27 Novemba

?Olsem Wanem Mi Save Serem Gospel?

Jona; Maeka

Kaonsel Tugeta

Wan memba blong kworom o klas presidensi i lidim; 10–20 minit

Long stat blong miting, tugeta, ripitim Stamba Toktok blong Ol Yang Woman o Stamba Toktok blong Ol Kworom blong Aronik Prishud. Afta, lidim wan toktok storian abaot wok ia blong fasin blong sevem man mo mekem olgeta oli kam olsem wan god, mo yusum wan, o moa long wan long ol kwestin andanit ia, o yusum ol kwestin blong yuwan (luk long Jeneral Hanbuk: Stap Givim Seves Insaed long Jos Ia blong Jisas Kraes blong Ol Lata-dei Sent 10.2, 11.2, ChurchofJesusChrist.org/study?lang=bis). Mekem plan blong gat sam wei blong tekem aksen folem wanem yufala i toktok raon long hem.

• Laef folem gospel. ?Hamas moa nao yumi muv i go kolosap moa long Sevya? ?Olsem wanem nao yumi stap traem blong kam moa olsem Hem?

• Kea long olgeta we oli stap long nid. ?Huia nao i bin stap long maen blong yumi long ol las dei we oli jes pas? ?Olsem wanem nao yumi save helpem wanwan long olgeta ia?

• Invaetem evriwan blong akseptem gospel. ?Olsem wanem nao yumi save givim ansa long ol kwestin blong ol fren blong yumi, abaot Jos?

• Joenem ol famli blong taem we i no save finis. ?Wanem nao samfala wei we yumi toktok o go kolosap moa wetem ol narafala memba blong famli, olsem ol bubu mo ol kasen brata mo sista?

Long en blong lesen, sapos i stret, mekem ol samting ia:

• Testifae abaot ol prinsipol we yu bin tijim.

• Rimaenem ol memba blong klas o blong kworom abaot ol plan mo ol invitesen we oli bin mekem long taem blong miting.

Stap Tijim Doktrin

Wan adalt lida o yut i lidim; 25–35 minit

Rere long Yuwan long Saed blong Spirit

Maet i gat sam memba blong klas o blong kworom blong yu, we oltaem, oli faenem wei blong serem gospel. !Mebi yu tu yu stap mekem hemia! Be, long plante pipol, blong stap serem gospel, hem i had, o oli fraet long hem. Laki tumas, evriwan long yumi i save kam gud moa long fasin blong stap serem bilif blong yumi long Jisas Kraes. Maet bae yu no harem stret voes blong Lod we i stap givim oda long yu blong mekem wan samting olsem: “Yu girap, yu go long bigfala taon ya Nineve, yu tok long olgeta, from we mi luk se fasin blong olgeta i nogud we i nogud,” olsem we Jona i bin harem (Jona 1:2). Be kwaet voes blong Tabu Spirit bae i save pusum yu blong “go stret” long sam spesifik memba blong famli mo fren, we oli mekem olgeta oli rere blong harem testemoni blong yu. Gat wan open maen long wanem yu save lanem aot long eksperiens blong Jona taem yu stap stadi long wik ia, mo mekem yuwan i rere blong serem wanem yu lanem wetem olgeta ia we yu stap tijim. Maet bae yu wantem ridim tu mesej ia blong Elda D. Todd Christofferson: “Stap Serem Mesej blong Restoresen mo Laef Bakegen long Ded.” taem yu stap rere blong tij (Liahona, Mei 2020, 110–13).

Tabu Spirit bae i save pusum yu blong serem gospel wetem olgeta we oli mekem olgeta oli rere blong harem testemoni blong yumi.

Stap Lan Tugeta

Blong helpem olgeta we yu stap tijim blong oli serem ol filing mo tingting we oli kasem taem oli bin stap stadi long Buk blong Jona long wik ia, yu save soem wan pikja blong Jona (luk long aotlaen blong wik ia insaed long Kam Folem Mi—Blong Wanwan Man, Woman mo Famli). Invaetem olgeta blong toktok raon long wanem we oli bin lanem abaot fasin blong stap serem gospel, aot long ol eksperiens blong Jona. Maet bae yu save invaetem olgeta blong luklukbak speseli long Jona 1 mo 3 mo askem: ?Wanem nao yumi lanem abaot fasin blong serem gospel wetem olgeta we, i luk se oli no rere blong jenis? ?Wanem nao yumi lanem abaot gud tingting blong God blong fogivim olgeta we oli stap sakem sin? Blong givim insperesen long klas o long kworom blong yu blong serem gospel, yusum wan, o moa long wan long olgeta aktiviti ia, o krietem wan aktiviti blong yuwan.

