“5–11 Disemba. Hagae; Sakaraea 1–3; 7–14: ‘ I Tabu, I blong Hae God,’” Kam Folem Mi—Blong Praemeri: OlTesteman 2022 (2021)
“5–11 Disemba. Hagae; Sakaraea 1–3; 7–14,” Kam Folem Mi—Blong Praemeri: 2022
5–11 Disemba.
Hagae; Sakaraea 1–3; 7–14
“I Tabu, I blong Hae God”
Wetem prea, ridim Hagae, Sakaraea mo tingting hevi long ol filing mo tingting we yu kasem. ?Olsem wanem nao ol trutok long ol buk ia i helpem blong mitim ol nid blong ol pikinini?
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Droem wan hapi fes long wan pis pepa, mo letem ol pikinini oli gat taem blong stap holem pikja ia. Long taem blong olgeta, invaetem olgeta blong serem wan samting we oli bin lanem abaot Papa long Heven mo Jisas Kraes we i mekem olgeta oli stap hapi.
Tijim Doktrin: Ol Smol Pikinini
Mi save putum God faswan long laef blong mi.
Blong stap lanem abaot kaonsel blong Lod blong “tingting long ol wei blong yu” i wan janis blong ol pikinini blong mekem sua se, oli stap mekem ol impoten samting we God i askem yumi blong mekem.
Samfala Aktiviti we Yu Save Mekem
-
Eksplenem long ol pikinini se, Lod i wantem blong Laen blong Isrel oli bildim tempol, be oli stap mekem ol narafala samting, mo no mekem hemia we Lod i askem long olgeta blong mekem. Ridim laod Hagae 1:7, mo eksplenem se blong “yufala i no luksave ol samting ya we i stap kasem yufala,” i minim se Lod i wantem Laen blong Isrel blong tingbaot se oli stap mekem ol impoten samting o no. Ridim ves 8 long ol pikinini mo invaetem olgeta blong mekem olsem se “[oli] mas go long bus,” “katem ol timba,” mo “wokem haos blong Lod].” ?Wanem nao ol impoten wok we God i wantem yumi blong mekem?
-
Putum ol pikja oli fes daon long tebol; ol pikja ia oli ripresentem sam long ol samting we oli impoten long God olsem, ol skripja, prea mo tempol. Letem ol pikinini oli gat janis blong jusum wan pikja, mo soem long klas. Helpem olgeta blong andastanem from wanem i impoten blong mekemsua se yumi faenem taem blong mekem wanwan long ol samting we oli stap long ol pikja ia.
Jisas i save mekem spirit blong mi i klin.
Doti klos blong Josua, we i hae pris, we oli tokbaot insaed long Sakaraea 3:1–7, i givim saen blong wanem i hapen taem yumi mekem sin. Tru long Atonmen blong Jisas Kraes, yumi save kam klin, olsem Josua i bin kam klin taem hem i kasem ol niufala klos.
Samfala Aktiviti we Yu Save Mekem
-
Letem ol pikinini oli pasem wan doti sot i go raon mo ridim Sakaraea 3:3. Afta pasem wanem klin sot i go raon mo ridim ves 4. Toktok wetem ol pikinini abaot olsem wanem taem yumi mekem ol rong joes i olsem blong stap kam toti long saed blong spirit, be Sevya i save mekem yumi kam klin bakegen. ?Olsem wanem nao yumi filim se yumi klin? Serem testemoni blong yu se, from se Jisas Kraes i bin harem nogud mo i bin ded from ol sin blong yumi, bae yumi kam klin long ol sin blong yumi sapos yumi sakem sin.
-
Sapos i posibol, soem long ol pikinini wan pikja blong wan man we i werem waet klos long taem blong baptaes (o luk long Gospel Art Buk, ol pej namba 103, 104). ?From wanem yumi werem waet klos long taem blong baptaes? Singsing long wan singsing abaot baptaes olsem, “When I Am Baptized” (Children’s Songbook,103). Invaetem ol pikinini blong droem olgetawan we oli stap kasem baptaes, mo serem wanem filing we oli gat taem oli tingting se bae oli kasem baptaes wan dei.
Ol profet oli tijim yumi abaot Jisas Kraes.
Olsem ol narafala profet long OlTesteman, Sakaraea i bin profesae abaot Jisas Kraes. ?Wanem nao ol profesi insaed long Sakaraea 2:10; 9:9; 14:3–9 i tijim ol pikinini abaot Hem?
Samfala Aktiviti we Yu Save Mekem
-
Soem wan pikja blong Jisas Kraes we i stap sidaon long dongki mo wokbaot i kam insaed long Jerusalem (luk long Gospel Art Buk, namba 50). Talem long ol pikinini se, plante yia bifo Jisas i kam daon long wol ia, Sakaraea i bin profesae se Jisas Kraes bae i sidaon long wan dongki mo wokbaot i go long Jerusalem bifo bae Hem i ded from yumi. Taem yu stap ridim Sakaraea 9:9, askem ol pikinini blong poenem ol pipol insaed long ol pikja we oli stap “glad bigwan,” mo tu, blong oli poen i go long “King.” ?Huia i King? Askem ol pikinini blong serem from wanem oli talem tangkyu from Jisas.
-
Ridim long ol pikinini sam long ol profesi blong Sakaraea we i abaot Seken Kaming blong Sevya, olsem olgeta ia insaed long Sakaraea 2:10; 14:9. Askem ol pikinini blong droem ol pikja blong wanem tingting blong olgeta long saed blong taem we Jisas bae i kambak bakegen, o singsing wan singsing abaot Seken Kaming, olsem “When He Comes Again” (Children’s Songbook, 82–83).
