“Ebraham mo Sarae,” Ol Stori long OlTesteman (2021)
“Ebraham mo Sarae,” Ol Stori long OlTesteman
Jenesis 11–15; 17; Ebraham 1–2
Ebraham mo Sarae
Wan promes blong blesem famli blong man
Ebraham i bin stap laef long siti blong Uru. Ol rabis pris longwe oli wantem sakrifaesem hem i go long ol aedol blong olgeta. Ebraham i bin prea mo Lod i bin sevem hem.
Afta, Lod i givim oda long Ebraham mo waef blong hem, Sarae, blong tufala i aot long Uru mo travel i go long wan graon longwe longwe. Hem i promes se bae Hem i blesem tufala long rod blong tufala.
Ebraham mo Sarae i bin trastem Lod, mo tufala i aot long Uru. Be tufala i bin harem nogud from tufala i no save gat ol pikinini. Lod i bin kamfotem tufala. Hem i promes long tufala se bae tufala i gat wan pikinini.
Jenesis 11:30–31; 15:1–6; 17:2–16; Ebraham 2:6–9
Ebraham i bin prea long Lod blong lanem moa abaot Hem. Lod i visitim Ebraham mo i talem se Hem, Lod, nem blong nem i Jehova. Jehova i bin mekem wan kavenan wetem Ebraham. Hem i bin promesem Ebraham se bae hem i gat prishud. Hem i promesem tu se, tru long famli blong Ebraham, evri famli blong wol ia bae i kasem blesing.
Taem Ebraham mo Sarae i stap wokbaot, oli bin nidim blong faenem kaekae. Oli traem blong laef long wan graon we oli singaotem Kenan. I no bin gat kaekae longwe, mekem se oli mas go long Ijip. Be oli stap long denja taem oli stap laef long Ijip.
Jenesis 12:10–20; Ebraham 2:21–25
Ebraham mo Sarae i aot long Ijip mo gobak blong laef long Kenan. Oli karem kaekae mo ol animol we oli stap long Ijip, i go wetem tufala. Kenan i pat blong graon we Lod i bin promesem long olgeta.
Jenesis 13:1–4, 12; Ebraham 2:19
Lod i bin kipim promes blong Hem tu, se Ebraham bae i kasem prishud. Wan dei, Ebraham mo Sarae i mitim wan king we i stret mo gud we nem blong hem Melkesedek. Ebraham i pem taeting i go long hem.
Ebraham i kasem prishud tru long Melkesedek. Hemia i semmak prishud we tufala profet ia, Adam, mo Noa, tufala i bin kasem.
Josef Smit Translesen, Jenesis 14:36–40; Ebraham 1:2–4; Doktrin mo Ol Kavenan 84:14
Ebraham mo Sarae oli bin hapi long Kenan, be yet, tufala i wari from tufala i no gat wan pikinini. Oli bin trastem promes blong Lod se, wan dei, bae famli blong tufala i gro i kam bigwan mo blesem ful wol.