• Blong kasem samfala aedia abaot wei blong serem gospel blong Sevya wetem ol narawan, klas o kworom blong yu i save luklukbak long olgeta stori ia insaed long ol skripja: Jon 4:3–26; Ol Wok 16:25–33; Alma 19:14–18, 28–31. Afta, yufala i save toktok raon long ol kwestin olsem olgeta kwestin ia: ?Long wanem wei nao, ol pipol we oli stap long ol stori ia, oli bin rere blong harem mesej blong gospel? ?Wanem nao yu yu luk abaot wei we oli bin serem mesej ia? ?From wanem yu yu ting se Papa long Heven mo Jisas Kraes, Tufala i wantem yumi blong serem gospel? Afta long hemia, yu save toktok raon, olsem wan klas o wan kworom, wanem ol stori ia oli stap tijim yumi abaot wei we yumi save serem gospel tedei.

• Sapos yu stap ridim ol insperesen eksampol blong ol narawan we oli bin serem gospel, hem i save leftemap tingting blong ol yut we yu stap tijim blong mekem semfala samting. Elda D. Todd Christofferson i bin serem samfala eksampol long mesej blong hem ia: “Stap Serem Mesej blong Restoresen mo Laef Bakegen long Ded..” Long mesej blong hem, Elda Christofferson i bin tijim se i gat trifala samting we yumi nidim blong mekem invitesen blong yumi blong akseptem gospel, i winim tingting blong man: lav blong yumi, eksampol blong yumi, mo hao yumi yusum Buk blong Momon. Toktok raon long ol eksampol ia blong stap serem gospel we oli stap insaed long mesej ia, mo invaetem olgeta we yu stap tijim blong oli serem ol nara eksampol, we i tekem tu, eksperiens blong olgetawan. ?Olsem wanem nao ol eksperiens ia oli soemaot ol trifala samting we Elda Christofferson i stap tijim?

• ?Olsem wanem nao yu save helpem olgeta we yu stap tijim blong oli andastanem se, fasin blong stap serem gospel, i save kam olsem nomo, mo i no nid blong i strong long ol man. Maet bae yu wantem soem ol vidio we oli stap anda long “Ol Sapot Risos” mo askem ol yut blong tingting abaot wei we bae oli save serem gospel wetem wan we oli save hem. ?Wanem nao yumi save mekem blong invaetem hem blong kam mo luk? ?Wanem janis i stap blong oli kam mo help? ?Olsem wanem nao yumi helpem olgeta blong oli wantem blong kam mo stap? ?Olsem wanem nao yumi save mekem se fasin blong serem gospel i pat blong evri dei laef blong yumi?

Mekem Samting Wetem Fet

Leftemap tingting blong ol memba blong klas o blong kworom blong tingting hevi mo raetemdaon wanem bae oli mekem blong tekem aksen folem ol strong tingting mo filing we oli bin kasem tedei. Sapos oli wantem, oli save serem ol aedia blong olgeta. Invaetem olgeta blong oli tingting abaot, hao we, taem oli tekem aksen folem ol tingting we oli bin kasem, bae i mekem se rilesensip blong olgeta wetem Papa long Heven mo Jisas Kraes i kam strong moa.

Ol Sapot Risos

• Carlos A. Godoy, “Mi Biliv long Ol Enjel,” Liahona, Nov 2020, 86– 88

• “Sharing the Gospel,” “Inviting Others to ‘Come and See,’” “Inviting Others to ‘Come and Help,’” “Inviting Others to ‘Come and Stay’” (ol vidio), ChurchofJesusChrist.org; yu save faenem sam moa risos anda long “Sharing the Gospel,”insaed long Gospel Laebri

Tij Folem Wei blong Sevya

“Ol pipol bae oli save mekem moa jenis we i gat mining insaed long laef blong olgeta taem ol jenis ia oli hapen from oli praktisim fridom blong olgeta blong mekem joes. Taem yu givim wan invitesen blong tekem aksen, mekemsua se yu respektem fridom blong joes blong olgeta ia we yu stap tijim” (Teaching in the Savior’s Way, 35).