“12–18 Disemba. Malakae: ‘Hae God I Talem long Yumi Se: ‘Oltaem Mi Mi Lavem Yufala,’” Kam Folem Mi—Blong Praemeri: OlTesteman 2022 (2021)
“12–18 Disemba. Malakae,” Kam Folem Mi—Blong Praemeri: 2022
12–18 Disemba.
Malakae
“Hae God I Talem long Yumi Se: ‘Oltaem Mi Mi Lavem Yufala”
Lod i lavem ol pikinini we yu tijim. ?Olsem wanem bae yu helpem ol pikinini blong filim lav blong Hem taem yu stap tijim doktrin we i stap insaed long buk blong Malakae?
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Ridim sentens ia aot long Malakae 1:2: “Hae God i talem long yumi se, ‘Oltaem mi mi lavem yufala.’” Invaetem wanwan pikinini blong serem wan wei we oli save se Lod i lavem olgeta. Afta we wanwan pikinini i toktok, talem tangkyu long olgeta, mo serem testemoni blong yu abaot lav we Lod i gat long ol pikinini ia.
Tijim Doktrin: Ol Smol Pikinini
Papa long Heven bae i blesem mi taem mi pem taeting blong mi.
Nomata sapos ol pikinini we yu tijim oli smol mo oli no kasem mane yet, oli stil save lanem abaot blesing we i kam taem wan i pem taeting.
Samfala Aktiviti we Yu Save Mekem
-
Helpem ol pikinini blong kaontem 10 smol samting, olsem ol koen we oli stap long aktiviti pej blong wik ia. Invaetem olgeta blong karemaot wan aot long ol narafalawan, mo eksplenem long olgeta se hemia i olsem taeting we yumi givim long Lod. Yumi givim wan aot long ten blong evri samting we yumi kasem. Serem testemoni blong yu long olsem wanem Lod i blesem yumi taem yumi pem taeting. Singsing wetem ol pikinini wan singsing abaot taeting olsem, “I Want to Give the Lord My Tenth” (Children’s Songbook,150).
-
Droem wan windo long bod, mo ridim Malakae 3:10 long ol pikinini. Askem olgeta blong poen i go long windo taem yu ridim sentens ia, “openem [ol windo blong heven].” Eksplenem se, hemia i minim se Papa long Heven i givim yumi plante blesing taem yumi pem taeting. Taem ol pikinini oli kalarem aktiviti pej blong wik ia, tokbaot sam long ol risen, from wanem yumi pem taeting.
-
Serem wan stori long Fren magasin o wan stori blong yuwan, taem yu stap pem taeting blong yu. Invaetem ol pikinini blong lisin long ol blesing we i save kam taem wan i pem taeting.
Yumi sil tugeta olsem wan famli long tempol.
From ol prishud ki blong siling we Elaeja i bin givim long Josef Smit long Ketlan Tempol, nao, ol famli oli save yunaet blong oltaem. Taem yu tijim ol trutok ia, lukaot gud long ol filing blong ol pikinini we famli blong olgeta i no bin sil yet insaed long tempol.
Samfala Aktiviti we Yu Save Mekem
-
Ridim Malakae 4:5 long ol pikinini. Afta, talem long olgeta se, promes ia i bin hapen taem we Elaeja i bin kamkamaot long Josef Smit long Ketlan Tempol (luk long “Japta 40: Ol Visen insaed long Ketlan Tempol,” insaed long Ol Doktrin mo Kavenan Stori,155). Soem wan pikja blong taem ia (luk long Gospel Art Buk, namba 95), mo invaetem ol pikinini blong poen i go long Elaeja mo Josef Smit. Eksplenem se, from we Elaeja i bin kam. Bae yumi save sil olsem wan famli insaed long tempol. Serem testemoni blong yu abaot from wanem i impoten blong sil olsem wan famli.
-
Talem long ol pikinini abaot lav blong yu long famli blong yu; soem wan pikja sapos i posibol. Invaetem sam pikinini blong serem ol filing blong olgeta long famli blong olgeta. Singsing wan singsing tugeta abaot famli olsem, “Famle I Stap Tugeta Foreva” (Liahona, Epril 2013, p.63), mo testifae se Papa long Heven i wantem ol famli blong sil tugeta, mo from se hemia nao i wan risen from wanem yumi gat ol tempol. Helpem ol pikinini blong andastanem se, from Jisas Kraes, yumi save sil tu wetem ol memba blong famli blong yumi we oli no save go long tempol long laef ia. Invaetem ol pikinini blong dro wan pikja blong famli blong olgeta we oli stap tugeta long heven.
Tijim Doktrin: Ol Bigfala Pikinini
Papa long Heven bae i blesem mi taem mi pem taeting blong mi.
Blong stap pem taeting, i moa olsem blong stap gat fet long Papa long Heven mo Jisas Kraes bitim blong lukluk long hem long saed blong mane nomo. ?Wanem nao ol pikinini we yu tijim oli andastanem abaot taeting? ?Olsem wanem nao bae yu helpem olgeta blong gat fet blong pem taeting?
