Jenesis 6–9; Moses 8

Noa mo Famli blong Hem

Wan bigfala sip, wan bigfala wota we i kavremap graon, mo ol promes blong Lod

Noa mo famli blong hem i obei long Lod. Evri nara pipol oli fulap long rabis fasin. Lod i talem long Noa se bae wan bigfala wota i kavremap ful wol ia sapos ol pipol oli no sakem sin.

Jenesis 6:5–13; Moses 8:13–17

Noa i tijim ol pipol se Lod i lavem olgeta mo i wantem olgeta blong sakem sin mo gat fet long Jisas Kraes. Oli no wantem lisin.

Moses 8:19–30

Noa i harem nogud se ol pipol oli no wantem sakem sin. Lod i talem long Noa blong bildim wan bigfala sip we oli singaotem wan ak. Ak ia bae i kipim Noa mo famli blong hem i sef long taem blong bigfala wota ia we i kavremap graon.

Jenesis 6:14–18; Moses 8:25

Famli blong Noa i karem kaekae i kam long ak. Lod i sendem tu animol blong evri kaen i go long Noa. Ol animol oli go insaed long ak, mo afta long seven dei, i stat blong ren.

Jenesis 6:18–22; 7:1–9

Olsem we Lod i bin givim woning, i bin ren blong 40 dei mo 40 naet. Wan bigfala wota i kavremap wol ia.

Jenesis 7:6–23

Famli blong Noa mo evri animol insaed long ak oli flot sef long wota.

Jenesis 7:24; 8:1–3

Taem bigfala wota we i kavremap graon i finis, ak i sidaon i stap long drae graon. Noa mo famli blong hem oli bildim wan olta blong wosipim Lod mo talem tangkyu long Hem blong protektem olgeta. Lod i promes blong neva mekem bigfala wota i kavremap wol bakegen. Hem i sendem wan renbo olsem wan rimaenda blong promes blong Hem.

Jenesis 8:13–22; 9:8–17