“31 Oktoba–6 Novemba. Daniel 1–6: ‘I No Gat Wan Narafala God Nating we I Save Sevem Man Olsem God Ya,’” Kam Folem Mi—Blong Praemeri: OlTesteman 2022 (2021)
“31 Oktoba–6 Novemba. Daniel 1–6,” Kam Folem Mi—Blong Praemeri: 2022
Daniel I Talem Mining blong Drim blong Nebukadnesa, i kam long Grant Romney Clawson
31 Oktoba–6 Novemba
Daniel 1–6
“I No Gat Wan Narafala God Nating we I Save Sevem Man Olsem God Ya”
Taem bae yu ridim Daniel 1–6, tekem not long ol trutok we yu filim blong helpem long pikinini blong faenemaot.
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Soem ol pikja blong ol samting we oli hapen insaed long Daniel 1–6 (luk long aotlaen blong wik ia insaed long Kam Folem Mi—Blong Wanwan Man, Woman mo Famli o Gospel Art Buk, ol namba 23, 24, 25, 26). Askem ol pikinini blong serem wanem oli save abaot ol samting we i stap long ol pikja ia. Invaetem olgeta blong serem wan taem we oli bin jusum blong folem Sevya, olsem Daniel mo fren blong hem, oli bin mekem.
Tijim Doktrin: Ol Smol Pikinini
Papa long Heven bae i wantem mi blong lukaotem gud bodi blong mi.
Daniel mo ol fren blong hem i no akseptem blong kakae mit mo drink waen we king i givim long tufala, from se tufala i wantem blong folem ol komanmen blong God, mo blong no spolem bodi blong tufala. Tedei, Tok blong Waes i helpem yumi blong no tekem ol samting we oli save spolem bodi blong yumi.
Samfala Aktiviti we Yu Save Mekem
-
Serem wetem ol pikinini “Daniel mo Ol Fren blong Hem” (insaed long Ol Stori long OlTesteman), o talem long wan sot toktok wanem we i stap long Daniel 1:1–17. Invaetem ol pikinini blong aktem stori ia. Helpem olgeta blong andastanem olsem wanem Lod i blesem Daniel mo ol fren blong hem blong jusum blong obei long Hem (luk long ves 17). ?Wanem nao ol blesing we yumi stap kasem long Lod, taem yumi jusum blong mekem raet samting?
-
Soem long ol pikinini, ol pikja blong ol samting we Tok blong Waes i tijim yumi blong kakae o yusum, mo ol samting we hem i talem long yumi blong no kakae o yusum (luk long Doktrin mo Ol Kavenan 89). Invaetem ol pikinini blong priten blong kakae ol gudfala samting, mo blong talem no long ol nogud samting. Testifae se Lod i blesem yumi taem yumi lukaotem gud bodi blong yumi. Singsing tugeta wan singsing abaot fasin blong stap lukaotem gud bodi blong yumi, olsem “The Lord Gave Me a Temple” o “The Word of Wisdom” (Children’s Songbook, 153, 154–55). ?Wanem nao singsing ia i tijim yumi long hem?
Pikja blong Daniel mo ol fren blong hem we oli no akseptem kaekae we i kam long Brian Call
God bae i blesem mi taem mi jusum blong folem Jisas Kraes.
Buk blong Daniel, insaed i gat ol stori blong ol pipol we oli bin jusum blong folem ol komanmen blong God, nomata se i had blong mekem. ?Olsem wanem nao bae yu helpem ol pikinini blong lanem samting aot long ol eksampol ia?
Samfala Aktiviti we Yu Save Mekem
-
Faenem ol pikja blong ol stori long Daniel 1, 3, mo6 (luk long aktiviti pej blong wik ia, aotlaen blong wik ia insaed Kam Folem Mi—Blong Wanwan Man, Woman mo Famli, o Gospel Art Buk, ol namba 23, 25, 26). Putum ol pikja long bod o long floa; putum saed we i gat pikja i fesem bod o floa. Invaetem wan pikinini blong tanem wan long ol pikja ia, mo helpem hem blong talem stori we pikja ia i ripresentem. (Blong kasem help, luk long “Daniel mo Ol Fren blong Hem,” “Sadrak, Mesak, mo Abednego,” mo “Daniel mo Hol blong Laeon” insaed long Ol Stori long OlTesteman.) Afta long wanwan stori, toktok raon long ol kwestin olsem hemia: ?Wanem nao ol pipol oli mekem blong folem Lod? ?Olsem wanem nao Lod i bin blesem olgeta? Serem wetem olgeta, olsem yu bin kasem blesing from yu stap jusum blong folem Jisas Kraes. Askem ol pikinini blong serem ol eksperiens blong olgeta.
-
Invaetem ol pikinini blong aktem ol situesen long taem we oli save soem fet blong olgeta long God, taem oli stap obei ol komanmen blong Hem. Oli mekem hemia taem oli stap soem kaen fasin long ol brata mo sista blong olgeta, taem oli tokbaot Sevya long wan, o taem oli stap prea evri naet. Soem wan pikja blong Sadrak, Mesak mo Abednego insaed long bigfala oven blong faea (luk long Gospel Art Buk, namba 25), mo askem ol pipol blong kaontem ol man insaed long bigfala oven blong faea ia. Ridim Daniel 3:24–25 blong faenemaot huia bakegen i bin stap insaed long bigfala oven blong faea. Serem testemoni blong yu se Lod i stap wetem yumi, taem yumi folem Hem.
