2 King 22; 2 Kronikel 34–35

King Josaea

Wan faet blong stap obei long ol komanmen blong Lod

Josaea i eit yia taem we hem i kam king blong Juda. Hem i bin wan gudfala king we i lavem Lod. Hem i bin wantem blong helpem ol pipol blong hem, Ol Man blong Isrel, blong oli obei long Lod, mo blong oli stop blong stap wosipim ol aedol. Taem hem i kam bigwan, hem mo ol pipol blong hem oli stap blong fiksim tempol mo oli mekem tempol i naes bakegen.

2 King 22:1–2; 2 Kronikel 34:3–7

Taem we ol pipol oli bin stap wok long tempol, Hilkia, we i hae pris, i faenem buk blong loa, wan rol we insaed long hem, i gat ol skripja i stap.

2 King 22:3–9

Wan wokman i ridim buk long Josaea. Josaea i harem ol toktok mo i no glad from se ol pipol blong hem oli no bin lisin long Lod. Hem i terem ol klos blong hem blong soem se hem i stap harem nogud.

2 King 22:10–13, 19

Hem i talem long Hilkia blong askem long Lod se wanem nao bae oli mas mekem. Hilkia mo ol wokman blong king oli go visitim Hulda. Hem i wan woman we i profet, wan fetful lida we Lod i stap givim insperesen long hem. Hulda i talem se Lod i glad wetem Josaea from hem i stap helpem ol pipol blong oli stap obei. Lod i promesem se King Josaea bae i laef long pis.

2 King 22:12–20

King Josaea i bin wantem blong ol pipol blong hem oli kipim ol promes blong olgeta we oli mekem long Lod. Hem i askem olgeta blong selebretem Pasova blong helpem olgeta blong oli tingbaot olsem wanem Lod i bin mekem Ol Man blong Isrel oli kam fri, longtaem finis i pas long Ijip.

2 Kronikel 35:1–19