“Ol Rod blong Hem i No Gat En” (Habakuk 3:6). Long Stat, Toktok I Bin Stap, i kam long Eva Timothy

28 Novemba–4 Disemba

Neham; Habakuk; Sefanaea

“Ol Rod blong Hem Oli No Gat En,”

Yu save stadi long ol skripja blong wan ful laef, mo evri taem yu stadi, bae yu stil faenem sam niu tingting. Yu no filim se yu mas andastanem evri samting naoia nomo. Prea blong yu kasem help blong luksave ol mesej we yu nidim tedei.

Raetemdaon Ol Filing mo Tingting blong Yu

Blong stap ridim OlTesteman, plante taem i minim blong stap ridim ol profesi abaot ol taem we ol samting oli prapa lus evriwan. Plante taem, Lod i bin singaotem ol profet blong oli givim woning long ol nogud man se bae jajmen blong Hem bae i foldaon long olgeta. Ol seves blong Neham, Habakuk, mo Sefanaea, oli ol gudfala eksampol. Wetem plante ditel, ol profet oli bin talemaot finis we ol siti bae oli foldaon, we long tetaem ia, i luk se oli strong mo gat paoa—olgeta siti ia olsem Nineve, Babilon, mo iven Jerusalem. Be, hemia i bin plante taosen yia i pas. ?From wanem hem i impoten tumas blong stap ridim ol profesi ia tedei?

I nomata we ol siti ia we oli gat hae tingting mo oli gat nogud fasin, Lod i bin prapa spolem gud olgeta, fasin ia blong gat hae tingting mo nogud fasin i bin strong i stap. Long wol tedei, samtaem yumi save harem se ol ivel oli raonem yumi, ol ivel ia nao we ol profet bifo oli bin tok strong agensem. Samtaem, bae yumi faenem wan smol pis blong ol samting ia oli stap yet insaed long hat blong yumi bakegen. Ol profesi ia blong OlTesteman oli soemaot olsem wanem Lod i stap filim abaot fasin blong gat hae tingting mo nogud fasin, mo ol profesi ia oli stap tij se yumi save tanem baksaed blong yumi long ol ivel ia. Maet hemia nao i wan risen from wanem, tedei, yumi stap ridim yet olgeta profesi ia blong bifo. Neham, Habakuk, Sefanaea, mo ol narawan, oli no jes ol profet blong tokbaot ol tudak samting—oli bin ol profet blong mekem man i kam fri. Ol raeting ia we oli tokbaot ol nogud taem ia, oli no luk strong tumas from i gat ol invitesen blong kam long Kraes, mo kasem sore blong Hem. I gat ol toktok ia we i talem blong faenemaot Lod, mo lukaotem stret mo gud fasin, blong lukaotem blong gat fasin blong no stap flas (Sefanaea 2:3). Hemia i bin wei we Lod i mekem long man long taem bifo, mo hem i stil wei blong Hem tedei. “[Ol rod blong Hem, oli no save lus]” (Habakuk 3:6).

Blong gat wan bigfala lukluk long Ol Buk ia, luk long “Neham,” “Habakuk,” mo “Sefanaea” long Gaed long Ol Skripja.

Ol Aedia blong Skripja Stadi blong Yuwan

Neham 1

Lod i gat tufala samting ia: Hem i gat paoa mo Hem i gat sore.

Misin blong Neham, hem i blong talemaot fastaem se Nineve bae i lus evriwan—Nineve i kapitol siti blong bigfala nogud rul blong Asiria, we i bin mekem se Isrel i seraot mo go olbaot, mo i mekem nogud long Juda. Neham i stat blong tokbaot nogud kros blong God, mo paoa blong Hem we i no gat samting blong komperem wetem; be tu, Hem i tokbaot sore mo gud fasin blong God. Bae yu save tingting blong faenemaot ol ves, insaed long japta 1 we oli helpem yu blong andastanem wanwan long ol fasin ia—mo ol nara fasin blong God we yu bin luk. ?From wanem nao, long tingting blong yu, i impoten blong save wanwan long ol samting ia abaot Lod?

Sam bae oli faenem i had blong joenem tijing ia long skripja se “Hae God i gud tumas,” (Neham 1:7) wetem tijing ia we i talem se, bambae “Hem i kros we i kros, mo bambae i givim panis long olgeta we oli stap agens long hem” (Neham 1:2). Insaed long Buk blong Momon, boe blong Alma, Korianton, i bin gat ol semmak kwestin “we hem i long saed blong jastis blong God long fasin blong panisim ol man blong sin” (Alma 42:1). Blong lanem moa abaot sore blong God mo olsem wanem i go wetem jastis blong Hem, ridim ansa blong Alma i go long Korianton we i stap long Alma 42.

“Hae God i gud tumas. Taem ol man blong hem oli stap long trabol, hem i save lukaot gud long olgeta.” (Neham 1:7).

Habakuk

Mi save trastem tingting mo taem blong Lod.

Iven ol profet, samtaem, oli gat ol kwestin abaot ol wei blong Lod. Habakuk, we i bin laef long wan taem we nogud fasin i stap goraon bigwan long Juda, i stat blong raetemdaon ol kwestin blong hem i go long Lod (luk long Habakuk 1:1–4). ?Olsem wanem nao bae yu talemsot ol wari ia blong Habakuk? ?Yu yu bin gat ol semmak filing olsem?

