Lae Hawae Tempol

5–11 Disemba

Hagae; Sekaraea 1–3; 7–14

“I Tabu, I blong Hae God”

Taem yu ridim olgeta skripja, hem i stap invaetem revelesen i kam. Gat wan open tingting long ol mesej we Tabu Spirit i stap talemaot long tru long revelesen taem yu stap ridim Hagae mo Sekaraea.

Raetemdaon Ol Filing mo Tingting blong Yu

Afta ten yia we oli stap olsem prisena, wan grup blong Ol Man Isrel, maet insaed i gat ol profet ia, Hagae mo Sekaraea, oli bin givim raet long olgeta blong gobak long Jerusalem. Sam, insaed long grup ia, oli bin tingbaot se Jerusalem i luk olsem wanem bifo God i prapa spolem gud. Traem tingting se bae filing blong olgeta i olsem wanem taem bae oli luk ol pis doti i stap, blong wanem we, long wan taem, i bin hom blong olgeta, i bin ples blong oli wosip, mo tempol blong olgeta. Long olgeta ia we oli stap askem olgetawan se, bae tempol bae i luk olsem haos blong Lod long fasfala taem, (Hagae 2:3), Profet Hagae i talem ol toktok blong Lod, blong leftemap tingting se: “Be yufala i no mas harem nogud from samting ya. Mi wantem se yufala evriwan i mas wok, from we mi mi stap wetem yufala.” “Niufala haos ya blong mi bambae i flas we i flas gud, … mo bambae mi mekem we yufala i gat plante samting, mo bambae yufala i gat pis.” (Hagae 2:4–5, 7,9.)

Mo i no jes tabu tempol ia nomo we oli bin nidim blong bildimbak. Long plante wei, ol pipol blong God, olgeta tu oli brokbrok long pisis i stap. Mo blong bildimbak wan tabu pipol, i tekem moa bitim blong katem mo putum stret ol ston blong bildim wol blong tempol. Tedei, long ol tempol i gat wan raeting i stap “Tabu Fasin long Lod,” we olgeta toktok ia oli no jes blong wan bilding, be tu, long wan fasin blong laef. Blong stap raetem ol toktok ia long “ol bel blong strap blong ol hos” mo long “evri sospen long Jerusalem,” (Sekaraea 14:20–21) bae i help nomo sapos oli raetem ol toktok ia tu long evri hat blong bodi blong man. Blong gat tru tabu fasin, i nidim blong wan i gat ol toktok mo ol loa blong Lod i stap strong (Sekaraea 1:6) insaed long hat blong yumi, mo i letem paoa blong Hem i jenisim fasin blong yumi, blong mekem se yumi kam tabu olsem Hem (luk long Levitikas 19:2).

Blong gat wan bigfala lukluk long Buk blong Hagae mo Sekaraea, luk long “Hagae” mo “Sekaraea” insaed long Gaed long Ol Skripja.

Sam Aedia blong Skripja Stadi blong Yuwan

Hagae 1; 2:1–9

“Yufala i no luksave samting ya we i stap kasem yufala.”

I bin gat plante impoten samting blong mekem blong bildimap Jerusalem bakegen. Be afta samples 15 yia we i pas afta we Ol Man Isrel oli kambak, Lod i no bin glad se oli no putum faswan, wok ia, blong bildimbak tempol Hagae 1:2–5; luk tu long Esra 4:24). Taem yu stap ridim Hagae 1; 2:1–9, tingting long ol kaen kwestin olsem: ?Wanem risal nao Ol Man Isrel oli bin fesem from se oli no bin finisim wok blong bildimbak tempol? ?Wanem blesing nao Lod i bin promesem olgeta sapos oli finisim wok blong bildim haos blong Hem? Maet bae yu wantem tekem janis ia blong “luksave samting ia we i stap kasem [yu]”—blong tingting long ol samting we yu putum i kam faswan, mo olsem wanem bae yu save stretem ol samting ia oli go wetem ol samting blong Lod.

Luk tu long Doktrin mo Ol Kavenan 95; Terence M. Vinson, “Ol Tru Disaepol blong Sevya,”   Liahona, Nov 2019, 9–11.

Sekaraea 1– 3;7– 8; 14

Lod i save mekem mi mi tabu.

Sista Carol F. McConkie i bin tijim: “Tabu fasin i blong mekem ol joes we bae i kipim Tabu Spirit i stap olsem gaed blong yumi. Tabu fasin i blong livim long saed ol kaenkaen fasin blong wol mo blong yumi kam wan sent tru long Atonmen blong Kraes we i Lod. [Mosaea 3:19]. … Hop blong yumi blong gat tabu fasin i stamba long Kraes, long sore blong Hem mo gladhat blong Hem.” (“Wanem I Naes long Tabu Fasin,” Jeneral Konfrens Epril 2017, ChurchofJesusChrist.org/study/general-conference?lang=bis). Kipim ol tijing ia insaed long maen blong yu taem yu stap ridim ol toktok blong Lod, we Hem i bin givim tru long Sekaraea, we i askem strong long Isrel blong kam moa tabu: Sekaraea 1:1–6; 3:1–7; 7:8–10; 8:16–17. Teknot long ol samting we Lod i askem Isrel blong mekem, blong mekem se i save mekem olgeta oli kam tabu. ?Olsem wanem Hem i stap mekem yu yu kam moa tabu?

