“Ol Rod blong Hem Oli No Gat En” (Hababuk 3:6). Bifo we bifo olgeta, taem we wol ya i no stap yet, i gat wan man i stap we nem blong hem “Tok blong God, i kam long Eva Timothy

28 Novemba–4 Disemba.

Neham; Hababuk; Sefanaea

“Ol Rod blong Hem Oli No Gat En”

Lav blong yu long ol skripja i save gat bigfala paoa long ol pikinini we yu tijim. Letem olgeta oli luk, hamas bigfala tangkyu yu gat from toktok blong God.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Invaetem ol pikinini blong gat taem blong stanap mo mekem olsem se oli wan profet long OlTesteman we i stap stanap long “waj haos” olsem Hababuk (Hababuk 2:1). Askem olgeta blong talem wan samting we oli stap lanem abaot Jisas Kraes mo gospel blong Hem.

Tijim Doktrin: Ol Smol Pikinini

Hababuk 2:3

God bae i oltaem mekem ol promes blong Hem oli kam tru.

Profet Hababuk i bin harem nogud from ol nogud fasin blong ol pipol blong Juda (luk long Hababuk 1:2–4). Lod i mekem i klia long hem se ol promes blong Hem oli kam tru long taem blong Hem (luk long Hababuk 2:3).

Samfala Aktiviti we Yu Save Mekem

• Serem sam eksampol blong sam samting we oli gud, be bae i kam nomo afta we yumi wet—olsem wan frut we i mas raep bifo yu karem o wan flaoa we i no tan yet mo i nid blong go long oven bifo i rere blong kakae. ?Wanem bae i hapen sapos yumi traem blong kakae frut o flaoa ia bifo i rere? Tokbaot profet Habakuk we i wantem save wetaem bae Lod i stopem ol fasin we hem i bin luk raon long hem. Ridim ansa long ol ol pikinini we i stap long Hababuk 2:3. Tokbaot bigwan se Habakuk i nidim blong wet long promes blong Lod i kam tru, semmak olsem samtaem, yumi nidim blong mekem olsem. Serem wan taem we yu bin wet from wan blesing.

• Helpem ol pikinini blong tingting long ol samting we God i promesem—eksampol, se Jisas Kraes bae i kambak long wol ia o se bae yumi save gobak laef bakegen wetem God. Wetem wanwan eksampol, invaetem ol pikinini blong ripitim sentens ia: “From we taem blong ol samting ya i no kam yet, be bambae oli mas kamtru i no longtaem.”

Hababuk 2:14

Mi save help blong fulumap wol ia wetem save abaot Jisas Kraes.

Habakuk i profesae abaot dei ia we ful wol ia bae oli save abaot Jisas Kraes. Profesi ia i stat blong kamtru long dei blong yumi. Tingting long olsem wanem yu save helpem ol pikinini blong kam pat blong profesi ia.

Samfala Aktiviti we Yu Save Mekem

• Soem wan emti jag, mo givim wan smol samting long wanwan pikinini. Askem wanwan pikinini blong serem wan samting we Jisas i bin mekem o tijim, mo afta, putum samting we oli givim long olgeta insaed long jag ia. Ridim laod Hababuk 2:14, mo eksplenem se, olsem we oli pikinini oli stap fulumap jag wetem save blong olgeta abaot Lod, yumi save fulumap wol ia tu wetem save long saed blong Hem.

• Soem long ol pikinini wan map blong wol (luk long Jos Histri Map, namba 7, “Map blong Wol”). Helpem olgeta blong faenem weaples oli stap long hem mo ol ples we oli misinari we oli save oli bin givim seves long hem. Serem testemoni blong yu se, Papa long Heven i wantem evri pipol raon long wol blong save abaot Jisas Kraes. ?Olsem wanem nao yumi save help blong tijim ol narafala pipol abaot Jisas? Talem long ol pikinini abaot ol samting we yu bin luk oli mekem, we i tijim yu abaot Jisas Kraes. Helpem olgeta blong tingting long ol narafala samting we oli save mekem.

• Singsing tugeta wan singsing abaot fasin blong stap serem gospel, olsem “I Want to Be a Missionary Now” (Children’s Songbook,168). ?Wanem nao yumi save talem abaot Jisas Kraes long ol narafala man? Luk long Ol Toktok blong Bilif, blong karem sam aedia.

Sefanaea 2:3

“Lukaotem Lod.”

Sefanaea i tijim se, yumi mas lukaotem Lod long ol taem we i gat bigfala fasin nogud, semmak olsem ol las dei ia. Tingting hevi long olsem wanem bae yu leftemap tingting blong ol pikinini blong lukaotem Hem.

Samfala Aktiviti we Yu Save Mekem

• Soem wan pikja blong Jisas mo ridim Sefanaea 2:3long ol pikinini. Invaetem olgeta blong blokem ae blong olgeta wetem han olsem ol glas blong ae, mo lukluk long pikja, evri taem yu ridim “lukaot.” Eksplenem se profet Sefanaea i wantem ol pipol blong lukaotem Lod. ?Olsem wanem nao yumi lukaotem Lod? ?Weaples nao bae mi faenem Hem?

