Esta 2–5; 7–9

Kwin Esta

No fraet long wan taem blong denja

Oli singaotem sam Ol Man Isrel oli Ol Man Jiu. Esta hem i wan Jiu we i bin stap laef long Pesia. Papa mo mama blong hem i ded mekem se kasen blong hem, Modekae i lukaot long hem. Oli invaetem hem wetem ol nara woman insaed long kingdom blong go long haos blong king. King i bin wantem wan niu kwin, mo hem i jusum Esta.

Esta 2:2–7, 16–17 

King i gat wan wokman we nem blong hem Haman, we i bin gro mo gat bigfala paoa. Haman i helpem king blong rul long graon. King i mekem evriwan i bodaon long Haman.

Esta 3:1–2 

Be Modekae i no wantem bodaon long Haman. Modekae i wantem bodaon long Lod nomo. Hemia i mekem Haman i kros. Hem i wantem blong panisim Modekae mo evri Jiu.

Eksodas 20:5; Esta 3:5–6, 8

Haman i talem long king se Ol Man Jiu oli no stap folem ol loa blong king. Mekem se king i letem Haman blong mekem wan niu loa: long wan dei we oli putum, bae oli kilim evri Jiu.

Esta 3:8–11, 13 

Modekae i askem Esta blong i toktok long king. King i save jenisim loa blong Haman mo sevem ol Jiu. Be Esta i fraet. Samtaem king i stap kilim ol pipol we oli kam blong toktok long hem, be hem i no invaetem olgeta.

Esta 4:5–11

Modekae i askem Esta blong i tingbaot Ol Man Jiu we bae oli kilimded olgeta. Modekae i talem se maet Lod i putum Esta long haos blong king blong sevem ol Jiu.

Esta 4:13–14

Esta i save se hem i mas toktok long king, iven sapos hemia i minim se bae oli kilim hem. Esta i askem evri Jiu mo ol wokman blong hem blong fast wetem hem.

Esta 4:15–16 

Afta we oli fast blong tri dei, Esta i rere long hemwan blong go luk king.

Esta 5:1

Taem Esta i stap wokbaot i go kolosap long king, king i stanemap stik blong king blong hem. Hemia i minim se king i hapi blong luk hem mo bae i no kilim hem. Hem i askem wanem Esta i wantem. Esta i talem long king se ol pipol blong hem oli stap long denja. From loa blong Haman, bae oli kilim ded hem wetem evri Jiu insaed long kingdom.

Esta 5:2–3; 7:4–6

King i kros long Haman mo i mekem oli kilim hem i ded. King i mekem wan niu loa we i protektem ol Jiu. Naoia, oli gat raet blong faet blong protektem olgetawan sapos eni wan i traem blong mekem nogud long olgeta.

Esta 7:9–10; 8:10–11

Fet blong Esta long Lod mo strong paoa long tingting blong toktok long king, i sevem ol pipol blong hem. I nogat ded mo harem nogud, be i gat wan lafet. Ol Jiu oli selebret.

Esta 8:16–17; 9:18–32