7–13 Novemba

Hosea 1–6; 10–14; Joel

“Bambae Mi Lavem Yufala long Olgeta Tingting blong Mi”

Invaetem Spirit blong oli kam wan pat blong stadi blong yu long Buk blong Hosea mo Joel. Tekem not long ol mesej we Spirit i talem strong long hat mo maen blong yu.

Raetemdaon Ol Filing mo Tingting blong Yu

kavenan blong Isrel wetem Lod, i blong i dip i stap mo blong i gat dip mining, mekem se Lod i komperem long wan mared. Kavenan ia, olsem wan mared, i gat wan komitmen we i no save finis, ol eksperiens we oli serem, stap bildim wan laef tugeta, ful tru fasin long hasban o waef, mo antap long evriwan, lav wetem ful hat. Kaen ful tingting ia, i kam wetem hae mak blong wok—mo ol nogud risal taem wan i no tru. Tru long profet Hosea, God i tokbaot sam long ol risal we Ol Man Isrel oli fesem from oli bin brekem ol kavenan blong olgeta. Be yet, mesej blong hem i no se, bambae mi sakemaot yu from se yu yu no fetful. Be, hem i talem se bambae i invaetem hem bakegen (luk long Hosea 2:14–15). “Oltaem tingting blong mi bambae i stap strong long yufala,” Lod i talemaot (Hosea 2:19). “Naoia mi mi no moa kros long yufala. Bambae mi tekem yufala i kambak long mi bakegen, nao bambae mi lavem yufala long olgeta tingting blong mi” (Hosea 14:4). Hemia i semfala mesej we Hem i givim long yumi tedei taem yumi stap lukaot blong laef folem ol kavenan blong yumi wetem lav mo ful hat mo tingting.

Joel i bin serem wan semmak mesej: “Hae God i God blong yumi, mo yufala i mas kambak long hem. Hem i kaen mo i gat sore long man, hem i no save kros kwik, mo oltaem hem i stap holem promes blong hem. Oltaem hem i rere blong fogivim man blong i no save panisim hem” (Joel 2:13). “[Lod bae i hop blong ol pipol blong hem, mo bae i paoa blong ol pikinini blong Isrel” (Joel 3:16). Taem yu stap ridim Hosea mo Joel, tingting hevi long rilesensip blong yuwan wetem Lod. Tingting long wei we, hamas Hem i bin fetful, i bin givim insperesen long yu blong yu stap fetful long Hem.

Blong gat wan bigfala lukluk long Ol Buk blong Hosea mo Joel, luk long “Hosea” mo “Joel” insaed long Gaed long Ol Skripja.

Ol Aedia blong Skripja Stadi blong Yuwan

Hosea 1–3; 14

Lod, oltaem i stap invaetem mi blong gobak long Hem.

Waef blong Hosea, Goma, i no bin fetful long hem, mo God i bin poen long nogud taem ia blong tijim Ol Man Isrel abaot wei we Hem i harem abaot olgeta mo abaot ol kavenan blong olgeta wetem Hem. Taem yu stap ridim Hosea 1–3, tingting hevi long wei we Lod i stap lukluk rilesensip we Hem i gat wetem ol kavenan pipol blong hem. Yu save tingting hevi long ol wei we, yu, olsem Ol Man Isrel, i no bin fetful long Lod, mo olsem wanem Hem i pusum han blong Hem i kam long yu. Eksampol: ?Wanem nao Hosea 2:14–23 mo Hosea14 oli stap tijim yu long saed blong lav mo sore blong Lod? ?Olsem wanem yu save soem se yu lavem Hem mo stap tru long Hem?

Luk tu long Dieter F. Uchtdorf, “Point of Safe Return,” Liahona, May 2007, 99–101.

Goma, we i mekem sin, we i ripresentem Isrel, Lod i bin talem se bae i pemaot hem. Pikja droing i kam long Deb Minnard; oli karem laesens long goodsalt.com

Hosea 6:4–7; Joel 2:12–13

Ful hat mo tingting long God, yumi mas filim insaed long yumi, be i no jes blong soemaot aotsaed.

Lod i bin givim oda long ol pipol blong Hem blong oli givim ol sakrifaes we oli ol animol. Be, iven we ol pipol blong taem blong Hosea oli bin stap obei long loa ia, oli bin stap brekem ol komanmen we oli impoten moa (luk long Hosea 6:4–7). Long tingting blong yu, ?hem i minim wanem se Lod “i no wantem fasin ya we yufala i stap kilim animol blong mekem sakrifaes long mi, mi wantem we oltaem, yufala i stap lavem mi. Mi wantem we yufala i save mi long laef blong yufala. Fasin ya i gud tumas long mi, i winim we yufala i stap bonem sakrifaes blong givim presen i kam long mi”? (Hosea 6:6). ?Wanem nao yu ting se i minim blong stret mo gud fasin i olsem wan klaod o olsem smol ren? ?Stret mo gud fasin blong yumi, i mas olsem wanem? (luk long Aesea 48:18; 1 Nifae 2:9–10).

