Jona long Sanbij long Nineve, i kam long Daniel A. Lewis

21–27 Novemba.

Jona; Maeka

“Oltaem Yu Yu Glad blong Soemaot long Mifala we Yu Stap Lavem Mifala Tumas”

Lukaotem ol impoten prinsipol long ol buk blong Jona mo Maeka, we bae i blesem ol pikinini we yu tijim. Tingting hevi long ol wei we yu save helpem ol pikinini blong lanem ol prinsipol ia. Ol aedia long aotlaen ia oli save helpem yu.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Blong helpem ol pikinini blong tingbaot stori blong Jona o ol narafala trutok we oli save lanem long hom, singsing wan singsing olsem ves 7 blong “Follow the Prophet” (Children’s Songbook, 110–11).

Tijim Doktrin: Ol Smol Pikinini

Jona 1:4–17; 3:3–5

Lod i blesem mi taem mi obei long Hem.

Taem we Lod i askem Jona blong go prij long ol pipol blong Nineve, Jona i no obei. Helpem ol pikinini blong andastanem se yumi kasem blesing taem yumi obei long Lod.

Samfala Aktiviti we Yu Save Mekem

• Soem ol pikja blong stori blong Jona, mo invaetem ol pikinini blong talem wanem we oli save abaot stori ia (luk long “Profet Jona” insaed long Ol Stori long OlTesteman; aktiviti pej blong wik ia; o aotlaen blong wik ia insaed long Kam Folem Mi—Blong Wanwan Man, Woman mo Famli). Askem ol kwestin olsem hemia: ?Wanem i hapen taem Jona i no obei long Lod? (luk long Jona 1:4–17). ?Wanem i hapen taem hem i bin obei? (luk long Jona 3:3–5). Serem testemoni blong yu se Lod bae i blesem yumi taem yumi obei long Hem.

• Singsing tugeta wan singsing abaot fasin blong obei long Lod olsem “Quickly I’ll Obey” (Children’s Songbook,197). Tokbaot olsem wanem bae i gud sapos Jona i bin obei long fas taem. Helpem ol pikinini blong tingting long ol samting we God i wantem olgeta blong mekem, mo afta, aktem olsem wanem oli save obei kwiktaem.

Papa long Heven i wantem evriwan blong harem gospel.

Jona 3

Gospel i blong evriwan.

Ol pipol blong Nineve oli sakem sin taem we Jona i serem mesej blong Lod wetem olgeta. ?Wanem janis nao ol pikinini oli gat blong serem gospel?

Samfala Aktiviti we Yu Save Mekem

• Aktem ol pat blong Jona 3:3–8 wetem ol pikinini olsem, blong stap wokbaot long siti blong Nineve, mo stap serem mesej blong Lod, mo stap raetem wan ofisol leta blong king i go long ol pipol blong hem. Soem wan pikja blong ol misinari (luk long Gospel Art Buk, ol namba 109, 110). ?Wanem nao ol misinari oli stap mekem? ?Olsem wanem nao Jona i stap olsem wan misinari? Helpem ol pikinini blong oli tingting long ol wei we oli save serem gospel wetem ol narafala man, olsem blong serem wan toktok blong bilif, o serem testemoni blong olgeta abaot Jisas Kraes.

• Tokbaot wan eksperiens we yu bin serem gospel blong Jisas Kraes. O, sam dei bifo klas, invaetem wan man blong i visitim klas blong yu, mo bae i tokbaot wan taem we hem i serem gospel, o taem we wan i serem gospel wetem hem. Leftemap tingting blong man ia blong soem sam pikja sapos i posibol. Helpem ol pikinini blong tingting long ol wei we oli save stap olsem ol misinari naoia.

Maeka 5:2

Jisas Kraes i bon long Betlehem.

Maeka i profesae se wan fiuja “man blong rul long Isrel” bae i bon long Betlehem. Yu save helpem ol pikinini blong save se profesi ia i hapen taem Jisas Kraes i bon.

Samfala Aktiviti we Yu Save Mekem

• Soem ol samting we i stap hapen raon long taem we Jisas Kraes i bon (luk long Gospel Art Buk, ol namba 28, 29, 30, 31). Invaetem ol pikinini blong tokbaot wanem i stap hapen long wanwan pikja ia. Ridim Maeka 5:2, mo invaetem ol pikinini blong stanap taem bae oli harem toktok ia “Bet-lehem.” Testifae se ol profet oli bin save abaot taem we Jisas bae i bon long hem, from se i impoten tumas.

• Invaetem ol pikinini blong dro wan pikja abaot taem we Jisas i bon long hem. Taem bae oli stap soem ol pikja blong olgeta, askem olgeta from wanem oli talem tangkyu from Jisas Kraes.

Tijim Doktrin: Ol Bigfala Pikinini

Jona 1:10–12; 2:1–4,9; 3:1–5

Insaed long fasin blong sakem sin, i gat fasin blong luksave ol sin blong mi mo fasin blong stap askem fogivnes.

