“Ami blong Gideon,” Ol Stori long OlTesteman (2022)
“Ami blong Gideon,” Ol Stori long OlTesteman
Ami blong Gideon
Stap gat tras long Lod long taem blong faet
Ol pipol blong Isrel oli kasem blesing blong plante yia. Be afta, oli jusum blong no stap obei long Lod. Blong helpem olgeta blong oli tingbaot Hem, Lod i letem enemi blong olgeta, Ol Man Midian blong oli tekem kaekae mo animol blong olgeta. Ol Man Isrel oli bin hanggri gud, mekem se oli tingbaot Lod mo oli bin prea long Hem blong kasem help.
Gideon i wan man we i kamaot long wan famli we i pua. Lod i sendem wan enjel blong kam singaotem hem blong i mekem Isrel i kam fri. Gideon i bin stap askem hemwan se from wanem Lod i bin jusum hem.
Lod i talem long Gideon blong prapa spolem gud ol ples we Ol Man Isrel oli bin stap wosipim ol giaman god ia long hem. Taem we Gideon i bin obei, ol pipol oli kros bigwan.
Ol Man Isrel oli wantem blong kilimded Gideon. Be papa blong Gideon i winim tingting blong olgeta se bae oli no mekem nogud long hem. Gideon i stap sef i stap.
Gideon i no ting se hem i save mekem Isrel ia kam fri. I gat moa long 135,000 soldia insaed long ami blong Ol Man Midian. Be Lod i givim waes tingting mo paoa long Gideon.
Lod i wantem blong Ol Man Isrel oli save se bae oli save win wetem paoa blong Hem, be i no paoa blong olgetawan. Nomata se Isrel i bin gat 32,000 soldia nomo, Lod i askem Gideon blong sendem hom eni soldia we i fraet. Afta we 22,000 i gohom, i gat 10,000 soldia nomo blong Ol Man Isrel i stap.
Lod i talem se, 10,000 soldia, i wan bigfala namba. Hem i talem long Gideon se bae i tekem ami i go daon long ples blong wota. Olgeta we oli dring stret aot long wota ia wetem maot blong olgeta, bae oli sendem olgeta i gohom. Olgeta we oli yusum han blong olgeta blong dring wota, bae oli save stap. Naoia, i gat 300 man nomo i stap.
Long en, Ol Man Isrel oli rere blong faet. Lod i soem Gideon olsem wanem blong winim Ol Man Midian. Gideon i talem long ami blong hem blong yusum ol bubu mo ol laet blong mekem olgeta oli fraet. Noes mo laet, bae i mekem tingting blong Ol Man Midian i fasfas bigwan, mekem se bae oli stat blong faet agensem olgeta bakegen. Afta, oli singsingaot mo oli ronronwe.
From se Gideon i gat tras long Lod, Ol Man Isrel, we oli 300 man nomo, oli winim bigfala ami blong Ol Man Midian. Lod i mekem ol pipol blong Isrel oli kam fri.