12–18 Disemba

Malakae

“Hae God I Talem long Yumi Se: ‘Oltaem Mi Mi Lavem Yufala.’”

Nem ia, Malakae, i minim “mesenja blong mi” (Bible Dictionary, “Malakae”). Taem yu stadi long mesej blong Malakae long Isrel, ?wanem mesej nao yu yu faenem blong yusum long laef blong yu? ?Olsem wanem nao ol toktok blong Malakae i go wetem taem blong yumi tedei?

Raetemdaon Ol Filing mo Tingting blong Yu

“Oltaem mi mi lavem yufala,” Lod i bin talem long ol pipol blong Hem tru long profet Malakae. Be Ol Man Isrel, we oli bin safa tru long plante jeneresen blong ol hadtaem mo fasin blong stap prisena, oli bin askem Lod: “Yu yu soemaot olsem wanem long mifala se yu lavem mifala tumas?” (Malakae 1:2). Afta evri samting we Isrel i bin gotru long hem, oli bin stap askem olgetawan sapos histri blong Isrel blong bifo i rili wan stori blong lav blong God long ol kavenan pipol blong Hem, o nogat.

Taem yu stap tingting long wanem yu bin ridim long OlTesteman long yia ia, ?wanem pruf nao, yu yu faenem, we i soem lav blong God? Hem i isi blong luk plante eksampol blong wiknes mo agens blong ol man. Be yet, truaot long evri samting ia, God i neva stop blong stretem han blong Hem long ol man wetem lav. Taem we ol boe blong Jekob oli no mekem gud long brata blong olgeta, Josef, Lod i stil mekem wan rod i rere blong sevem olgeta long taem blong hanggri (luk long Jenesis 45:4–8). Taem we Isrel i komplen long waelples, God i bin fidim olgeta wetem mana (luk long Eksodas 16:1–4). Iven taem we Isrel i lego God, oli tanem olgeta i luk long ol narafala god, mo oli bin seraot olbaot, God i neva lego olgeta fulwan, be i bin promesem se, sapos oli sakem sin, bambae Hem i mekem olgeta oli kam tugeta wanples, mo bae i pemaot olgeta “we i glad blong tekembak olgeta” (luk long Aesea 54:7).

Taem yu lukluk long wei ia, OlTesteman i wan stori blong lav ia blong God we i save wet longtaem, mo i save stap strong tru long hadtaem. Mo stori ia i gohed tedei. “bambae paoa blong mi blong sevem man mo blong mekem hem i stret man long fes blong mi, bambae i kavremap yufala olsem san we i girap, nao laet blong hem i saen, i kavremap olgeta samting, nao bambae yufala i kam gud bakegen,” Malakae i talem long profesi blong hem (Malakae 4:2). Jisas Kraes i bin kam, i tekem hiling long saed blong bodi mo long saed blong spirit i kam long evriwan we i kam long Hem. Hem i bigfala pruf ia blong lav blong God long Isrel blong bifo, mo blong yumi evriwan.

Blong gat moa infomesen abaot buk blong Malakae, luk long “Malakae” insaed long Gaed long Ol Skripja.

Ol Aedia blong Skripja Stadi blong Yuwan

Malakae 1–4

“Naoia sapos yufala i tanem tingting blong yufala, yufala i kambak long mi, mi bambae mi save kambak long yufala bakegen.”

Long taem blong Malakae, Ol Man Isrel oli bin bildimbak tempol finis long Jerusalem, be, olsem wan pipol, oli stil nid blong bildimbak rilesensip blong olgeta wetem Lod. Taem yu stap stadi long Malakae, lukaotem ol kwestin we Lod i bin askem Ol Man Isrel, o ol kwestin we olgeta oli bin askem Lod. Tingting blong askem yuwan ol semmak kwestin, (sam eksampol oli stap daon ia) blong helpem yu blong skelem rilesensip blong yu wetem Lod mo kam kolosap moa long Hem.

• ?Olsem wanem mi mi bin filim lav we Lod i gat long mi? (luk long Malakae 1:2).

• ?Weswe? ?Ol ofring blong mi long Lod oli rili givim ona long Hem? (luk long Malakae 1:6–11).

• ?Long wanem wei mi mi nidim blong gobak long Lod? (luk long Malakae 3:7).

• ?Mi mi stap stilim Hem long eni wei? (luk long Malakae 3:8–11).

• ?Olsem wanem nao, fasin blong mi long taem blong hadtaem i soemaot ol filing blong mi long Lod? (luk long Malakae 3:13–15; luk tu long 2:17).

Luk tu long D.Todd Christofferson, “As Many as I Love, I Rebuke and Chasten,” Liahona, May 2011, 97–100.

Malakae 1:6–14

Lod i askem wan “[ofring we i klin evriwan.]”