Sekaraea 2:10–11; 8:1–8; 14:9–11, 20–21 i tokbaot se laef bae i olsem wanem long wan fiuja taem, taem we evriwan bae i stastap wetem Lod, we evriwan i tabu. ?Wanem nao ol toktok ia we oli tokbaot olgeta samting ia oli minim long olgeta ia we oli bin stap bildimbak Jerusalem long taem blong Sekaraea? ?Oli minim wanem long yu?

“!Yufala i luk! King blong yufala i stap kam long yufala. Hem i win finis, mo i glad tumas from we hem i winim ol enemi blong hem. Be tingting blong hem i stap daon, nao i stap raed long wan dongki. Hem i stap raed long wan dongki we i yangfala nomo” (Sekaraea 9:9). Viktri Maj, i kam long Harry Anderson

Sekaraea 9:9–11; 11:12–13; 12:10; 13:6–7; 14:1–9

Jisas Kraes i Mesaea ia we God i promesem.

Plante long ol raeting blong Sekaraea oli poenem yumi i go long eli taem long seves blong Jisas Kraes, mo tu, long taem ia we bambae Hem i kambak long Seken Kaming. Komperem olgeta profesi ia we oli kam long Sekaraea wetem olgeta skripja long ol nara buk blong skripja:

• Sekaraea 9:9–11 (luk long Matiu 21:1–11; 1Peter 3:18–19)

• Sekaraea 11:12–13 (luk long Matiu 26:14–16; 27:1–7)

• Sekaraea 12:10 (luk long John 19:37; Revelesen 1:7)

• Sekaraea 13:6–7; 14:1–9 (luk long Matiu 26:31; Doktrin mo Ol Kavenan 45:47–53)

?Wanem nao yu lanem abaot Sevya taem yu bin stap stadi long ol skripja ia? ?Wanem hem i impoten long yu blong save andastanem olgeta skripja ia?

Luk tu long Gaed long Ol Skripja, “Mesaea” (olskripja.ChurchofJesusChrist.org).

Ol Aedia blong Famli Skripja Stadi mo Haos Naet

Hagae 1:2–7.Olgeta ves ia oli save pusum famli blong yu blong “luksave samting ia we i stap kasem yufala.” Maet ol famli oli save aktem wanem i stap long ol toktok blong ves 6. ?Wanem nao ves ia i tijim long saed blong skelem wanem i impoten moa, olsem ol samting blong wol ia ova long ol samting we oli blong God? Kaonsel tugeta abaot ol samting we oli kam faswan insaed long famli blong yufala. Singsing wan singsing olsem “Mi Traem blong Kam Olsem Jisas” (Liahona, Epril 2012, Children’s Songbook, 64); hem i save helpem famli blong yu blong skelem wanem gud samting yufala i stap mekem, mo ol ples we yufala i save kam antap long hem.

Hagae 2:1–9.Blong presentem ol ves ia, yu save serem stori blong Provo Siti Senta Tempol, we oli bin bildimbak afta we tabenakol i bin bon long faea (luk long vidio ia: “Provo City Center Temple Completed,” ChurchofJesusChrist.org). Taem we famli blong yu i stap ridim Hagae 2:1–9, yu save askem ol memba blong famli blong tingting long wan samting long laef blong yumi we bae i olsem wok ia blong stap bildimbak tempol we i bin lus. ?Olsem wanem Lod i stap bildimbak yumi afta we prapa nogud taem o agens i kam long yumi?

Sekaraea 3:1–7.Taem yufala i stap ridim ol ves ia, yu save soem famli blong yu sam klos we oli doti i stap. ?Olsem wanem nao bae Josua i filim taem hem i stanap long fored blong enjel wetem ol klos we oli doti? ?Olsem wan sin i olsem doti klos? ?Wanem nao Sekaraea 3:1–7 i stap tijim yumi abaot fogivnes? Afta, yufala i save klinim ol klos ia tugeta mo tokbaot paoa blong Atonmen blong Sevya blong klinim man.

Sekaraea 8:1–8.?Wanem i tajem yu abaot visen blong Sekaraea long saed blong fiuja blong Jerusalem? ?Wanem nao yumi faenem long ples ia we yumi wantem blong luk long komuniti blong yumi? ?OIsem wanem yumi save invaetem Sevya blong i stap long medel blong yumi? (luk long Gary E. Stevenson, “Sacred Homes, Sacred Temples,” Ensign o Liahona, Mei 2009, 101–3).

Blong gat moa tingting blong stap tijim ol pikinini, luk long aotlaen blong wik ia, long Kam Folem Mi—Blong Praemeri.

Wan singsing: “Mi Traem blong Kam Olsem Jisas,” Liahona, Epril 2012, 64.

Stap Kam Antap long Stadi blong Yuwan

Tekem sam janis blong yu skelem yuwan. Taem yu stap stadi olgeta skripja ia, plante taem bae yu gat insperesen blong yu tingting hevi long komitmen blong yuwan long Papa long Heven mo long Jisas Kraes. Mekem folem ol filing mo tingting we yu kasem.