Bred blong Laef, i kam long Chris Young

14–20 Novemba.

Amos; Obadaea

“!Yufala I Mas Kambak long Mi! Mi Mi Hae God, Mo Hemia Tok blong Mi.” Mi save lukaotem Lod mo singaotem Hem”

Taem yu tij mo lukluk nomo long ol tru doktrin long ol simpol wei, yu givim ol janis blong Tabu Spirit blong i testifae long ol pikinini. Yusum ol aktiviti long aotlaen ia—o krietem wan blong yu—blong helpem yu blong tijim ol prinsipol long ol simpol wei.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Askem ol pikinini blong serem wan samting we oli bin lanem i no longtaem i pas long hom o jos. Eksampol. Askem sapos oli bin faenem eni niufala skripja we i fevret blong olgeta o wan mesej we oli bin harem, mo we oli save serem wetem klas.

Tijim Doktrin: Ol Smol Pikinini

Amos 3:7; 7:14–15

Ol profet oli ol mesenja blong Jisas Kraes.

Wan long ol impoten samting we ol pikinini oli mas save abaot ol profet i we, oli ol mesenja blong Jisas Kraes. Ol aedia andanit ia i save helpem yu blong tijim olgeta long impoten trutok ia.

Samfala Aktiviti we Yu Save Mekem

• Talem long wan kwaet voes i go long wan pikinini, wan mesej blong evriwan long klas (olsem blong askem ol pikinini blong stanap long wan lek o tantanem olgeta long wan sekol), mo askem long pikinini ia blong serem mesej ia wetem ol narafala pikinini. Ripitim aktiviti ia, mo letem sam long ol pikinini blong oli stap olsem mesenja. Helpem ol pikinini blong oli andastanem olsem wanem, mesenja long aktiviti ia, i olsem wan profet we i stap serem mesej blong God wetem yumi. Serem sam eksampol blong mesej we i kam long profet we i stap laef we i helpem yu blong gro kolosap moa long Jisas Kraes.

• Invaetem wan pikinini blong stanap long fored blong rum mo priten se hem i profet Amos. Taem yu serem ol tru samting abaot Amos we oli stap long Amos 7:14–15, givim long wanwan pikinini ol pikja o ol stik pikja we oli go stret wetem wanwan tru samting ia, olsem pikja blong wan sipsip, wan frut, mo Lod. Eksplenem se Amos i wan man blong lukaot long ol sipsip we Lod i bin singaotem hem olsem mesenja blong Hem. Afta soem pikja blong Lod mo profet we i stap laef, mo eksplenem se Lod i gohed blong singaotem ol mesenja blong Hem tedei. Ridim Amos 3:7 laod, mo askem ol pikinini blong poen i go long stret pikja taem oli harem toktok ia “Lod” mo “ol profet.” Serem testemoni blong yu se, semmak olsem long ol dei blong Amos, Jisas Kraes i toktok long yumi tru long ol profet blong Hem.

• Serem wan stori aot long wan magasin blong Jos we i jes kamaot, abaot ol eksperiens we ol memba blong Jos Ia blong Jisas Kraes blong Ol lata-dei Sent oli bin gat taem oli folem kaonsel blong ol profet. (Luk tu long “Meet Today’s Prophets and Apostles” long ChurchofJesusChrist.org.)

• Singsing o plei long wan rekoding blong wan singsing abaot ol profet olsem, “Follow the Prophet” (Children’s Songbook, 110–11), taem ol pikinini oli wok long aktiviti pej blong wik ia. Poenemaot long ol pikinini ia, ol toktok long singsing ia we oli tijim olsem wanem ol profet oli lidim yumi long rod ia i go long Jisas Kraes.

Amos 5:14

Sapos mi lukaotem ol gudfala samting, bae Lod i stap wetem mi.

Amos i invaetem Ol Laen blong Isrel blong, “traehad blong folem stret fasin, mo i no ivel,” mo hem i promesem se, sapos oli mekem, “ bambae [Lod]… i stap wetem [olgeta].” ?Olsem wanem nao bae yu helpem ol pikinini blong oli ansa long invitesen ia mo kasem promes ia?

Samfala Aktiviti we Yu Save Mekem

• Soem sam pikja blong ol pikinini we oli stap mekem ol gudfala samting olsem blong stap helpem ol narafala man o stap tekpat long sakramen. Letem wanwan pikinini blong gat wanwan taem blong tokbaot wan long ol pikja, taem bae ol narafala pikinini oli talemaot se wijwan pikja nao pikinini ia i stap tokbaot. Ridim Amos 5:14, mo helpem ol pikinini blong tingting long ol wei we bae oli save “traehad blong folem stret fasin” evri dei.

• Invaetem ol pikinini blong dro ol pikja blong olgetawan we oli stap mekem wan gudfala samting. Ridim Amos 5:14, mo tokbaot bigwan promes blong Lod se bae Hem i stap wetem yumi taem yumi traehad blong folem stret fasin. Invaetem ol pikinini blong ademap long ol droing blong olgeta wan pikja blong Jisas we i stap stanap wetem olgeta.

Tijim Doktrin: Ol Bigfala Pikinini

Lod i talemaot ol trutok, tru long revelesen, long ol profet blong Hem.

Amos 3:7

Ol profet oli ol mesenja blong Jisas Kraes.