Eksampol blong Jona i save givim insperesen long ol pikinini, blong oli tanem olgeta i go long Lod, taem oli mekem sin.

Samfala Aktiviti we Yu Save Mekem

• Helpem ol pikinini blong mekem wan lis long bod blong sam long ol besik wei blong sakem sin (luk long Gaed long Ol Skripja, “Sakem Sin, Fasin blong Sakem Sin,” olskripja.ChurchofJesusChrist.org). Tugeta, yufala i luklukbak long stori blong Jona, mo invaetem ol pikinini blong poenemaot wan pruf we i soem se Jona i stap sakem sin ( eksampol, luk long Jona 1:10–12; 2:1–4,9; 3:1–5). ?Olsem wanem yumi save soem long Lod se yumi sakem sin wetem wan tru hat?

• Singsing wan singsing abaot fasin blong sakem sin, olsem “RepentanceChildren’s Songbook,98). Askem ol pikinini se wanem toktok o sentens aot long singsing ia, we bae oli wantem serem wetem Jona blong helpem hem blong sakem sin.

Jona 2:7–10; 3:10; 4:2; Maeka 7:18–19

Lod i gat sore long olgeta evriwan we oli tanem olgeta i go long Hem.

Taem we ol pikinini oli andastanem se Lod i gat plante sore mo i kaen, bae oli tanem olgeta i go long Hem taem oli nidim sore blong Hem.

Samfala Aktiviti we Yu Save Mekem

• Invaetem ol pikinini blong faenem mining blong toktok ia sore long wan diksonari o insaed long Gaed long Ol Skripja (olskripja.ChurchofJesusChrist.org). ?From wanem Jona i nidim sore? ?From wanem ol pipol blong Nineve oli nidim sore? (luk long Jona 1:1–3). Askem ol pikinini blong pikjarem long maen blong olgeta, se olgeta oli save intaviu long Jona. ?Wanem pruf nao Jona i save soem blong talem se Lod i gat plante sore? (eksampol, luk long Jona 2:7–10; 3:10; 4:2). ?Olsem wanem nao Lod i bin soem sore blong Hem long yumi?

• Askem ol pikinini blong mekem wan lis long bod, blong ol samting we oli “glad” long hem, olsem ol samting we oli laekem blong mekem oltaem, ol blesing we i kam long Lod mo sam narawan moa. Invaetem olgeta blong ridim Maeka 7:18–19 blong faenemaot wan samting we Lod i stap glad from. ?Wanem trutok long ol ves ia, bae i save helpem wan we i fraet blong sakem sin?

• Helpem ol pikinini blong save tingting long ol eksampol blong sore we Sevya i soem long nara man, olsem long Mak 2:3–12; Luk 23:33–34; mo Jon 8:1–11. Soem ol pikja blong ol taem ia sapos i posibol. Helpem ol pikinini blong tingting long ol janis we oli gat blong stap gat sore mo stap kaen long ol narafala man.

Maeka 6:8

Lod i wantem mi blong mekem samting i stret oltaem, blong lavem sore, mo blong mi wokbaot wetem Hem we tingting we i stap daon.

Maeka 6:8 i givim wan paten blong stap laef folem fasin we i stret mo gud. ?Olsem wanem nao yu save helpem ol pikinini blong faenemaot mo laef folem ol tijing long ves ia?

Samfala Aktiviti we Yu Save Mekem

• Tugeta ridim Maeka 6:8, mo helpem ol pikinini blong andastanem wanem ol sentens ia i minim: “mekem ol fasin we i stret gud,” “lavem ol man,” mo “yumi stap fren gud wetem hem long evri haf blong laef blong yumi, we tingting blong yumi i stap daon.” Invaetem ol pikinini blong droem wan pikja blong olgetawan taem oli stap mekem wan samting we i go wetem wan long olgeta sentens.

• Raetem long bod: “?Wanem nao ol samting we i gud blong mekem, Hae God i talemaot finis long yumi?” Invaetem olgeta blong faenem ansa insaed long Maeka 6:8. ?Olsem wanem nao taem yumi stap obei long ol komanmen blong Lod i helpem yumi blong mekem i hapen wanem we Lod i askem long yumi long ves ia?

Stap Leftemap Tingting blong Lanem Samting long Hom

Blong wanwan pikinini, raetem long wan pis pepa wan ki sentens aot long wan long ol skripja we yufala i stap toktok raon long hem olsem wan klas. Invaetem ol pikinini blong lanem baehat sentens ia mo askem wan memba blong famli blong serem sam tingting we hem i gat abaot sentens ia.

Stap Kam Antap long Fasin blong Yumi Blong Stap Tij

Lisin long ol pikinini. ?Olsem wanem nao ol pikinini long klas blong yu oli stap tekpat long taem blong lanem ol aktiviti? Sapos ol pikinini oli no save stap kwaet, maet hem i taem blong traem wan narafala aktiviti. Long nara tingting, sapos yu luk se ol pikinini oli stap tekpat mo lisin mo stap lanem samting, no filim se yu mas fos blong mas gohed blong kavremap ol nara pat blong lesen.