Ol toktok blong Lod long Malakae 1 i soem se ol pris blong Ol Man Isrel, oli bin stap givim, olsem sakrifaes, ol animol we oli no gat mak, mo oli no sik, insaed long tempol, we Lod i bin blokem hemia (luk long Levitikas 22:17–25). ?Wanem nao ol sakrifaes ia oli stap talem abaot ol filing blong ol pris ia long Lod? (luk long Malakae 1:13). ?From wanem Lod i askem yumi blong givim Hem ol bes ofring blong yumi? Tingting abaot ol sakrifaes we Lod i bin askem yu blong yu mekem. ?Wanem nao yu yu save givim Hem olsem wan ofring we i klin evriwan? (Malakae 1:11; luk tu long 3:3).

Luk tu long Moronae 7:5–14.

Malakae 3–4

Ol profesi blong Malakae oli stap kamtru long ol las dei.

Taem we Sevya i bin visitim Ol Amerika, hem i kwotem Malakae 3–4 long Ol Man blong Nifae (luk long 3 Nifae 24–25). Long 1823, enjel Moronae i bin serem samfala pat blong ol semfala japta ia wetem Josef Smit (luk long Josef Smit—Histri 1:36–39; luk tu long Doktrin mo Ol Kavenan 2). ?From wanem nao yu ting se ol toktok blong Malakae, oli ripitim olgeta plante taem long ol skripja? (luk tu long Doktrin mo Ol Kavenan 27:9; 110:13–16; 128:17–18). Long tingting blong yu, ?wanem mesej nao we i stap long Malakae 3–4 i luk se oli impoten tumas long taem blong yumi tedei?

Taem we Moronae i bin kwotem Malakae 4:5–6 long Josef Smit, hem i mekem mo i jenisim smol long wei blong ridim olsem we i stap long Baebol (Josef Smit—Histri 1:36). ?Smol jenis ia blong Moronae, i ademap wanem moa save long profesi ia? Blong lanem moa abaot kaming blong Elaeja, mo wei we profesi ia i stap kamtru tedei, luk long Doktrin mo Ol Kavenan 110:13–16 mo mesej blong Elda David A. Bednar, “The Hearts of the Children Shall Turn” (Liahona, Nov. 2011, 24–27). ?From wanem yumi talem tangkyu se Elaeja i bin kam?

Pikja droing blong Elaeja i kamkamaot long Josef Smit mo Oliva Kaodri long Ketlan Tempol, i kam long Robert T. Barrett

Malakae 3:8–12

Taem yumi pem taeting, i openem ol windo blong heven.

Taem yu stap ridim Malakae 3:8–12, tingting long eksperiens blong yuwan abaot fasin blong pem taeting. Toktok ia, “mi openem skae,” (ves 10) i minim wanem long yu?

Ol Aedia blong Famli Skripja Stadi mo Haos Naet

Malakae 1:2.?Olsem wanem nao famli blong yu i ansarem kwestin we i stap long Malakae 1:2—“Yu yu soemaot olsem wanem long mifala se yu lavem mifala tumas?” ?Wanem samfala pruf blong lav ia we Lod i gat long yumi?

Malakae 3:8–12.Taem yu stap ridim Malakae 3:8–12, invaetem ol memba blong famli blong oli serem ol tingting, o ol filing blong olgeta abaot taeting. ?Wanem blesing, long saed blong laef ia mo long saed blong spirit yumi bin luk taem yumi bin pem taeting? (luk long David A. Bednar, “The Windows of Heaven,” Liahona, Nov. 2013, 17–20). Ol memba blong famli oli save laekem blong droem ol pikja we oli ripresentem ol blesing ia mo afta, hangem olgeta long wan windo.

Malakae 3:13–18.?Hem i minim wanem long yu blong yu yu blong Lod mo yu yu wan long ol rij ston blong Hem.

Malakae 4:5–6.Afta we yufala i ridim ol ves ia, famli blong yu i save faenemaot ol ansa long ol kwestin ia abaot profesi blong Malakae: ?Huia? ?Wanem? ?Wetaem? ?Weaples? ?From wanem? (luk tu long Doktrin mo Ol Kavenan 2).

?Olsem wanem yumi tanem hat blong yumi i go long ol papa blong yumi? ?Olsem wanem nao yumi kasem blesing taem yumi stap mekem olsem? Maet bae yu wantem tingting hevi long ol kwestin ia taem yufala i stap wajem vidio ia: “The Promised Blessings of Family History” (ChurchofJesusChrist.org). ?Wanem nao bae yumi mekem olsem wan famli blong kasem olgeta blesing ia?

Blong gat moa tingting blong stap tijim ol pikinini, luk long aotlaen blong wik ia, long Kam Folem Mi—Blong Praemeri.

Wan singsing: “Family History—I Am Doing It,” Children’s Songbook,94.

Stap Kam Antap long Stadi blong Yuwan

Askem ol kwestin taem yu stap stadi i go. Taem yu stap stadi long ol skripja, bae i gat sam kwestin i kam long maen blong yu. Tingting hevi long ol kwestin ia mo faenem ol ansa.

Ol Hosana blong Mourning, i kam long Rose Datoc Dall. Wan woman we nem blong hem, Mourning, i stanap long spirit wol, mo ol bubu blong hem oli raonem hem. Hem i stap selebretem we oli kam fri long fasin blong stap long kalabus long saed blong spirit.