“21–27 Novemba. Jona; Maeka: ‘Oltaem Yu Yu Glad blong Soemaot long Mifala we Yu Stap Lavem Mifala Tumas,’” Kam Folem Mi—Blong Wanwan Man, Woman mo Famli: OlTesteman 2022 (2021)
“21–27 Novemba. Jona; Maeka,” Kam Folem Mi—Blong Wanwan Man, Woman mo Famli: 2022
Jona long Soa blong Nineve i kam long Daniel A. Lewis
21–27 Novemba
Jona; Maeka
“Oltaem Yu Yu Glad blong Soemaot long Mifala we Yu Stap Lavem Mifala Tumas”
Taem yu stap raetemdaon ol tingting mo filing blong yu, tingbaot olsem wanem olgeta prinsipol long Jona mo Maeka oli go wetem wanem we yu bin stap lanem long ol skripja.
Raetemdaon Ol Filing mo Tingting blong Yu
Jona i bin stap long wan bot i go long Tarsis. I no gat samting i rong blong sel i go long Tarsis, be hemia nomo, hem i longwe long Nineve, ples we Jona i sapos blong go long hem blong givimaot mesej blong God. Mekem se sip i fesem strong win, nao Jona i bin save se from hem i no bin obei. Jona i stanap strong, nao ol boskru oli sakem hem long dip solwota blong stopem strong win. I luk olsem se hemia i en blong laef blong Jona mo seves blong hem. Be Lod i no givap long Jona—semmak olsem we Hem i no bin givap long ol pipol blong Nineve, mo semmak olsem we Hem i no stap givap long eniwan blong yumi. Olsem we Maeka i tijim, Lod i no glad blong stap panisim yumi, be Hem i glad blong soemaot sore blong Hem. Taem yumi tanem yumi i go long Hem, “[bae hem i] sore bakegen long [yumi], i tekemaot sin blong [yumi] i gowe long [yumi], olsem we yu … sakem i godaon olgeta long medel solwota. (Maeka 7:18–19).
Blong gat wan bigfala lukluk long Ol Buk blong Jona mo Maeka, luk long “Jona” mo “Maeka” long Gaed long Ol Skripja.
Ol Aedia blong Skripja Stadi blong Yuwan
Lod i gat sore long olgeta evriwan we oli tanem olgeta i go long Hem.
Buk blong Jona i soem, wetem sam moa samting, hamas Lod i gat sore taem yumi sakem sin. Taem yu stap ridim Jona, lukaotem ol eksampol blong sore blong Hem. Tingting hevi long wei we yu bin gat eksperiens long sore ia insaed long laef blong yu. ?Wanem nao yu bin lanem we i save helpem yu blong gat moa sore long ol narawan?
Blong stap witnesem sore blong Lod, samtaem i givim insperesen blong ol filing blong lav mo fasin blong talem tangkyu. Be Jona ‘i no glad nating” mo “i kros” (Jona 4:1) taem we Lod i givim sore long ol pipol blong Nineve, we oli ol enemi blong Ol Man Isrel. ?From wanem Jona i filim olsem? ?Yu yu bin gat wan semmak filing olsem finis? ?Yu ting se Lod i bin stap traem blong mekem Jona i andastanem wanem long japta 4?
Tingting hevi long ol tijing we oli stap long Maeka 7:18–19. ?Olsem wanem ol trutok ia oli bin helpem Jona blong jenisim fasin blong hem abaot Lod mo ol pipol blong Nineve?
Luk tu long Luk 15:11–32; Jeffrey R. Holland, “The Justice and Mercy of God,” Ensign, Sept. 2013, 16–21.
Yumi save serem gospel wetem ol pikinini blong God.
Evriwan long ol pikinini blong God oli nidim janis ia blong harem gospel.
Nineve i bin pat blong Rul blong Asiria, wan enemi blong Isrel, mo oli savegud se oli save faet mo oli gat rabis fasin. Long Jona, i no ril nomo se ol pipol blong Nineve oli bin rere blong akseptem toktok blong God mo sakem sin. Be yet, Presiden Dallin H, Oaks i tijim: “Yumi neva mas putum yumi olsem ol jaj blong talem se hu i rere mo hu i no rere. Lod i save hat blong evriwan long ol pikinini blong Hem, mo sapos yumi prea from insperesen, bambae Hem i helpem yumi faenem ol pipol we Hem i save se oli stap “rere blong lisingud long toktok” (Alma 32:6)” (“Sharing the Restored Gospel,” Ensign o Liahona, Nov. 2016, 58–59). ?Wanem nao yu lanem aot long Jona 3 we i givim yu insperesen ia blong serem gospel iven wetem olgeta we i luk se oli no rere blong jenis?
