“19–25 Disemba. Krismes: ‘Yumi Stap Trastem Hem, mo Hem I Sevem Yumi,’” Kam Folem Mi—Blong Praemeri: OlTesteman 2022 (2021)
“19–25 Disemba. Krismes,” Kom Folem Mi—Blong Praemeri: 2022
Long Yumi, Wan Pikinini I Bon I Kam long Wol Ia, i kam long Simon Dewey
19–25 Disemba.
Krismes
“Yumi Stap Trastem Hem, mo Hem I Sevem Yumi”
Ol Profet blong OlTesteman, oli bin luk fored wetem bigfala glad from taem ia we Mesaea bae i bon long hem (luk long Aesea 25:9). Taem yu stap rere blong tij long taem blong Krismes sisen ia, tingting long olsem wanem yu save helpem ol pikinini blong faenem glad long taem we Sevya, Jisas Kraes i bon long hem.
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Invaetem ol pikinini blong serem wanem ol save abaot taem we Jisas Kraes bae i bon long hem. Taem oli talem wan man o wan samting aot long stori, invaetem olgeta blong droem man o samting ia long bod. Askem ol pikinini wanem oli laekem abaot stori ia.
Tijim Doktrin: Ol Smol Pikinini
OlTesteman i tijim mi abaot Jisas Kraes.
Helpem ol pikinini blong lukluk nomo long Sevya, Jisas Kraes olsem risen ia nomo we yumi stap selebretem Krismes. Yu save mekem olsem, taem yu yusum ol skripja aot long OlTesteman we oli testifae abaot Hem.
Samfala Aktiviti we Yu Save Mekem
-
Soem wan pikja blong taem mo ples we Jisas i bon long hem (olsem long Gospel Art Buk, namba 30, o wan long ol pikja insaed long aotlaen blong wik ia insaed long Kam Folem Mi—Blong Wanwan Man, Woman mo Famli). Ridim Aesea 9:6, mo givim taem long wanwan pikinini blong poenem bebi Jisas taem oli harem sentens ia: “!Wan pikinini boe bambae i bon long mifala!” Serem testemoni blong yu se ol profet long OlTesteman oli bin save se Jisas bae i bon.
-
Invaetem wanwan pikinini blong talem nem blong hem, mo poenemaot se, antap long ol nem blong yumi, oli save singaotem yumi long ol narafala wei, olsem sista o brata o fren. Invaetem ol pikinini blong tingting long ol narafala eksampol. Ridim Aesea 9:6 long ol pikinini, tokbaot bigwan ol nem we oli singaotem Jisas Kraes long hem: “Nambawan Man blong Givhan long Man, God we i Gat Paoa, Papa we bambae i Stap Oltaem, Pikinini ya blong King, we Hem i Stamba blong Pis.” Helpem ol pikinini blong andastanem wanem ol nem ia oli talem long yumi abaot Jisas.
-
Givim long wanwan pikinini, wan pepa sta, mo invaetem olgeta blong leftemap sta blong olgeta taem yu stap ridim sentens ia aot long Namba 24:17: “wan sta we i kamaot we i saen we i saen [aot long laen blong Jekob].” Invaetem ol pikinini blong serem olsem wanem Jisas i olsem wan sta we i saenem ful wol. Singsing tugeta wan singsing abaot sta we i kamkamaot taem we Jisas i bon, olsem “Stars Were Gleaming” (Children’s Songbook,37) o “The First Noel” (Hymns, no.213).
Jisas Kraes i Sevya blong mi.
Krismes i no wan taem blong selebretem taem we Jisas i bon i kam long wol ia nomo, be tu, hem i blong selebretem laef mo misin blong Hem olsem Sevya blong wol. ?Olsem wanem yu save helpem ol pikinini blong filim glad mo gat wan hat blong talem tangkyu from Atonmen blong Jisas Kraes.
Samfala Aktiviti we Yu Save Mekem
-
Askem long ol pikinini blong tingbaot wan samting we oli stap lukluk fored from. Eksplenem se, long taem blong OlTesteman, ol pipol oli lukluk fored from taem we Jisas Kraes bae i bon long hem. Ridim Aesea 25:9 long ol pikinini, mo askem olgeta blong ripitim sentens ia: “Oltaem yumi stap trastem hem, mo yumi save harem gud, yumi save glad, from we hem i sevem yumi.” Serem wetem olgeta from wanem yu stap glad mo hapi se Kraes i bin bon i kam long wol ia. Invaetem ol pikinini blong serem ol filing blong olgeta abaot Sevya.
-
Singsing tugeta wan singsing abaot taem we Jisas i bon long hem “Away in a Manger” (Children’s Songbook, 42–43) o “Hark! The Herald Angels Sing” (Hymns, no. 209). Helpem ol pikinini blong faenemaot ol sentens long singsing ia we i tijim yumi abaot Sevya mo ol blesing we kasem from Hem.
