Jenesis 30; 37

Ol Drim blong Josef we Oli Kam Tru long Insperesen

Wan famli i gat hadtaem blong lavlavem wanwan long olgeta

Rejel mo Jekob, tufala i bin prea blong plante yia blong gat wan boe. Lod i bin ansarem prea blong tufala taem we Josef i bon i kam long wol ia. Fevret boe blong Jekob, hem i Josef, mo hem i bin givim wan spesel kot long Josef. Ol 10 bigfala boe blong Josef oli bin jalus.

Jenesis 30:22–24; 37:1–4

Taem Josef i gat samples 17 yia, hem i gat wan drim we i kam tru long insperesen, se hem i stap putum gud tugeta ol sid long garen wetem ol brata blong hem. Bandel sid blong Josef i tolfala i bitim ol narawan. Be ol bandel sid blong ol brata blong hem, oli stap bodaon long bandel sid blong Josef. Taem we Josef i bin talem ol brata blong hem abaot drim ia, oli bin kros long hem.

Jenesis 37:2, 5–8

Afta long hemia, Josef i gat wan nara drim tru long insperesen. Long drim blong hem, san, mun mo 11 sta oli bodaon long hem. Josef i bin talem drim ia long famli blong hem. Drim ia i mekem se i saon olsem se Josef bae i rul ova long famli blong hem. Ol brata blong Josef oli bin kam kros moa long Josef. Oli no bin laekem ol drim blong hem.

Jenesis 37:9–11

Wan dei, ol brata blong Josef oli stap longwe long hom, oli stap fidim ol sipsip. Jekob i sendem Josef blong i jekem olgeta.

Jenesis 37:12–19

Sam long ol brata blong Josef oli bin wantem blong kilimded hem. Oli tekem longfala kot blong Josef mo oli sakem Josef insaed long wan hol.

Jenesis 37:20–24

Taem we Josef i stap insaed long hol ia, ol brata blong hem oli luk sam man oli stap travel i go long Ijip. Ol brata oli disaed blong salem Josef olsem wan slef i go long ol man ia, mo putum praes blong hem i 20 koen silva.

Jenesis 37:25–28

Afta, ol brata blong Josef oli putum blad blong nani long longfala kot blong hem. Ol brata blong Josef oli gobak long papa blong olgeta, Jekob, mo oli soem longfala kot ia long hem. Oli giaman long Jekob, mo oli talem long hem se ol wael animol oli bin kilimded Josef.

Jenesis 37:31–33

Jekob i bin krae from se hem i ting se Josef i ded.

Jenesis 37:32–35

Be Josef i laef nomo i stap. Hem i stap longlongwe long hom, i stap long Ijip, mo i stap olsem wan slef.

Jenesis 37:36