Maet bae i save help blong komperem fasin blong Jona (luk long Jona 1; 3–4) long ol filing blong Alma mo ol boe blong Mosaea (luk long Mosaea 28:1–5; Alma 17:23–25).
Luk tu long 3 Nifae 18:32.
Jisas Kraes i bin yusum ol raeting blong Maeka.
Yumi save gud se Sevya i bin yusum ol toktok blong Aesea mo Ol Sam. ?Yu yu save se Hem i bin yusum tu ol toktok blong Maeka plante taem? Tingting long olgeta eksampol ia, mo tingting hevi long ol skripja ia we, maet oli bin impoten long Sevya. ?From wanem oli impoten long yu?
Maeka 4:11–13 (luk long 3 Nifae 20:18–20). Lod i komperem kam tugeta blong las dei long wan taem blong pikimap kaekae (luk tu long Alma 26:5–7; Doktrin mo Ol Kavenan 11:3–4). ?Taem yu lukluk long hao Lod i komperem toktok blong hem, wanem nao samting ia i stap talem long yu abaot kam tugeta blong Isrel?
Maeka 5:8–15 (luk long 3 Nifae 21:12–21). ?Wanem nao ol ves ia oli talem long yu abaot ol pipol blong God (haf ia blong ol pipol blong Jekod) long ol las dei ia?
Maeka 7:5–7 (luk long Matiu 10:35–36). Folem ol ves ia, from wanem hem i impoten blong “luk long Lod” faswan? ?From wanem nao kaonsel ia i impoten?
?Wanem nao Lod i nidim long yu?
Maeka i stap invaetem yumi blong traem tingting se i olsem wanem blong go long fored blong Lod, mo bodaon long fes blong Hae God (Maeka 6:6). ?Wanem nao ol ves 6–8 oli talem long yu abaot wanem i impoten long Lod taem Hem i stap skelem laef blong yu?
Luk tu long Matiu 7:21–23; 25:31–40; Dale G. Renlund, “Mekem Stret mo Gud Fasin, Lavem Ol Man Tumas, mo Wokbaot wetem God wetem Tingting I Stap Daon,” Liahona, Nov 2020, 109–12.
Ol Aedia blong Famli Skripja Stadi mo Haos Naet
-
Jona 1–4.Maet bae ol pikinini blong yu oli glad blong mekem ol aksen we oli stap talem stori blong Jona, olsem blong priten blong stap ronwe, mekem saon olsem strong win long solwota, o blong priten se wan bigfala fis i solemdaon olgeta (luk long “Profet Jona” long Ol Stori long OlTesteman). Askem long ol memba blong famli wanem oli lanem aot long eksperiens blong Jona. Blong gat wan eksampol blong wan lesen aot long Jona, luk long ves 7 blong singsing ia: “Follow the Prophet” (Children’s Songbook, 110–11).
-
Jona 3.?Wanem nao Jona i bin lanem abaot fasin blong serem gospel? ?Huia yumi save hem, we bae i wan blesing long hem blong harem mesej ia blong gospel we i kambak, we i blong Jisas Kraes?
-
Maeka 4:1–5.Folem ol ves ia, wanem nao bae i tekem pis mo gudlaef long ol pipol blong Lod? ?Wanem nao yumi save mekem blong help blong mekem profesi ia i hapen insaed long hom blong yumi?
-
Maeka 5:2.yu save soem wan pikja blong Jisas taem Hem i wan smol boe, we Hem i stap wetem mama blong Hem (luk long Gospel Art Buk, namba 33) long wan saed blong rum, mo wan pikja blong Ol Waes Man long narasaed. Tugeta, ridim Maeka 5:2 mo Matiu 2:1–6. ?Olsem wanem nao profesi blong Maeka i bin helpem Ol Waes Man blong faenem Jisas? Ol memba blong famli oli save muvum pikja blong Ol Waes Man i go long saed blong pikja blong Jisas. Bae famli blong yu i laekem tu blong wajem vidio ia: “The Christ Child: A Nativity Story” (ChurchofJesusChrist.org).
Blong gat moa tingting blong stap tijim ol pikinini, luk long aotlaen blong wik ia, long Kam Folem Mi—Blong Praemeri.
Wan singsing: “Talem Se Mi Redi blong Go, Masta,” STSP, pej 46.
Stap Kam Antap long Stadi blong Yuwan
Faenem lav blong God. Taem yu stap ridim ol skripja, tingting blong raetemdaon ol pruf we oli soemaot lav blong God. Eksampol: lukaotem olsem wanem God i bin soem lav blong Hem long ol pikinini blong Hem, insaed long stori blong Jona.
Pikja droing we i kam long Kevin Carden