Papa long Heven i wantem mi blong prea oltaem.
Daniel i akseptem blong putum laef blong hem long denja, taem hem i stap prea long Papa long Heven evri dei, nomata oli bin blokem blong man i prea. ?Olsem wanem nao yu save helpem ol pikinini blong developem wan kaen filing olsem blong prea?
Samfala Aktiviti we Yu Save Mekem
-
Talem stori insaed long Daniel 6 (luk long “Daniel mo Hol blong Laeon” insaed long Ol Stori long OlTesteman), mo invaetem ol pikinini blong droem wan pikja abaot stori ia. Askem olgeta blong yusum ol pikja blong talem stori long wanwan long olgeta. ?From wanem nao Papa long Heven i wantem yumi blong prea long Hem? Serem from wanem prea i impoten long yu.
-
Toktok long ol pikinini abaot ol taem we oli save prea, olsem long taem we oli fraet, mo taem oli mekem ol mistek o taem oli nidim help long skul. ?From wanem i gud blong prea long ol situesen olsem? Tijim ol pikinini se nomata long ples we oli stap long hem, oli save prea oltaem long hat blong olgeta.
-
Singsing tugeta wan singsing abaot prea, olsem “We Bow Our Heads” (Children’s Songbook,25). Toktok long ol pikinini abaot ol samting we yumi save prea from.
Tijim Doktrin: Ol Bigfala Pikinini
Mi save mekem wanem i raet iven sapos i had blong mekem.
Ol stori long Daniel1, 3, mo6 i save givim long ol pikinini we yu tijim, wan strong paoa long tingting mo fet ia blong mekem ol gudfala joes, iven taem oli filim se oli stap olgetawan.
Samfala Aktiviti we Yu Save Mekem
-
Droem sam aro we oli stap poen i go long semmak daereksen, mo afta, wan narafala aro i stap poen i go long wan narafala daereksen. ?Olsem wanem nao, Daniel mo ol fren blong hem oli semmak olsem wan aro ia we i poenem narafala daereksen? Invaetem ol pikinini blong givim ol eksampol aot long ol stori insaed long Daniel 1, 3, mo6 (luk long “Daniel mo Ol Fren blong Hem,” “Sadrak, Mesak, mo Abednego,” mo “Daniel mo Hol blong Laeon” insaed long Ol Stori long OlTesteman). Askem ol pikinini se from wanem oli ting se i had blong Daniel mo ol fren blong hem blong mekem ol gudfala joes. ?Olsem wanem nao Lod i blesem olgeta taem oli stap jusum blong mekem raet samting?
-
?Helpem ol pikinini blong tingting long ol situesen taem we maet oli fosem olgeta blong mekem wan rong joes. Invaetem ol pikinini blong serem ol eksperiens blong taem we oli bin kasem blesing blong stap jusum blong raet nomata sapos i had. Singsing tugeta wan singsing we i go wetem topik ia, olsem “Choose the Right” (Hymns, no.239).
Jos Ia blong Jisas Kraes blong Ol Lata-dei Sent i kingdom blong God long wol ia.
Taem Daniel i givim mining blong drim blong Nebukadnesa we i kam wetem insperesen, hem i luk wan ston “we i kamaot hem wan antap long wan bigfala hil” (Daniel 2:45). Ston ia i ripresentem Jos Ia blong Jisas Kraes blong Ol Lata-dei Sent i kingdom blong God long wol ia, we i kam blong fulumap wol.
Samfala Aktiviti we Yu Save Mekem
-
Ridim Daniel 2:31–35, 44–45 wetem ol pikinini, mo invaetem olgeta blong droem wan pikja blong wanem we Nebukadnesa i bin luk long drim blong hem. Askem ol pikinini wanem oli lanem aot long ol ves ia abaot ston long drim. Eksplenem se ston ia i ripresentem Jos Ia blong Jisas Kraes blong Ol Lata-dei Sent. Askem ol pikinini blong talem nem blong sam samting we Papa long Heven i mekem blong setemap Jos blong Hem long ol las dei ia. Blong givim ol aedia long olgeta, soem ol pikja blong ol samting we i hapen long taem blong Restoresen blong Jos (luk long Gospel Art Buk, ol namba 90–95).
-
Givim long wanwan pikinini wan pis pepa we i oli skwisim mo i rafraf blong ripresentem ston long drim blong Nebukadnesa. Askem wanwan pikinini blong serem olsem wanem hem i save se God i putumbak Jos blong Hem. Taem we ol pikinini oli serem wanem we oli gat, invaetem olgeta blong givim ol “ston” blong olgeta long yu. Skwisim ol pepa ston blong olgeta tugeta mo skojem blong mekem wan bigfala ston. Testifae se, taem yumi mekem ol testemoni blong yumi i kam strong moa, mo taem yumi stap serem gospel long ol narafala man, yumi yunaetem fet blong yumi blong help bildimap kingdom blong God blong “[i fulumap] ful wol ia” (Daniel 2:35).
Stap Leftemap Tingting blong Lanem Samting long Hom
Invaetem ol pikinini blong mekem wan samting long wik ia we i soem fet blong olgeta long Jisas Kraes.
Stap Kam Antap long Fasin blong Yumi blong Stap Tij
Helpem ol pikinini blong luksave Spirit. Taem yu gat ol eksperiens long saed blong spirit wetem ol pikinini, helpem olgeta blong luksave Tabu Spirit we i lidim tingting blong yumi.