“Profet Inok,” Ol Stori long OlTesteman (2022)
“Profet Inok,” Ol Stori long OlTesteman
Jenesis 5; Moses 6–7
Profet Inok
Olsem wanem fet long Lod i sevem wan siti
Lod Jisas Kraes i bin askem Inok blong talem long ol pipol blong sakem sin. Be Inok i ting se hem i no save toktok gud tumas. Hem i fraet se bae ol pipol i no lisin long hem.
Lod i promesem blong mekem Inok i kam moa strong mo protektem hem nomata we sam pipol oli no laekem wanem Inok i stap tijim.
Promes blong Lod i givim strong tingting long Inok. Inok i obei long Lod mo i tijim ol pipol wetem paoa. Hem i tij abaot Jisas Kraes, fasin blong sakem sin, baptaes, mo Tabu Spirit. Sam pipol oli bilivim Inok mo oli wantem folem Lod.
Inok i gat raet we i kam long God blong i baptaes. Evri pipol we oli bilivim Inok, oli kasem baptaes mo oli kam moa kolosap long Lod. I no gat wan i pua from se oli lukaot long olgeta wanwan. Oli singaotem olgeta Saeon, from se oli laef tugeta long lav mo fasin we i stret mo gud.
Wan dei, Lod i soem evri samting we bae i hapen long wol ia, long Inok long wan visen. Inok i bin luk laef, ded, mo Laef Bakegen long Ded blong Jisas Kraes. Inok i lanem se, long ol las dei, gospel bae i kambak bakegen long wol ia. Hem i bin luk Seken Kaming blong Jisas tu.
Long en, evri pipol long siti blong Saeon oli biliv long Inok mo oli sakem sin. From se oli lukaot long wanwan long olgeta mo laef long pis, Lod i tekem olgeta blong go laef wetem Hem.