“7–13 Novemba. Hosea 1–6; 10–14; Joel: ‘“Bambae Mi Lavem Yufala long Olgeta Tingting blong Mi,’” Kam Folem Mi—Blong Praemeri: OlTesteman 2022 (2021)
“7–13 Novemba. Hosea 1–6; 10–14; Joel,” Kam Folem Mi—Blong Praemeri: 2022
7–13 Novemba.
Hosea 1–6; 10–14; Joel
“Bambae Mi Lavem Yufala long Olgeta Tingting blong Mi”
Taem yu stap stadi ol skripja mo rere blong tij, lukaotem insperesen long Tabu Spirit. ?Wanem nao yumi filim insperesen blong lukluk nomo long hem long taem blong klas long wik ia.
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Soem wan pikja blong Sevya, mo invaetem ol pikinini blong serem wan samting we oli save o lanem abaot Hem long wik ia. Givim taem long wanwan long olgeta blong holem pikinini ia taem oli stap toktok.
Tijim Doktrin: Ol Smol Pikinini
Mi save lukaotem Lod.
Hosea 10:12 i yusum ol pikja blong planem ol sid, pikimap, taem mo ren blong invaetem yumi blong lukaotem Lod. Taem yu stap ridim ves ia, ?wanem nao ol gudfala tingting blong krietem samting bae i kam long maen blong yu we i save givim insperesen, long ol pikinini blong lukaotem Hem?
Samfala Aktiviti we Yu Save Mekem
-
Ridim Hosea 10:12 long ol pikinini mo invaetem olgeta blong mekem ol simpol aksen blong helpem olgeta andastanem ves ia, olsem blong mekem olsem se oli stap planem ol sid, pikimap ol vejetebol we i rere blong karemaot, o stanap long ren. O soem pikinini blong ol sid, ol plan mo ren. Helpem ol pikinini blong rere blong stap planem wan sid mo pikimap ol gudfala frut, olsem blong stap laef long wan stret mo gud fasin mo stap kasem ol blesing blong Lod. Testifae long ol blesing we Lod i poremaot olsem ren long yumi taem yu stap traem blong lukaotem Hem.
-
Droem wan klok long bod, mo askem ol pikinini blong serem ol wei we yumi save lukaotem Lod, long ol defdefren taem truaot long wan dei. Invaetem ol pikinini blong ripitim wetem yu sentens ia “Naoia i taem blong yufala i kambak long mi(Lod) bakegen” (Hosea 10:12). Helpem olgeta blong andastanem se, oltaem hem i taem blong lukaotem Lod. Serem wetem olgeta wanem yu mekem blong stap tingbaot Hem oltaem.
Jisas Kraes i Sevya mo Ridima blong yumi.
Jisas Kraes i Sevya blong mi.
Taem yu tij abaot Sevya mo Atonmen blong Hem, serem testemoni blong yu abaot lav blong Hem long wanwan long ol pikinini.
Samfala Aktiviti we Yu Save Mekem
-
Soem sam pikja blong sam pipol ,o hemia blong Jisas, mo askem ol pikinini blong faenem wijwan long ol pipol ia i Jisas Kraes. Ridim Hosea 13:4, mo tokbaot bigwan se, i no gat wan Sevya, be i gat Jisas Kraes. Testifae se, from we Atonmen blong Jisas Kraes, yumi save gobak blong laef wetem Papa long Heven bakegen.
-
Letem evri pikinini i gat taem blong holem wan pikja blong Jisas we i hang long kros o hol long ston o wan pikja blong Jisas aotsaed long emti hol blong ston ia. Invaetem ol pikinini blong tokbaot wanem nao ol pikja ia i stap soem. Ridim long Hosea 13:14 sentens ia “Mi bambae mi no save blokem yufala, mi no save tekemaot yufala long paoa blong ded.” Testifae se Jisas Kraes i sevem yumi long ded mo we yumi save laef bakegen long ded. Singsing tugeta wan singsing abaot Laef Bakegen long Ded, olsem “Did Jesus Really Live Again?” (Children’s Songbook,64). Helpem ol pikinini blong luksave Spirit taem oli stap singsing.
Tabu Spirit i save lidim mi.
Taem yu stap tijim profesi blong Joel insaed long Joel 2:28, tingting long olsem wanem yu save helpem ol pikinini blong rere blong kasem presen ia we i Tabu Spirit, afta we oli kasem baptaes.
Samfala Aktiviti we Yu Save Mekem
-
Ridim Joel 2:28 long ol pikinini mo eksplenem se toktok ia “[evri mit mo bun]” i minim evriwan, mo i gat tu “ol boe” mo “ol gel” olsem olgeta. Invaetem ol pikinini blong droem ol pikja blong ol pipol we oli stap tokbaot olgeta long ves ia (ol boe mo ol gel, ol olfala mo yangfala man), mo olgeta tu. Eksplenem se wan wei we Papa long Heven i givim Spirit blong Hem, i taem i givim presen ia we i Tabu Spirit taem yumi kasem baptaes.
-
Askem ol pikinini blong serem wanem oli save abaot Tabu Spirit. Helpem olgeta blong andastanem se Tabu Spirit i save tijim yumi abaot Papa long Heven mo Jisas Kraes mo i save helpem yumi blong save wanem i tru (luk long Jon 14:26; Doktrin mo Ol Kavenan 42:17). Serem ol eksperiens blong helpem ol pikinini blong andastanem ol wei we Spirit i save helpem yumi.
