“Job,” Ol Stori long OlTesteman (2021)
“Job,” Ol Stori long OlTesteman
Job 1–3; 19; 38–42
Job
Stap Trastem Lav blong Lod
Job i bin wan gudfala man we i lavem Lod mo i kipim ol komanmen blong Hem. Hem mo waef blong hem i gat 10 pikinini, mo hem i gat fulap grup blong ol animol mo hem i rij fulap.
Lod i letem blong oli testem fet blong Job. Job i go tru long ol samting we oli had.
Wan dei, man i stilim fulap animol blong Job. Samtaem afta, wan faea i bonem ful ples blong Job mo i kilim evri wokman mo ol narafala animol blong hem. Afta long hemia, wan strong win i brekem daon haos blong Job. Ol pikinini blong hem oli bin stap insaed mo oli ded evriwan. Job mo waef blong hem i nomo gat samting be gudfala helt blong tufala nomo.
Job mo waef blong hem tufala i harem nogud. Oli lusum evri samting, iven ol pikinini blong tufala. Be Job i gohed blong gat fet long Lod. Hem i no blemem Lod from wanem we i bin hapen.
Afta Job i sik bigwan. Ol bigfala soa blong bodi we i soa tumas i kavremap bodi blong hem. Job mo waef blong tufala i stap tingting se, from wanem evri nogud samting ia i stap hapen.
Lod i toktok long Job mo i soem planet wol ia, ol sta, mo evri samting we i stap laef. Lod i tijim Job wan impoten lesen. Evri samting we oli krietem i blong helpem ol pikinini blong Papa long Heven blong lanem abaot Pikinini blong Hem Jisas Kraes mo blong oli folem Hem.
Job i sakem sin mo i askem Lod blong fogivim hem from hem i gat tu tingting. Hem i bin promes blong gat tras long Lod. Lod i save se Job i lavem Hem. Hem i bin hilim Job mo i bin blesem hem wetem sam moa pikinini, mo tu, i dabolem ol rij samting we hem i bin gat bifo.