?

• Maet bae yu nidim blong raetem ol toktok ia we oli kam long Elda Dieter F. Uchtdorf, antap long bod: “God i gat wan samting we yu no save bilivim long maen blong Hem, blong yuwan mo wetem Jos—wan gudfala wok mo wan sapraes.” (“God Bae I Mekem Wan Samting we Yumi No Save Bilivim,” 53). Tingting blong askem long ol yut blong oli lukluk long mesej blong Elda Uchtdorf blong faenem ol blesing ia we yumi no save bilivim, we God i bin givim long ol pipol long ol skripja afta long wan taem we i had tumas. ?Wanem Elda Uchtdorf tijim yumi blong mekem, blong mekem se yumi save mekem ol gudfala desisen taem we yumi fesem wan taem we i had? Invaetem ol yut blong mekem wan lis blong ol samting “we yumi no save bilivim” we God i save gat long maen blong Hem, blong yumi mekem. Invaetem olgeta we yu stap tijim blong tingting hevi long wanem we oli glad blong mekem blong save kasem olgeta blesing ia.

• Tingting blong soem vidio ia: “President Nelson: Hear Him—Personal Revelation” (ChurchofJesusChrist.org). Askem ol yut blong lisin long ol niu tingting abaot wei we Spirit i stap toktok long yumi, mo olsem wanem Hem i stap blesem laef blong yumi. Mo tu, oli save luklukbak long mesej blong Presiden Russell M. Nelson: “Revelesen blong Jos, Revelesen blong Ol Laef blong Yumi” (Liahona, Mei 2018, 93–96). ?Askem olgeta blong lukaotem ol ansa long ol kwestin olsem: ?Olsem wanem nao Presiden Nelson i stap lukaotem mo stap kasem ol kwaet toktok we oli kam long Spirit? ?Wanem nao yumi lanem aot long Josef Smit abaot glad hat mo tingting blong God blong save toktok long ol pikinini blong Hem? ?Wanem nao Presiden Nelson i askem strong long yumi blong mekem? Talem long ol yut abaot wan taem we yu bin filim Lod i kapsaetem Spirit blong Hem long yu. Invaetem olgeta blong oli tingting hevi long sam eksperiens we oli bin gat, mo sapos oli filim se i stret, oli save serem olgeta.

Mekem Samting Wetem Fet

Leftemap tingting blong ol memba blong klas o blong kworom blong tingting hevi mo raetemdaon wanem bae oli mekem blong tekem aksen folem ol strong tingting mo filing we oli bin kasem tedei. Sapos oli wantem, oli save serem ol aedia blong olgeta. Invaetem olgeta blong oli tingting abaot, hao we, taem oli tekem aksen folem ol tingting we oli bin kasem, bae i mekem se rilesensip blong olgeta wetem Papa long Heven mo Jisas Kraes i kam strong moa.

Ol Sapot Risos

• Ol Wok 2:1–6, 14–21; Jekob 7:1–8; Mosaea 4:1–3, 19–20; 18:7–11; Alma 19:14, 28–36; Hileman 6:34–36; Doktrin mo Ol Kavenan 19:37–41

Tij Folem Wei blong Sevya

“Antap long fasin blong stap helpem olgeta we oli stap lan blong oli filim mo haremsave Spirit, helpem olgeta blong tekem aksen folem ol kwaet toktok we oli kasem long Spirit”(Teaching in the Savior’s Way, 10).