Tijim Doktrin: Ol Bigfala Pikinini
OlTesteman i tijim mi abaot Jisas Kraes, Mesaea we God i promesem.
OlTesteman i no wan koleksen blong ol stori mo ol raeting we i pulum intres blong man; be stamba tingting, olsem long evri skripja, i testifae abaot Jisas Kraes. Helpem ol pikinini blong lanem olsem wanem blong faenem Hem insaed long OlTesteman.
Samfala Aktiviti we Yu Save Mekem
-
Invaetem ol pikinini blong mekem wan lis blong evri nem mo ol taetol blong Jisas Kraes we oli save faenem insaed long Moses 7:53; Ol Sam 23:1; Job 19:25; Aesea 7:14; 9:6; 12:2; Amos 4:13; mo Sakaraea 14:16. Letem olgeta oli wok tutu, sapos oli wantem. Invaetem olgeta blong serem lis blong olgeta wetem wanwan long olgeta. ?Wanem nao yumi lanem abaot Sevya aot long wanwan nem mo taetol ia?
-
Soem long ol pikinini sam Krismes dekoresen (o ol pikja blong sam long ol samting ia) olsem wan sta, ol laet o wan presen. Askem ol pikinini olsem wanem wanwan long ol samting ia i save rimaenem yumi abaot Sevya. Eksplenem se oltaem yusum ol skripja olsem ol saen o simbol blong tijim yumi abaot Jisas Kraes. Invaetem ol pikinini blong luklukgud long wan o moa long ol ves ia blong faenem wan samting we i minim Jisas Kraes: Jenesis 22:8; Eksodas 17:6; Ol Sam 18:2; 27:1 (luk long aotlaen blong wik ia insaed long Kam Folem Mi—Blong Wanwan Man, Woman mo Famli blong gat sam moa eksampol). ?Olsem wanem nao Jisas i olsem wan smol sipsip, wota, ston, ston wol o laet?
-
Long en blong stadi long OlTesteman blong yia ia, invaetem ol pikinini blong serem fevret stori o skripja aot long OlTesteman. ?Wanem nao ol stori mo ol skripja ia oli tijim yumi abaot Jisas Kraes? ?From wanem yumi glad tumas blong gat OlTesteman?
Jisas Kraes I Sevya mo Ridima blong Mi.
Taem yumi selebretem taem we Jisas i bon long hem, yumi save glad tu long laef, sakrifaes blong Hem we i pem praes from sin. ?Olsem wanem nao yu save yusum ol skripja aot long OlTesteman blong helpem ol pikinini blong bildimap fet blong olgeta long Sevya mo Ridima?
Samfala Aktiviti we Yu Save Mekem
-
Ridim tugeta Aesea 7:14; afta, invaetem ol pikinini blong serem wanem oli save abaot taem we Kraes i bon long hem. O soem vidio: “The Nativity” (ChurchofJesusChrist.org), mo invaetem wanwan pikinini blong jusum wan man aot long vidio mo serem olsem wanem man ia i bin filim olsem. Serem testemoni blong yu abaot Sevya, mo invaetem ol pikinini blong mekem semmak.
-
Blong helpem ol pikinini blong andastanem moa wok blong Jisas Kraes olsem Sevya blong yumi, invaetem olgeta blong ridim Aesea 25:8–9; 53:3–5; mo Hosea 13:14. ?Wanem nao ol skripja ia oli tijim yumi abaot olsem wanem Lod i sevem yumi? ?Olsem wanem yumi “save harem gud, yumi save glad, from we hem i sevem yumi”? (Aesea 25:9).
-
Singsing tugeta wan singsing abaot lav blong Jisas Kraes from yumi, olsem “Away in a Manger” (Children’s Songbook, 42–43) o “Mi Sapraes Tumas We Jisas I Lavem Mi” (STSP, p. 22). Invaetem ol pikinini blong serem ol sentens we oli helpem olgeta blong filim lav blong Sevya.
Stap Leftemap Tingting blong Lanem Samting long Hom
Invaetem ol pikinini blong serem wetem ol famli o wan fren blong olgeta wan samting we oli bin lanem abaot Jisas Kraes long OlTesteman. Leftemap tingting blong olgeta blong stadi long Niu Testeman long wik ia.
Stap Kam Antap long Fasin blong Yumi blong Stap Tij
Krietem wan ples we i stap invaetem Spirit. I gat plante wei we yu save invaetem Spirit i kam insaed long klas blong yu. Miusik i save leftemap tingting blong stap kwaet. Taem wan i talemaot lav mo testemoni blong hem, i save mekem se i gat wan ples we filing i kwaet mo oli save filim Spirit. Wetem plante prea, tingting long wanem yu save mekem blong krietem wan ples we Spirit i save stap long hem insaed long klasrum blong yu. (Luk long Teaching in the Savior’s Way,15.)