Lod i bin ansabak long ol kwestin blong Habakuk taem Hem i bin talem se bambae Hem i sendem Ol Man Koldia (Ol Man Babilonia) blong i panisim Juda (luk long Habakuk 1:5–11). Be tingting blong Habakuk i trabol yet, from i luk se i no stret blong Lod i stanap i stap nomo “Taem oli [Babilonia] stap kilim ol man we fasin blong olgeta i stret lelebet [Juda], oli winim olgeta” (luk long ol ves 12–17). ?Wanem nao yu faenem long Habakuk 2:1–4 we i givim insperesen long yu blong yu trastem Lod taem yu no gat ansa long ol kwestin blong yu?

Japta 3 long Buk blong Habakuk i wan prea blong presem God, mo i wan wei blong talemaot bilif long Hem. ?Wanem i tajem yu moa long ol toktok blong Habakuk we oli stap long ol ves 17–19? ?Olsem wanem nao saon blong ol ves ia oli defren long olgeta long Habakuk 1:1–4? Tingting hevi long olsem wanem yu save developem moa bigfala fet long God, iven taem we yu luk se laef i no mekem gud long yu.

Luk tu long Hibrus 10:32–39; 11; Doktrin mo Ol Kavenan 121:1–6; Robert D. Hales, “Waiting upon the Lord: Thy Will Be Done,” Liahona, Nov. 2011, 71–74.

Sefanaea

“Yufala long ples ya, we tingting blong yufala i stap daon, mo oltaem yufala i stap obei long ol tok blong Hae God, i gud yufala i stap prea long hem.”

Sefanaea i talem profesi se ol pipol blong Juda bae oli prapa lus evriwan long han blong Ol Man Babilonia from ol nogud fasin blong olgeta. “Hae God i talem se: Olgeta samting we i stap long wol ya, mi bambae mi spolem olgeta evriwan.” (Sefanaea 1:2). Be yet, Sefanaea i bin talem tu se bae “[wan smol haf] we bae i laef i stap” bae God i holemtaet olgeta (Sefanaea 3:13). Taem yu stap ridim olgeta profesi ia, teknot long ol kaen fasin mo aksen we i bin lidim Juda mo ol nara grup blong God i prapa spolem gud olgeta—speseli, lukluk long Sefanaea 1:4–6,12; 2:8, 10,15; 3:1–4. Afta, yu lukluk long ol fasin blong ol pipol we God bae i holemtaet olgeta oli laef i stap luk long Sefanaea 2:1–3; 3:12–13, 18–19. ?Wanem mesej nao yu yu harem se Lod i stap talem long yu long ol ves ia?

Sefanaea 3:14–20 i tokbaot glad ia we ol stret mo gud pipol oli bin gat, hemia afta we Lod “i tekemaot ol enemi blong olgeta finis” (ves 15). Long ol ves ia, ?wanem promes blesing nao yu filim se i stret long yuwan? ?From wanem hem i impoten, long yu, blong yu save abaot ol blesing ia? Yu save komperem ol ves ia wetem ol eksperiens we oli tokbaot long 3 Nifae 17 mo tingting hevi long wei we Jisas Kraes i bin filim abaot ol pipol blong Hem—we i tekem yu tu.

Ol Aedia blong Famli Skripja Stadi mo Haos Naet

Neham 1:7.?Olsem wanem nao Sevya i olsem “wan sef ples … blong stap strong”? Maet famli blong yu i save bildim wan strong fanis, o strong fanis ston wol insaed long hom blong yufala, mo toktok raon long Neham 1:7 taem oli stap insaed long hem. ?Wanem i mekem se taem blong yumi, i wan taem blong trabol? ?Olsem wanem Jisas Kraes mo gospel blong Hem i mekem yumi gat moa paoa mo kam strong moa? ?Olsem wanem nao bae yumi soemaot we yumi “trastem hem”?

Habakuk 2:14.?Olsem wanem yumi save help blong mekem profesi long ves ia i hapen?

Habakuk 3:17–19.?Wanem nao yumi save lanem aot long eksampol blong Habakuk long ol ves ia?

Sefanaea 2:3.Yu save plei wan gem, we insaed long hem, ol memba blong famli oli mas faenem ol toktok ia “stret mo gud fasin”, mo “no stap flas” oli stap long wan pej wetem plante moa nara toktok. Afta, oli save tokbaot ol eksampol blong stret mo gud fasin mo no stap flas we oli bin luk long wanwan long olgeta. ?Hem i minim wanem blong stap wantem faenem stret mo gud fasin mo fasin blong no stap flas?

Sefanaea 3:14–20.?Wanem nao yumi faenem long Sefanaea 3:14–20 we i mekem se yumi wantem “singsingaot, “mas glad” wetem ful hat”? Maet famli blong yu i save singsing ol hym o ol singsing we oli kam long maen taem oli stap ridim olgeta ves ia.

Blong gat moa tingting blong stap tijim ol pikinini, luk long aotlaen blong wik ia, long Kam Folem Mi—Blong Praemeri.

Wan singsing: “Seek the Lord Early,” Children’s Songbook,108.

Stap Kam Antap long Stadi blong Yuwan

Gat fasin blong save wet longtaem. Samtaem, yumi wantem ol ansa blong ol kwestin blong yumi oli kam kwiktaem, be ol niu tingting long spirit oli tekem taem blong kam mo yumi no save fos blong oli kam. Olsem we Lod i bin talem long Habakuk: “Maet yu luk se i tektaem tumas blong kam, be bambae i mas kamtru long stret taem blong hem, mo yu yu mas wet long hem.” (Habakuk 2:3).

“Hae God i God blong yufala, mo hem i stap wetem yufala. Paoa blong hem i stap mekem yufala i win” (Sefanaea 3:17). Hem I Kam Bakegen blong Rul mo Kam King, i kam long Mary R. Sauer