Tijim Doktrin: Ol Bigfala Pikinini
Mi save stap fetful blong kipim ol kavenan blong mi.
Insaed long buk blong Hosea, Lod i komperem ol kavenan blong Hem wetem Ol Laen blong Isrel long wan mared. Nomata we Ol Laen blong Isrel oli no fetful, Hem i stil lavem olgeta mo wantem olgeta blong gobak long Hem. Wei ia blong komperem samting ia i save help blong tijim ol pikinini abaot olsem wanem i impoten blong stap obei long ol kavenan blong yumi wetem Lod.
Samfala Aktiviti we Yu Save Mekem
-
Talem long ol pikinini se insaed long buk blong Hosea, Lod i komperem ol kavenan blong Hem wetem Isrel, long wan mared. Soem wan pikja blong wan woman mo man we bae i mared. ?Olsem wanem nao Papa long Heven i wantem hasban mo waef blong tritim tufala? ?Olsem wanem nao yumi soem long Lod se yumi lavem Hem mo bae yumi stap fetful long Hem?
-
Helpem ol pikinini blong andastanem se, ol kavenan we yumi mekem wetem Lod, oli blong stap blong oltaem. Invaetem wan pikinini blong ridim Hosea 2:19–20, mo lukaotem ol toktok we oli tokbaot olsem wanem Lod i filim abaot ol kavenan blong Hem wetem yumi. ?Wanem kavenan nao we yumi mekem taem yumi kasem baptaes? ?Olsem wanem yumi save kipim kavenan ia we yumi bin mekem wetem Lod?
Jisas Kraes I Sevya mo Ridima blong Mi.
?Olsem wanem nao yu save yusum ol toktok blong Hosea blong mekem ol testemoni blong ol pikinini long Sevya mo Ridima blong olgeta i kam moa strong? Taem yu tij, helpem ol pikinini blong filim glad mo lav blong Atonmen blong Jisas Kraes.
Samfala Aktiviti we Yu Save Mekem
-
Invaetem ol pikinini blong ridim Hosea 13:4,14, mo lukaotem ol toktok mo ol sentens we oli tokbaot Jisas Kraes. ?Wanem nao ol toktok ia oli tijim yumi abaot Jisas Kraes? Invaetem ol pikinini blong yusum Topical Guide o Ol Gaed long Skripja blong faenem mo serem ol narafala skripja we oli tij abaot Jisas Kraes olsem Sevya mo Ridima. Serem testemoni blong yu abaot Sevya, mo givim janis long ol pikinini blong mekem semmak.
-
Blong helpem ol pikinini blong andastanem olsem wanem Sevya i karemaot o pemaot yumi long ded, soem vidio “Handel’s Messiah: Debtor’s Prison” (ChurchofJesusChrist.org). ?Wanem nao yumi lanem aot long vidio we bae i helpem yumi andastanem wanem we Sevya i bin mekem from yumi?
Tabu Spirit i save lidim mi.
Plante long ol pikinini we yu tijim, oli bin baptaes finis mo oli kasem presen ia we i Tabu Spirit. ?Olsem wanem yu save yusum ol skripja ia blong helpem olgeta blong andastanem paoa mo ol blesing we oli kam taem yumi stap lisin long voes blong Spirit?
Samfala Aktiviti we Yu Save Mekem
-
Invaetem ol pikinini blong ridim tugeta Joel 2:28–29, mo putum nem blong olgeta wanwan long ples we i gat ol sentens ia “ol boe blong yu” mo “ol gel blong yu.” Long bod, raetem wan sentens olsem Tabu Spirit i save … mo invaetem ol pikinini, wan afta wan blong hem i komplitim sentens ia. Leftemap tingting blong olgeta blong gat tu ol samting we oli lanem aot long Jon 14:16; Moronae 10:5; Doktrin mo Ol Kavenan 42:17, mo ol narafala skripja.
-
Putum wan samting insaed long wan bolglas, mo letem ol pikinini oli gat wanwan janis blong kapsaetem wota i go blong kavremap samting ia insaed long bol klas. Eksplenem se samting insaed long bolglas ia i ripresentem yumi, mo wota i ripresentem Tabu Spirit. Taem yumi kasem baptaes, yumi kasem presen ia we i Tabu Spirit, we i wan wei ia we Lod i mekem i hapen promes blong Hem blong “poremaot spirit blong [Hem].” ?Wanem nao yumi mas mekem blong kasem Tabu Spirit? Invaetem ol pikinini blong serem ol taem we oli bin filim paoa blong Tabu Spirit.
Stap Leftemap Tingting blong Lanem Samting long Hom
Helpem ol pikinini blong poenemaot wan samting we oli bin lanem abaot Papa long Heven, Jisas Kraes, o Tabu Spirit long klas tedei. Leftemap tingting blong olgeta blong serem hemia wetem ol famli blong olgeta.
Stap Kam Antap long Fasin blong Yumi blong Stap Tij
Lukaotem blong kasem revelesen evri dei. Taem yu stap rere blong tij, prea mo tingting strong long ol skripja truaot long wik. Ol aedia, tingting mo filing abaot olsem wanem blong tij, i save kam long yu eni taem mo long eni ples. (Luk long Teaching in the Savior’s Way, 12.)