Tijim Doktrin: Ol Bigfala Pikinini
“Tingting long ol wei blong yu.”
Hem i impoten blong yumi evriwan blong save gud ol samting we oli kam faswan long laef mo tekem taem blong “tingting long ol wei blong [yumi].” ?Olsem wanem yu save givim insperesen long ol pikinini blong faenem taem, insaed long laef blong olgeta, blong mekem ol samting blong God?
Samfala Aktiviti we Yu Save Mekem
-
Invaetem ol pikinini blong ridim Hagae 1:2–5 blong faenemaot, from wanem Lod i no glad wetem Ol Laen blong Isrel. Askem ol pikinini blong jusum wan sentens aot long ves 6 mo droem wan pikja blong hem. Letem klas i talemaot wanem sentens nao ol droing ia oli ripresentem. Tokbaot olsem wanem taem yumi spenem taem long ol samting we Lod i no wantem, i olsem se yumi stap kakae be yumi no fulap, i olsem se yumi stap werem klos be yumi stap kolkol nomo. ?From wanem i impoten blong mekem taem blong ol samting we oli impoten long Lod?
-
Raetem “Tingting long ol wei blong yu” long bod (ves 7). Invaetem wanwan pikinini blong mekem wan lis blong ol samting we hem i stap mekem long wan nomol dei, mo i gat tu ol samting we Lod i askem yumi blong mekem. Askem ol pikinini blong “Tingting long ol wei [blong olgeta]” mo raetem sekol i go raon long wanem ol samting we maet Lod i talem se i moa impoten long lis blong olgeta. ?Olsem wanem yumi save mekemsua se yumi faenem taem, evri dei, blong mekem ol samting we Lod i wantem yumi blong mekem?
Yumi werem waet klos long taem blong baptaes blong yumi, blong soem se Jisas Kraes i save mekem yumi klin taem yumi sakem ol sin blong yumi (luk long Sakaraea 3:3–4).
Blong mekem mo kipim ol kavenan, i save helpem mi blong kam moa olsem Papa long Heven mo Jisas Kraes.
Long wan visen, Sakaraea i bin luk wan hae pris we nem blong hem i, Josua, we “klos blong hem i doti we i doti.” (Sakaraea 3:3). Wan enjel i givim klin klos long hem mo eksplenem se hemia i wan saen blong wasemaot ol sin blong hem. Yu save yusum visen ia blong helpem ol pikinini andastanem ol kavenan mo ol blesing we i go wetem baptaes.
Samfala Aktiviti we Yu Save Mekem
-
Ridim tugeta Sakaraea 3:1–7 mo toktokraon long ol kwestin olsem hemia: ?Wanem nao “ol toti klos” i ripresentem? ?Olsem wanem nao yumi save kam klin aot long ol sin blong yumi? ?Olsem wanem nao ol kavenan blong baptaes blong yumi i helpem yumi blong “wokbaot long ol wei [blong Lod]”?
-
Sam dei bifo klas i stat, askem wan pikinini blong rere blong givim wan toktok abaot taem we hem i kasem baptaes. Luklukbak tugeta long kavenan we yumi mekem long taem blong baptaes (luk long Doktrin mo Ol Kavenan 20:37). ?Olsem wanem nao blong stap kipim ol promes blong yumi, i helpem yumi blong kam moa olsem Papa long Heven mo Jisas Kraes. ?Olsem wanem nao taem yumi stap tekem sakramen evri wik i helpem yumi blong kipim ol kavenan blong baptaes blong yumi?
Sakaraea 9:9–11; 11:12; 13:6–7
Jisas Kraes i Mesaea ia we oli promesem.
?Wanem nao ol pikinini oli save lanem aot long ol profesi blong Sakaraea abaot Jisas Kraes?
Samfala Aktiviti we Yu Save Mekem
-
Mekem ol pikinini oli sidaon tutu. Givim long wanwan grup wan long ol profesi blong Sakaraea ia, folem wetem ol ves blong Niu Testeman we i stap tokbaot wetaem ol profesi ia oli stap kam tru: Sakaraea 9:9 mo Matiu 21:5–9; Sakaraea 9:11 mo 1 Pita 3:18–19; Sakaraea 11:12 mo Matiu 26:14–16; Sakaraea 13:7 mo Matiu 26:31. Askem wanwan grup blong serem wanem oli bin lanem abaot Jisas Kraes aot long ol ves ia, mo from wanem oli tangkyu long Hem.
-
Soem ol pikja 50, 60, mo64 long Gospel Art Buk. Raetem ol skripja refrens ia long bod, mo invaetem ol pikinini blong majem olgeta i go long ol pikja ia: Sakaraea 9:9; 13:6; 13:7. Invaetem ol pikinini blong serem ol filing blong olgeta abaot Jisas Kraes.
Stap Leftemap Tingting blong Lanem Samting long Hom
Invaetem ol pikinini blong raetemdaon wan trutok we oli bin lanem long klas. Invaetem olgeta blong toktok raon wetem famli blong olgeta, olsem wanem oli save kasem wan testemoni we i moa strong long saed blong trutok ia.
Stap Kam Antap long Fasin blong Yumi blong Stap Tij
Yusum tingting blong yu blong mekem samting i moa intresting. Letem ol aedia long aotlaen ia oli wekemap tingting blong yu blong mekem samting i moa interesting. Tingbaot wanem ol pikinini long klas blong yu bae oli glad long hem mo wanem bae i helpem olgeta blong faenem koneksen bitwin ol skripja mo laef blong olgeta.