Amos 3:7 i wan gudfala skripja toktok we i blong helpem ol pikinini blong luksave se, taem yumi lisin long ol profet, yumi stap lisin long wan mesenja blong Jisas Kraes.

Samfala Aktiviti we Yu Save Mekem

• Helpem ol pikinini blong lanem baehat evri pat blong Amos 3:7. Eksampol. Givim smol taem long olgeta blong ridim ves ia plante taem, taem bae yu stap raetem evri narafala toktok blong ves ia long bod. Invaetem ol pikinini blong sarem ol skripja blong olgeta mo ridim laod ves ia tugeta, mo yusum ol toktok blong givhan we oli stap long bod. Afta rapemaot sam toktok, wan afta wan, kasem taem we ol pikinini oli save ripitim ves ia fulwan, mo oli nomo nidim wan givhan toktok long bod. ?Wanem nao ves ia i tijim yumi abaot ol profet? ?Olsem wanem nao profet blong yumi we oli stap laef oli helpem yumi blong save wanem we Sevya i wantem yumi blong mekem?

• Raetem sam kwestin abaot ol profet long ol pis pepa, olsem olgeta ia: ?From wanem yumi gat ol profet? ?Wanem nao ol profet oli stap mekem? ?From wanem yu stap folem ol profet? ?Wanem nao ol profet oli stap tijim? Askem ol pikinini blong sidaon tutu, mo wan pikinini long wanwan grup bae i jusum wan pepa mo askem narafala patna blong hem blong ansarem. Sapos ol pikinini oli nidim help blong stap ansarem wan kwestin, oli save luk long “Profet” insaed long Gaed long Ol Skripja (olskripja.ChurchofJesusChrist.org). Afta we patna i ansarem kwestin, tufala save jenisim rol, blong narawan i save jusum wan narafala kwestin.

• Serem wetem ol pikinini sam trutok abaot wan profet long OlTesteman, we oli bin lan abaot hem long yia ia (olsem Noa, Moses o Aesea). Askem olgeta blong talemaot se wijwan profet nao yu stap tokbaot. Ripitim hemia blong ol narafala profet tu.

Amos 5:4–15

Sapos mi traehad blong folem stret fasin, Lod bae i stap wetem mi.

Ol pikinini oli gat plante janis blong jus bitwin raet mo rong. Tingting long olsem wanem bae yu save givim insperesen long olgeta blong “traehad blong folem stret fasin” (ves 14).

Samfala Aktiviti we Yu Save Mekem

• Invaetem ol pikinini blong luklukgud insaed long Amos 5:4–15, mo stap lukaotem toktok ia “lukaot gud.” ?Wanem nao Lod i wantem yumi blong lukaot gud, mo wanem promes nao Hem i givim long olgeta we oli mekem. ?Olsem wanem nao yumi lukaotem Lod?

• Helpem ol pikinini blong lanem baehat las sentens blong nambatetin toktok blong bilif. ?Olsem wanem nao yumi “lukaotem ol samting ia.”?

Amos 8:11–12

Restoresen blong gospel i endem hanggri ia blong mekem apostasi.

Blong andastanem wanem we Amos i bin tijim abaot apostasi, i save helpem ol pikinini blong stap glad from Restoresen blong gospel.

Samfala Aktiviti we Yu Save Mekem

• Invaetem ol pikinini blong ridim Amos 8:11–12, mo tokbaot wanem i hapen taem ol pipol oli no gat toktok blong Lod. Helpem ol pikinini blong faenem mining blong apostasi insaed long Gaed long Ol Skripja (olskripja.ChurchofJesusChrist.org) o wan diksonari. ?Olsem wanem nao apostasi i olsem wan hadtaem blong lukaotem kaekae?

• Blong helpem ol pikinini blong andastanem Bigfala Apostasi, wetem olgeta, luklukbak long “Afta long Niu Testeman” (insaed long Ol Niu Testeman Stori, 167–70). Afta, toktokraon long ol kwestin olsem hemia: ?From wanem i gat wan Apostasi? ?Wanem i hapen olsem wan risal blong Apostasi? ?From wanem Lod i putumbak gospel blong Hem? (luk tu long “Restoresen blong Gospel blong Jisas Kraes, we I Fulwan: Tu Handred Yia Ofisol Toktok I Go long Wol,” ChurchofJesusChrist.org/study?lang=bis). Leftemap tingting blong ol pikinini blong raetem ol kwestin ia mo ol ansa blong olgeta, mo serem wetem ol famli blong olgeta long hom.

Stap Leftemap Tingting blong Lanem Samting long Hom

Givim smol taem long ol pikinini blong tingting abaot wan samting we oli lanem tedei we oli wantem blong serem wetem wan memba blong famli blong olgeta. Leftemap tingting blong olgeta blong oli disaed se huia bae oli serem wetem mo olsem wanem bae oli serem.

Stap Kam Antap long Fasin blong Yumi blong Stap Tij

Givim ol invitesen we oli respektem fridom blong joes blong wanwan man. Askem ol kwestin we bae i helpem ol pikinini blong tingting long ol wei we olgetawan oli save praktisim wanem oli bin lanem. Eksampol. Yu save askem, “?Wanem i wan samting we yu filim we yu mas mekem folem wanem we yumi bin tokbaot tedei?”