“Sadrak, Mesak, mo Abednego,” Ol Stori long OlTesteman (2022)
“Sadrak, Mesak, mo Abednego,” Ol Stori long OlTesteman
Daniel 1; 3
Sadrak, Mesak, mo Abednego
Wan tes blong fet we i fulap long denja
King Nebukadnesa i bildim wan bigfala statiu blong gol mo i fosem ol pipol blong hem blong wosipim statiu ia. Sapos oli no wantem, bae oli putum olgeta long wan hot ples blong faea.
Ol fren blong Daniel, Sadrak, Mesak, mo Abednego oli lavem God mo oli no wantem wosipim giaman god blong king. King i kros long olgeta.
Ol trifala fren ia oli talem long king se bae oli wosipim God nomo. Oli bilivim se God bae i protektem olgeta. Be iven sapos Hem i no sevem olgeta, bae oli stanap strong long wanem we oli biliv long hem.
King i kros tumas long Sadrak, Mesak, mo Abednego. Hem i mekem oli sakem olgeta i go long hot ples blong faea. Be taem king i lukluk i go insaed long hot ples blong faea ia, hem i sapraes blong luk wan man blong heven we i stap insaed long faea wetem ol tri man ia. Faea i no bonem olgeta.
King i singaotem Sadrak, Mesak, mo Abednego mo oli wokbaot i kamaot long hot ples blong faea ia. Faea i no mekem olgeta i harem nogud o iven bonem ol klos blong olgeta.
Sadrak, Mesak, mo Abednego oli obei long ol komanmen blong God, iven taem we laef blong olgeta i stap long denja. Eksampol blong olgeta i helpem king blong biliv long God.