Samfala Aktiviti we Yu Save Mekem
-
Raetem ol kwestin ia abaot taeting long bod olsem olgeta ia: ?Wanem ia taeting? ?Olsem wanem nao mi pem taeting? Mane blong taeting i blong wanem? ?Wanem nao ol blesing blong stap pem taeting? Invaetem ol pikinini blong luklukgud insaed long Malakae 3:8–12 mo “Taeting” insaed long Gaed long Ol Skripja (olskripja.ChurchofJesusChrist.org) mo raetemdaon ol ansa we oli faenem. Invaetem olgeta blong serem ol ansa blong olgeta long wanwan long olgeta. ?Yumi kam ol wanem kaen pipol taem yumi stap pem taeting?
-
Soem vidio blong “Jesus Teaches about the Widow’s Mite” (ChurchofJesusChrist.org), o ridim tugeta Mak 12:41–44. ?Wanem nao stori ia i tijim yumi abaot olsem wanem Lod i filim abaot ol ofring blong yumi.
-
Droem wan windo long bod, mo invaetem ol pikinini blong raet insaed long windo, ol blesing we wan i save kasem taem hem i stap pem taeting (blong kasem moa aedia, luk long Malakae 3:10–12). Invaetem ol pikinini blong serem wan eksampol blong olgetawan, long wei we hem o famli blong hem i bin kasem blesing taem oli bin stap pem wan fetful taeting. O, yu save serem wan eksampol blong laef blong yu abaot olsem wanem taem yu stap pem taeting i bin mekem fet blong yu long Papa long Heven mo Jisas Kraes i kam antap.
Pikja blong Elaeja i kamkamaot long Josef mo Oliva Kaodri insaed long Ketlan Tempol, i kam long Robert T. Barrett
“Bambae mi sanem Profet Elaeja i kamtru long yufala fastaem.”
Profesi blong Malakae abaot profet Elaeja i bin kamtru taem we Elaeja i kamkamaot long Josef Smit insaed long Ketlan Tempol mo givim ol ki blong prishud we i letem ol famli blong sil tugeta blong oltaem. Yu save tingting blong invaetem wan long wod we i gat responsabiliti blong wok long tempol o famli histri wok (olsem wan memba kworom blong ol elda o Rilif Sosaeti presidensi), blong helpem yu tijim doktrin ia long ol pikinini. Tingbaot blong lukaot gud long ol filing blong ol narafala pikinini we famli blong olgeta i no sil yet long tempol.
Samfala Aktiviti we Yu Save Mekem
-
Raetem wanwan sentens aot long Malakae 4:5–6 long wan seperet pis blong pepa. Givimaot ol pis pepa long ol pikinini, mo askem olgeta blong putum ol sentens ia long stret oda. Ridim ol ves ia tugeta, mo toktokraon long ol kwestin olsem olgeta ia: ?Huia nao Lod i promes blong sanem hem i kam? ?Wetaem nao Hem i talem se man ia bae i kam? ?Wanem nao Lod i talem se bae man ia i mekem? ?From wanem man ia i nidim blong kam? ?Profesi ia i bin kamtru long weaples? (luk long Doktrin mo Ol Kavenan 110:13–16).
-
Raetem long bod wan kwestin olsem ?Wanem i minim blong tanem hat blong ol pikinini i go long ol papa blong olgeta? (luk long Malakae 4:6). Invaetem ol pikinini blong tingting hevi long kwestin ia taem bae oli wajem vidio ia: “Their Hearts Are Bound to You” (ChurchofJesusChrist.org). Afta, invaetem ol pikinini blong serem ol tingting blong olgeta abaot kwestin ia long bod. Toktok raon long ol eksperiens we yu o ol pikinini oli bin gat taem oli stap lanem abaot famli histri.
-
Soem wan pikja blong Elaeja aot long aotlaen blong wik ia insaed long Kam Folem Mi—Blong Wanwan Man, Woman mo Famli. Invaetem ol pikinini blong serem wanem oli save abaot ol samting we i hapen, insaed long pikja ia (luk tu long Doktrin mo Ol Kavenan 110:13–16). Testifae se paoa ia blong siling we Elaeja i bin putumbak, i letem ol famli blong stap wan blong taem we i no save finis—we i gat tu ol famli we oli no gat janis ia long laef long wol ia. Sapos yu bin tekpat long wan siling, sapos i blong yuwan o blong wan we i ded finis, tokbaot wanem yu bin filim long taem blong odinens ia. Askem ol pikinini blong serem ol tingting mo filing blong olgeta abaot ol famli blong olgeta mo plan blong God blong helpem ol famli blong stap tugeta blong oltaem.
Stap Leftemap Tingting blong Lanem Samting long Hom
Invaetem ol pikinini blong tingting long wan samting we oli bin lanem long taem blong klas tedei, mo askem sam pikinini blong serem. Leftemap tingting blong ol pikinini blong serem wetem famli blong olgeta, wan samting we oli bin lanem abaot ol tijing blong Malakae.
Stap Kam Antap long Fasin blong Yumi blong Stap Tij
Mekem ol pikinini oli stap storian o toktok raon long ol topik blong gospel. Maet bae yu nidim blong tingting long sam niu wei blong mekem we ol smol pikinini oli save toktok raon long gospel. Eksampol. Ol pikinini oli save pasem wan balong i go raon mo serem ol ansa blong olgeta folem wan kwestin, taem bae balong i kam stop long han blong wan, bae hem i ansa.