• Yusum aktiviti pej blong wik ia, o tingting long wan narafala gem we i save leftemap tingting blong ol pikinini blong lukaotem Lod. Plei o singsing tugeta wan singsing we i go wetem topik olsem: “Seek the Lord Early” (Children’s Songbook,108). Toktok raon long wanem nao singsing ia i tij abaot wei we yumi save faenem Jisas Kraes long laef blong yumi.

Tijim Doktrin: Ol Bigfala Pikinini

Neham 1:7

“Hae God i gud tumas. Taem ol man blong hem oli stap long trabol, hem i save lukaot gud long olgeta.”

Wanwan long yumi i fesem ol “trabol dei” blong yumi. ?Olsem wanem yu helpem ol pikinini blong tanem olgeta i go long Lod, blong oli “trastem hem,” mo blong oli faenem sefti long saed blong spirit long ol taem blong trabol?

Samfala Aktiviti we Yu Save Mekem

• Soem long ol pikinini wan pikja blong wan ston wol we i raonem haos o wan haos blong king. ?Wanem nao sam long ol risen we sam pipol oli gat blong talem se oli nidim wan strong ston wol raon long haos blong olgeta? Invaetem ol pikinini blong ridim Neham 1:7 blong faenemaot wanem profet Neham i bin talem, we i olsem wanem blong gat wan ston wol we i raonem haos o wan haos blong king. ?Wanem nao Sevya bae i protektem yumi long hem?

• Invaetem ol pikinini blong droem wan pikja blong olgetawan mo famli blong olgeta insaed long wan ston wol we i raonem haos o wan haos blong king. Leftemap tingting blong olgeta blong raetem ol toktok raon long ston wol ia, we i tokbaot sam long ol paoa blong ivel long wol tedei. Invaetem olgeta blong raetem ol toktok insaed long ston wol ia we i tokbaot Jisas Kraes. ?Wanem nao Hem i askem yumi blong mekem blong kasem paoa blong Hem mo proteksen blong Hem? (luk long Doktrin mo Ol Kavenan 35:24).

  

  “Dei ya we Hae God bambae i jajem olgeta man long hem i stap kam kolosap nao” (Neham 1:7).

Hababuk 3:17–19

Mi save kasem glad long Jisas Kraes, iven long taem we mi stap fesem ol hadtaem.

Hababuk i tokbaot sam tes we i maet i save hapen long ol pipol blong hem, we i gat tu, ol tri mo ol rop we oli nomo karem frut. Afta, hem i talem se, nomata ol samting ia oli stap hapen, “mi bambae mi stap harem gud yet from we Hae God i God blong mi.”

Samfala Aktiviti we Yu Save Mekem

• Invaetem ol pikinini blong ridim Hababuk 3:17 mo poenemaot ol tes we ves ia i stap tokbaot. ?Olsem wanem nao wan man i filim sapos ol samting ia oli hapen? Helpem ol pikinini blong tingting long ol tes we i save hapen long olgeta. Afta ridim tugeta ol ves 18–19 blong lanem wanem Habakuk i talem abaot olsem wanem bae hem i filim sapos ol samting ia oli hapen long hem.

• Helpem ol pikinini blong oli faenem ol narafala eksampol blong ol pipol insaed long ol skripja we oli glad long Lod, nomata long ol hadtaem. Oli save faenem ol eksampol long Ol Wok 16:19–25; Mosaea 24:10–15; mo mesej blong Dieter F. Uchtdorf, “Grateful in Any Circumstances” (Liahona, May 2014, 70–77), speseli seksen we oli singaotem: “Being Grateful in Our Circumstances.” ?From wanem ol pipol ia oli save glad nomata long ol hadtaem? ?Olsem wanem nao yumi save folem ol eksampol blong olgeta?

Sefanaea 3:14–20

Olgeta we oli folem Jisas Kraes, bae oli faenem pis mo glad.

Sefanaea 3:14–20 tokbaot dei ia we i gat bigfala glad taem we Jisas Kraes, “king blong Isrel,” bae i rul ova long ol pipol mo “glad i ova [yumi] wetem singsing” (ves 15,17).

Samfala Aktiviti we Yu Save Mekem

• Ridim tugeta Sefanaea 3:14. Afta invaetem wanwan pikinini blong jusum wan ves insaed long Sefanaea 3:15–20 mo stadi long hem, mo stap lukaotem wan samting we i save helpem yumi blong “stap hapi mo glad.” Askem olgeta long wanem we oli faenem.

• Helpem ol pikinini blong faenem ol hym o ol singsing blong ol pikinini we bae i helpem olgeta blong “stap hapi mo glad” (Sefanaea 3:14). Singsing long sam singsing tugeta, mo leftemap tingting blong ol pikinini blong tokbaot glad we oli faenem insaed long gospel blong Jisas Kraes.

Stap Leftemap Tingting blong Lanem Samting long Hom

Askem ol pikinini blong raetemdaon ol refrens blong ol skripja we oli wantem blong serem wetem ol famli blong olgeta.

Stap Kam Antap long Fasin blong Yumi blong Stap Tij

Helpem ol pikinini blong luksave Spirit. Traem blong luksave, ol taem we ol pikinini oli stap filim paoa blong Spirit. Taem hemia i hapen, helpem olgeta blong andastanem se, ol filing ia oli kam tru long Tabu Spirit.