“Bebi Moses,” Ol Stori long OlTesteman (2022)
“Bebi Moses,” Ol OlTesteman Stori
Eksodas 1–2
Bebi Moses
Stap protektem ol fiuja lida blong ol laen blong Isrel
Famli blong Jekob oli kam ol bigbigfala pipol long Ijip. Oli singaotem olgeta ol laen blong Isrel. King blong Ijip, Fero, i bin fraet se wan dei, bae i gat tumas man blong Isrel mo bae oli tekova long Ijip, mekem se hem i mekem Ol Man Isrel oli kam ol slef blong hem.
Fero i givim oda se bae oli mas kilim evri bebi boe blong Ol Man Isrel we oli jes bon. Ol famli long laen blong Isrel oli bin fraet tumas.
Wan mama long laen blong Isrel we nem blong hem Jokebed, i tingting long wan wei blong sevem pikinini boe blong hem we i jes bon. Hem i putum bebi blong hem long wan basket mo haedem basket ia long ol longfala gras blong Nael Reva. Sista blong bebi ia, Miriam i stap lukaotem hem blong kipim hem i sef.
Gel blong Fero i faenem basket ia taem hem i stap swim long reva. Hem i luk bebi ia blong laen blong Isrel we i stap krae, mo hem i wantem blong lukaotem hem olsem pikinini blong hem. Miriam i kam luk gel blong Fero mo i askem sapos hem i save karem wan woman blong laen blong Isrel blong lukaot long bebi.
Miriam i karem mama blong hem, Jokebed, i kam long gel blong Fero. Gel blong Fero i agri blong pem Jokebed blong lukaot long bebi.
Bebi ia blong laen blong Isrel i gro i kam bigwan. Gel blong Fero i lukaotem hem olsem se hem i stret boe blong hem. Hem i putum nem blong hem, Moses.