Yu save ridim Matiu 9:10–13; 12:1–8 blong luk olsem wanem Sevya i bin yusum Hosea 6:6 long taem blong seves blong Hem. ?Olsem wanem nao ol skripja ia oli stap helpem yu blong andastanem ol toktok blong Hosea?

Taem yu stap rid long Joel 2:12–13, bae i helpem yu blong save se blong brekem o terem klos blong wan, i bin wan saen we man i luk, we i soem se yu krae sore mo yu harem nogud (eksampol, luk long 2 Kronikel 34:14–21,27). ?Olsem wanem taem yumi stap terem hat blong yumi i defren long terem ol klos blong yumi?

Luk tu long Aesea 1:11–17; Matiu 23:23; 1 Jon 3:17–18.

Joel 2

“Bae mi kapsaetem spirit blong mi long evri man. …”

Taem we Joel i bin talem profesi blong “Dei blong Hae God,” hem i tokbaot se i wan dei we “ i gat bigfala klaod, we i blak we i blak, mo olgeta ples bambae i tudak olgeta.” (Joel 2:1–2,11). Isrel i bin fesem plante nogud mo trabol taem truaot long histri blong hem, mo ol kavenan pipol blong God bae oli fesem moa long fiuja. ?Wanem nao i tajem yu abaot kaonsel ia we Lod i bin givim insaed long Joel 2:12–17? Mo tu, tekem not long ol blesing we Hem i promesem insaed long Joel 2:18–32. ?From wanem nao, ol blesing we Lod i promesem long ol ves 27–32 oli impoten, speseli long ol taem olsem ol taem we oli tokbaot insaed long Joel 2, mo i tekem tu taem blong yumi tedei?

?Yu ting se i minim wanem se Lod bae i “givim Spirit blong [hem] long olgeta man”? (Joel 2:28). ?Long wanem wei nao ol profesi we oli stap insaed long Joel 2:28–29 oli stap kamtru? (Luk long Ol Wok 2:1–21; Josef Smit—Histri 1:41.)

Yu save tingting hevi long ol toktok ia we oli kam long Presiden Russell M. Nelson: “Long ol dei we oli stap kam, bambae i no posibol blong laef long saed blong spirit, sapos yumi no gat Tabu Spirit i lidim, daerektem mo kamfotem yumi wetem paoa blong Hem” (“Revelesen blong Jos, Revelesen blong Laef blong Yumi,” Liahona, Mei 2018, 93). ?From wanem revelesen i impoten tumas blong save laef long saed blong spirit? ?Olsem wanem nao yu save mekem se yu gat moa paoa blong kasem revelesen we i blong yuwan?

Ol Aedia blong Famli Skripja Stadi mo Haos Naet

Hosea 2:19–20.Lod i yusum pikja toktok blong mared blong tokbaot kavenan rilesensip blong hem wetem Isrel (luk tu long Gaed long Ol Skripja, “Man we Bae I Mared,” olskripja.ChurchofJesusChrist.org). Famli blong yu i save toktok raon long from wanem nao mared i save stap olsem wan gud pikja toktok blong tokbaot ol kavenan blong yumi wetem God. ?Olsem wanem nao, Hosea 2:19–20 i stap helpem yumi blong andastanem olsem wanem nao God i stap harem abaot yumi? ?Olsem wanem nao yumi save stap fetful long ol kavenan we yumi mekem wetem Hem?

Hosea 10:12.Maet bae ol pikinini oli laekem blong droem wan klok mo mekem ol plan blong sam wei we oli save lukaotem Lod long ol defren taem truaot long dei.

Joel 2:12–13.Blong helpem famli blong yu blong tokbaot Joel 2:12–13, yu save putum wan pikja blong Sevya long wan saed blong rum, mo toktok ia, sin, long nara saed we i fesem toktok ia. Invaetem ol memba blong famli blong wanwan i kam mo i fesem saen, mo afta, i tanem hem long Sevya, mo semtaem oli serem ol samting we oli save helpem yumi tanem yumi i go long Hem “wetem ful hat blong yumi.” Leftemap tingting blong ol memba blong famli blong tingting abaot evri saed blong laef blong olgeta, wetem tu ol aktiviti, wok, skul mo ol rilesensip.

Joel 2:28–29.?Wanem i minim blong Spirit i “kapsaet” long yumi? Mebi yu save soem hemia taem yu kapsaetem wan wota, mo afta komperem wetem wan drop.

Blong gat moa tingting blong stap tijim ol pikinini, luk long aotlaen blong wik ia, long Kam Folem Mi—Blong Praemeri.

Wan singsing: “Come unto Jesus,” Hymns, namba 117.

Kam Antap long Fasin blong Yumi blong Stap Tij

Tijim doktrin. “Neva mestem wan janis blong pulum tugeta ol pikinini blong oli lanem doktrin blong Jisas Kraes. Ol kaen taem olsem, oli no hapen fulap taem komperem long ol traehad blong enemi” (Henry B. Eyring, “The Power of Teaching Doctrine,” Ensign, May 1999,74).

Kam long Mi, i kam long Kelly Pugh